Seia Tatou Toe Feiloai

Ou uso e ma tuafafine, ua tatou lagonaina savali musuia i nei aso mamalu e lua. Ua ootia o tatou loto ma ua faateleina lo tatou faatuatua a o tatou lagonaina le agaga sa auai ma i tatou i nei sauniga o le konafesi. A o tatou faaiuina, tatou te faafetai i lo tatou Tama Faalelagi mo Ana meaalofa e tele mo i tatou.

Ua siitia i tatou ma musuiaina i musika matagofie na sauniaina i taimi o sauniga. O tatalo sa fofogaina na tatou latalata atili atu ai i le lagi.

Ou te fia faailoa atu se faafetai loloto a le Ekalesia atoa i o tatou Uso sa faamaloloina i lenei konafesi. O le a matou misia i latou. O la latou sao i le galuega a le Alii ua anoanoai tele ma o le a lagonaina i augatupulaga i le lumanai.

Tau ina ia tatou foi atu i o tatou aiga ma se naunautaiga i o tatou loto ia lelei atili i lo le mea sa tatou i ai le tuanai. Ia tatou agalelei atili ma sili ona magafagafa lelei. Ia tatou aapa atu ma le loto fesoasoani, e le na o o tatou lava tagata o le Ekalesia ae faapena foi ia i latou e le o nisi o lo tatou faatuatuaga. A tatou fegalegaleai ma i latou, ia tatou faaali atu i ai lo tatou faaaloalo mo i latou.

O loo i ai i latou o loo tauivi i aso uma ma luitau. Ia tatou faailoa atu ia i latou lo tatou popole, faapea ai ma lo tatou lima fesoasoani. A tatou popole mo le tasi ma le isi, o le a faamanuiaina i tatou.

Ia tatou manatuaina tagata matutua ma i latou ua nofofale ona o gasegase. A tatou faaavanoa se taimi e asiasi atu ai ia i latou, o le a latou iloa e alofagiaina ma faatauaina i latou. Ia tatou mulimuli i le poloaiga e “fesoasoani i e vaivai, sii i luga lima ua tautau i lalo, ma faamalosia tulivae vaivai.”¹

Ia avea i tatou ma ni tagata faamaoni ma amiosa’o, o loo taumafai e faia le mea sa’o i taimi uma ma i tulaga uma. Ia avea i tatou ma ni soo faamaoni o Keriso, o ni faataitaiga o le amiotonu, ia avea ai ma “malamalama o le lalolagi.”²

Ou uso e ma tuafafine, ou te faafetai atu mo a outou tatalo mo a’u. Ua faamalosia e na tatalo a’u ma siitia a’u a o ou taumafai ma lo’u loto atoa ma le malosi e fai le finagalo o le Atua ma auauna atu ia te Ia ma auauna atu ia te outou.

A tatou tuua lenei konafesi, ou te talosagaina faamanuiaga o le lagi i o outou luga taitoatasi. Mo outou o loo malaga ese mai i o outou aiga, tau ina ia outou foi atu ma le saogalemu ma maua o loo sologa lelei mea uma. Ia tatou mafaufau loloto uma i upumoni ua tatou faalogo i ai, ma mafai ai ona fesoasoani ia i tatou ia avea atili ma ni soo totoa i lo le taimi na amatalia ai lenei konafesi.

Seia tatou toe feiloai foi i le isi ono masina, ou te talosagaina faamanuiaga a le Alii i o outou luga, ma luga o i tatou uma lava, ma ou te faia ai i Lona suafa paia—o Iesu Keriso, lo tatou Alii ma le Faaola—amene.