Aws, tus Tswv, Kuv Yuav Coj Raws Li Koj

“Nej cov uas sab sab vim nej ris nra hnyav, nej cia li los cuag kuv, thiab kuv yuav cia nej so.”³

Nej cov uas tsis tau yog mej zeej ntawm lub Koom Txoos yuav txais lo lus caw no los ntawm cov tub txib lub suab thaum lawv nug cov lus hais tias, “Nej puas kam nyeem Phau Ntawv Maumoos? Nej puas kam thov Vajtswv? Nej puas kam mus koom lub koom txoos? Nej puas kam ua raws li Yexus Khetos tus yam ntxwv thiab ua kev cai raus dej los ntawm cov uas tuav txoj cai?”⁴ Hnub no nej yuav teb cov lus caw no li cas?⁵

Kuv thov caw nej los mloog thiab ua raws li zaj lus no thiab hais tias, “Aws, tus Tswv, kuv yuav los cuag Koj!”

Cov tub txib tau qhia Carlos Badiola thiab nws tsev neeg, uas nyob hauv Minas, Uruguay. Vim cov tub txib nug ntau yam lus noog thaum lawv qhia, tsev neeg no caw ib tug neeg uas tsis yog mej zeej nyob hauv lawv zej zog—ib tug ntxhais zoo nkauj hu ua Norma uas muaj 14 xyoo—los pab lawv teb cov lus no. Norma rau rau siab kawm ntawv high school, thiab tab tom kawm txog Phau Ntawv Npainpaum nram tsev kawm ntawv xyoo ntawd, es thaum cov tub txib nug ib lo lus, ces Norma teb. Nws yog ib tug neeg muaj nqi uas nyiam kawm txog txoj moo zoo. Hnub ntawd cov tub txib qhia txog Txoj Lus Txawj Ntse.

Thaum nws rov qab los tsev tom qab cov tub txib qhia nws tas, Norma paub tias nws yuav tsum ua dab tsi. Nws hais rau nws niam hais tias, “Niam, txij no mus lawm, kuv yuav tsis haus kafes nrog mis nyuj lawm. Kuv yuav haus mis nyuj xwb.” Cov lus ntawd qhia tias nws muaj lub siab xav kam ua raws li lo lus caw kom coj raws li Yexus, li cov tub txib tau hais kom nws ua.

Carlos Badiola thiab Norma ob tug puav leej tau ua kev cai raus dej. Tom qab ntawd, Norma niam, txiv, thiab nus thiab viv ncaus kuj ua kev cai raus dej thiab, vim lawv ua raws li Norma tus yam ntxwv. Norma thiab kuv tau loj hlob ua ke hauv lub ceg ntseeg ntawd uas txawm me los muaj hwj chim. Tom qab ntawd, thaum kuv ua tub txiv tas es rov qab los, wb tau sib yuav ua ke ua txij ua nkawm. Kuv yeej ib txwm paub tias nws yuav yooj yim zog coj raws li tus Cawm Seej yog kuv muaj Norma ntawm kuv ib sab.

Ib tug uas yog ib tug mej zeej ntawm lub Koom Txoos thiab tau kam ua li lo lus caw no, rov qab cog lus txhua lis piam thaum nws noj lub cim nco txog.⁶ Ib qho ntawm lo lus cog tseg ntawd yog kom coj raws li tej lus txib; thaum nej ua li no nej hais tias, “Aws, tus Tswv, kuv yuav coj raws li Koj!”⁷

Tus Tswv lo lus caw rau tus nom tswv hluas uas nplua nuj yog “Nrog kuv mus.” Tus txiv neej nplua nuj no ib sim neej tau coj raws li tej lus txib. Thaum nws nug seb nws yuav ua tau dab tsi ntxiv, tus Tswv teb nws nrog ib lo lus meej hais tias: “Los, … nrog kuv mus.”⁸ Txawm li ntawd los, txawm lo lus caw yooj yim hais, nws yeej nyuaj ua li ntawd. Yuav tau mob siab ua—yuav tau txiav txim siab ua thiab ces ua raws li.

Tus yaj saub Nifais caw kom tib neeg xav rau lawv tus kheej thaum nws nug hais tias: “Thiab [Yexus] tau hais rau noob neej hais tias: Nej cia li lawv kuv qab. Yog li ntawd, kuv cov kwv tij uas kuv hlub es, peb puas yuav lawv tau Yexus qab yog hais tias peb tsis xav coj raws li Leej Txiv tej lus txib?”⁹

Txij thaum pib los cov tub txib lub ntsiab lus tau yog lo lus caw kom “los cuag Nws,” kom los mloog Nws lub suab, thiab kom ua raws li Nws lub suab, xwv kom pab tau ntau leej hloov lawv lub neej kom zoo tuaj.

Tsib caug xyoo dhau los cov tub txib nkag hauv kuv txiv lub khw kho moo kom tseg ib lub moo rau kuv txiv kho kom zoo dua. Vim nkawd yog tub txib zoo, nkawd siv lub cib fim ntawd tham nrog kuv txiv thiab kuv niam txog txoj moo zoo. Kuv txiv kam cov tub txib qhia nws, thiab kuv niam kam ua li cov lus lawv hais thiab uas lawv caw kom coj raws li Yexus Khetos. Txij thaum hnub ntawd los rau hnub no, kuv niam tau muaj siab ntseeg mus koom lub Koom Txoos. Nws hais tias, “Awm, tus Tswv, kuv yuav coj raws li Koj!”

Thaum nej mob siab los cuag Nws, nej yuav muaj lub hwj chim ua rau tej nra hnyav hauv nej lub neej tsis hnyav npaum, txawm yog ntawm sab cev nqaij daim ntawv los yog ntawm sab ntsuj plig, thiab nej yuav hloov ua ib tug neeg zoo dua kom yuav pab nej muaj kev zoo siab zog.

Norma thiab kuv tau kam ua ob lo lus caw kom “los cuag kuv” thiab “nrog kuv mus” wb ob leeg tus kheej. Ces, ua ke, wb sib txhawb nqa wb ob leeg, wb thiaj kawm tau kom nrog Nws mus kev.

Thaum peb sib zog thiab mob siab nrhiav Nws thiab lawv Nws qab peb yuav txais cov koob hmoov uas peb xav tau.

Tau muaj li no thaum muaj tus poj niam uas rau siab mus kov tau tus Cawm Seej lub ris tsho¹¹ los yog li thaum muaj tus txiv neej dig muag hu ua Npatimes, uas vim nws rau siab es thiaj muaj qhov txuj ci tseem ceeb tshwm sim hauv nws lub neej.¹² Tus Tswv tau zoo siab kho ob tug neeg no lub cev thiab tus ntsuj plig kom zoo.

Cia li ncav nej txhais tes rau Nws, kov Nws lub ris tsho, kam ua li Nws lo lus caw, hais tias, “Aws, tus Tswv, kuv yuav coj raws li Koj!”—thiab nrog Nws mus kev.

“Los cuag kuv,” “Nrog kuv mus,” thiab “Nrog kuv mus kev” yog tej lus caw uas muaj hwj chim tiag tiag—rau cov uas ua raws li tej ntawd—kom hloov nej lub neej thiab ua rau nej lub siab hloov, ces uas yuav pab nej hais tau tias, “[Kuv] tsis muaj siab xav ua phem ntxiv lawm, tiam sis ua zoo kom tsis tu ncua mus li.”¹³

Vim nej lub siab hloov lawm, nej yuav xav xav pab cov neeg uas tsis muaj zog, pab tsa cov tes uas tsa tsis tau lawm, thiab ua kom cov hauv caug uas qaug zog muaj zog tuaj.¹⁴

Hnub no peb yuav ua tau dab tsi kom “nrog Nws mus kev”?

1. Mob siab xav ua ib tug neeg coj raws Yexus Khetos zoo dua.¹⁵

2. Thov Vajtswv kom nej tau txoj kev xav no xwv kom nej txoj kev ntseeg Nws yuav loj hlob tuaj.¹⁶

3. Kawm tswv yim los ntawm cov vaj lug kub, kom pab nej pom txoj kev thiab pab nej xav hloov nej tus kheej kom zoo dua.¹⁷

4. Txiav txim siab hnub no tias nej yuav ua thiab hais tias, “Aws, tus Tswv, kuv yuav coj raws li Koj!” Txawm nej paub qhov tseeb nws yuav tsis hloov nej lub neej yog tias nej tsis siv txoj kev paub no mus ua dab tsi.¹⁸

5. Rau siab ua li nej tau txiav txim siab ua thiab niaj hnub ua raws li tej ntsiab cai no.¹⁹

Cia tus yaj saub uas peb hlub, Thawj Tswj Hwm Thomas S. Monson, cov lus pab txhawb nqa peb mus ua raws li peb txoj kev xav kam ua tus Cawm Seej lo lus caw. Thawj Tswj Hwm Monson hais tias: “Leej twg yog tus Vaj Ntxwv ntawm yeeb koob, tus Tswv rau txhua tus tswv? Nws yog peb tus Xib Hwb. Nws yog peb tus Cawm Seej. Nws yog Vajtswv Leej Tub. Nws yog tus uas muab kev cawm dim rau peb. Nws hu hais tias, ‘Cia li nrog kuv mus.’ Nws txib hais tias, ‘Cia li mus ua ib yam li ntawd.’ Nws taij thov peb hais tias, “Ua raws li kuv cov lus txib.’”²⁰

Cia peb txiav txim siab kom peb teev tiam Vajtswv zoo dua thiab rau siab ua li ntawd tshaj, thiab cia peb teb Nws lo lus caw nrov nrov thiab meej meej hais tias: “Aws, tus Tswv, kuv yuav coj raws li Koj!”²¹ Los ntawm tus Tswv Yexus Khetos lub npe dawb ceev, a-mees.