Txi Txiv, Huaj Vam, thiab Kav lub Ntiaj Teb

Ib feem tseem ceeb ntawm kev txi txiv uas tib neeg tsis tshua nco qab txog yog qhov uas peb yuav tsum ua kom muaj Vajtswv lub nceeg vaj nyob hauv lub ntiaj teb. Tus Cawm Seej qhia hais tias:

“Kuv yog tsob hmab, nej yog cov ceg. Tus uas txuas rau ntawm kuv, thiab kuv txuas rau ntawm nws, tus ntawd yuav txi txiv ncw; yog nej tsis txuas rau ntawm kuv, nej yeej ua tsis tau ib yam dab tsi li. …

“Yog nej txuas rau ntawm kuv thiab nej khaws kuv tej lus cia rau nruab siab lawm, nej xav yuav yam twg, nej cia li thov nej yuav tau yam ntawd.

“Yog nej txi txiv ncw, kuv Txiv yuav tau ntsej muag, thiab yog nej ua li ntawd, nej yuav tau ua kuv cov thwj tim.”²

Peb txi txiv thaum peb koom nrog Yexus Khetos thiab thaum peb “ris Nws lub npe [thiab] … ua hauj lwm rau nws kom mus txog thaum kawg”³ thiab thaum nej pab lwm tus los cuag Nws.

Niaj hnub no, cov yaj saub thiab cov thwj tim tseem tsa lawv tej suab caw peb ua txoj hauj lwm cawm seej raws li peb muaj peev xwm ua thiab muaj cib fim ua.

Qhov thib ib uas peb yuav tsum ua kom txi txiv yog kev “muaj siab mos siab muag.”⁴ Ces peb yuav mus cuag Khetos thaum peb ua raws li tus Vaj Ntsuj Plig Dawb Huv tej kev tshoov siab thiab ua raws li tej kev khi lus uas peb tau ua.⁵ Peb yuav muaj kev siab hlub thiab muaj hwj chim caw peb tsev neeg, peb cov poj koob yawm txwv, peb cov neeg zej zog uas yog mej zeej, thiab tsis yog mej zeej thiab phooj ywg kom lawv txais Yexus Khetos txoj moo zoo.

Kev muaj siab hlub tsis yog ib lub luag hauj lwm tiam sis kev muaj siab hlub yog kev xyiv fab. Kev sim siab yog cib fim kom peb txoj kev ntseeg loj hlob. Peb rais los ua cov neeg uas “sawv ua Vajtswv tej tim khawv rau txhua lub caij nyoog thiab rau txhua yam, thiab nyob tag nrho txhua qhov chaw uas [peb] yuav nyob, txawm peb tuag los.”⁶

Peb txhua tus yuav tsum siv zog ua txoj hauj lwm cawm seej. Tus Cawm Seej tau muab kev lav ris no rau peb nrog rau ib txoj kev cog lus hais tias: “Kuv xaiv nej thiab tsa nej kom mus txi cov txiv uas nyob mus ib txhis. Yog nej tuav kuv lub npe thov yam twg, Leej Txiv yuav pub yam ntawd rau nej.”⁷

Peb lub cev nqaij daim tawv yog ib txoj koob hmoov los ntawm Vajtswv. Peb tau txais peb lub cev xwv kom muaj raws li Leej Txiv Saum Ntuj Ceeb Tsheej txoj hauj lwm kom tib neeg tsis txawj tuag thiab muaj txoj sia nyob mus ib txhis li.”⁸ Vim peb muaj ib lub cev peb thiaj muaj peev xwm rais los ua neeg zoo li Vajtswv.

Leej Txiv Saum Ntuj Ceeb Tsheej cov me nyuam ntsuj plig uas mloog lus muaj cev nqaij daim tawv, lawv thiaj ua neej nyob hauv lub ntiaj teb no.⁹ Kev yug me nyuam pub Vajtswv lwm cov me nyuam ntsuj plig muaj txoj sia nyob hauv lub ntiaj teb thiab. Txhua tus uas yug los hauv lub ntiaj teb no muaj cib fim vam meej thiab txais kev tsa nto yog lawv ua raws li Vajtswv tej lus txib.

Kev sib yuav ntawm ib tug txiv neej thiab ib tug poj niam yog qhov uas Vajtswv pom zoo kom tib neeg thiaj li huaj vam. Txiv neej nrog txiv neej los sis poj niam nrog poj niam muaj tsis taus me nyuam.

Qhov uas ib khub niam txiv sib yuav raws li kev cai thiab sib khi hauv lub tuam tsev, qhov no pub nkawd thiab nkawd cov me nyuam muaj cib fim paub txog kev hlub thiab npaj rau ib lub neej vam meej. Yog qhov zoo tshaj plaws uas pab lawv ua raws li Vajtswv tej kev khi lus.

Vim Nws hlub peb, Leej Txiv Saum Ntuj Ceeb Tsheej tau npaj cov koob hmoov no, raws li lub sij hawm tus Tswv pom zoo, rau tag nrho Nws cov me nyuam uas rau siab ntseeg tsis hais cov uas tsis tau sib yuav los yog tseem tsis tau muaj me nyuam los yog tsis txais cov koob hmoov li ntawd tam sim no los yog.¹⁰

Cov yaj saub thiab cov thwj tim tau ntuas tag nrho cov uas muaj cib fim yuav poj niam yuav txiv mus ib txhis kom lawv muaj tswv yim thiab muaj kev ntseeg. Peb yuav tsum tsis txhob tos kom txog hnub dawb ceev ntawd vim peb xav tau tej yam ntawm lub ntiaj teb los yog xav tias yuav tsum tau ib tug khub zoo tag nrho thaum yeej tsis muaj ib tug zoo li ntawd.

Cov lus cog tseg rau cov uas ua kev sib khi mus ib txhis thiab txi txiv thaum lawv ua raws li lawv tej kev khi lus hais tias tus yeeb ncuab yuav tsis muaj hwj chim kov yeej lub hauv paus ntawm lawv txoj kev sib yuav mus ib txhis.

Kev kav lub ntiaj teb thiab txhua yam uas muaj txoj sia txhais hais tias peb kav tej no kom yuav muaj raws li Vajtswv lub siab nyiam¹¹ thiab pab Nws cov me nyuam. Qhov no kuj txhais hais tias peb kav peb lub cev thiab.¹² Qhov no tsis txhais hais tias peb raug tej yam hauv lub ntiaj teb no los yog siv tej ntawd kom ua tsis haum Vajtswv siab.¹³

Qhov uas peb txawj kav tej yam ntawm lub ntiaj teb pib nrog kev txo hwj chim paub peb tej kev qaug zog thiab paub txog lub hwj chim ntawm Yexus Khetos thiab Nws txoj Kev Theej Txhoj. Vim “Khetos tau hais tias: Yog nej yuav ntseeg kuv nej yeej yuav muaj hwj chim ua tau txhua yam uas kuv pom zoo.”¹⁴ Yuav muaj lub hwj chim no thaum peb xaiv ua raws li Nws tej lus txib. Peb yuav muaj txuj ci thaum peb nrhiav tej lub txiaj ntsim ntawm tus Ntsuj Plig.

Kuv twb yug los rau ib tsev neeg pluag zoo ib yam li tsev neeg feem coob nyob hauv Africa Teb. Kuv twb tau txuj ci kom txhawb tau kuv tus kheej thaum kuv tau kawm ntaub kawm ntawv, nrog kuv niam kuv txiv txoj kev pab. Kuv yuav tsum paub tias kuv muaj peev xwm rais los ua neeg zoo li cas kuv thiaj vam meej tau. Tom qab ntawd, kuv thiab kuv tus poj niam, Gladys, nrhiav tau txoj moo zoo no, uas pab coj peb txoj hau kev. Ib yam li txhua tsev neeg, peb muaj tej kev sim siab thiab teeb meem. Tiam sis thaum peb ntsia ntsoov tus Tswv thov kev pab, peb twb nrhiav tej yam uas ua rau peb nyob kaj siab lug thiab nplij peb lub siab, tej ntawd thiaj tsis kov yeej peb.

Tej teeb meem hauv peb lub sawm fem niaj hnub no, tsis hais kev deev luag poj luag txiv, cov duab liab qab, kev sib tawm tsam, pa phem, kev muaj yees, thiab kev txom nyem, ntshe tej no loj tuaj vim ntau tus nyob hauv lub ntiaj teb no tau xaiv “ua raws li tus dab lub siab nyiam thiab mus raws li cev nqaij daim tawv”¹⁵ thiab tsis ua raws li Vajtswv lub siab nyiam. Lawv tsis xav ua raws li tus Tswv kom ua neej ncaj ncees, tiam sis txhua tus nyias mus nyias txoj kev, thiab nyias ua raws li nyias tus vaj tswv, uas muaj yam ntxwv zoo li neeg ntiaj teb.¹⁶

Tiam sis, Vajtswv caw Nws cov me nyuam txhua tus kom lawv txais tau Nws txoj kev pab kov yeej thiab nyiaj tej teeb meem ntawm lub neej no thaum nws hais tias:

“Kuv yog Vajtswv; kuv tau tsim lub ntiaj teb, thiab tsim neeg ua ntej lawv muaj cev nqaij daim tawv.”

“… Yog hais tias nej yuav tig los rau kuv, thiab mloog kuv lus, thiab ntseeg, thiab hloov siab lees txim rau tag nrho [nej] tej kev ua txhaum, thiab ua kev cai raus dej, nyob hauv dej, los ntawm kuv Tib Leeg Tub lub npe, … nej yuav tau txais lub txiaj ntsim Vaj Ntsuj Plig Dawb Huv, thiab thov txhua yam los ntawm nws lub npe, thiab txhua yam uas nej yuav thov, kuv yuav muab qhov ntawd rau nej.”¹⁷

Haiv Neeg Ntseeg uas rau siab ntseeg thiab to taub lawv muaj peev xwm rais tau ua neeg zoo li Vajtswv thiab tso siab rau lub hwj chim uas muaj los ntawm tus Tswv Yexus Khetos txoj Kev Theej Txhoj, lawv yuav txais dag zog thiab “ua tau txhua yam tsav.”¹⁸ Lawv muaj peev xwm kov yeej kev ntxias ntawm cov neeg phem uas ua rau ntau tus neeg raug tus yeeb ncuab. Povlauj qhia hais tias:

“Vajtswv yog tus ncaj ncees, nws yeej tsis cia nej raug kev sim siab dhau qhov uas nej yuav nyiaj tsis taus, tiam sis thaum nej raug kev sim siab Vajtswv yuav pab kom nej ua taus lub siab ntev.”¹⁹

“Nim no Yexus paub pab cov neeg uas raug kev sim siab, rau qhov nws twb raug kev sim siab thiab kev tsim txom los lawm.”²⁰

Leej Txiv Saum Ntuj Ceeb Tsheej tau txib kom peb txi txiv, huaj vam, thiab kav lub ntiaj teb kom peb yuav rais los ua neeg zoo li Nws. Nws tau muab kev pab rau peb kom peb yuav loj hlob ua neeg zoo li no, raws li peb xaiv. Kuv thov kom peb yuav ua neej zoo peb thiaj yuav to taub qhov uas peb los ntawm Vajtswv los, peb yuav txais tau txhua yam Vajtswv muaj, thiab yuav ua kom muaj raws li Vajtswv lub siab nyiam.

Kuv ua tim khawv txog Vajtswv Leej Txiv thiab Nws Leej Tub, peb tus Cawm Seej Yexus Khetos; txog Nws txoj hau kev zoo siab; thiab txog tej yuam sij uas nws tau muab rau ib tug yaj saub hauv lub ntiaj teb no, uas yog Thomas S. Monson, tus uas peb hlub thiab txhawb nqa. Kuv thov kom peb yuav muaj hwj chim txais tau tag nrho Nws cov koob hmoov los ntawm Yexus Khetos lub npe, amees.