ចូរបង្កើតកូន ឲ្យចម្រើនជាច្រើនឡើង ហើយបង្ក្រាបផែនដី
ដោយ អែលឌើរ យ៉ូសែប ដបុលយូ ស៊ីតាទី
នៃពួកចិតសិបនាក់
ព្រះវរបិតាសួគ៌បានបញ្ជា និងប្រទានពរយើងដើម្បីចម្រើនជាច្រើនឡើង ឲ្យមានពេញពាសលើផែនដីចុះ ហើយបង្ក្រាបផែនដី ដើម្បីយើងអាចប្រែក្លាយដូចជាទ្រង់ ។
អរគុណក្រុមចម្រៀងរោងឧបោសថ សម្រាប់ការសម្ដែងនូវការដឹងគុណដ៏ផ្អែមល្ហែមចំពោះព្រះអង្គសង្គ្រោះនៃពិភពលោក ។
នៅថ្ងៃដែលព្រះជាព្រះវរបិតា បានអំពាវដល់ព្រះរាជបុត្រាបង្កើតតែមួយរបស់ទ្រង់ ដើម្បីបង្កើតមនុស្សឲ្យដូចជារូបអង្គទ្រង់ ហើយឲ្យមានភាពដូចទ្រង់ នោះទ្រង់បានប្រទានពរដល់កូនចៅរបស់ទ្រង់ ដោយបន្ទូលថា « ចូរបង្កើតកូនឲ្យចម្រើនជាច្រើនឡើង ឲ្យមានពេញពាសលើផែនដីចុះ ហើយបង្ក្រាបផែនដី ហើយមានអំណាច … លើជីវិតផងទាំងឡាយដែលកម្រើកនៅផែនដីផង » ។១ នោះគឺជាការចាប់ផ្តើមនៃដំណើរជីវិតរមែងស្លាប់របស់យើងជាមួយនឹងព្រះរាជបញ្ជា និង ពរជ័យដ៏ទេវភាពនេះ ។ ព្រះវរបិតាដែលពេញដោយក្តីស្រឡាញ់ បានប្រទានដល់យើងនូវព្រះរាជបញ្ជា និង ពរជ័យនេះ ដើម្បីបង្កើតកូនចៅ និង ចម្រើនជាច្រើន ហើយមានអំណាច ដូច្នេះយើងអាចអភិវឌ្ឍខ្លួន និង ប្រែក្លាយកាន់តែដូចទ្រង់ ។
បងប្អូនប្រុសស្រីអើយ នារសៀលនេះ ខ្ញុំសុំសេចក្តីជំនឿ និង ការអធិស្ឋានរបស់អ្នក ពេលខ្ញុំចែកចាយគំនិតមួយចំនួនជាមួយអ្នកអំពីលក្ខណៈគ្រឹះបីនៃនិស្ស័យនៃព្រះរបស់យើង ។ ខ្ញុំអធិស្ឋានថា យើងទាំងអស់គ្នាអាចទទួលស្គាល់ និង បំពេញទំនួលខុសត្រូវដ៏ពិសិដ្ឋយើងឲ្យកាន់តែពេញលេញ—គឺជាព្រះរាជបញ្ជារបស់ព្រះវរបិតាយើង— ដើម្បីអភិវឌ្ឍនិស្ស័យនៃព្រះរបស់យើង ដូច្នេះយើងអាចតម្រែតម្រង់ដំណើររបស់យើងឲ្យកាន់តែមានជោគជ័យ ហើយទទួលបាននូវជោគវាសនាដ៏ទេវភាពរបស់យើង ។
ទីមួយ ព្រះបានចេញព្រះរាជបញ្ជាឲ្យយើងបង្កើតកូន
ផ្នែកមួយសំខាន់នៃការបង្កើតកូន ដែលពេលខ្លះត្រូវបានមើលរំលង គឺជាការនាំនគររបស់ព្រះមកលើផែនដីនេះ ។ ព្រះអង្គសង្គ្រោះបានបង្រៀនថា ៖
« ខ្ញុំជាគល់ អ្នករាល់គ្នាជាខ្នែង ៖ អ្នកណាដែលនៅជាប់នឹងខ្ញុំ ហើយខ្ញុំជាប់នឹងអ្នកនោះ នោះទើបនឹងបង្កើតផលឡើងជាច្រើន ដ្បិតបើដាច់ពីខ្ញុំចេញ នោះអ្នករាល់គ្នាពុំអាចនឹងធ្វើអ្វីបានទេ ។ …
« បើអ្នករាល់គ្នានៅជាប់នឹងខ្ញុំ ហើយពាក្យខ្ញុំនៅជាប់ក្នុងអ្នករាល់គ្នា នោះចូរសូមអ្វីតាមតែប្រាថ្នាចុះ សេចក្តីនោះនឹងបានសម្រេចដល់អ្នករាល់គ្នាជាមិនខាន ។
« ព្រះវរបិតាខ្ញុំបានតម្កើងឡើង ដោយសេចក្តីនេះឯង គឺដោយអ្នករាល់គ្នាបង្កើតផលជាច្រើន យ៉ាងនោះអ្នករាល់គ្នានឹងធ្វើជាសិស្សខ្ញុំមែន ។២
យើងបានចម្រើនជាច្រើនឡើង នៅពេលយើងគោរពតាមព្រះគ្រីស្ទ និងនៅពេលយើង « លើកដាក់ [ ព្រះនាមទ្រង់មកលើខ្លួនយើង] រួច [ ហើយ ] … បម្រើទ្រង់ដល់ទីបំផុត »៣ ដោយការជួយដល់អ្នកដទៃឲ្យមករកទ្រង់ ។
នៅសម័យយើងនេះ ព្យាការី និង សាវកដែលកំពុងរស់នៅបន្តប្រកាសអញ្ជើញយើងម្នាក់ៗឲ្យចុះប្រឡូកក្នុងកិច្ចការនៃសេចក្តីសង្គ្រោះឲ្យកាន់តែពេញលេញ ស្របទៅតាម សមត្ថភាព និង ឱកាសនានារបស់យើង ។
ចំណុចផ្តើមនៃការឆ្លើយតប ដែលផ្តល់ផលផ្លែដ៏ច្រើននោះគឺ « ស្លូតបូត ហើយសុភាពរាបសា » ។ ៤ នោះយើងមករកព្រះគ្រីស្ទកាន់តែពេញលេញ នៅពេលយើងព្រមធ្វើតាមសេចក្តីទូន្មាននៃព្រះវិញ្ញាណបរិសុទ្ធ ហើយរក្សាសេចក្តីសញ្ញាទាំងអស់ដែលយើងបានធ្វើ ។៥ យើងអាចស្វែងរក និង ទទួលបានអំណោយទាននៃសេចក្តីសប្បុរស ហើយមានអំណាចដើម្បីអញ្ជើញក្រុមគ្រួសារផ្ទាល់ខ្លួន ដូនតា និង សមាជិក និង អ្នកជិតខាងដែលមិនមែនជាសមាជិក និង មិត្តភក្ដិរបស់យើងឲ្យទទួលយកដំណឹងល្អរបស់ព្រះយេស៊ូវគ្រីស្ទ ។
ការធ្វើការដោយស្មារតីនៃសេចក្តីសប្បុរសគឺមិនមែនជាកាតព្វកិច្ចនោះទេ តែវាជាក្តីអំណរមួយ ។ ឧបសគ្គនានាក្លាយជាឱកាសដើម្បីស្ថាបនាសេចក្តីជំនឿ ។ យើងប្រែក្លាយជា « សាក្សីដល់ [ សេចក្តីល្អនៃ ] ព្រះ គ្រប់ពេល និងគ្រប់សេចក្តី និងគ្រប់ទីកន្លែងដែល [ យើង ] នៅ រហូតដល់ពេលស្លាប់ » ។៦
យើងម្នាក់ៗអាច និងគួរតែចុះប្រឡូកយ៉ាងពេញលេញក្នុងកិច្ចការនៃសេចក្តីសង្គ្រោះ ។ ព្រះអង្គសង្គ្រោះបានប្រទានដល់យើងនូវទំនួលខុសត្រូវខាងក្រោមនេះជាមួយនឹងការសន្សាមួយ ៖ « ខ្ញុំទេតើ ដែលរើសអ្នករាល់គ្នាវិញ ទាំងតាំងអ្នករាល់គ្នាឲ្យទៅបង្កើតផល ហើយឲ្យផលរបស់អ្នករាល់គ្នាបាននៅជាប់ផង ដើម្បីឲ្យព្រះវរបិតាបានប្រោសប្រទានឲ្យអ្នករាល់គ្នា » ។៧
ទីពីរ ព្រះបានចេញព្រះរាជបញ្ជាឲ្យយើងចម្រើនជាច្រើនឡើង
រូបកាយរបស់យើងគឺជាពរជ័យមួយមកពីព្រះ ។ យើងទទួលរូបកាយរបស់យើងសម្រាប់គោលបំណងនៃការបំពេញកិច្ចការរបស់ព្រះវរបិតាសួគ៌គឺ « ដើម្បីនាំឲ្យមានអមតភាព និង ជីវិតដ៏នៅអស់លក្បជានិច្ចដល់មនុស្ស » ។៨ រូបកាយនេះគឺជាមធ្យោបាយដែលយើងអាចទទួលបាននូវសក្តានុពលដ៏ទេវភាពរបស់យើង ។
រូបកាយនេះអាចឲ្យកូនវិញ្ញាណដែលគោរពប្រតិបត្តិរបស់ព្រះវរបិតាសួគ៌ ទទួលបទពិសោធន៍នៃជីវិតលើផែនដី ។៩ ការបង្កើតកូនផ្តល់ឱកាសដល់កូនវិញ្ញាណដទៃទៀតរបស់ព្រះរីករាយនឹងជីវិតលើផែនដីផងដែរ ។ មនុស្សទាំងអស់ដែលកើតមកក្នុងជីវិតរមែងស្លាប់នេះ មានឱកាសដើម្បីរីកចម្រើន និង ត្រូវបានលើកតម្កើង បើសិនពួកគេគោរពតាមព្រះបញ្ញត្តិរបស់ព្រះ ។
ចំណងអាពាហ៍ពិពាហ៍រវាងបុរសម្នាក់ និង ស្ត្រីម្នាក់គឺជាច្បាប់ដែលព្រះបានតែងតាំងឡើងសម្រាប់ការបំពេញតាមព្រះរាជបញ្ជាដើម្បីឲ្យចម្រើនជាច្រើនឡើង ។ ទំនាក់ទំនងភេទដូចគ្នាមិនធ្វើឲ្យចម្រើនជាច្រើនឡើងឡើយ ។
អាពាហ៍ពិពាហ៍ស្របច្បាប់ និង ពេញច្បាប់ ដែលបានផ្សារភ្ជាប់នៅក្នុងព្រះវិហារបរិសុទ្ធ និង សេចក្តីសញ្ញានៃការផ្សារភ្ជាប់ត្រូវបានគោរព ដែលផ្តល់ដល់ឪពុកម្តាយ និង កូនចៅរបស់ខ្លួននូវឱកាសសម្រាប់បទពិសោធន៍ដ៏មហិមានៃសេចក្តីស្រឡាញ់ និង ការរៀបចំសម្រាប់ជីវិតដ៏មានផលផ្លែ ។ វាផ្តល់ដល់ពួកគេនូវបរិយាកាសដ៏ឧត្តមដែលពួកគេអាចរស់នៅតាមសេចក្តីសញ្ញារបស់ខ្លួនដែលបានធ្វើជាមួយព្រះ ។
ដោយសារតែសេចក្តីស្រឡាញ់របស់ទ្រង់ចំពោះយើង នោះព្រះវរបិតាសួគ៌បានប្រទានថា អស់ទាំងកូនចៅស្មោះត្រង់របស់ទ្រង់ដែលគ្មាន ឬ ពុំអាចរីករាយនឹងពរជ័យនៃអាពាហ៍ពិពាហ៍ក្នុងសេចក្ដីសញ្ញា និង កូនចៅ ឬ ភាពពោរពេញនៃពរជ័យទាំងនោះ ដោយសារតែមិនមែនជាកំហុសរបស់ពួកគេ នោះនឹងរីករាយជាមួយនឹងពរជ័យទាំងនេះនៅក្នុងពេលកំណត់មួយរបស់ព្រះអម្ចាស់ ។១០
ព្យាការី និង សាវកដែលកំពុងរស់នៅ បានទូន្មានដល់អស់អ្នកដែលមានឱកាសចូលទៅក្នុងសេចក្តីសញ្ញានៃអាពាហ៍ពិពាហ៍អស់កល្បជានិច្ចឲ្យបន្តនៅក្នុងប្រាជ្ញា និង សេចក្តីជំនឿ ។ យើងពុំគួរពន្យាពេលនៃថ្ងៃដ៏ពិសិដ្ឋនោះ ដោយសារតែការចង់មានបានខាងលោកិយ ឬ ប្រកាន់ការរំពឹងរបស់យើងសម្រាប់តែដៃគូដែលសមរម្យនៅក្នុងកម្រិតមួយដែលធ្វើឲ្យបុគ្គលដទៃទៀតបែរជាមិនសក្តិសមនឹងខ្លួននោះឡើយ ។
សេចក្តីសន្យាដល់អស់អ្នកទាំងឡាយណាដែលបានផ្សារភ្ជាប់នៅក្នុងសេចក្តីសញ្ញានៃអាពាហ៍ពិពាហ៍អស់កល្ប និង អ្នកដែលបានបង្កើតកូន តាមរយៈការរក្សានូវសេចក្តីសញ្ញាខ្លួននោះគឺថា មារសត្រូវនឹងពុំមានអំណាចដើម្បីបំផ្លាញគ្រឹះនៃភាពជាដៃគូអស់កល្បជានិច្ចរបស់ពួកគេឡើយ ។
ទីបី ព្រះចេញព្រះរាជបញ្ជាឲ្យយើងបង្ក្រាបផែនដី
ដើម្បីបង្កាបផែនដី និងគ្រប់គ្រងលើរបស់មានជីវិតទាំងអស់ គឺគ្រប់គ្រងលើរឿងទាំងឡាយនេះដើម្បីបំពេញតាមព្រះទ័យរបស់ព្រះ ១១នៅពេលពួកគេបម្រើគោលបំណងនៃកូនចៅរបស់ទ្រង់ ។ ការបង្ក្រាប រួមមានការធ្វើជាម្ចាស់លើរូបកាយផ្ទាល់របស់យើង ។១២ វា ពុំ រាប់បញ្ចូលនូវការជាជនរងគ្រោះដែលគ្មានអ្វីសោះ ឬ ប្រើប្រាស់អ្វីៗទាំងនោះផ្ទុយពីព្រះឆន្ទៈព្រះឡើយ ។១៣
ការអភិវឌ្ឍន៍សមត្ថភាពដើម្បីបង្ក្រាបអ្វីៗនៅលើផែនដីនេះ ចាប់ផ្តើមជាមួយការបន្ទាបខ្លួនដើម្បីទទួលស្គាល់ភាពទន់ខ្សោយរបស់យើងក្នុងនាមជាមនុស្ស និង អំណាចដែលប្រទានដល់យើងតាមរយៈព្រះគ្រីស្ទ និង ដង្វាយធួនរបស់ទ្រង់ ។ ដ្បិត « ព្រះគ្រីស្ទមានព្រះបន្ទូលថា ៖ បើសិនជាអ្នករាល់គ្នាមានសេចក្តីជំនឿជឿដល់យើង នោះអ្នករាល់គ្នានឹងមានអំណាច ប្រយោជន៍នឹងធ្វើនូវអ្វីៗដែលជាការចាំបាច់ដល់យើង » ។១៤ អំណាចនេះអាចមានដល់ពួកយើងនៅពេលយើងជ្រើសធ្វើតាមព្រះបញ្ញត្តិទ្រង់ ។ យើងបង្កើនសមត្ថភាពរបស់យើងដោយព្យាយាមរកអំណោយទាននៃព្រះវិញ្ញាណ ហើយដោយការអភិវ្ឍន៍ទេពកោសល្យខ្លួន ។
ខ្ញុំបានកើតមក និង ត្រូវបានចិញ្ចឹមបីបាច់នៅក្នុងស្ថានភាពគ្រួសារខ្សត់ខ្សោយ ដែលដូចជាក្រុមគ្រួសារជាច្រើនទៀតនៅប្រទេសអាហ្វ្រិកដែរ ។ ខ្ញុំបានបង្កើនសមត្ថភាពដើម្បីយកឈ្នះលើស្ថានភាពទាំងនោះ ដោយព្យាយាម និងទទួលការអប់រំដ៏ល្អមួយដោយមានជំនួយពីឪពុកម្តាយខ្ញុំ ។ ការបង្កើតទស្សនវិស័យអំពីអ្វីដែលខ្ញុំអាចប្រែក្លាយគឺជាចំណុចសំខាន់ដើម្បីការរីកចម្រើនរបស់ខ្ញុំ ។ ក្រោយមក ក្នុងនាមជាគូស្វាមីភរិយាវ័យក្មេង ភរិយាខ្ញុំ គ្លេឌី និងខ្ញុំ បានរកឃើញដំណឹងល្អដែលបានស្តារឡើងវិញ ដែលបន្តប្រទានពរជ័យដល់ជីវិតរបស់យើងជាមួយនឹងការដឹកនាំខាងវិញ្ញាណ ។ ដូចជាគ្រប់ក្រុមគ្រួសារដែរ យើងមានការសាកល្បង និង ឧបសគ្គរបស់យើង ។ ប៉ុន្តែ ពេលយើងសម្លឹងទៅព្រះអម្ចាស់សម្រាប់ជំនួយ នោះយើងរកឃើញចម្លើយដែលនាំភាពសុខសាន្ត និង ភាពកក់ក្តៅ ហើយយើងនឹងមិនស្មុគស្មាញដោយសាររឿងទាំងនោះឡើយ ។
ឧបគ្គសនានាដែលប្រឈមមុខនៅក្នុងសង្គមមនុស្សសព្វថ្ងៃនេះ រួមមាន ភាពអសីលធម៌ ការណ៍អាសគ្រាម សង្គ្រាម អំពើពុករលួយ ថ្នាំញៀន និង ភាពក្រីក្រ កើនឡើងដោយសារមនុស្សជាច្រើននៅក្នុងពិភពលោកនេះបានបែរខ្លួនគេចេញ ទៅជ្រើសរើស « តាមបំណងនៃអារក្ស និង របស់ខាងសាច់ឈាម »១៥ ជាជាងធ្វើតាមព្រះឆន្ទៈរបស់ព្រះ ។ « ពួកគេពុំស្វែងរកព្រះអម្ចាស់ដើម្បីតាំងសេចក្តីសុចរិតរបស់ទ្រង់ឡើយ ប៉ុន្តែមនុស្សគ្រប់រូបដើរតាមផ្លូវរបស់ខ្លួនគេផ្ទាល់ ហើយតាមរូបភាពនៃព្រះរបស់ខ្លួនគេផ្ទាល់ដែលមានរូបភាពដូចជារូបរាងនៃលោកិយ » ។១៦
ទោះជាយ៉ាងណា ព្រះអញ្ជើញ កូនចៅទ្រង់ទាំងអស់ ឲ្យទទួលជំនួយពីទ្រង់ដើម្បីយកឈ្នះ និង ទប់ទល់នឹងឧបគ្គសនានានៃជីវិតនេះជាមួយនឹងព្រះបន្ទូលទាំងនេះថា ៖
« យើងជាព្រះ យើងបានបង្កើតលោកិយ និង មនុស្សលោកមក មុនពេលពួកគេនៅក្នុងសាច់ឈាម្ល៉េះ ។
« … បើសិនជាអ្នកបែរមករកយើង ហើយប្រុងស្តាប់តាមសំឡេងយើង ហើយជឿ ហើយប្រែចិត្ត ពីអស់ទាំងអំពើរំលងរបស់អ្នក ហើយទទួលបុណ្យជ្រមុជគឺដោយទឹក ដោយនូវព្រះនាមនៃព្រះរាជបុត្រាបង្កើតតែមួយរបស់យើង… នោះអ្នកនឹងបានទទួលអំណោយទានជាព្រះវិញ្ញាណបរិសុទ្ធ ដោយសូមអ្វីៗទាំងដោយនូវព្រះនាមទ្រង់ ហើយអ្វីៗក៏ដោយដែលអ្នករាល់គ្នាសុំ នោះនឹងបានប្រទានដល់អ្នក » ។១៧
ពួកបរិសុទ្ធថ្ងៃចុងក្រោយដ៏ស្មោះត្រង់ ដែលយល់នូវសក្តានុពលដ៏ទេវភាពរបស់ខ្លួននេះ ហើយពឹងផ្អែកដោយអស់ពីចិត្តលើអំណាចដែលបានមកតាមរយៈដង្វាយធួននៃព្រះអម្ចាស់យេស៊ូវគ្រីស្ទ ត្រូវបានពង្រឹងនៅក្នុងនិស្ស័យដ៏ទន់ខ្សោយរបស់ខ្លួន ហើយ « អាចធ្វើគ្រប់ការណ៍ទាំងអស់ » ។១៨ ពួកគេអាចយកឈ្នះលើការល្បួងរបស់អារក្ស ដែលបានដាក់មនុស្សជាច្រើននៅក្នុងសេវកភាពនៃមារសត្រូវ ។ ប៉ុលបានបង្រៀនថា ៖
« ដ្បិតព្រះទ្រង់ក៏ស្មោះត្រង់ដែរ [ ហើយ ] មិនឲ្យកើតមានសេចក្តីល្បួងហួសកំឡាំងអ្នករាល់គ្នាឡើយ គឺនៅវេលាណាដែលត្រូវល្បួង នោះទ្រង់ក៏រៀបផ្លូវឲ្យចៀសរួច ដើម្បីឲ្យអ្នករាល់គ្នាអាចនឹងទ្រាំបាន » ។១៩
« ដ្បិត ដែលទ្រង់បានរងទុក្ខលំបាក ទាំងត្រូវសេចក្តីល្បួង នោះទ្រង់ក៏អាចនឹងជួយដល់អស់អ្នក ដែលត្រូវសេចក្តីល្បួងបានដែរ » ។២០
ព្រះវរបិតាសួគ៌ បានចេញព្រះរាជបញ្ជា និង ប្រទានពរដល់យើងឲ្យបង្កើតកូន ឲ្យចម្រើនជាច្រើនឡើង ហើយត្រូវបង្ក្រាបផែនដី ដើម្បីយើងអាចនឹងប្រែក្លាយដូចជាទ្រង់ ។ ទ្រង់បានផ្តល់ជំនួយ ដែលយើងម្នាក់ៗអាចទទួលបាន ស្របតាមការជ្រើសរើសរបស់យើងម្នាក់ៗ ដើម្បីប្រែក្លាយដូចជាទ្រង់ ។ ខ្ញុំអធិស្ឋានថា យើងទាំងអស់គ្នាអាចរស់នៅក្នុងរបៀបមួយដែលយើងនឹងត្រូវដឹកនាំដោយទស្សនវិស័យនៃនិស្ស័យនៃព្រះរបស់យើង ចាប់យកឯកសិទ្ធិដ៏ទេវភាពរបស់យើងទាំងអស់ ហើយបំពេញជោគវាសនាដ៏ទេវភាពរបស់ខ្លួន ។
ខ្ញុំសូមថ្លែងទីបន្ទាល់អំពីព្រះដ៏មានព្រះជន្មរស់ពិត ជាព្រះបិតា និង អំពីព្រះរាជុបុត្រាសំណប់របស់ទ្រង់ ព្រះអង្គសង្គ្រោះ ព្រះយេស៊ូវគ្រីស្ទរបស់យើង អំពីផែនការដ៏រុងរឿងនៃសុភមង្គលទ្រង់ និងអំពីកូនសោដែលទ្រង់បានប្រទានមកដល់ព្យាការីនៅរស់លើផែនដីសព្វថ្ងៃនេះ ជា ថូម៉ាស អេស ម៉នសុន ដែលយើងស្រឡាញ់ និងគាំទ្រ ។ ខ្ញុំសូមអធិស្ឋានថា យើងអាចមានអំណាច ដើម្បីបានរីករាយនឹងភាពពេញលេញនៃពរជ័យទាំងឡាយរបស់ទ្រង់ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។