ຈົ່ງມີລູກເຕົ້າໃຫ້ແຜ່ຂະຫຍາຍ, ເພີ່ມທະວີ, ແລະ ປົກຄອງແຜ່ນດິນໂລກ
ໂດຍ ແອວເດີ ໂຈເຊັບ ດັບເບິນຢູ ສີຕາຕີ
ແຫ່ງສາວົກເຈັດສິບ
ພຣະບິດາເທິງສະຫວັນໄດ້ສັ່ງ ແລະ ອວຍພອນເຮົາໃຫ້ແຜ່ຂະຫຍາຍ, ເພີ່ມທະວີ, ແລະ ປົກຄອງແຜ່ນດິນໂລກ ເພື່ອເຮົາຈະສາມາດກາຍເປັນເໝືອນດັ່ງພຣະອົງ.
ຂອບໃຈ, ກຸ່ມນັກຮ້ອງແທໂບແນໂກ, ສຳລັບເພງທີ່ຊື່ນຊ້ອຍ ຊຶ່ງສັນລະເສີນພຣະຜູ້ຊ່ອຍໃຫ້ລອດຂອງໂລກ.
ໃນມື້ນັ້ນທີ່ພຣະເຈົ້າພຣະບິດາໄດ້ເອີ້ນໃຫ້ພຣະບຸດທີ່ຖືກຳເນີດອົງດຽວຂອງພຣະອົງໃຫ້ສ້າງມະນຸດ ທີ່ຄ້າຍຄືກັບພຣະອົງ, ພຣະອົງໄດ້ອວຍພອນລູກໆຂອງພຣະອົງ ໂດຍກ່າວວ່າ, ຈົ່ງມີລູກເຕົ້າໃຫ້ແຜ່ຂະຫຍາຍ, ເພີ່ມທະວີ, ແລະ ປົກຄອງແຜ່ນດິນໂລກ ແລະ ມີອຳນາດ ... ເໜືອທຸກສິ່ງທີ່ເຄື່ອນໄຫວຢູ່ເທິງແຜ່ນດິນໂລກ.1ດັ່ງນັ້ນຊີວິດມະຕະຂອງເຮົາຈຶ່ງໄດ້ເລີ່ມຕົ້ນໂດຍມີຄຳສັ່ງສັກສິດພ້ອມກັບພອນ. ພຣະບິດາທີ່ຊົງຮັກຈຶ່ງໄດ້ມອບຄຳສັ່ງ ແລະ ອວຍພອນ ໃຫ້ເຮົາມີລູກເຕົ້າໃຫ້ແຜ່ຂະຫຍາຍ ແລະ ເພີ່ມທະວີ ແລະ ມີອຳນາດປົກຄອງ ເພື່ອເຮົາຈະກ້າວໜ້າ ແລະ ກາຍເປັນເໝືອນດັ່ງພຣະອົງ.
ອ້າຍເອື້ອຍນ້ອງທັງຫລາຍ, ບ່າຍມື້ນີ້ຂ້າພະເຈົ້າຂໍໃຫ້ທ່ານມີສັດທາ ແລະ ອະທິຖານເພື່ອຂ້າພະເຈົ້າດ້ວຍ ໃນຂະນະທີ່ຂ້າພະເຈົ້າແບ່ງປັນຄວາມຄິດບາງຢ່າງ ທີ່ກ່ຽວກັບຄຸນສົມບັດຕົ້ນຕໍສາມຢ່າງຂອງທຳມະຊາດແຫ່ງສະຫວັນຂອງເຮົາ. ຂ້າພະເຈົ້າຫວັງວ່າ ເຮົາທຸກຄົນຈະຮັບຮູ້ ແລະ ປະຕິບັດໜ້າທີ່ຮັບຜິດຊອບອັນສັກສິດຂອງເຮົາ—ຊຶ່ງເປັນຄຳສັ່ງຈາກພຣະບິດາຂອງເຮົາ—ທີ່ຈະພັດທະນາທຳມະຊາດແຫ່ງສະຫວັນຂອງເຮົາ ເພື່ອວ່າເຮົາຈະສາມາດດຳລົງຊີວິດໄດ້ດີກວ່າ ແລະ ບັນລຸຈຸດໝາຍປາຍທາງແຫ່ງສະຫວັນຂອງເຮົາ.
ທຳອິດ ພຣະເຈົ້າໄດ້ສັ່ງເຮົາໃຫ້ແຜ່ຂະຫຍາຍ
ສ່ວນສຳຄັນໃນການແຜ່ຂະຫຍາຍ ຊຶ່ງຫລາຍເທື່ອອາດຈະເສີຍເມີຍ ແມ່ນການນຳເອົາອານາຈັກຂອງພຣະເຈົ້າມາສູ່ໂລກ. ພຣະຜູ້ຊ່ອຍໃຫ້ລອດໄດ້ສອນວ່າ:
“ເຮົາເປັນເຄືອອະງຸ່ນ ພວກທ່ານເປັນກິ່ງ. ພວກທີ່ຍັງຢູ່ໃນເຮົາ ແລະ ເຮົາຢູ່ໃນເຂົາ ຈະເກີດຜົນຫລາຍ; ດ້ວຍວ່າບໍ່ມີເຮົາແລ້ວ ພວກທ່ານເຮັດຫຍັງບໍ່ໄດ້. …
“ຖ້າພວກທ່ານຍັງຢູ່ໃນເຮົາ ແລະ ຖ້ອຍຄຳຂອງເຮົາຝັງຢູ່ໃນພວກທ່ານແລ້ວ ພວກທ່ານປາດຖະໜາສິ່ງໃດຈົ່ງຂໍ ແລະ ພວກທ່ານຈະໄດ້ຮັບສິ່ງນັ້ນ.
“ພຣະບິດາຂອງເຮົາຈະໄດ້ຮັບສະງ່າລາສີຢ່າງນີ້ແຫລະ ເມື່ອພວກທ່ານເກີດຜົນຫລາຍ; ແລະ ໃນທຳນອງນີ້ ພວກທ່ານຈຶ່ງກາຍເປັນສາວົກຂອງເຮົາ.”2
ເຮົາແຜ່ຂະຫຍາຍເມື່ອເຮົາຢູ່ໃນພຣະຄຣິດ ແລະ ເມື່ອເຮົາຮັບພຣະນາມຂອງພຣະອົງ ແລະ ຮັບໃຊ້ພຣະອົງຈົນເຖິງທີ່ສຸດ3ໂດຍການຊ່ອຍຄົນອື່ນໃຫ້ມາຫາພຣະອົງ.
ໃນສະໄໝຂອງເຮົາ, ສາດສະດາ ແລະ ອັກຄະສາວົກໃນປະຈຸບັນ ຍັງສືບຕໍ່ເປັ່ງສຽງເຊື້ອເຊີນເຮົາແຕ່ລະຄົນ ໃຫ້ມີສ່ວນຮ່ວມກັບວຽກງານແຫ່ງຄວາມລອດ ຕາມຄວາມສາມາດ ແລະ ໂອກາດຂອງເຮົາ.
ຈຸດເລີ່ມຕົ້ນຂອງການເຮັດໃຫ້ເກີດຜົນຫລາຍແມ່ນການ “ມີໃຈອ່ອນໂຍນ ແລະ ຕ່ຳຕ້ອຍ.”4ແລ້ວເຮົາຈະສາມາດມາສູ່ພຣະຄຣິດຢ່າງສົມບູນກວ່າ ໃນຂະນະທີ່ເຮົາຍອມຕໍ່ການຊັກຈູງຂອງພຣະວິນຍານອັນສັກສິດ ແລະ ຮັກສາພັນທະສັນຍາທັງໝົດທີ່ເຮົາໄດ້ເຮັດໄວ້.5ເຮົາສາມາດສະແຫວງຫາ ແລະ ໄດ້ຮັບພອນແຫ່ງຄວາມໃຈບຸນ ແລະ ມີອຳນາດທີ່ຈະເຊື້ອເຊີນຍາດພີ່ນ້ອງຂອງເຮົາ, ບັນພະບຸລຸດຂອງເຮົາ, ແລະ ເພື່ອນບ້ານໃກ້ຄຽງທີ່ເປັນສະມາຊິກ ແລະ ຜູ້ບໍ່ໄດ້ເປັນ ໃຫ້ຮັບເອົາພຣະກິດຕິຄຸນຂອງພຣະເຢຊູຄຣິດ.
ການເຮັດວຽກຕາມວິນຍານແຫ່ງຄວາມໃຈບຸນບໍ່ແມ່ນໜ້າທີ່ ແຕ່ແມ່ນຄວາມຊື່ນຊົມ. ການທ້າທາຍຈະກາຍເປັນໂອກາດທີ່ເພີ່ມສັດທາ. ເຮົາກາຍເປັນ “ພະຍານຂອງ [ຄຸນຄວາມດີຂອງ] ພຣະເຈົ້າໃນທຸກເວລາ ແລະ ໃນທຸກສິ່ງ ແລະ ໃນທຸກບ່ອນທີ່ [ເຮົາ] ຢູ່, ເຖິງແມ່ນຈົນເຖິງຄວາມຕາຍ.”6
ເຮົາທຸກຄົນສາມາດ ແລະ ຄວນມີສ່ວນຮ່ວມຢ່າງເຕັມທີ່ໃນວຽກງານແຫ່ງຄວາມລອດ. ພຣະຜູ້ຊ່ອຍໃຫ້ລອດໄດ້ມອບໜ້າທີ່ຮັບຜິດຊອບຕໍ່ໄປນີ້ໃຫ້ເຮົາ ພ້ອມດ້ວຍຄຳສັນຍາ ທີ່ວ່າ: “ເຮົາໄດ້ເລືອກເອົາພວກທ່ານ ແລະ ແຕ່ງຕັ້ງພວກທ່ານໃຫ້ໄປເກີດຜົນຫລາຍ ເປັນຜົນຊະນິດທີ່ຕັ້ງຢູ່ຖາວອນ. ດັ່ງນັ້ນແຫລະ ພຣະບິດາຈະໃຫ້ພວກທ່ານ ສິ່ງທີ່ພວກທ່ານຂໍຈາກພຣະອົງໃນນາມຂອງເຮົາ.”7
ທີສອງ ພຣະເຈົ້າໄດ້ສັ່ງເຮົາໃຫ້ເພີ່ມທະວີ
ຮ່າງກາຍຂອງເຮົາແມ່ນພອນຈາກພຣະເຈົ້າ. ເຮົາໄດ້ຮັບມັນເພື່ອຈະປະຕິບັດວຽກງານຂອງພຣະບິດາທີ່ເຮັດໃຫ້ເກີດຄວາມເປັນອະມະຕະ ແລະ ຊີວິດນິລັນດອນຂອງມະນຸດ.8ຮ່າງກາຍແມ່ນວິທີທີ່ເຮົາສາມາດກາຍເປັນເໝືອນພຣະເຈົ້າ.
ຮ່າງກາຍເຮັດໃຫ້ລູກທາງວິນຍານຂອງພຣະບິດາເທິງສະຫວັນມີປະສົບການໃນຊີວິດຢູ່ເທິງໂລກ.ການໃຫ້ກຳເນີດ ໄດ້ໃຫ້ລູກທາງວິນຍານຂອງພຣະເຈົ້າຄົນອື່ນໆ ມີໂອກາດມາຊື່ນຊົມກັບຊີວິດຢູ່ເທິງໂລກ.9 ທຸກຄົນທີ່ເກີດໃນຄວາມເປັນມະຕະ ມີໂອກາດທີ່ຈະຈະເລີນກ້າວໜ້າ ແລະ ສູງສົ່ງໄດ້ ຖ້າຫາກເຂົາເຈົ້າເຊື່ອຟັງພຣະບັນຍັດຂອງພຣະເຈົ້າ.
ການແຕ່ງງານລະຫວ່າງຜູ້ຊາຍ ແລະ ຜູ້ຍິງ ແມ່ນສະຖາບັນທີ່ພຣະເຈົ້າໄດ້ແຕ່ງຕັ້ງໄວ້ ເພື່ອຈະໄດ້ປະຕິບັດຕາມຄຳສັ່ງທີ່ວ່າ ໃຫ້ເພີ່ມທະວີ. ຄວາມສຳພັນລະຫວ່າງເພດດຽວກັນ ບໍ່ສາມາດເພີ່ມທະວີໄດ້.
ການແຕ່ງງານຕາມກົດໝາຍທີ່ໄດ້ຜະນຶກເຂົ້າກັນໃນພຣະວິຫານ ແລະ ການຮັກສາພັນທະສັນຍາແຫ່ງການຜະນຶກນັ້ນ ເຮັດໃຫ້ພໍ່ແມ່ ແລະ ລູກມີໂອກາດ ທີ່ຈະປະສົບກັບຄວາມຮັກ ແລະ ມີຊີວິດຢ່າງອຸດົມສົມບູນທີ່ສຸດ. ມັນສ້າງບັນຍາກາດອັນສົມບູນ ເພື່ອເຂົາເຈົ້າຈະສາມາດດຳລົງຊີວິດຕາມພັນທະສັນຍາທີ່ໄດ້ເຮັດໄວ້ນຳພຣະເຈົ້າ.
ຍ້ອນຄວາມຮັກທີ່ພຣະອົງມີໃຫ້ເຮົາ ພຣະບິດາເທິງສະຫວັນຈຶ່ງໄດ້ຈັດຫາພອນເຫລົ່ານີ້ໄວ້ໃຫ້ລູກຂອງພຣະອົງຜູ້ທີ່ສັດຊື່ ແຕ່ບໍ່ໄດ້ຮັບ ຫລື ບໍ່ສາມາດໄດ້ຮັບພອນແຫ່ງພັນທະສັນຍາຂອງການແຕ່ງງານ ພ້ອມກັບລູກ ຫລື ບໍ່ໄດ້ຮັບຄວາມສົມບູນຂອງພອນດັ່ງກ່າວ ເພາະສາເຫດໃດກໍຕາມ ທີ່ເຂົາເຈົ້າຄວບຄຸມບໍ່ໄດ້ ເພື່ອເຂົາເຈົ້າຈະໄດ້ຮັບຕາມເວລາຂອງພຣະຜູ້ເປັນເຈົ້າ.10
ສາດສະດາ ແລະ ອັກຄະສາວົກໃນປະຈຸບັນ ໄດ້ແນະນຳທຸກຄົນທີ່ມີໂອກາດ ໃຫ້ເຂົ້າສູ່ພັນທະສັນຍາແຫ່ງການແຕ່ງງານນິລັນດອນ ໃຫ້ດຳເນີນຕໍ່ໄປຕາມປັນຍາ ແລະ ສັດທາ. ເຮົາບໍ່ຄວນຈະເລື່ອນມື້ເລື່ອນວັນສັກສິດນັ້ນ ເພາະການສະແຫວງຫາສິ່ງທີ່ເປັນທາງໂລກ ຫລື ບໍ່ຄວນຕັ້ງເງື່ອນໄຂໄວ້ສູງເກີນໄປສຳລັບຄູ່ຊີວິດ ຈົນບໍ່ມີໃຜເລີຍທີ່ເຫັນວ່າ ເໝາະສົມ.
ຄຳສັນຍາສຳລັບທຸກຄົນທີ່ໄດ້ຜະນຶກເຂົ້າໃນພັນທະສັນຍາແຫ່ງການແຕ່ງງານນິລັນດອນ ແລະ ສຳລັບຜູ້ທີ່ແຜ່ຂະຫຍາຍ ໂດຍການຮັກສາພັນທະສັນຍາຂອງເຂົາເຈົ້າ ແມ່ນວ່າ ຜູ້ປໍລະປັກຈະບໍ່ມີອຳນາດ ທີ່ຈະເຮັດໃຫ້ຮາກຖານຂອງຄວາມເປັນຄູ່ນິລັນດອນໃຫ້ອ່ອນແອລົງເລີຍ.
ທີສາມ ພຣະເຈົ້າໄດ້ສັ່ງເຮົາໃຫ້ປົກຄອງແຜ່ນດິນໂລກ
ໃນການປົກຄອງແຜ່ນດິນໂລກ ແລະ ມີອຳນາດເໜືອທຸກສິ່ງທີ່ມີຊີວິດຢູ່ ໝາຍຄວາມວ່າ ຈະບັງຄັບບັນຊາສິ່ງດັ່ງກ່າວ ເພື່ອມັນຈະປະຕິບັດຕາມພຣະປະສົງຂອງພຣະເຈົ້າ11 ຂະນະທີ່ເຂົາເຈົ້າຮັບໃຊ້ຈຸດປະສົງຂອງລູກໆຂອງພຣະອົງ. ການປົກຄອງແມ່ນຮ່ວມດ້ວຍການບັງຄັບບັນຊາຮ່າງກາຍຂອງເຮົາເອງ.12ມັນ ບໍ່ ໄດ້ຮ່ວມທັງການເປັນເຫຍື່ອຂອງສິ່ງດັ່ງກ່າວ ຫລື ການໃຊ້ມັນຢ່າງກົງກັນຂ້າມກັບພຣະປະສົງຂອງພຣະເຈົ້າ.13
ການພັດທະນາຄວາມສາມາດທີ່ຈະປົກຄອງແຜ່ນດິນໂລກ ຈະເລີ່ມຕົ້ນຈາກຄວາມຖ່ອມຕົວ ຊຶ່ງໃຫ້ເຮົາຮັບຮູ້ຄວາມອ່ອນແອທາງມະນຸດຂອງເຮົາ ແລະ ອຳນາດທີ່ມີຢູ່ໂດຍຜ່ານທາງພຣະຄຣິດ ແລະ ການຊົດໃຊ້ຂອງພຣະອົງ. ເພາະ “ພຣະຄຣິດໄດ້ກ່າວວ່າ: ຖ້າຫາກເຈົ້າມີສັດທາໃນເຮົາ, ເຈົ້າຈະມີອຳນາດເຮັດສິ່ງໃດກໍໄດ້ຕາມທີ່ເຮົາເຫັນສົມຄວນ.”14ເຮົາສາມາດມີອຳນາດນີ້ ເມື່ອເຮົາເລືອກທີ່ຈະເຊື່ອຟັງພຣະບັນຍັດຂອງພຣະອົງ. ເຮົາຈະມີຄວາມສາມາດຫລາຍຂຶ້ນ ໂດຍການສະແຫວງຫາຂອງປະທານແຫ່ງພຣະວິນຍານ ແລະ ໂດຍການພັດທະນາພອນສະຫວັນຂອງເຮົາ.
ຂ້າພະເຈົ້າໄດ້ເກີດມາ ແລະ ໄດ້ເຕີບໂຕຂຶ້ນ ໃນສະພາບທີ່ຕ່ຳຕ້ອຍ ເໝືອນກັບຫລາຍໆຄອບຄົວຢູ່ ປະເທດອາຟຣິກາ. ຂ້າພະເຈົ້າໄດ້ມີຄວາມສາມາດທີ່ຈະເອົາຕົວລອດຈາກສະຖານະການດັ່ງກ່າວ ໂດຍການຊອກຫາ ແລະ ໄດ້ການສຶກສາດີ ດ້ວຍຄວາມຊ່ອຍເຫລືອຂອງພໍ່ແມ່. ການເຫັນເຖິງຄວາມສາມາດຂອງຂ້າພະເຈົ້າ ໄດ້ເປັນສິ່ງທີ່ສຳຄັນທີ່ສຸດສຳລັບຄວາມກ້າວໜ້າຂອງຂ້າພະເຈົ້າ. ເຊັ່ນດຽວກັບທຸກຄອບຄົວ, ເຮົາຈະປະເຊີນກັບການທົດລອງ ແລະ ການທ້າທາຍ. ແຕ່ເມື່ອເຮົາເພິ່ງອາໄສພຣະຜູ້ເປັນເຈົ້າໃຫ້ຊ່ອຍເຫລືອ, ແລ້ວເຮົາຈະໄດ້ຮັບຄຳຕອບ ທີ່ຈະນຳຄວາມສະຫງົບ ແລະ ຄວາມສະບາຍໃຈມາໃຫ້ເຮົາ, ແລະ ເຮົາຈະບໍ່ຮູ້ສຶກທໍ້ຖອຍໃຈກັບສິ່ງເຫລົ່ານີ້.
ການທ້າທາຍທີ່ປະເຊີນໜ້າສັງຄົມໃນປະຈຸບັນ ແມ່ນຮ່ວມທັງຄວາມຜິດສິນທຳ, ຮູບພາບລາມົກ, ສົງຄາມ, ຄວາມເປິເປື້ອນ, ການຕິດຢາ, ແລະ ຄວາມຍາກຈົນ, ມີຢູ່ຢ່າງຫລວງຫລາຍ ເພາະມີຫລາຍຄົນໃນໂລກທີ່ໄດ້ສະໝັກຕົວເລືອກ “ເຮັດຕາມຄວາມປະສົງຂອງມານ ແລະ ເນື້ອໜັງ”15 ແທນທີ່ຈະເຮັດຕາມພຣະປະສົງຂອງພຣະເຈົ້າ. ເຂົາເຈົ້າບໍ່ຊອກຫາພຣະຜູ້ເປັນເຈົ້າເພື່ອສ້າງຄວາມຊອບທຳຂອງພຣະອົງ, ແຕ່ມະນຸດທຸກຄົນຍ່າງໃນທາງຂອງຕົນເອງ ແລະ ຕາມລັກສະນະຂອງຕົນເອງ, ຊຶ່ງລັກສະນະນັ້ນເປັນເໝືອນກັບລັກສະນະຂອງໂລກ.”16
ເຖິງຢ່າງໃດກໍຕາມ, ພຣະເຈົ້າຍັງເຊື້ອເຊີນລູກຂອງພຣະອົງ ໝົດທຸກຄົນ ໃຫ້ຮັບເອົາຄວາມຊ່ອຍເຫລືອຈາກພຣະອົງ ເພື່ອເອົາຊະນະ ແລະ ອົດທົນກັບການທ້າທາຍໃນຊີວິດນີ້ ດັ່ງຕໍ່ໄປນີ້ວ່າ:
ພຣະອົງເປັນພຣະເຈົ້າ ພຣະອົງໄດ້ສ້າງແຜ່ນດິນໂລກ, ແລະ ມະນຸດ ກ່ອນເຂົາເຈົ້າເປັນຢູ່ໃນເນື້ອໜັງ.
… ຖ້າຫາກເຮົາຈະຫັນໄປຫາພຣະອົງ, ແລະ ຟັງສຸລະສຽງຂອງພຣະອົງ ແລະ ເຊື່ອ ແລະ ກັບໃຈຈາກການລ່ວງລະເມີດທັງປວງຂອງເຮົາ ແລະ ຮັບບັບຕິສະມາ ແມ່ນແຕ່ໃນນ້ຳ ໃນພຣະນາມຂອງພຣະບຸດອົງດຽວທີ່ຖືກຳເນີດຂອງພຣະອົງ, ແລ້ວເຮົາຈະໄດ້ຮັບຂອງປະທານແຫ່ງພຣະວິນຍານບໍລິສຸດ, ໂດຍຂໍສິ່ງທັງປວງໃນພຣະນາມຂອງພຣະອົງ, ແລະ ສິ່ງໃດກໍຕາມທີ່ເຮົາຈະຂໍ, ກໍຈະໃຫ້ມັນແກ່ເຮົາ.17
ໄພ່ພົນຍຸກສຸດທ້າຍຜູ້ສັດຊື່ທີ່ເຂົ້າໃຈຄວາມເປັນໄປໄດ້ແຫ່ງສະຫວັນຂອງຕົນ ແລະ ເພິ່ງອາໄສອຳນາດທີ່ສາມາດດ້ວຍສຸດໃຈ ທີ່ມີໃຫ້ ໂດຍຜ່ານທາງການຊົດໃຊ້ຂອງພຣະເຈົ້າພຣະເຢຊູຄຣິດ, ຈະໄດ້ຮັບພະລັງ ເພີ່ມເຕີມ ໃຫ້ແກ່ຄວາມອ່ອນແອທາງທຳມະຊາດຂອງຕົນ ແລະ “ສາມາດເຮັດໄດ້ທຸກສິ່ງທຸກຢ່າງ.”18ເຂົາເຈົ້າຈະສາມາດເອົາຊະນະການລໍ້ລວງຂອງຄວາມຊົ່ວຮ້າຍ ຊຶ່ງໄດ້ເຮັດໃຫ້ຫລາຍຄົນເປັນທາດຂອງຜູ້ປໍລະປັກ. ໂປໂລໄດ້ສອນວ່າ:
“ພຣະເຈົ້າສັດຊື່ ແລະ ພຣະອົງຈະບໍ່ອະນຸຍາດໃຫ້ການທົດລອງ ທີ່ຈະເກີດຂຶ້ນກັບພວກເຈົ້ານັ້ນມີເກີນກວ່າທີ່ພວກເຈົ້າຈະທົນໄດ້; ແລະ ເມື່ອພວກເຈົ້າຖືກທົດລອງນັ້ນ ພຣະອົງຈະໃຫ້ພວກເຈົ້າມີກຳລັງທົນໄດ້ ແລະ ມີທາງຫລີກໜີໄປດ້ວຍ.”19
“ແລະ ບັດນີ້ພຣະອົງກໍສາມາດຊ່ອຍຜູ້ທີ່ຖືກທົດລອງໄດ້ ເພາະພຣະອົງເອງໄດ້ຖືກທົດລອງ ແລະ ຖືກທົນທຸກທໍລະມານ.”20
ພຣະບິດາເທິງສະຫວັນໄດ້ສັ່ງ ແລະ ອວຍພອນເຮົາໃຫ້ແຜ່ຂະຫຍາຍ, ໃຫ້ເພີ່ມທະວີ, ແລະ ປົກຄອງແຜ່ນດິນໂລກ ເພື່ອເຮົາຈະສາມາດກາຍເປັນເໝືອນດັ່ງພຣະອົງ. ພຣະອົງໄດ້ຈັດຕຽມຄວາມຊ່ອຍເຫລືອໄວ້ໃຫ້ເຮົາ ເພື່ອວ່າ ຕາມການເລືອກດ້ວຍຄວາມສະໝັກໃຈຂອງເຮົາ, ເຮົາຈະສາມາດຈະເລີນກ້າວໜ້າ ກາຍເປັນເໝືອນດັ່ງພຣະອົງ. ຂ້າພະເຈົ້າຫວັງວ່າ ເຮົາທຸກຄົນຈະດຳລົງຊີວິດໃນທາງທີ່ເຮົາຈະຖືກຊົງນຳໂດຍມະໂນພາບທຳມະຊາດແຫ່ງສະຫວັນຂອງເຮົາ, ເພື່ອຮັບເອົາສິດທິພິເສດແຫ່ງສະຫວັນຂອງເຮົາ, ແລະ ເພື່ອບັນລຸຈຸດໝາຍປາຍທາງແຫ່ງສະຫວັນຂອງເຮົາ.
ຂ້າພະເຈົ້າເປັນພະຍານເຖິງຄວາມເປັນຈິງຂອງພຣະເຈົ້າພຣະບິດາ ແລະ ຂອງພຣະບຸດທີ່ຮັກຂອງພຣະອົງ ພຣະຜູ້ຊ່ອຍໃຫ້ລອດຂອງເຮົາ ພຣະເຢຊູຄຣິດ; ເຖິງແຜນແຫ່ງຄວາມສຸກອັນສະຫງ່າງາມຂອງພຣະອົງ; ແລະ ເຖິງຂໍກະແຈທີ່ພຣະອົງໄດ້ມອບໃຫ້ແກ່ສາດສະດາໃນໂລກ ໃນປະຈຸບັນ, ແມ່ນແຕ່ ທອມມັສ ແອັສ ມອນສັນ ຜູ້ທີ່ຂ້າພະເຈົ້າຮັກແພງ ແລະ ສະໜັບສະໜູນ. ຂ້າພະເຈົ້າອະທິຖານວ່າ ເຮົາຈະສາມາດຮັບເອົາພອນຂອງພຣະອົງຢ່າງເຕັມທີ່ ໃນພຣະນາມຂອງພຣະເຢຊູຄຣິດ, ອາແມນ.