Tej Koob Hmoov ntawm lub Tuam Tsev

Kuv cov kwv tij cov muam, kuv zoo siab vim kuv tuaj nrog nej koom ua ke tag kis sawv ntxov Hnub Easter no thaum peb tej kev xav tig mus rau tus Cawm Seej rau lub ntiaj teb. Kuv xa kuv txoj kev hlub thiab kev zoo siab rau nej txhua tus thiab thov kom peb Leej Txiv Saum Ntuj Ceeb Tsheej yuav txhawb nqa kuv cov lus.

Hauv lub rooj sab laj no kuv nco txog xya xyoo tas los lawm thaum kuv raug tsa los ua tus Thawj Tswj Hwm rau lub Koom Txoos. Tej xyoo no yeej muaj hauj lwm ntau kawg, yeej muaj tej kev cov nyom tiam sis muaj tej koob hmoov uas suav tsis txheeb li. Tej koob hmoov zoo thiab dawb ceev tshaj plaws yog qhov uas kuv muaj cib fim mus fij thiab rov qab fij tej tuam tsev tseg rau Vajtswv.

Zaum tas los lawm, thaum lub Kaum Ib Hlis Ntuj tas los no kuv muaj cib fim muab lub Tuam Tsev hauv Phoenix Arizona fij tseg. Thawj Tswj Hwm Dieter F. Uchtdorf, Txwj Laug Dallin H. Oaks, Txwj Laug Richard J. Maynes, Txwj Laug Lynn G. Robbins, thiab Txwj Laug Kent F. Richards tau koom nrog kuv. Hmo ua ntej muab fij tseg, tau muaj ib qho ua koob tsheej nco txog lawv kab lig kev cai uas muaj coob tshaj 4,000 tug tub thiab ntxhais hluas hauv koog chaw rau lub tuam tsev uas tau ua yeeb yam rau peb saib. Ces hnub tom qab ntawd tau ua peb tuas dawb ceev thiab zoo kawg thaum muab lub tuam tsev fij tseg.

Txoj kev ua cov tuam tsev qhia tseeb hais tias lub Koom Txoos yeej loj hlob tuaj. Tam sim no peb muaj 144 lub tuam tsev thoob plaws ntiaj teb no, es tab tom rov qab kho 5 lub thiab tseem ua 13 lub ntxiv. Tsis tas li ntawd xwb, twb tshaj tawm txog 13 lub ntxiv uas tseem tab tom ntaus tswv yim seb yuav pib ua cov tuam tsev. Xyoo no peb npaj siab yuav rov qab muab 2 lub tuam tsev fij tseg thiab muab 5 lub tuam tsev tshiab fij tseg uas yuav ua tiav xyoo no.

Rau ob xyoos tas los lawm, thaum peb sib zog ua cov tuam tsev uas peb twb tshaj tawm txog kom tiav tas, peb tsis tau ntaus tswv yim txog ib co tuam tsev ntxiv. Tiam sis, tag kis no, kuv zoo siab tshaj tawm txog peb lub tuam tsev tshiab uas peb yuav ua hauv tej qhov chaw no: Abidjan, Ivory Coast teb; Port-au-Prince, Haiti teb; thiab Bangkok, Thaib teb. Peb cov mej zeej uas rau siab ntseeg hauv tej chaw no yuav tau koob hmoov loj kawg nkaus, muaj tseeb tiag, txawm cov tuam tsev nyob qhov twg hauv ntiaj teb no los lawv tau koob hmoov.

Tseem ua txoj kev txiav txim txog thiab nrhiav tej chaw rau cov tuam tsev ntxiv, vim peb xav kom cov mej zeej coob npaum li coob tau yuav muaj cib fim mus rau lub tuam tsev tsis tas yuav txi sij hawm thiab nyiaj ntau ntau. Ib yam li peb tau ua yav tas los lawm, peb yuav qhia nej seb peb txiav txim li cas hais txog tej no.

Thaum kuv xav txog cov tuam tsev, kuv xav txog ntau txoj koob hmoov uas peb txais hauv. Thaum peb nkag kiag hauv lub qhov rooj rau lub tuam tsev, peb tseg txhua yam kev kub ntxhov thiab tej yam uas tab kaum peb hauv ntiaj teb no. Nyob hauv qhov chaw dawb ceev no, peb nrhiav tau kev zoo nkauj thiab txoj kev muaj kab muaj kev. Peb tus ntsuj plig tau chaw so thiab peb dim tej kev nyuaj siab hauv peb lub neej.

Thaum peb nyob hauv lub tuam tsev, peb sab ntsuj plig yuav hloov hlo thiab yuav hnov kev kaj siab lug ntau tshaj lwm yam uas peb lub siab tau hnov dua. Peb yuav pib to taub tias tus Cawm Seej hais li cas tiag thaum Nws hais tias: “Kuv muab kuv txoj kev kaj siab tso rau nej; txoj kev kaj siab uas kuv muab pub rau nej. … Nej tsis txhob txhawj, tsis txhob nyuaj siab thiab tsis txhob ntshai.”¹

Txoj kev kaj siab no nkag tau mus rau hauv ib lub siab twg los tau—tej siab uas xeeb txhob, tej siab uas muaj kev nyuaj siab ntau, tej siab uas raug kev kub ntxhov, tej siab uas xav tau kev pab.

Tsis ntev tas los lawm kuv hnov txog ib tug tub hluas uas mus rau hauv lub tuam tsev vim nws taij thov kom tau kev pab. Ntau hli ua ntej ntawd nws raug hu mus ua tub txib nram Amelikas Sab Qab Teb. Tiam sis, nws daim visa uas pub nws nkag mus txawv teb chaws pheej tsis tuaj txog ces nws raug xa mus ua tub txib hauv Teb Chaws Amelikas. Txawm nws poob siab me ntsis vim nws mus tsis tau rau qhov chaw uas nws xub raug hu mus ua tub txib ntawd, nws tseem sib zog ua hauj lwm hauv qhov chaw tshiab no, nws txiav txim siab tias nws yuav ua zoo npaum li nws ua tau. Tiam sis nws pib poob siab, vim nws pom tej yam tsis zoo nrog ib co tub txib uas zoo nkaus li xav muaj kev lom zem tsis tshua xav tshaj tawm txoj moo zoo.

Ob peb hlis tom qab ntawd tus tub hluas no muaj mob loj uas ua rau nws tuag tes tuag taw, ces tau xa nws mus tsev kom tau kev kho mob.

Ces ob peb hlis tom qab ntawd tus tub hluas no txawm zoo mob zoo nkees, nws txoj kev tuag tes tuag taw tau ploj mus. Lawv qhia nws tias nws yuav muaj cuab kav rov qab mus ua tub txib dua, txhua txhua hnub nws twb thov Vajtswv foom koob hmoov li ntawd rau nws. Tib qho uas ua rau nws poob siab yog qhov uas nws yuav tau rov qab mus rau qhov chaw ua tub txib uas nws nyob thaum nws los tsev, vim nws xav tias nyob ntawd ib txhia tub txib ua tsis tshua zoo thiab lawv tsis coj cwj pwm zoo tag nrho.

Nws tau los rau hauv lub tuam tsev nrhiav kev nplij siab thiab lus pom zoo hais tias nws yuav ua tej yam zoo thaum nws mus ua tub txib dua. Nws niam thiab txiv tau thov Vajtswv kom qhov uas nws mus hauv lub tuam tsev yuav pab nkawd tus tub thiab.

Thaum ua tuas tas es tus tub hluas mus hauv chav xilethi-aus, nws zaum ntawm ib lub rooj zaum thiab pib thov kom nws Leej Txiv Saum Ntuj Ceeb Tsheej yuav coj nws kev.

Tsis ntev tom qab ntawd muaj dua lwm tus txiv neej hluas npe hu ua Landon uas nkag los hauv chav xilethi-aus thiab. Thaum nws los hauv chav tsev ntawd, nws cia li ntsia ntsoov tus tub hluas uas zaum ntawm lub rooj zaum, qis qhov muag tab tom thov Vajtswv. Landon tau kev tshoov siab kom mus nrog tus tub hluas ntawd tham. Tiam sis, nws tsis xav txiav tus ntawd txoj kev thov Vajtswv ces, nws thiaj tos me ntsis. Tom qab ob peb na this, tus tub hluas tseem thov Vajtswv. Landon txawm paub tias nws tos tsis tau ntxiv yuav ua raws li txoj kev tshoov siab no. Nws los rau ntawm tus tub hluas thiab maj mam kov nws sab xwb pwg. Tus tub hluas qhib qhov muag, ib nyuag ceeb vim leej twg kov nws. Landon ntxhi lus hais tias, “Kuv tau kev tshoov siab hais tias kuv yuav tau nrog koj tham, tab sis mas tsis paub yog vim li cas.”

Thaum nkawd pib sib tham, tus tub hluas nthuav tag nrho nws siab ntsws rau Landon, piav hais tias nws raug xwm dab tsi thiab piav hais tias nws tsuas xav tau kev nplij siab thiab kev txhawb nqa hais txog nws txoj kev mus ua tub txib. Landon, uas nyuam qhuav los tsev ib xyoos tom qab ua ib tug tub txib zoo, piav txog qhov uas nws mus ua tub txib, tej teeb meem thiab kev txhawj xeeb uas nws muaj thiab, qhov uas nws tau thov tus Tswv kev pab, thiab tej koob hmoov uas nws tau txais. Nws cov lus pab nplij thiab txhawb nqa nws siab, nws ua rau tus tub hluas xav mus ua tub txib. Nyob nyob ces, nws tej kev ntshai pib ploj mus, ces tus tub hluas tau muaj kev kaj siab lug. Nws muaj kev ris txiaj heev vim nws paub tias Vajtswv tau teb nws zaj lus thov.

Ob tug txiv neej hluas no thov Vajtswv ua ke, ces Landon npaj yuav mus tsev, zoo siab heev vim nws tau ua raws li txoj kev tshoov siab uas nws raug ntawd. Thaum nws sawv yuav mus, tus tub hluas nug Landon hais tias, “Koj tau ua tub txib rau qhov twg?” Txog lub sij hawm no nkawd ob leeg tib si tsis tau hais tias nkawd tau mus ua tub txib rau qhov chaw twg. Thaum Landon teb hais tias nws tau mus rau qhov chaw twg, tus tub hluas no tau pib los kua muag. Landon tau ua tub txib hauv tib qho chaw uas tus tub hluas no yuav rov qab mus nyob!

Hauv ib tsab ntawv uas Landon sau rau kuv, nws qhia tias tus tub hluas hais li no rau nws tias: “Kuv twb ntseeg hais tias Leej Txiv Saum Ntuj Ceeb Tsheej yuav foom koob hmoov rau kuv, tiam sis kuv yeej tsis tau xav tias nws yuav xa ib tug los pab kuv uas tau ua tub txib hauv kuv qhov chaw ua tub txib ntag. Kuv paub tias txhua yam yeej yuav zoo.”² Twb tau hnov thiab teb txoj kev txo hwj chim thov Vajtswv ntawd.

Kuv cov kwv tij thiab cov muam, peb yuav raug tej kev ntxias hauv peb lub neej; peb yuav raug tej kev sim siab thiab tej teeb meem. Thaum peb mus hauv lub tuam tsev, thaum peb nco txog tej kev khi lus uas peb khi tseg hauv, peb yuav haj yam muaj cuab kav kov yeej tej kev ntxias ntawd thiab nyiaj mus dhau peb tej kev sim siab. Nyob hauv lub tuam tsev peb nrhiav tau kev kaj siab lug.

Tej koob hmoov hauv lub tuam tsev muaj nuj nqi uas suav tsis txheeb. Txhua hnub kuv muaj kev ris txiaj heev rau qhov kuv tus me poj niam, Frances, wb tau txhos caug ntawm lub thaj thiab tau ua tej kev sib khi lus uas muab wb sib khi ua ke tas mus ib txhis. Tsis muaj ib txoj koob hmoov uas muaj nqi tshaj qhov no vim kuv tau kev kaj siab lug thiab kev nplij siab vim kuv paub hais tias wb yeej yuav nyob ua ke dua.

Thov kom peb Leej Txiv Saum Ntuj Ceeb Tsheej yuav foom koob hmoov rau peb kom peb muaj lub siab xav teev tiam hauv lub tuam tsev, thov kom peb yuav ua raws li Nws cov lus txib, thiab kom peb yuav ua tib zoo raws peb tus Tswv thiab tus Cawm Seej, Yexus Khetos qab. Kuv ua tim khawv tias Nws yog peb tus Txhiv Dim. Nws yog Vajtswv Leej Tub. Nws tau tawm ntawm lub ntxa los thawj hnub Easter, Nws coj qhov khoom plig uas yog txoj sia nyob mus ib txhis los rau Vajtswv txhua tus me nyuam. Hauv hnub zoo nkauj kawg no, thaum peb ua koob tsheej nco txog qhov no, thov kom peb yuav muaj kev ris txiaj rau Nws qhov khoom plig zoo kawg nkaus uas Nws pub rau peb. Thov kom yuav muaj li no, kuv txo hwj chim thov li no los ntawm Nws lub npe dawb huv, amees.