2010–2019
Li osob’tesink re li santil ochoch
April 2015


Li osob’tesink re li santil ochoch

Naq noko’wulak sa’ li santil ochoch, taaruuq taachalq qik’in li musiq’anb’il aatin ut li tuqtuukil usilal.

Ex was wiitz’in raarookex inb’aan, k’a’jo’ xnimal inb’antioxihom chi wank sa’ eeyank chiru li ch’ina-usil eq’la re Paswa a’in naq naxik li qak’a’uxl rik’in aj Kolol re li ruchich’och’. Nink’e eere lin rahom ut jun sahil k’ulunik ut nintijok naq li qaChoxahil Yuwa’ tixkutanob’resi ru li waatin.

Sa’ li ch’utub’aj-ib’ a’in, wuqub’ chihab’ chaq ink’ojob’ankil choq’ Awa’b’ej re li Iglees. Laatz’eb’ li chihab’ a’in, moko yal ta nujenaq rik’in junjunq li ch’a’ajkilal, rik’ineb’ ajb’an wi’ li osob’tesink maak’a’ rajlankileb’. Sa’ xyanqeb’ li osob’tesink k’a’jo’ xsahileb’ ut xloq’aleb’, q’axal chaab’il li usilal re xk’ojob’ankileb’ ut xk’ojob’ankileb’ chi xkab’ sutil li santil ochoch.

Toje’, sa’ li noviembre, xin’usilaak rik’in xk’ojob’ankil li ak’il ut chaq’al ru santil ochoch sa’ Phoenix, Arizona. Wochb’eeneb’ aran li Awa’b’ej Dieter F. Uchtdorf, laj Elder Dallin H. Oaks, laj Elder Richard J. Maynes, ut laj Elder Lynn G. Robbins, ut laj Elder Kent  F. Richards. Sa’ li ewu rub’elaj li k’ojob’ank, xk’ulman jun chaq’al ru ninq’e b’ar wi’ ke’tz’aqon 4000 chi ch’ajom li neke’wan sa’ xweent xnub’aal lix sutam li santil ochoch. Sa’ li kutan jun, xk’ojob’aak li santil ochoch sa’ oxib’ chi loq’laj ut musiq’anb’il ch’utam.

Xkab’lankileb’ li santil ochoch naxk’utb’esi lix k’ijiik li Iglees. Anajwan wankeb’ 144 chi santil ochoch chiru li ruchich’och’, oob’ reheb’ yookeb’ chi chaab’ilob’resiik, ut oxlaju chik toj maji’ xraqe’ xkab’lankileb’. Jo’kan ajwi’, oxlaju chik li ak’ yeeb’ileb’ resil, k’uub’k’uukeb’ chaq a’b’an maji’ te’kab’laaq. Chiru li chihab’ a’in, wiib’ chik li santil ochoch te’k’ojob’aaq chi xkab’ sutil ut oob’ li ak’ santil ochoch te’k’ojob’aaq.

Chiru wiib’ chihab’ anajwan, naq yooko chi k’anjelak re xkab’lankileb’ li santil ochoch ak yeeb’ileb’ resil, ink’a’ yooko chi aatinak chirix xkomon chik li santil ochoch. A’b’anan sa’ li eq’la a’in, sa inch’ool chixyeeb’al resil eere naq oxib’ chik li santil ochoch te’kab’laq sa’eb’ li na’ajej a’in: Abdijan, Costa de Marfilt; Port-au-Prince, Haiti; ut Bangkok, Tailandia.K’a’jo’ xchaq’alil ru li osob’tesink li te’chalq rik’ineb’ aj Santil Paab’anel sa’eb’ li na’ajej a’in ut, relik chi yaal, sa’ li junjunq chi na’ajej natawman wi’ jun li santil ochoch.

Toj yooko chixtz’ilb’al rix b’ar na’aje’ ru xkomon chik li santil ochoch, xb’aan naq naqaj naq li jo’ k’ihal reheb’ li komon te’wanq rosob’tesinkil chi wulak sa’ jun li santil ochoch nach’ wan rik’ineb’. Jo’ chanchan qab’aanuhom junxil, taqaye eere jo’q’e taayeemanq resil junaq ak’ santil ochoch.

Naq yookin chixk’oxlankil chirix li santil ochoch, nin’ok chixk’oxlankil li k’iila osob’tesink naqak’ul chi sa’. Naq noko’ok sa’ roqeb’aal li santil ochoch, naqakanab’ chiqix li choqink ut li sache’k ch’oolej re li ruchich’och’. Chi sa’ li loq’laj na’ajej a’in, naqataw li k’a’ru chaq’al ru ut li tustuukilal. Wan aran xhilob’aal li qaam ut jun kolb’a-ib’ na’ajej chiruheb’ li naxik wi’ qach’ool sa’ li qayu’am.

Naq noko’wulak sa’ li santil ochoch, taaruuq taachalq qik’in li musiq’anb’il aatin ut li tuqtuukil usilal li neke’xq’axeb’ ru xchaab’ilal yalaq eek’ahom chik li na’ok sa’ lix ch’ool li winq. Taqataw ru xyaalalil li raatin li Kolonel naq kixye: “Li tuqtuukil usilal ninkanab’ eerik’in, lin tuqtuukil usilal nink’e eere … Misachk eech’ool chi k’oxlak, chi moko chexxiwaq”.1

Li tuqtuukil usilal a’in naru chi ok sa’ chixjunil paay chi ch’oolej—li ch’oolej li wan xch’a’ajkilal, li ch’oolej li nariiqa rahilal, li ch’oolej li nasache’ xch’ool, li ch’oolej li narelaji xtenq’.

Toje’ xwab’i resil jun ch’ajom li xko’o sa’ li santil ochoch chixpatz’b’al lix tenq’. Naab’aleb’ po chaq chiru a’an, kixk’ul lix b’oqb’al chi k’anjelak jo’ aj k’amol aatin sa’ Sudamerica. A’b’anan, xb’ay rib’ lix huhil chi ok sa’ li tenamit, jo’kan naq xjale’ lix b’oqb’al ut anjawan chik taawanq jo’ aj k’amol aatin sa’ li Estados Unidos. Us ta ra b’ayaq xch’ool naq moko xru ta chi k’anjelak sa’ li na’ajej xb’een b’oqb’il wi’ chi k’anjelak, a’an xk’anjelak chi kaw sa’ lix ak’il na’aj, k’eek’o xch’ool chi k’anjelak chi anchal lix metz’ew. A’b’anan, xka’ch’ino’ xch’ool rik’in naq xe’wan junjunqeb’ li rochb’een aj k’amol aatin li xe’raj xsaylankil rib’ wi’chik chiru xwotzb’al li evangelio.

Junjunq po chirix chaq a’an, li ch’ajom a’in q’axal xyajer ut xmaak a’an ch’a’aj chiru reek’asinkil rib’, jo’kan naq xtaqlaak sa’ wochoch xb’aan xyajel.

Junjunq po chirix chaq naq x’el sa’ xk’anjel, k’iresinb’il chik ut maak’a’ chik xch’a’ajkilal reek’asinkil rib’. Xyehe’ re naq taaruuq wi’ chaq chik taa’ok sa’ xk’anjel jo’ aj k’amol aatin. A’an jun osob’tesink li xpatz’ sa’ tijok wulaj wulaj. Ka’ajwi’ ra b’ayaq xch’ool naq taasutq’iiq sa’ li mision b’ar wi’ xwan junxil ut b’ar wi’ xreek’a naq lix na’leb’eb’ aj k’amol aatin moko chaab’il ta.

A’an wulajenaq sa’ li santil ochoch re taak’ojlaaq xch’ool ut taak’ehe’q re xsumenkil li rajom naq chaab’ilaq chik li k’a’ru tixk’ul jo’ aj k’amol aatin. Lix na’ xyuwa’ xe’tijok ajwi’ naq lix wanjik sa’ li santil ochoch taatenq’anq re li ralal.

Naq li ch’ajom x’ok sa’ li choxahil na’ajej re li santil ochoch chirix naq xraqe’ li k’anjel, xchunla sa’ jun li chunleb’aal ut x’ok chi tijok re xk’ulb’al xb’eresinkil rik’in lix Choxahil Yuwa’.

X’ok ajwi’ jun chik ch’ajom sa’ li choxahil na’ajej re li santil ochoch, laj Landon xk’ab’a’. Naq x’ok sa’ li na’ajej a’an, tikto xka’ya li ch’ajom chunchu sa’ li chunleb’aal, tz’aptz’o xnaq’ ru ut yoo chi tijok. Laj Landon x’eek’asiik xch’ool xb’aan li Santil Musiq’ej naq taa’aatinaq rik’in li ch’ajom jun. A’b’anan moko xraj ta xramb’al lix tij, jo’kan naq x’oyb’eni junpaataq. Chirix xnumik junjunq xtasalil hoonal toj yoo chi tijok. Laj Landon xnaw naq ink’a’ chik xru chiroyb’eninkil naq tixb’aanu li k’a’ru musiq’anb’il chiru. Xnacho’ rik’in li ch’ajom ut xch’e’ xb’een xtel. Li ch’ajom xte li ru, sachso xch’ool naq anihaq xch’e’ok re. Laj Landon xye re sa’ hasb’, “Xweek’a sa’ inch’ool naq tento taawatina, us ta ink’a’ ninnaw k’a’ut”.

Naq xe’ok chiraatinankil rib’, li ch’ajom x’ok chixyeeb’al chixjunil wan sa’ li raam re laj Landon. Xch’olob’ li k’a’ru yoo chixnumsinkil ut xraqe’ rik’in xyeeb’al naq yoo chixsik’b’al xk’ojk’ookilal ut xkawilal xch’ool chirix lix mision. Laj Landon, ak sutq’ijenaq jun chihab’ chaq sa’ xmision, xye re li k’a’ru xk’ul sa’ xmision a’an, li ch’a’ajkilal ut xka’ch’inal xch’ool xnumsi, chanru naq xpatz’ xtenq’ankil chiru li Qaawa’, ut eb’ li osob’tesink xk’ul chaq. Rik’in li raatin ut lix rahom choq’ re lix mision, xk’ojlaak xch’ool li ch’ajom. Timil timil, naq x’isiman lix xiw, li tuqtuukil usilal xchal rik’in li ch’ajom. Q’axal nim xb’antioxihom xch’ool naq xk’e reetal naq ak sumenb’il chaq lix tij.

Li wiib’ chi ch’ajom a’in wotz xe’tijok, toja’ naq xik re laj Landon, sa xch’ool naq xrab’i ut xpaab’ li musiq’anb’il na’leb’ xk’ul chaq. Naq xxaqab’ rib’ chi xik, li ch’ajom jun xpatz’ re laj Landon, “B’ar wan li mision xatk’anjelak wi’?” Naq yookeb’ chi aatinak, maji’ xye chaq re li mision xk’anjelak wi’. Naq xchaq’ok laj Landon ut xye re b’ar xwan chaq sa’ lix mision, x’ok xya’al li ru li ch’ajom. Laj Landon a’an xwan chaq choq’ aj k’amol aatin sa’ tz’aqal li mision taasutq’iiq wi’ li ch’ajom.

Sa’ jun tz’iib’anb’il esil choq’ we, laj Landon xwotz wik’in li raatin li ch’ajom jun chik naq xe’xchaq’rab’i rib’: “Xwan chaq inpaab’al naq li qaChoxahil Yuwa’ tinrosob’tesi, a’b’an maajo’q’e xink’oxla naq A’an tixtaqla we anihaq li xk’anjela sa’ tz’aqal lin mision laa’in. Anajwan ninnaw chik naq us taa’elq chixjunil.”2. Ab’inb’il ut sumenb’il chik lix q’unal tij junaq li xtijok rik’in x’anchalil lix ch’ool.

Ex was wiitz’in, te’wulaq li aaleek sa’ li qayu’am; te’wulaq li yalok-ix ut li ch’a’ajkilal. Naq nokoxik sa’ li santil ochoch, ut naq najultiko’ qe lix sumwank naqak’uub’ aran, taawanq qaseeb’al chi numtaak sa’ xb’eeneb’ li aaleek a’an ut chixpaqonkil lix yalb’al qix. Sa’ li santil ochoch tooruuq chixtawb’al li tuqtuukil usilal.

Maajo’nimal xtz’aq li osob’tesink re li santil ochoch. Jun reheb’ li osob’tesink li ninb’antioxi wi’ wulaj wulaj, a’an li k’a’ru xink’ul wochb’een lin raarookil ixaqil naq xoowiq’la chiru li loq’laj altar ut xqak’uub’ li sumwank li toxlaq’ab’ choq’ re li junelik q’e kutan. Maajun osob’tesink naxq’ax xchaab’ilal li tutquukil usilal ut xk’ojk’ookilal inch’ool chirix naq taqil qib’ wi’ chik.

Chi’osob’tesinq qe li qaChoxahil Yuwa’ re naq taawanq qik’in li musiq’ej re loq’onink sa’ li santil ochoch, re naq taqapaab’ lix taqlahom, ut re naq taqataaqe li Qaawa’ ut li Kolonel, Jesukristo. Ninch’olob’ xyaalal naq A’an aj Tojol qix. A’an li Ralal li Dios. A’an a’an li ki’el sa’ li muqleb’aal kamenaq chiru li xb’een eq’la re li Paswa, xk’amb’al chaq rik’in li maatan re li yu’am chi junelik choq’ reheb’ chixjunil li ralal xk’ajol li Dios. Sa’ li ch’ina-usil kutan a’in, naq yooko chixloq’oninkil ru li xnimal ru na’leb’ a’in, chootijoq rik’in b’antioxink xb’aan li xnimal ru maatan choq’ qe. Chi’uxq taxaq chi jo’kan, a’an intij sa’ lix loq’laj k’ab’a’, amen.

Eb’ li raqalil

  1. Jwan 14:27.

  2. Isinb’il sa’ lix huhil laj Thomas  S. Monson