Magbuót Kamo nga Magtuo
Ni Elder L. Whitney Clayton
Sang Pangulohan sang Kapituan
Ang manluluwas nagahatag sang Iya ebanghelyo bilang isa ka kasanag nga nagatuytoy sa yadtong nagabuót nga magtuo kag magsunod a Iya.
Sang nagligad nga Enero, ang pito ka tuig nga si Sailor Gutzler kag ang iya panimalay nagalupad sa eroplano halin sa Florida padulong sa Illinois sa isa ka pribado nga eroplano. Ang tatay ni Sailor amó ang piloto. Sang indi lang madugay sa kagab-ihon, ang eroplano ginsuguran sang pangmekaniko nga mga problema kag ini na-kras sa masyado kadulom nga mga bungyod sang Kentucky, nga naghugpaas sing suli sa masyado ka magasrang nga patag. Ang tanan napatay luwas lang kay Sailor. Ang iya pulso nabali sa kras. Siya nagbatitî sang mga pilas kag mga gasgas kag nadula ang iya isa ka sapatos. Ang temperatura 38 ka grado sang Fahrenheit (ukon 3 ka grado sa Celsius)—isa ka matugnaw, maulanon nga winter nga gab-i sa Kentucky—kag si Sailor nagsuksok lang sang shorts, T-shirt, kag isa lang ka medyas.
Nagpanawag siya sa iya iloy kag amay, pero walâ sing may nagsabat. Gintipon niya ang tanan nga kusog, kag nagsugod nga maglakat nga nagatiil lang pakadto sa kaumahan sa pagpangita sang bulig, nag-ubog sa mga luuk, kag mga kanal, kag ginbatas ang mga tunok sang tanom nga blackberry. Gikan sa ibabaw sang pukatod, nakit-an niya ang kasanag sa malayo, mga isa ka milya ang distansya. Nagakadasma sa sulod sang kadudulman kag kasiutan pakadto sa kasanag, sa katapusan nakaabot siya sa balay sang isa ka maayo nga tawo nga indi gid niya nakilal-an kag maabtik nga nagtabang sa iya. Si Sailor hilway na sa katalagman. Gilayon siya gindala sa ospital kag ginbuligan nga mag-ayo.1
Si Sailor nabuhi tungod nakakita siya sang isa ka kasanag sa malayo kag naghimud-os siya nga makaabot didto—wala sapayan sa matalunanon nga kaumahan, sa kadadalman sang disgrasya nga iya gin-atubang, kag ang mga samad nga iya naagom. Mabudlay isipon kon paano ni Sailor nahimo ang iya ginhimo sinang gab-i. Pero kita nakahibalo nga siya nakakilala nga sa kasanag sinang malayo nga balay may kahigayunan siya nga matabangan. May paglaum sadto. Nagpakaisog siya sa kamatuoran nga bisan ano kalain ang mga butang sa iya kahimtangan, ang iya panabang makita sa sinang kasanag.
Pila lang sa aton ang makabatas bisan san-o man sang isa ka inagihan subong ka sakit sang inagihan ni Sailor. Pero tanan kita, sa kon san-o nga panahon, makaagi sa aton espirituhanon nga talunan kag mag-atubang sa aton magasrang nga mga panglakaton sang balatyagon. Sa yadtong mga tinion, bisan daw ano kadulom ukon walay paglaum ang mga ini, kon kita magpangita sini, may nagapadayon gid nga espirituhanon nga kasanag nga nagapanawag sa aton, nga nagahatag sang paglaum sang pagtabang kag pagpaumpaw. Inang kasanag nagasiga halin sa Manluluwas sang katawhan, nga amó ang Kapawa sang Kalibutan.
Ang paghangop sang espirituhanon nga kasanag iban sang sa pagkakita sang natural nga kasanag. Ang pagkilala sang espirituhanon nga kapawa sang Manluluwas nagasugod sa aton kabubut-on nga magtuo. Ang Diyos una nga nagapaabot nga sa kadiutayan kita maghangad nga magtuo. ”Kon magbugtaw kamo kag pukawon ninyo ang inyo mga ikasarang sang hunahuna ... kag maggamit sang isa ka tipik sang pagtuo,” ang propeta nga si Alma nagatudlo, ”huo, bisan pa nga indi na kamo maglabaw sangsa maghandum sa pagpati, tuguti ini nga handum sa paghikot sa sulod ninyo, bisan tubtob nga kamo magapati sa isa ka paagi nga mahatagan ninyo sing duog para sa isa ka bahin sang mga pulong [sang Ginuo]”2
Ang panawag ni Alma sa aton tanan nga maghandom sa pagpati ka g ”maghatag sang duog” sa aton mga tagipusuon sa mga pulong sang Manluluwas nagapahanumdom sa aton nga ang pagpati kag pagtuo nagakinahanglan sang aton personal nga pagpili kag paghimo. Dapat kita magbugtaw kag pukawon naton ang [aton] ikasarang nga mga hunahuna.” Nagapangayo kita bag-o kita hatagan; nagapangita kita bag-o kita makakita; nagapanuktok kita bag-o kita pagabuksan. Dayon kita ginahatagan sining promisa: ”Kay ang nagapangayo, ginahatagan; kag ang nagapangita, makakita; kag ang nagapanuktok pagaabrihan.”3
Wala na sang tudok sa tagipusuon nga pangabay sa aton nga magtuo sangsa nagahalin sa Manluluwas mismo sang tion sang iya dutan-on nga pag-alagad, sang Siya nagpangabay sa Iya di-nagapati nga mga manugpalamati:
”Kon ako walâ nagahimo sang mga buhat sang akon Amay, indi ninyo ako pagpatiha.
”Pero kon ginabuhat ko ini, bisan indi kamo magtuo sa akon, patiha ninyo ang akon mga binuhatan: agud nga mahibaloan ninyo, kag magpati kamo, nga ang Amay yari sa akon, kag ako yara sa iya.”4
Sa tagsa ka adlaw ang kada isa sa aton nagaatubang sang pagtilaw: magapili balá kita nga magtuo sa Iya kag magtugot sa kapawa sang Iya ebanghelyo nga magpadaku sa aton tagipusuon, ukon kita balá mangindi sa pagtuo kag magpilit sa pagpanakayon nga nagaisahanon sa kadudulman? Ang Manluluwas nagahatag sang Iya ebanghelyo bilang isa ka kasanag nga nagatuytoy sa yadtong nagabuót nga magtuo kag magsunod a Iya.
Pagkatapos sang kras, si Sailor may isa ka pagpili. Kon ayhan nagili siya nga magpabilin sa eroplano sa kadudulman, nagaisahanon kag nahadlok. Pero ang kagab-ihon malaba, kag magadugang lang ang katugnaw, Nagpili siya sang iban nga paagi. Si Sailor nagtaklad sa pukatod, kad didto nakita niya ang kasanag sa palanan-awan.
Hinayhinay, samtang nakita niya ang alagyan sa kagab-ihon padulong sa kasanag, ini nadugangan nga nagsiga. Bisan pa, basi may mga tion nga indi niya makita ini. Basi ini nadula sa iya panulok sang yara siya sa dal-og ukon sa likuran sang mga kakahuyan ukon mga kahuy-kahoy, apang siya nagpadayon. Basta nga makit-an niya ang kasanag, may pamat-od si Sailor nga yara siya sa husto nga dalan. Indi pa niya nahibal-an sing pat-od kon ano yadto nga siga, pero siya nagpadayon nga maglakat padulong didto suno sa iya nahibal-an, nagsalig kag naglaum nga makit-an niya ini sa liwat kon siya padayon sa husto nga direksyon. Sa paghimo sadto, amó ayhan ang nagluwas sang iya kabuhi..
Ang aton mga kabuhi kasubong man sina. Kon kaisa may mga tion nga kita nasamad, kon kita nalapyo, kag ang aton mga kabuhi daw madulom kag matugnaw. May mga tion nga indi naton makita ang kasanag sa palanan-awan, kag daw mawad-an kita sang paglaum. Kon kita buót nga magtuo, kon kita luyag nga magtuo, kon kita magpili nga magtuo, dayon ang mga panudlo sang Manluluwas kag ang Iya ehemplo magapakita sa aton sang padulungan.
Magbuót nga Magtuo
Subong nga si Sailor nagtuo nga luwason siya sang kasanag nga nagasiga sa kalayuan, kita man dapat nga magpili sa pagbukas sang aton mga tagipusuon sa diyosnon nga kamatuoran sang Manluluwas—kag sa Iya walay katapusan nga kapawa kag Iya nagapaayo nga kaluoy. Ang mga propeta sa tanan nga panahon nagapaisog sa aton kag bisan pa gani nagapakitluoy sa aton nga magtuo kay Cristo. Ang ila mga panudlo nagasandig sa makahulugan nga kamatuoran: Ang Diyos walâ nagapilit sa aton nga magtuo. Sa tigaylo Siya naga-imbita sa aton nga magtuo paagi sa pagpadala sang buhi nga mga propeta kag mga apostoles nga magtudlo sa aton, sa paghatag sang balaan nga mga kasulatan, kag magpakilala sa aton paagi sa Iya Espiritu. Kitá amó ang magpili nga magbaton sang yadtong espirituhanon nga mga pangagda, magpili nga makakita sa aton espirituhanon nga mga mata sang espirituhanon nga kasanag nga sa diin Iya kita ginatawag. Ang pagbuót nga magtuo amó ang pinakaimportante nga pagpili nga aton mahimo bisan san-o man. Ini nagapamat-od sang tanan naton nga mga pagpili.
Ang Diyos walâ nagapilit sa aton nga magtuo subong nga Siya indi nagapilit sa aton nga magtuman sang Iya mga kasuguan, bisan pa nga ang Iya himpit nga luyag amó ang magbugay sa aton. Pero ang Iya pagtawag sa aton nga magtuo sa Iya—nga maghimo sinang tipik sang pagtuo kag maghatag sang lugar sa Iya mga pulong—nagapabilin sa gihapon subong. Sa ginsiling sang Manluluwas, ”Nagapamatuod ako nga ginasugo sang Amay ang tanan nga mga tawo, bisan diin, sa paghinulsol kag magpati sa akon.”5
Ang pagpati kag ang pagpamatuod kag ang pagtuo indi mga prinsipyo nga indi nagalihok. Indi sila nagakatabo lang. Ang pagpati isa ka butang nga aton ginapili—ginalauman naton ini, kag nagabatas kita para sini. Indi kita aksidente nga makatuo sa Manluluwas kag sang Iya ebanghelyo subong man nga indi kita aksidente lang nga magpangamuyo ukon magbayad sang ikanapulo. Kita aktibo nga nagapili nga magtuo, subong nga kita nagapili nga magtuman sang iban pa nga mga kasuguan.
Ibutang ang Pagtuo sa Paghimo
Si Sailor walâ nakahibalo sa una pa lang kon ang iya ginahimo samtang siya nagaduso sang iya kaugalingon sa idalom sang mga kahuy-kahoy matuod nga magaobra. Siya nadula kag nasamad; yadto madulom kag matugnaw. Pero iya ginbayaan ang lugar sang kras kag nagtilaw nga maggwa sa paglaum nga siya maluwas, nagkamang kag nagdutdot pasulong sa iya alagyan tubtob nga makita niya ang kasanag sa malayo. Sa kaisa nga pagkakita sini, matutom nga nagpadulong siya didto, nga nadumdoman ang iya nakita.
Kita man dapat maghatag sang lugar sa paglaum nga makakita kita sang espirituhanon nga kasanag paagi sa pagtuo sa tigaylo nga magpili sang pagduhaduha. Ang aton hinimuan amó ang kaseguruhan sang aton pagtuo kag mangin unod kag kaseguruhan sang aton pagtuo. Kita nagabuót nga magtuo kon kita nagapangamuyo kag kon kita nagabasa sang balaan nga mga kasulatan. Kita nagabuót nga magtuo kon kita nagapuasa, kon kita nagapakabalaan sang Adlaw sang Pagpahuway, kag kon kita nagasimba sa templo. Kita nagabuót nga magtuo kon kita nagapabunyag kag nagapakig-ambit sang sakramento. Kita nagabuót nga magtuo kon kita nagahinulsol kag nagapangayo sang balaan nga pagpatawad kag paghigugma nga nagapaayo.
Indi Gid Mawad-an sang Paglaum
Kon kaisa ang pag-uswag sa espirituhanon nga mga butang daw masyado kahinay kag talagsahon. Kon kaisa daw aton mabatyagan nga nagaluya kita kag ang aton pinakamaayo nga kabudlay nga makilala ang Manluluwas walâ sing pulos. Kon kamo nagabatyag sini, kabay pa indi kamo magdula sang paglaum—bisan san-o man. Magpadayon kamo nga magtuo sa Iya kag sa Iya ebanghelyo kag sa Iya Simbahan. Ipasantu ang inyo mga hinimuan sa inyo mga pagtuo. Sa yadtong mga tinion kon ang kasanag sang inyo pagtuo nagadulom, tuguti ninyo nga ang inyo paglaum sa paghigugma kag grasya sang Manluluwas, nga makita sa Iya ebanghelyo kag sa Iya Simbahan, magdaug sang inyo pangduhaduha. Ako nagapanaad nga Siya handa nga magbaton sa inyo. Sa sulod sang panahon makaangkon kamo sang paghangop nga kamo nakapili sa inyo ikasarang sang pinakamaayo nga pagpili. Ang inyo maisog nga pamat-od nga magtuo sa Iya magapakamaayo sa inyo sing walay katumbas kag walay katapusan.
Ang Mga Bugay sang Pagtuo
Ako nakabatyag sang maluluy-on nga paghigugma sang Manluluwas sa akon kabuhi. Ako nagpangita sa Iya sa akon mga tinion sang kadudulman, kag Siya nagkari sa akon kaupod ang Iya nagapaayo nga kasanag. Ang isa sa mga daku nga kalipayan sang akon kabuhi amó ang pagpakigbiyahe kaupod ang akon asawa, nga si Kathy, sa pagkilala sang mga miyembro sang Simbahan sa madamo nga bahin sang kalibutan. Ining mga talagsahon nga mga hitabo nagtudlo sa akon nahanungod sa pagpalangga sang Diyos sa Iya mga kaanakan. Sila nagpakita sa akon sang walay katumbas nga ikasarang sang kalipayan nga maangkon sang yadtong nagabuót nga magsunod sa mga panudlo sang Ginuong JesuCristo. Natun-an ko nga ang pagtuo sa Iya kag sa Iya nagapanubos nga gahum amó ang matuod-tuod nga alagyan padulong sa ”paghidaet diri sa kalibutan, kag sa walay katapusan nga kabuhi sa magaabot nga kalibutan.”6
Ako nagapamatuod nga si JesuCristo amó ang ginahalinan sang kapawa kag paglaum para sa aton tanan. Ako nagapangamuyo nga tanan kita magbuót nga magtuo sa Iya. Sa ngalan ni JesuCristo, amen.