Xaiv Kev Ntseeg

Lub Ib Hlis Ntuj tas los, ib tug me nyuam ntxhais uas muaj xya xyoos, Sailor Gutzler, thiab nws tsev neeg caij nyab hoom los ntawm Florida mus rau Illinois. Sailor txiv yog tus uas tsav lub nyab hoom. Tom qab hmo ntuj lawm, lub nyab hoom muaj teeb meem thiab poob rau hauv lub xeev Kentucky thaum tsaus ntuj nti, poob khwb rwg nyob rau hauv toj roob hauv pes. Txhua tus tuag tsuas tshuav Sailor xwb. Nws lub pob tes tau dam thaum lub nyab hoom poob. Nws ib ce to tag thiab nws nkawm khau xiam. Huab cua muaj 38 degree no heev (3 degree Celsius)—yog ib hmo no no thiab los nag nyob hauv Kentucky—thiab Sailor hnav ris luv, ib lub tsho, thiab ib sab thoom thaub xwb.

Nws qw nrov rau nws niam thiab txiv, tiam sis tsis muaj leej twg teb. Nws ua siab loj mus ko taw liab qab taug qhov chaw tom ntug nroog nrhiav kev pab, plos cov me nyuam dej, hla kwj, thiab raug pos chob. Thaum nws nyob saum ib lub toj me me, Sailor pom ib lub teeb nyob deb li ib mais. Nws pheej ntshaus ceg nyob rau hauv kev tsaus ntuj nti thiab mus rau lub teeb ntawd, thaum kawg nws tuaj txog ib lub tsev ntawm ib tug txiv neej siab zoo uas nws tsis tau paub uas tau pab nws. Sailor twb nyab xeeb lawm. Tsis ntev ces lawv coj nws mus rau lub tsev kho mob kom pab nws zoo mob.¹

Sailor tiv dhau vim nws pom ib lub teeb nyob deb, thiab siv zog mus txog—txawm nws yuav tsum hla hav zoov, nws nyuaj siab, thiab nws raug mob. Yeej nyuaj rau peb xav txog tej uas Sailor tau ua hmo ntawd. Tiam sis peb paub tias nws twb xav tias lub teeb nyob hauv lub tsev ntawd tej zaum yuav pab tau nws. Muaj kev cia siab. Nws ua siab loj hais tias txawm nyuaj npaum li cas los, lub teeb ntawd yuav pab cawm nws dim.

Peb feem coob yeej yuav tsis raug xwm txheej nyuaj npaum li Sailor. Tiam sis peb txhua tus nyias yuav tsum hla nyias lub hav zoov ntawm sab ntsuj plig thiab nyias taug nyias txoj kev ntawm lub siab lub ntsws. Thaum tej lub sij hawm ntawd, txawm tsaus ntuj nti los yog peb xav tias tsis muaj kev cia siab, yog peb nrhiav, ces yeej yuav muaj qhov kaj ntawm sab ntsuj plig uas thov peb los, muab kev cia siab rau peb tias peb yuav dim. Qhov kaj ci tuaj los ntawm tus Cawm Seej ntawm tib neeg txhua tus, tus uas yog neeg ntiaj teb txoj kev kaj.

Kev pom qhov kaj ntawm sab ntsuj plig tsis zoo ib yam li kev pom qhov kaj ntawm sab cev nqaij daim tawv. Yog peb xav pom tus Cawm Seej txoj kev kaj ntawm sab ntsuj plig peb yuav tsum txaus siab ntseeg. Vajtswv hais tias peb yuav tsum xav ntseeg. Tus yaj saub Amas qhia tias, “Yog nej yuav tsim thiab siv tej hlwb … thiab los muab ib qho kev ntseeg me me sim, muaj tseeb tiag, yog tsis muaj dab tsi ntau tshaj li uas nej xav los ntseeg, cia lub siab xav ntseeg no ua hauj lwm nyob hauv nej, mus txog thaum nej ntseeg zoo li qhov uas nej muab tau ib qho chaw rau [tus Cawm Seej] tej lus nyob.”²

Qhov uas Amas hais kom peb xav ntseeg thiab “muab tau ib qho chaw” nyob hauv peb lub siab rau tus Cawm Seej tej lus ua rau peb nco qab hais tias kev ntseeg nyob ntawm seb peb txiav txim siab ua li cas. Peb yuav tsum “tsim thiab siv [peb] tej [peev xwm].” Peb nug ua ntej Vajtswv muab rau peb; peb nrhiav ua ntej peb nrhiav tau; peb kho ua ntej Vajtswv qhib rau peb. Ces tus Tswv cog lus tias: “Vim txhua tus uas thov, twb tau txais; thiab tus uas nrhiav, twb ntsib; thiab rau tus uas khob, nws yeej yuav raug qhib.”³

Tsis muaj leej twg uas tau siv zog thov kom peb los ntseeg tshaj tus Cawm Seej, thaum Nws ua hauj lwm qhuab qhia cov uas tsis ntseeg Nws.

“Yog kuv tsis ua tej hauj lwm uas kuv Txiv kom kuv ua, ces nej tsis txhob ntseeg kuv tej lus.

“Tiam sis kuv twb ua tej hauj lwm ntawd lawm, txawm yog nej tsis ntseeg kuv los nej yuav tsum ntseeg tej hauj lwm uas kuv ua ntawd; nej yuav paub hais tias Leej Txiv thiab kuv koom ib txoj sia.”⁴

Txhua hnub peb sawv daws raug sim siab. Yog kev sim siab tseem ceeb tshaj plaws ntawm peb lub neej: peb puas yuav xaiv ntseeg Nws thiab cia txoj kev kaj ntawm txoj moo zoo loj hlob nyob hauv peb, los sis peb puas tsis ntseeg thiab taug kev peb ib leeg nyob hauv qhov tsaus ntuj nti? Tus Cawm Seej muab Nws txoj moo zoo tsa ua ib lub teeb kom pab coj cov uas xaiv ntseeg Nws.

Tom qab lub nyab hoom poob, Sailor yuav tsum txiav txim siab. Nws nyob tau ze rau lub nyab hoom nyob hauv qhov tsaus ntuj, nyob nws ib leeg thiab ntshai. Tiam sis nws yuav tsum nyob tas ib hmo, thiab yuav txias zuj zus tuaj. Nws tau xaiv lwm txoj kev. Sailor nce toj, es nws pom tau ib lub teeb ntawm qab ntug.

Thaum Sailor taug kev mus nyob ze lub teeb ntawd, ces qhov kaj ntawd ci loj zuj zus tuaj. Tiam sis, nyaj muaj tej lub sij hawm thaum nws pom tsis taus. Tej zaum nws pom tsis taus thaum nws nyob hauv lub kwj ha los sis cov tsob ntoo tav kev, tiam sis nws tseem thawb mus tom ntej. Thaum twg nws pom qhov kaj, Sailor paub tias nws taug txoj kev yog. Nws tsis tau paub tias qhov kaj ntawd yog dab tsi, tiam sis nws tseem taug kev mus rau qhov kaj ntawd vim nws paub yog ib qho zoo, nws cia siab hais tias nws yuav rov qab pom yog tias nws taug txoj kev mus raws li qhov yog. Vim nws ua li no, tej zaum nws twb cawm nws tus kheej.

Peb lub neej yeej zoo ib yam li ntawd tau thiab. Tej zaum muaj sij hawm thaum peb muaj mob muaj nkeeg, thiab thaum peb lub neej nyob tsaus ntuj nti thiab no no. Tej zaum muaj tej lub sij hawm thaum peb tsis pom qhov kaj nyob ntawm qab ntug, thiab peb xav tso tseg. Yog peb txaus siab ntseeg, yog peb xav ntseeg, yog peb xaiv kev ntseeg, ces tus Cawm Seej tej lus qhia thiab tus yam ntxwv yuav qhia kev rau peb mus tom ntej.

Xaiv Kev Ntseeg

Ib yam li Sailor yuav tsum ntseeg tias nws yuav muaj kev nyab xeeb thaum nws mus txog qhov kaj ntawd, peb kuj yuav tsum qhib peb lub siab rau qhov uas muaj tus Cawm Seej tiag tiag—rau Nws txoj kev kaj nyob mus ib txhis thiab lub siab hlub. Cov yaj saub nyob hauv txhua lub caij nyoog twb hais thiab thov kom peb ntseeg Khetos. Lawv qhia peb raws li ib qho tseeb uas tseem ceeb: Vajtswv tsis yuam peb ntseeg. Nws caw peb ntseeg thaum nws xa cov yaj saub thiab cov thwj tim qhia peb, muab vaj lug kub rau peb, thiab thov peb los dhau los ntawm Nws tus Ntsuj Plig. Peb yog cov uas yuav tsum xaiv seb peb puas xav ua raws li tej lus ntawd, thiab pom qhov kaj ntawm sab ntsuj plig uas Nws siv kom hu peb los. Kev txiav txim siab tias peb yuav ntseeg yog kev txiav txim siab tseem ceeb tshaj plaws. Qhov no yuav hloov tag nrho peb tej kev txiav txim siab.

Vajtswv tsis yuam peb ntseeg ib yam li Nws tsis yuam peb ua raws li cov lus txib, txawm yog Nws xav foom koob hmoov rau peb. Tiam sis qhov uas Nws hu kom peb ntseeg Nws—kom peb siv qhov me me ntawm kev ntseeg thiab npaj ib qho chaw rau Nws tej lus—Nws tseem hu li ntawd niaj hnub no. Ib yam li tus Cawm Seej hais tias, Nws ua tim khawv tias Leej Txiv txib tag nrho cov neeg, nyob qhov txhia chaw, kom lawv hloov siab lees txim thiab ntseeg Nws.⁵

Tsis yog peb yuav lam tau kev ntseeg thiab ib zaj lus tim khawv. Tsis yog peb raug tej yam no xwb. Kev ntseeg yog ib yam uas peb xaiv—peb cia siab rau, ua hauj lwm rau, thiab ua kev txi kom tau kev ntseeg. Tsis yog peb yuav lam los ntseeg tus Cawm Seej thiab Nws txoj moo zoo ib yam li peb yuav tsis lam thov Vajtswv thiab lam them ib feem kaum. Peb xaiv kev ntseeg, ib yam li peb xaiv ua raws li cov lus txib.

Ua Raws Li Kev Ntseeg

Sailor tsis tau paub tias thaum nws thawb mus tom ntej rau hauv cov me nyuam nroj tsuag yog nws yuav txais kev pab. Nws poob zoo thiab raug mob; tsaus ntuj thiab no no heev. Tiam sis nws tawm lub nyab hoom mus cia siab hais tias nws yuav dim, nkag thiab fawb mus tom ntej mus txog thaum nws pom qhov kaj ntawd. Tom qab nws pom lub teeb, nws rau siab mus rau lub teeb ntawd, thiab nws nco qhov uas nws pom.

Peb kuj yuav tsum cia siab tias peb yuav nrhiav qhov kaj ntawm sab ntsuj plig thaum peb ntseeg thiab tsis txhob ua xyem xyav. Tej yam peb ua yog kev ua pov thawj txog peb txoj kev ntseeg. Peb xaiv kev ntseeg thaum peb thov Vajtswv thiab nyeem vaj lug kub. Peb xaiv kev ntseeg thaum peb yoo mov, thaum peb hwm Hnub Caiv, thiab thaum peb teev tiam hauv lub tuam tsev. Peb xaiv kev ntseeg thaum peb ua kev cai raus dej thiab thaum peb txais lub cim nco txog. Peb xaiv kev ntseeg thaum peb hloov siab lees txim thiab thov kom Vajtswv zam txim pub rau peb thiab txais tau Nws txoj kev hlub.

Txhob Tag Kev Cia Siab

Tej lub sij hawm peb xav tias peb txoj kev vam meej ntawm sab ntsuj plig twb nres lawm los yog maj mam mus. Tej lub sij hawm peb xav tias peb nyob deb dua li yav tas los, peb tau ua yuam kev, los sis txawm peb sib zog ua kom nyob ze tus Cawm Seej los peb tseem nyob deb heev. Rau nej cov uas xav li no, thov kom nej tsis txhob tag kev cia siab hlo li. Cia li ntseeg Nws thiab Nws txoj moo zoo thiab Nws lub Koom Txoos. Ua raws li nej ntseeg. Thaum qhov kaj ntawm nej txoj kev ntseeg twb qauj lawm, cia nej txoj kev cia siab rau tus Cawm Seej txoj kev hlub thiab kev tshav ntuj, uas muaj nyob hauv Nws txoj moo zoo, thiab Nws lub Koom Txoos kov yeej nej txoj kev ua xyem xyav. Kuv cog lus tias Nws yeej tos txais nej. Sij hawm dhau mus ces nej yuav pom tias nej tau xaiv tej yam zoo. Qhov uas nej txiav txim siab ntseeg Nws yuav foom koob hmoov rau nej mus ib txhis li.

Cov Koob Hmoov Los ntawm Kev Ntseeg

Kuv tau paub txog tus Cawm Seej txoj kev hlub hauv kuv lub neej. Kuv tau nrhiav Nws thaum kuv nyob hauv qhov tsaus ntuj, thiab Nws tau pab kuv nrog Nws txoj kev kaj uas kho taus kuv. Ib qho uas ua rau kuv xyiv fab heev hauv kuv lub neej yog qhov uas kuv muaj cib fim nrog kuv tus poj niam, Kathy, mus ntsib cov mej zeej ntawm lub Koom Txoos nyob thoob plaws lub ntiaj teb no. Tej kev sib ntsib no twb qhia kuv ntau yam txog Vajtswv txoj kev hlub rau peb. Tej no tau qhia kuv tias cov uas xaiv ua raws li tus Tswv Yexus Khetos tej lus qhia txais koob hmoov ntawm kev zoo siab. Kuv tau kawm tias qhov uas peb ntseeg Nws thiab Nws txoj kev txhiv dim yog txoj kev tseeb kom peb txais tau kev kaj siab lug thiab txoj sia nyob mus ib txhis hauv lub neej tom ntej.⁶

Kuv ua tim khawv hais tias Yexus Khetos yog lub hauv paus ntawm qhov kaj thiab kev cia siab rau peb txhua tus. Kuv thov kom peb yuav xaiv ntseeg Nws. Los ntawm Yexus Khetos lub npe, amees.