Lipooti ʻa e Potungāue ʻAotita ʻa e Siasí ki he 2014
Ki he Kau Palesitenisī ʻUluakí ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní
Siʻi Kau Taki: Hangē ko ia ʻoku fakamatalaʻi ʻi he fakahā he vahe 120 ʻo e Tokāteline mo e Ngaahi Fuakavá, ʻoku fakamafaiʻi ʻe he Fakataha Alelea ki Hono Fakaʻaongaʻi ʻo e Vahehongofulú,ʻa ia ʻoku kau ki ai e Kau Palesitenisī ʻUluakí, Kōlomu ʻo e Kau ʻAposetolo ʻe Toko Hongofulu Mā Uá mo e Kau Pīsopeliki Pulé, ʻa e fakamole kotoa pē ʻoku fai mei he paʻanga ʻa e Siasí. ʻOku vahevahe ʻe he ngaahi potungāue ʻa e Siasí e paʻangá ʻo fakatatau mo e ngaahi patiseti, tuʻutuʻuni mo e ngaahi founga ngāue kuo fakangofuá.
Ko e Potungāue ʻAotita ʻa e Siasí ʻoku ʻi ai ha kau taukei tauhitohi kuo fakamoʻoniʻi pea tauʻatāina mei he ngaahi potungāue kotoa ʻa e Siasí, pea ko honau fatongiá ke fai e ngaahi ʻaotitá ʻo fakataumuʻa ke fakapapauʻi e ngaahi tokoni ʻoku maʻú, fakamole ne fakahokó pea maluʻi e koloa ʻa e Siasí.
Fakatatau mo e ngaahi ʻaotita kuo fakahokó, ʻoku pehē ai ʻe he Potungāue ʻAotita ʻa e Siasí, ko e ngaahi nāunau kotoa pē, ngaahi tokoni ne maʻu maí, fakamole kuo fakahokó pea mo e koloa ʻa e Siasí ki he taʻu 2014, kuo lekooti pea fakahoko fakatatau mo e patiseti ʻa e Siasí kuo fakangofuá, tuʻutuʻuní mo e ngaahi founga fakatauhitohí. ʻOku muimui ʻa e Siasí ʻi he ngaahi founga ʻoku akoʻi ki hono kau mēmipá ke nofo ʻi loto he patisetí, fakaʻehiʻehi mei he fakamoʻuá, pea fakahū ha paʻanga ki he taimi ʻo e faingataʻá.
Fakahū atu ʻi he loto fakaʻapaʻapa moʻoni,
Potungāue ʻAotita ʻa e Siasí
Kevin R. Jergensen
Talēkita Pulé