Cov uas Tiv Thaiv Kev Tshaj Tawm txog Tsev Neeg

Kuv zoo siab koom nrog pawg me nyuam ntxhais thiab poj niam no. Peb cov poj niam yeej tau koob hmoov vim peb sib hlub thiab koom ua ke hmo no.

Daim Duab

Old portrait of Marie Madeleine Cardon

Tsis ntev tas los kuv nyeem ib zaj dab neeg txog Marie Madeline Cardon, uas tau txais Yexus Khetos txoj moo zoo nrog nws tsev neeg los ntawm thawj cov tub txib uas Vajtswv tau hu mus ua hauj lwm nyob hauv lub teb chaws Italis nyob rau xyoo 1850. Nws yog ib tug ntxhais hluas uas muaj 17 los yog 18 xyoo thaum lawv ua kev cai raus dej. Muaj ib hnub Sunday, thaum nws tsev neeg muaj kev sib ntsib teev tiam Vajtswv nyob hauv lawv lub tsev pem roob Alps nyob hauv Italis Sab Qaum Teb, muaj ib pawg txiv neej chim siab, ib feem yog cov xib hwb ntawm lwm lub tsev teev ntuj, es lawv nyob puag ncig lawv lub tsev thiab qw nrov nrov kom lawv coj ob tug tub txib tuaj sab nraud. Kuv tsis xav tias lawv xav kawm txog txoj moo zoo—lawv xav ua phem rau ob tug tub txib ntawd. Marie yog tus uas mus sab nraud sib tham nrog pawg neeg phem ntawd.

Lawv qw nrov ntxiv kom lawv coj ob tug tub txib tuaj. Marie tuav phau Npaiv Npaum thiab tsa nws sab tes thiab txib lawv khiav mus. Nws hais tias nws yog tus uas pov hwm ob tug txwj laug ntawd thiab nws tsis pub lawv ua rau nkawd mob tsis hais ib txog plaub hau los yog. Cia li mloog nws hais li cas: “Txhua tus xav tsis thoob. … Vajtswv nrog nraim kuv nyob. Nws tau tso cov lus ntawd nyob hauv kuv lub qhov ncauj, tsis li ntawd ces kuv yeej hais tsis tau. Txhua yam twb nyob kaj siab lug. Pawg txiv neej lim hiam ntawd twb sawv rau ntawm ib tug ntxhais qaug zog uas tsis ntshai hlo li.” Cov xib hwb hais kom pawg txiv neej ntawd khiav mus, es lawv txhua tus txaj muag, thiab tu siab mus. Pawg ntseeg ntawd twb sib ntsib es tsis muaj teeb meem ntxiv.¹

Nej puas pom tus ntxhais hluas siab loj ntawd, uas muaj hnub nyoog ib yam li nej feem coob, tawm tsam ib pawg neeg phem thiab rau siab tiv thaiv nws txoj kev ntseeg?

Cov viv ncaus, peb feem ntau yeej yuav tsis tas tawm tsam ib pawg neeg phem li no, tiam sis nyob hauv lub ntiaj teb no yeej muaj tib neeg uas tawm tsam peb cov lus qhuab qhia. Kuv hais txog cov lus qhuab qhia ntawm tsev neeg. Tib neeg cem, thuam thiab tawm tsam lub ntsiab uas qhia vim li cas peb muaj ib tsev neeg thiab qhov uas peb lub tsev yeej dawb huv.

Thaum Thawj Tswj Hwm Gordon B. Hinckley nyeem “Tsev Neeg: Ib zaj Lus Tshaj Tawm rau lub Ntiaj Teb” 20 xyoo tas los, peb saib zaj no rau nqi vim zaj no yeej meej, yooj yim to taub thiab qhia qhov tseeb. Thaum ntawd peb tsis tau paub hais tias peb yuav xav tau tej lus tshaj tawm no niaj hnub no kom peb yuav paub txiav txim siab txog txhua lub tswv yim uas los ntawm xov xwm, Internet, cov neeg txawj ntse, TV, yees duab, thiab cov kws lij choj. Zaj lus tshaj tawm txog tsev neeg twb yog peb txoj kev saib seb neeg ntiaj teb tej lub tswv yim puas zoo, thiab kuv ua tim khawv hais tias tej ntsiab cai uas lawv sau rau hauv zaj lus no muaj tseeb hnub no ib yam li tej lus no muaj tseeb txij thaum Vajtswv tus yaj saub tau muab tej no rau peb 20 xyoo tas los.

Kuv xav hais ib qho uas txhua tus paub lawm. Yus lub neej yeej tsis zoo li yus xav, thiab peb txhua tus paub tias tsis yog txhua tus poj niam uas muaj lub neej raws li zaj lus tshaj tawm no piav txog. Tiam sis peb tseem yuav tsum to taub thiab qhia tus Tswv txoj kev thiab siv zog kom muaj raws li Nws txoj kev.

Peb txhua tus muaj ib lub luag hauj lwm nyob hauv Nws txoj hau kev, thiab tus Tswv saib peb txhua tus rau nqi zoo ib yam. Peb yuav tsum nco ntsoov tias Leej Txiv Saum Ntuj Ceeb Tsheej paub txog peb tej kev xav ncaj ncees thiab yuav ua raws li Nws tau cog lus tias tsis muaj dab tsi uas yuav txwv tsis pub cov uas rau siab ua raws li lawv tej kev khi lus. Leej Txiv Saum Ntuj Ceeb Tsheej muaj ib lub luag hauj lwm rau peb txhua tus, tiam sis Nws kuj tau teem sij hawm. Ib qho uas nyuaj tshaj hauv lub neej no yog qhov uas peb yuav tsum ntseeg tus Tswv txoj kev teem sij hawm. Yeej yog tswv yim zoo kom muaj lwm txoj kev nej ua tau, uas yuav pab peb rais los ua poj niam uas muaj siab hlub thiab ncaj ncees uas tsa Vajtswv lub nceeg vaj txawm peb lub neej zoo li cas los. Peb yuav tsum qhia peb cov ntxhais kom tsom ntoov rau qhov zoo tshaj plaws tiam sis npaj siab thaum tsis zoo li ntawd.

20 xyoo tom qab tau sau zaj lus tshaj tawm txog tsev neeg, kuv xav hais kom peb cov poj niam ntawm lub Koom Txoos tiv thaiv “Tsev Neeg: Ib zaj Lus Tshaj Tawm rau lub Ntiaj Teb.” Ib yam li Marie Madeline Cardon ua siab loj tiv thaiv cov tub txib thiab nws txoj kev ntseeg, peb yuav tsum tiv thaiv tus Tswv cov lus qhuab qhia txog kev sib yuav, tsev neeg, cov txiv neej thiab cov poj niam lub luag hauj lwm, thiab qhov uas peb tej tsev yog qhov chaw dawb huv—txawm neeg ntiaj teb qw nrov nrov hais tias tej ntsiab cai no tsis muaj nqi ntxiv. Txhua tus muaj peev xwm tiv thaiv tus Tswv txoj hau kev nyob hauv zaj lus tshaj tawm txog tsev neeg, tsis hais lawv muaj tus txiv los tsis muaj los yog. Yog tias nov yog tus Tswv txoj hau kev, ces tsim nyog uas nov yog peb txoj hau kev thiab!

Zaj lus tshaj tawm muaj peb lub ntsiab cai uas kuv xav tias peb yuav tsum tiv thaiv ruaj nrees. Lub ntsiab cai thib ib yog kev sib yuav ntawm txiv neej thiab poj niam. Vaj lug kub qhia hais tias, “Txawm li ntawd los peb cov uas ntseeg tus Tswv, tsis hais txiv neej los sis poj niam ib leeg yeej vam ib leeg.”² Yog leej twg xav tau tag nrho cov koob hmoov pov thawj hwj, yuav tsum muaj ib khub niam txiv uas sib khi ua ke nyob hauv tus Tswv lub tsev, uas koom ua ke ua ncaj ncees, thiab ua raws li lawv tej kev khi lus. Nov yog tus Tswv txoj hau kev rau Nws cov me nyuam, thiab txawm tib neeg cem los yog sib tham los yeej hloov tsis tau qhov uas tus Tswv tau hais. Peb yuav tsum ua ncaj ncees, nrhiav txoj koob hmoov ntawd, thiab muaj kev ntseeg yog tias yuav tsum ua siab ntev. Thov kom peb yuav tiv thaiv kev sib yuav raws li tus Tswv pom zoo tiam sis peb tseem hlub cov uas xav txawv peb.

Lub ntsiab cai thib ob uas peb yuav tsum tiv thaiv yog lub luag hauj lwm ntawm cov niam tsev txiv tsev. Peb xav xav qhia peb cov me nyuam kom lawv cuab hom phiaj siab heev. Peb xav xav ua tib zoo qhia peb cov ntxhais tias lawv muaj peev xwm ua txhua yam lawv xav ua. Peb cia siab hais tias lawv yuav nyiam kawm ntawv, muaj txuj ci, thiab tej zaum yuav rais los ua ib tug zoo li Marie Curie los yog Eliza R. Snow.

Peb puas qhia peb cov tub thiab ntxhais hais tias nyob hauv lub neej no tsis muaj lub npe zoo tshaj thiab tsis muaj lub luag hauj lwm zoo tshaj kev ua niam tsev txiv tsev? Kuv cia siab hais tias peb yuav yaum peb cov me nyuam kom lawv ua zoo npaum lawv ua tau nyob hauv lub neej no thiab peb yuav qhia kom lawv hwm tej lub luag hauj lwm uas cov niam tsev thiab cov txiv tsev muaj nyob hauv peb Leej Txiv Saum Ntuj Ceeb Tsheej txoj hau kev.

Peb tus ntxhais ntxawm, Abby, pom tias nws muaj cib fim tiv thaiv kev ua niam tsev. Muaj ib hnub nws hnov xov los ntawm nws cov me nyuam lub tsev kawm ntawv hais tias yuav ua yeeb yam txog tib neeg tej txoj hauj lwm. Lawv caw cov niam tsev txiv tsev xa ntawv tuaj yog tias lawv xav tuaj qhia cov tub ntxhais kawm ntawv txog lawv txoj hauj lwm, thiab Abby txais kev tshoov siab xa daim ntawv mus hais tias nws yuav qhia cov me nyuam txog kev ua niam tsev. Nws tsis tau hnov dab tsi los ntawm lub tsev kawm ntawv ntawd, thiab thaum txog lub sij hawm lawv yuav ua Hnub Kawm txog Kev Ua Hauj Lwm, nws hu lub tsev kawm ntawv, vim nws xav tias tej zaum lawv ua nws daim ntawv poob lawm. Cov thawj coj nrhiav ob tug xib hwb uas pom zoo cia Abby tuaj hais rau lawv tej hoob kawm thaum txog Hnub Kawm txog Kev Ua Hauj lwm.

Nws ua yeeb yam lom zem heev, es Abby qhia cov me nyuam tias, vim nws yog ib tug niam tsev nws yuav tsum paub txog kev kho mob, kev teev ntuj, kev qhia, kev hu nkauj, ntawv nyeem, kos duab, suav nyiaj, ua zam, kho plaub hau, thauj neeg, dhia cev, ua mov, thiab li ntawd. Cov me nyuam xav tsis thoob. Thaum nws qhia tiav lawm nws hais kom cov me nyuam nco txog lawv niam thiab sau ntawv rau lawv niam ua lawv tsaug rau tej yam kev pab uas lawv txais niaj hnub los ntawm lawv niam. Abby xav tias cov me nyuam twb pom lawv niam ua tshiab thiab qhov uas yus yog ib tug niam tsev los yog txiv tsev yeej muaj nqi heev. Xyoo no nws twb xa ntawv kom ua yeeb yam ntxiv thiab muaj rau hoob uas xav cia nws ua.

Daim Duab

Sister Oscarson's daughter, Abby, holding a portrait of her children

Abby hais li no hais tias: “Kuv xav tias yuav yooj yim rau ib tug me nyuam xav tias ua ib tug niam tsev yeej yog ib txoj hauj lwm tsis tshua tseem ceeb. Kuv xav kom txhua tus me nyuam xav tias lawv niam lawv txiv saib lawv tseem ceeb heev, thiab tej zaum vim kuv qhia lawv tias kev ua niam tsev tseem ceeb npaum li cas rau kuv, kuv yuav pab lawv paub tag nrho txhua yam uas lawv niam lawv txiv ua rau lawv.”

Peb tus yaj saub, Thawj Tswj Hwm Thomas S. Monson, yeej coj yam ntxwv hwm cov poj niam thiab kev ua niam tsev, qhov tseem ceeb yog nws niam. Hais txog peb niam nyob hauv lub ntiaj teb, nws hais tias, “Thov kom peb nco ntsoov qhov tseeb no; yeej tsis tsim nyog uas yus hnov qab yus niam thiab nco txog Vajtswv. Yeej tsis tsim nyog nco yus niam thiab hnov qab Vajtswv. Vim li cas? Vim hais tias, ob tug neeg dawb huv no, Vajtswv thiab [peb] niam hauv [lub ntiaj teb], uas tau pab tsim peb, nrog kev hlub, nrog kev txi, thiab kev pab, nkawd koom siab.”³

Lub ntsiab cai kawg uas peb yuav tsum tiv thaiv yog qhov uas peb lub tsev yog ib qho chaw dawb huv. Peb yuav tsum muab ib lo lus uas tej tug neeg thuam thiab muab lo lus no txhawb nqa. Yog lo lus niam tsev. Peb txhua tus, tsis hais cov poj niam, cov txiv neej, cov tub hluas ntxhais hluas, thiab cov me nyuam, cov uas yuav txiv los yog cov uas tseem tsis tau, lawv puav leej yeej ua tau tej yam kom ua ib tug pab hauv tsev. Peb yuav tsum “kho peb lub tsev” kom muaj chaw txawb chaw rau, pov hwm, dawb huv, thiab nyab xeeb. Peb yuav tsum ua kom peb lub tsev muaj tus Tswv tus Ntsuj Plig ntau npluas mias thiab muaj kev kawm, qhia thiab ua raws li cov vaj lug kub thiab txoj moo zoo. Yog tias txhua tus neeg xav tias lawv yog cov uas tsim tau tej tsev ncaj ncees, ces yuav pab peb lub ntiaj teb heev. Thov kom peb tiv thaiv peb tej tsev uas yog ib qhov chaw dawb huv nrog rau lub tuam tsev.

Cov viv ncaus, kuv zoo siab vim kuv yog ib tug poj niam nyob hauv lub caij nyoog kawg no. Peb muaj cib fim thiab tej yam peb ua tau ntau tshaj lwm cov poj niam muaj thaum yav tas los. Thov kom peb yuav pab txhim tsa Vajtswv lub nceeg vaj los ntawm kev ua siab loj tiv thaiv kev sib yuav, kev ua niam tsev, thiab tsev neeg. Tus Tswv xav kom peb ua neeg siab loj, ruaj nrees, thiab khov kho uas tiv thaiv Nws txoj hau kev thiab qhia tej tiam neeg yav tom ntej txog Nws tej qhov tseeb.

Kuv ua tim khawv tias peb Leej Txiv Saum Ntuj Ceeb Tsheej muaj txoj sia nyob thiab hlub peb txhua tus. Nws Leej Tub, Yexus Khetos yog peb tus Cawm Seej thiab tus Cawm Dim. Kuv hais lus tim khawv rau nej los ntawm Yexus Khetos lub npe, amees.