Pagka-amay—Ang Aton Walay Katapusan nga Padulungan
Ni Larry M. Gibson
Ginbuy-an Sining Karon Lang Bilang Unang Manuglaygay sa Pangkabilogan nga Pangulohan sang Young Men
Kabay pa nga ang tagsa sa aton nagakalipay sa kabug-usan sang mga bugay sang aton Amay diri sa sining kinabuhi kag sa katumanan sang Iya buluhaton kag sang Iya himaya sa pagka- mangin mga amay sang aton mga panimalay para sa kabuhi nga walay katapusan.
Ang akon amay nagtudlo sa akon sang pinkamahulugan nga leksyon sang ako bataon pa. Siya nakatalupangod nga ako nabihag sang mga pangkalibutan nga mga butang. Kon ako may kuwarta, gilayon nga gingasto ko ini—halos masami sa akon kaugalingon.
Sang isa ka hapon gindala niya ako sa pagbakal sang bag-o nga sapatos. Sa ikaduha nga panalgan sang department store, gin-agda niya ako nga magtulok sa gwa sang bintana.
”Ano balá ang imo makita?” nagpamangkot siya.
”Mga bilding, ang langit, mga tawo” ang akon sabat.
”Pila?”
”Masyado kadamo!”
Dayon siya naghunos sining isa ka sensilyo sa iya bulsa. Samtang ginhatag niya ini sa akon, siya nagpamangkot, ”Ano ini?”
Sa gilayon nahibal-an ko: ”Isa ka plata nga dolyar!”
Sa paggamit sang iya ihibalo sa kimika, siya nagsiling, ”Kon tunawon mo ining plata nga dolyar kag isimbog sa nagasantu nga mga ingrediyente, ini mangin isa ka plata nga nitrato. Kon idaplasan mo ining bintana sining plata nga nitrato, ano ang makita mo?”
Walâ ako sing hinalung-ong, gani gingabayan niya ako sa mataas nga espeho kag ginpamangkot, ”Karon, ano balá ang imo makita?’
”Makita ko ako.”
”Indi,” ang iya sabat, ”ang imo nakita isa ka plata nga nagaaninaw sa imo. Kon ikaw nagatumod lang sa plata, ang tanan nga imo makita amó lang ang imo kaugalingon, kag kasubong sang isa ka mantu, ini magatabon sa imo maathag nga pagkakita sang imo walay katapusan nga padulungan nga ginhanda sa imo sang Langitnon nga Amay.
”Larry, ang iya pagpadayon, ”’indi kamo magpangita sang mga butang sining kalibutan apang magpangita kamo ... una ... ang ginharian sang Diyos, kag magpasad sang [Iya] katarungan; kag ining tanan nga mga butang ihatag Niya sa inyo’”(Joseph Smith Translation, Matthew 6:38 [in Matthew 6:33, footnote a]).
Ginhambalan niya ako nga taguon ko ang dolyar kag indi gid ini pagdulaon. Sa kada tion nga ginatan-aw ko ini, panumdumon ko ang nahanungod sa walay katapusan nga padulungan nga gin-aman sa akon sang Langitnon nga Amay.
Palangga ko ang akon amay kag kon paano niya ako gintudluan. Gusto ko nga mangin katulad niya. Gintanom niya sa akon tagipusuon ang hangad nga mangin maayo nga amay, kag ang akon labing tudok nga handum amó nga makasunod ako sa iya ehemplo.
Ang aton pinalangga nga propeta, si Presidente Thomas S. Monson, masami nga nagahambal nga ang aton mga desisyon nagapamat-od sang aton padulungan kag may walay katapusan nga mga kaabtanan (tan-awa ang “Decisions Determine Destiny” [Church Educational System fireside, Nov. 6, 2005], 2; lds.org/broadcasts).
Gani, indi balá kita magpadaku sang maathag nga paghangop sang aton walay katapusan nga padulungan, labi na gid ang isa nga luyag sang aton Langitnon nga Amay nga aton matuman—ang walay katapusan nga pagka-amay? Tugutan naton nga ang aton walay katapusan nga padulungan magpamat-od sang tanan naton nga mga desisyon. Bisan ano man kabudlay ang yadtong mga desisyon, ang Amay magasakdag sa aton.
Ako nakahangop sang gahum sinang panan-awon sang ako nag-ugyon sa akon 12- kag -13 ka tuig nga lalaking mga anak sa isa ka gintawag nga 50/20 nga palumba. Ang 50/20 ka palumba nalakipan sang 50 ka milya (80 ka kilometro) nga paglakat sa sulod sang diutay sa 20 ka oras. Nag-umpisa kami sang alas 9:00 sa gab-i kag naglakat sa bilog nga gab-i kag halos sa bilog nga adlaw nga masunod. Masyado ka mabudlay kag masakit yadtong 19 ka mga oras, apang kami nagmadinalag-on.
Sang kami nakapauli na, matuod-tuod nga kami nagkamang pasulod sa balay, nga sa diin ang isa ka maayo nga asawa kag iloy naghanda sang manamit nga panyapon, nga amon indi gintandog. Ang akon manghod nga lalaking anak naghaplay, sa lubos nga kalapyo, sa sopa, samtang ang akon magulang nga anak nagkamang sa idalom nga panalgan sa iya kuwarto.
Pagkatapos sang akon kaugalingon nga pagpahuway sang akon masakit nga lawas, nagkadto ako sa akon manghod nga anak sa pagtan-aw kon siya buhi pa.
”OK ka balá?” nagpamangkot ako.
”Tay, yadto amó ang pinakabudlay nga butang nga akon nahimo bisan san-o pa, kag indi ko na gid ina paghimuon liwat.”
Kag walâ ako sing intensyon nga maghambal sa iya nga ako man indi na gid maghimo sini bisan san-o pa. Sa tigaylo, ginsilingan ko siya nga ako nahamuot sa iya nga siya nakatuman sang isa ka mabudlay nga butang. Nahibal-an ko nga ini magahanda sa iya sa mga butang nga mas mabudlay pa sa palaabuton. Sa sina nga panghunahuna, ako nagsiling, ”Anak, tuguti ako nga magpanaad sa imo sini. Kon ikaw magmisyon, indi ka gid maglakat sang 50 ka milya sa isa ka adlaw.”
”Maayo, Tay! Gani magmisyon ako.”
Yadtong mga simpli nga mga pulong nagpunô sang akon kalag sing pagpasalamat kag kalipay.
Dayon nagpanaog ako sa idalom nga panalgan sa akon magulang nga anak. Naghigda ako sa iya luyo. ”Anak, ano ang pamatyagon mo?”
”Tay, yadto amó ang pinakamabudlay nga akon nahimo sa bilog ko nga kabuhi bisan san-o man, kag indi ko na gid ini paghimuon liwat maski san-o pa gid.” Ang iya mga mata nagkipot—pagkatapos nagbukas—kag nagsiling siya, ”Luwas nga ang akon lalaking anak luyag magpahimo sa akon sini.”
Nagtulo ang akon mga luha samtang ginpabutyag ko ang akon pagpasalamat sa iya. Ginhambalan ko siya nga nahibal-an ko nga siya mangin mas maayo nga tatay sang sa akon. Nalipay gid ako nga sa iya linghod kag mabinatyagon nga tion sang iya kabuhi nahangpan na niya nga ang isa sa pinakasagrado nga mga buluhaton sang priesthood amó ang mangin isa ka amay. Walâ siya sang kahadlok sa sina nga katungdanan kag titulo—ang nagasantu nga titulo nga ang mismo nga Diyos luyag nga aton gamiton kon kita nagapakighambal sa iya. Nahangpan ko ang akon obligasyon nga magpadaku sang tudok sa mga handum sang akon anak nga mangin-amay.
Ining mga pulong sang Manluluwas naghatag sa akon sang madalom nga kahulugan bilang amay:
”Walâ sing ginahimo ang Anak nga Iya lamang, apang ang iya nakita nga ginahimo sang Amay: kay [kon ano man nga mga butang ang Iya] ginahimo, amó man ini ang ginahimo sang Anak” (John 5:19).
”Walâ ako nagahimo sang akon lamang; luwas nga ang akon ginahambal amó lamang ang gintudlo sang akon Amay” (John 8:28).
Nalipay ako nga mangin isa ka bana kag amay—ginkasal sa pinili nga babaying anak sang langitnon nga mga ginikanan. Ginahigugma ko siya. Ini isa sa labing madinalag-on nga bahin sang akon kabuhi. Ang handom ko sa sinang gab-i amó nga ang akon lima ka lalaking anak kag ang ila utod nga babaye padayon nga makakita sa akon sang kalipay nga nagaabot gikan sa walay katapusan nga pag-asawahay, pagka-amay, kag panimalay.
Mga amay, nakasegurado ako nga kamo nakabati sining halambalon ”Magwali sang ebanghelyo sa tanan nga tion, kag kon kinahanglan gamita ang mga pulong” (padungog kay Francis sang Assisi). Sa tagsa ka adlaw kamo nagatudlo sa inyo mga anak kon ano ang kahulugan sang pagka-amay. Kamo nagapasad sang sadsaran para sa masunod nga henerasyon. Ang inyo lalaking mga anak makahangop kon paano ang mangin mga bana kag mga amay sa pagpanilag kon paano ninyo ginatuman ining mga katungdanan. Halimbawa:
Nahibal-an balá nila kon daw ano mo ka palangga kag nahamut-an ang ila iloy kag daw ano ang imo pagkaluyag nga ikaw ang ila amay?
Sila makahibalo kon paano sila magkabig sa ila palaabuton nga asawa kag mga anak samtang sila nagatan-aw kon paano mo ginakabig ang tagsa sa ila katulad sang kon ano sila kabigon sang ila Langitnon nga Amay.
Paagi sa imo ehemplo, sila makahibalo kon ano ang pagtahod, pagpadungog, kag pagpangapin sa pagkababaye.
Sa inyo puluy-an, makatuon sila sa pagpamuno sa ila mga panimalay sa paghigugma kag sa katarungan. Makatuon sila sa pagpanangkap sang mga kinahanglanon sang kabuhi para sa ila panimalay—pangkalibutanon kag espirituhanon (tan-awa ang “The Family: A Proclamation to the World,” Ensign ukon Liahona, Nov. 2010, 129).
Mga kauturan sang priesthood, sa bug-os ko nga tagipusuon, ako nagapangayo sa inyo nga binagbinagon ninyo ining pamangkot: Ang inyo balá mga lalaking anak nakakita sa inyo nga nagatinguha nga maghimo sang mga butang nga ginapahimo sa ila sang Langitnon nga Amay?
Nagapangamuyo ako nga ang sabat huo. Kon ang sabat indi, indi pa ini ulihi nga magbag-o, apang kamo dapat mag-umpisa subong. Napamatuod ako nga ang Langitnon nga Amay magabulig sa inyo.
Subong, mga lamharon nga lalaki, nga akon ginapalangga, nahibal-an ninyo nga kamo nagahanda sa pagbaton sang Priesthood ni Melchizedek, magbaton sang sagrado nga mga ordinansa sang templo, magtuman sang inyo katungdanan kag obligasyon nga magmisyon sa lubos nga panahon, kag dayon, indi maghulat sing madugay, magpangasawa sa templo sa isa ka babaying anak sang Diyos kag mag-angkon sang panimalay. Pagkatapos magpamuno kamo sa inyo panimalay sa espirituhanon nga mga butang sa pagtuytoy sang Balaan nga Espiritu (tan-awa ang D&C 20:44; 46:2; 107:12).
Nakapamangkot ako sa kadam-an sang mga lamharon nga mga lalaki, ”Ngaa yari kamo diri?”
Asta karon, walâ pa sing nakasabat nga, ”Para mangin isa ka amay, nga ako makahanda kag takos nga makabaton sang tanan nga Iya sang akon Amay sa Langit.”
Ayhan isayasatonninyo ang inyo mga katungdanan sa Priesthood ni Aaron nga ginasaysay sa seksyon 20 sang Doktrina kag mga Kasugtanan. Tuguti nga matandog ang inyo balatyagon samtang akon ginagamit ining mga katungdanan sa inyo pag-alagad sa inyo panimalay.
”Agdaha ang tanan [sa inyo panimalay] nga magkari kay Cristo” (bersikulo 59).
”Bantayan [sila] padayon, kag mag-upód sa ila kag magpabakod sa ila” (bersikulo 53).
”Magwali, magtudlo, magpaathag, maglaygay, kag magbunyag” sang miyembro sang inyo panimalay” (bersikulo 46).
”Laygayi sila sa pagpangamuyo nga mabatian ang ila tingog kag sa sekreto kag magtambong sa tanan nga mga katungdanan sang panimalay” (bersikulo 47).
”Pat-uron ninyo nga walâ sing kalalat-an sa [inyo panimalay], ukon pagdumot sa isa kag isa, ukon pagbinutig, panglibak, ukon malain nga panghambal” (bersikulo 64).
”Pat-uron ninyo nga ang [inyo panimalay nagakilit-anay] sa madamo nga tion” (bersikulo 55).
Magbulig kamo sa inyo amay sa iya katungdanan bilang isa ka patriyarka. Sakdagon ninyo ang inyo iloy upód ang kabakod sang priesthood kon ang isa ka amay walâ (tan-awa ang mga bersikulo 52, 56).
Kon kamo ginapangabay, ”ibutang ang inyo mga kamot sa pag-ordinar sa mga pari, mga manunudlo, kag mga diyakono” sa inyo panimalay (bersikulo 48).
Daw indi balá ini daw buluhaton kag katungdanan sang isa ka amay?
Ang pagtuman sang inyo mga katungdanan sa Priesthood ni Aaron nagahanda sa inyo lamharon nga mga lalaki para sa pagka-amay. Ang Katungdanan sa Diyos nga balasahon pambulig nagapahangop kon paano makahimo sang pat-od nga mga plano sa pagtuman sang inyo mga katungdanan. Ini makagiya sa inyo kag magbulig samtang kamo nagahangad sang kabubut-on sang inyo Amay sa Langit kag magplano nga matuman ini.
Ang Amay sa Langit nagdala sa inyo diri sa sining natalana nga panahon para sa natuhay nga buluhaton kag walay katapusan nga katuyuan. Luyag Niya nga maathagan ninyo kag mahangpan kon ano ina nga katuyuan. Siya amó ang inyo Amay, kag padayon kamo nga makapangayo sang Iya paggiya.
Nahibal-an ko nga ang Langitnon nga Amay nagakabalaka sa tagsa sa aton isa kag isa kag Siya may personal nga plano para sa aton nga matuman ang aton walay katapusan nga padulungan. Ginpadala Niya ang Iya Bugtong nga anak, si JesuCristo, nga magbulig sa aton sa pagda-ug sang aton mga kakulangan paagi sa Pagpasag-uli. Ginabugayan Niya kita sang Balaan nga Espiritu nga isa ka panaksi, isa ka kaupod, kag giya sa aton walay katapusan nga padulungan kon kita nagasalig sa Iya. Kabay pa nga ang tagsa sa aton nagakalipay sa kabug-usan sang mga bugay sang aton Amay diri sa sining kinabuhi kag sa katumanan sang Iya buluhaton kag sang Iya himaya sa pagka-mangin mga amay sa aton mga panimalay para sa kabuhi nga walay katapusan (tan-awa ang Moses 1:39). Sa ngalan ni JesuCristo, amen.