2010–2019
Kev Ua Txiv Tsev—Peb lub Neej uas Nyob Mus Ib Txhis
April 2015


Kev Ua Txiv Tsev—Peb lub Neej uas Nyob Mus Ib Txhis

Thov kom peb yuav tau tag nrho Leej Txiv cov koob hmoov hauv lub neej no thiab pom ua Nws txoj hauj lwm thiab Nws lub yeeb koob thaum peb los ua ib leej txivrau peb tsev neeg rau tas mus ib txhis.

Kuv txiv qhia kuv ib yam tseem ceeb heev thaum kuv tseem hluas. Nws paub tias kuv tab tom nyiam tej khoom ntiaj teb heev. Thaum twg kuv muaj nyiaj, kuv muab siv tas sim ntawd—feem ntau yuav khoom rau kuv tus kheej xwb.

Daim Duab
Painting of a father talking to son in front of window with a view of the city below

Muaj ib hnub nws txawm coj kuv mus yuav ib nkawm khau tshiab. Nyob hauv lub kiab khw ntawm theem tsev thib ob, nws caw kuv los ntsia ntawm lub qhov rais mus.

Nws nug hais tias “Koj pom dab tsi?”

Kuv teb hais tias “Tej tsev, lub ntuj, thiab tib neeg.”

“Pes tsawg leej?”

“Coob tug!”

Ces nws thau ib lub nyiaj npib ntawm nws hnab ris. Nws muab cev rau kuv thiab nug hais tias, “Nov yog dab tsi?”

Kuv paub tam sim ntawd ces hais tias: “Ib lub nyiaj npib uas yog ib daus las!”

Nws yog ib tug kws paub ua txuj ci ces, hais tias, “Yog koj muab lub nyiaj npib ntawd ua kom kub ua kua nyiaj thiab muab do nrog tej yam zoo, ces koj yuav tau cov nyiaj silver nitrate. Yog koj muab cov kua silver nitrate ntawd pleev ntawm lub qhov rais no koj yuav pom dab tsi?”

Kuv tsis tau paub, ces nws tau coj kuv mus rau ib daim iav loj loj thiab nug hais tias, “Nim no koj pom dab tsi?”

Daim Duab
Father and son looking in a mirror at a clothing store.

“Kuv pom kuv tus kheej.”

Nws teb tias ”Tsis yog, koj pom cov kua nyiaj uas ua rau koj pom koj tus kheej. Yog koj ua tib zoo ntsia cov kua nyiaj ntawd, koj tsuas pom koj tus kheej xwb, thiab zoo li daim ntaub thaiv, nws yuav ua rau koj pom tsis tseeb seb Leej Txiv Saum Ntuj Ceeb Tsheej tau npaj dab tsi tseg rau koj lub neej uas nyob mus ib txhis.”

Nws hais ntxiv hais tias, “Larry, ‘tsis txhob nrhiav tej yam hauv ntiaj teb no tiam sis … xub … nrhiav Vajtswv lub nceeg vaj, thiab txhim tsa [Nws] txoj kev ncaj ncees; thiab ces mam li muab txhua yam tsav no ntxiv rau koj’” (Yauxej Xamiv Kev Txhais Lus, Mathais 6:38 [hauv Mathais 6:33, lus cim nram qab a]).

Nws hais kom kuv khaws daus las ntawd cia thiab tsis txhob ua xiam. Txhua zaus uas kuv ntsia lub ntawd, kuv tau xav txog lub neej uas nyob mus ib txhis uas Leej Txiv Saum Ntuj Ceeb Tsheej tau npaj tseg rau kuv.

Kuv hlub kuv txiv thiab nyiam nws txoj kev qhuab qhia. Kuv tau xav rais los mus ua neeg zoo li nws. Nws ua rau kuv muaj siab xav ua ib leej txiv zoo, thiab kuv tseem cia siab hais tias kuv tab tom ua raws li nws tus yam ntxwv.

Monson tau hais ntau zaus hais tias peb tej kev txiav txim siab yeej pauv tau seb peb lub neej tom ntej yuav zoo li cas thiab tej ntawd yuav kav mus ib txhis (saib “Decisions Determine Destiny” [Church Educational System kev sib ntsib, Kaum Ib Hlis Ntuj hnub tim 6, 2005], 2; lds.org/broadcasts).

Yog li ntawd, tsim nyog peb yuav pom kev meej meej hais tias peb lub neej nyob mus ib txhis, yuav zoo li cas yeej xav txog lub uas peb Leej Txiv Saum Ntuj Ceeb Tsheej xav kom peb tau uas yog—kev ua txiv tsev tas mus ib txhis? Cia peb lub neej uas nyob mus ib txhis coj kav peb txhua txoj kev txiav txim. Txawm hais tias tej kev txiav txim siab ntawd yuav nyuaj npaum li cas los, Leej Txiv yuav txhawb nqa peb.

Kuv kawm paub tias txoj kev xav li ntawd muaj hwj chim npaum li cas thaum kuv ob tug tub uas muaj 12 xyoos thiab 13 xyoos mus sib xeem qhov 50/20. Ib qho 50/20 muaj qhov uas yus taug kev 50 mais hauv tsawg tshaj 20 teev. Peb tau pib thaum 9:00  moos tsaus ntuj thiab taug kev ib hmos thiab hnub tom qab ntawd. Yeej yog 19 teev uas nyuaj kawg nkaus li, tiam sis peb twb kov yeej lawm.

Thaum rov qab los tsev, peb nkag los hauv tsev, nyob ntawd kuv tus poj niam thiab nkawd niam tau npaj ib pluag hmo zoo, uas peb yeej tsis tau kov li. Kuv tus tub yaus, uas sab kawg nkaus, tau pw ntawm lub xaloos, es kuv tus tub hlob tau nqi mus pw hauv nws chav pw.

Tom qab kuv so ib pliag mob ib ce kawg, tau mus xyuas kuv tus tub yaus seb nws puas tseem ciaj.

Kuv nug hais tias, “Koj puas OK?”

“Txiv, qhov ntawd yog qhov nyuaj tshaj plaws uas kuv tau ua, thiab kuv tsis xav ua dua.”

Kuv twb tsis xav qhia nws tias kuv los yuav tsis ua dua ib zaug thiab. Tiam sis, kuv qhia nws tias kuv qhuas nws vim hais tias nws tau ua ib yam uas nyuaj kawg nkaus li. Kuv paub tias qhov ntawd yuav pab nws npaj ua tej yam nyuaj heev hauv nws lub neej tom ntej. Thaum xav tau li ntawd, kuv hais tias, “Me tub, cia kuv cog lus li no rau koj. Thaum koj mus ua tub txib, koj yuav tsis tas taug kev 50 hnub hauv ib hnub nkaus xwb.”

“Txiv, ua li ntawd los zoo! Ces kuv mam li mus.”

Tej lus ntawd ua rau kuv muaj kev ris txiaj thiab kev zoo siab.

Ces kuv tau nqi mus xyuas kuv tus tub hlob. Kuv tau pw ntawm kuv tus tub ib sab—ces tau kov nws es hais tias. “Me tub, koj puas nyob zoo?”

“Txiv, qhov ntawd yog qhov nyuaj tshaj plaws uas kuv tau ua hauv kuv lub neej, thiab kuv yuav tsis ua dua ib zaug.” Nws qis qhov muag—ces qhib—thiab hais tias, “Tsuas yog kuv tus tub xav kom kuv ua.”

Kuv los kua muag thaum kuv qhia nws tias kuv muaj kev ris txiaj ntau vim kuv muaj nws. Kuv qhia nws tias nws yeej yuav ua ib leej txiv zoo dua kuv ua. Kuv muaj kev zoo siab heev vim txawm nws tseem hluas los nws tseem paub tias nws ib txoj kev lav ris dawb ceev hauv lub pov thawj hwj yeej yuav yog ua ib leej txiv. Nws tsis ntshai txoj hauj lwm thiab lub npe ntawd—twb yog tib lub npe uas Vajtswv kiag xav kom peb siv thaum peb nrog Nws tham. Kuv paub tias kuv muaj kev lav ris tu txoj kev xav ua txiv tsev uas kuv tus tub muaj no.

Ua ib leej txiv kuv thiaj xav ntau ntau txog tus Cawm Seej cov lus uas hais tias:

“Leej Tub ua tsis tau dab tsi nws tus kheej, tsuas yog tej yam uas nws pom Leej Txiv ua: rau qhov [tej yam uas Leej Txiv] ua, tej ntawd Leej Tub kuj ua thiab” (Yauhas 5:19).

“Kuv tsis ua ib yam dab tsi raws li kuv lub siab, tiam sis kuv tsuas hais tej uas Leej Txiv kom kuv hais xwb” (Yauhas 8:28).

Kuv nyiam ua tus txiv thiab ib leej txiv—tau yuav ib tug ntxhais tshwj xeeb uas muaj niam txiv saum ntuj ceeb tsheej. Kuv hlub nws heev. Yog ib qho uas muaj nuj nqi tshaj plaws hauv kuv lub neej. Kuv cia siab tias hmo ntawd kuv tsib tug tub thiab lawv tus muam yuav pom hais tias kuv muaj kev zoo siab npaum li cas vim kuv tau yuav lawv niam tas mus ib txhis, ua lawv leej txiv, thiab muaj tsev neeg no.

Cov txiv es, kuv xav hais tias nej tau hnov kab lus uas hais tias “Tshaj tawm txoj moo zoo txhua lub sij hawm, thiab thaum twg tsim nyog ces hais tej lus” (tus uas hais yog Francis hauv Assisi). Txhua hnub nej tab tom qhia nej cov me nyuam hais tias ua leej txiv txhais tau li cas. Nej tab tom pua lub hauv paus rau lwm tiam neeg. Nej cov tub yuav kawm seb yuav ua li cas thiaj ua tau ib tug txiv thiab leej txiv thaum lawv saib seb koj ua koj tej hauj lwm no li cas. Piv txwv hais tias:

Lawv puas paub hais tias nej hlub thiab hlub tshua lawv niam npaum li cas thiab nej nyiam ua lawv txiv ntau npaum li cas?

Lawv yuav kawm seb yav tom ntej lawv yuav ua zoo npaum li cas rau lawv tus poj niam thiab cov me nyuam thaum lawv saib koj ua li cas rau lawv txhua tus ib yam li Leej Txiv Saum Ntuj Ceeb Tsheej yuav ua.

Dhau ntawm koj tus yam ntxwv, lawv yuav kawm seb yuav ua li cas thiaj saib tau, hwm, thiab pov hwm kev ua niam tsev.

Nyob hauv nej tsev, lawv yuav kawm hais tias txoj kev coj kav ib tse neeg thaum muaj kev hlub thiab kev ncaj ncees txhais tau li cas. Lawv yuav kawm hais tais txoj kev tu xyuas thiab pov hwm ib tse neeg yog li cas tiag—hais txog sab cev nqaij daim tawv thiab sab ntsuj plig tib si (saib “Tsev Neeg: Ib zaj Lus Tshaj Tawm rau lub Ntiaj Teb,” Ensign los sis Liahona, Kaum Ib Hlis Ntuj 2010, 129).

Cov kwv tij es, kuv hais tag siab tag ntsws kom nej xav txog lo lus nug no hais tias: Nej cov tub puas pom nej sim ua tej yam uas Leej Txiv Saum Ntuj Ceeb Tsheej yuav xav kom lawv ua?

Kuv thov kom lawv yuav pom nej ua li ntawd. Yog tias nej teb hais tias tsis yog li ntawd, nws yeej tsis tau lig rau nej muab pauv, tiam sis nej yuav tsum pib ua li ntawd txij hnub no mus. Thiab kuv hais lus tim khaw tias Leej Txiv Saum Ntuj Ceeb Tsheej yuav pab nej.

Nim no nej cov tub hluas, nej paub tias nej tab tom npaj txais yuav lub Pov Thawj Hwj Mekixedes, txais te kab ke dawb ceev hauv lub tuam tsev, ua nej tej hauj lwm thiab kev lav ris mus ua tub txib, ces tsis tos ntev mam li yuav Vajtswv ib tug ntxhais ua poj niam hauv lub tuam tsev thiab muaj ib tse neeg. Nej thiaj coj tau nej tsev neeg sab ntsuj plig raws li tus Vaj Ntsuj Plig Dawb Huv qhia (saib Q&K 20:44; 46:2; 107:12).

Kuv tau nug coob tug tub hluas thoob plaws ntiaj teb no hais tias, “Ua cas koj nyob no?”

Txog tav no, tsis muaj ib tug uas teb hais tias, “Los kawm ua ib leej txiv, xwv kom kuv thiaj tau npaj siab txais thiab tsim nyog tau txhua yam uas Leej Txiv Saum Ntuj Ceeb Tsheej muaj.”

Cia peb ntsuam xyuas txog nej tej hauj lwm hauv lub Pov Thawj Hwj Aloos raws li sau tseg hauv tshooj 20 hauv phau Lus Qhuab Qhia thiab Kev Khi Lus. Ua tib zoo xav txog tej yam uas nej hnov thaum nej ua raws li tej kev lav ris no thaum nej ua hauj lwm rau nej tsev neeg.

“Caw txhua tus [hauv nej tsev neeg] los cuag Khetos” (nqe 59).

“Saib xyuas [lawv] tsis tu tsis tseg, thiab nrog lawv nyob thiab ntxiv dag zog rau lawv” (nqe 53).

“Qhuab qhia, qhia, piav, ntuas, thiab muab” cov neeg hauv nej tsev neeg ua kev cai raus dej (nqe 46).

“Ntuas kom lawv thov Vajtswv kom nrov thiab twj yam hauv lawv siab thiab kom lawv ua txhua yam hauj lwm hauv nej tsev neeg” (nqe 47).

“Xyuas kom [nej tsev neeg] yuav tsis ua txhaum, ib leeg txhob ua tawv rau ib leeg, tsis dag, tsis thuam, los sis hais lus phem” (nqe 54).

“Xyuas kom [nej tsev neeg] yuav ib sij sib ntsib” (nqe 55).

Pab nej txiv ua nws tej hauj lwm ua tus yawg suab. Siv nej lub zog ntawm lub pov thawj hwj los txhawb pab nej niam thaum txiv tsis nyob (saib nqe 52, 56).

Thaum thov ces, “tsa lwm tus pov thawj, xib hwb, thiab dikas” hauv nej tsev neeg (nqe 48).

Tej no puas yog leej txiv tej hauj lwm thiab tej kev lav ris?

Daim Duab
A young man reading a a Church publication.

Txoj kev ua tej hauj lwm hauv lub Pov thawj Hwj Aloos tab tom npaj nej cov tub hluas los ua ib tug txiv tsev. Phau Tes Hauj Lwm rau Vajtswv pab tau nej kawm txog thiab tawm tswv yim seb yuav ua li cas thiaj ua tau nej tej hauj lwm. Nws yuav ua ib tug qauv thiab pab koj thaum koj sim ua raws li Leej Txiv Saum tuj Ceeb Tsheej lub siab nyiam thiab tsa tej lub hom phiaj uas yuav pab nej ua li ntawd.

Leej Txiv Saum Ntuj Ceeb Tsheej tau coj nej los rau lub sij hawm tseem ceeb no los ua ib txoj hauj lwm tshwj xeeb thiab rau ib lub hom phiaj uas kav mus ib txhis. Nws xav kom nej yuav pom kev meej meej thiab to taub tias lub hom phiaj ntawd yog dab tsi. Nws yog nej Txiv, thiab nej muaj cuab kav thov Nws txoj kev pab thaum twg los tau.

Kuv paub tias Leej Txiv Saum Ntuj Ceeb Tsheej txhawj txog peb txhua tus thiab tau tawm tswv yim rau txhua tus neeg uas yuav pab peb ncav cuag peb lub neej uas nyob mus ib txhis. Nws tau xa Nws Tib Leeg Tub, Yexus Khetos, los pab peb kov yeej peb tej kev txhaum dhau los ntawm txoj Kev Theej Txhoj. Nws tau foom koob hmoov rau peb thaum muab tus Vaj Ntsuj Plig Dawb Huv ua ib tug tim khawv, ib tug khub, thiab tus coj peb kev mus rau peb lub neej uas nyob mus ib txhis yog hais tias peb yuav vam Nws. Thov kom peb yuav tau Leej Txiv txhua txoj koob hmoov hauv lub neej no thiab pom ua Nws txoj hauj lwm thiab Nws lub yeeb koob ua tiav tas thaum peb rais los mus ua tej leej txiv rau tas mus ib txhis (saib Mauxes 1:39). Los ntawm Yexus Khetos lub npe, amees.