Muaj Qhov Kaj thiab Qhov Tseeb Puv Peb lub Tsev
Los ntawm Cheryl A. Esplin
Tus Pab Cuam Thib Ob ntawm lub Koom Haum Me Nyuam Yaus
Yog peb thiab peb tsev neeg yuav tiv tau lub ntiaj teb tej kev nyuaj, ces peb yuav tsum muaj qhov kaj thiab qhov tseeb puv npo.
Kuv lub siab muaj tus Vaj Ntsuj Plig thaum kuv mloog tej tsev neeg no qhia qhov tseeb dawb huv: “Peb tsev neeg los ntawm Vajtswv los.”1 Cov nkauj uas tshoov peb lub siab yog ib txoj kev uas tus Ntsuj Plig ntxhi lus rau peb, ua rau peb muaj qhov kaj thiab qhov tseeb puv npo.
Ntau xyoo tas los kuv tau kawm txog txoj kev muaj qhov kaj thiab qhov tseeb puv npo. Kuv tau koom ib txoj kev sib ntsib thaum Koom Haum Ntxhais Hluas pawg tuam thawj tau qhia txog kev tsim tsev neeg uas muaj zog ntawm sab ntsuj plig. Kom qhia peb zoo, ib tug Koom Haum Ntxhais Hluas tus thawj coj tau tuav ob lub kas poos dej qab zib. Ib sab tes tuav ib lub kas poos uas qhuav lawm thiab ib sab tes tuav ib lub kas poos uas tseem tsis tau qhib thiab puv dej qab zib. Thaum xub thawj, nws nyem lub kas poos uas qhuav lawm; lub kas poos ntawd pib nkhaus ces nws muab tsuam tag. Ces, nyob ntawm lwm sab tes, nws muab lub kas poos nyem. Lub ntawd ruaj khov kho. Muab tsis tau nkhaus los yog tsuam ib yam li lub uas qhuav—vim yog muaj dab tsi nyob hauv.
Peb tau muab txoj kev ua piv txwv no piv rau peb lub neej thiab peb tsev neeg. Thaum muaj tus Ntsuj Plig thiab txoj moo zoo tseeb puv npo, peb muaj hwj chim tiv tau tej yam hauv lub ntiaj teb uas nyob ib puag ncig thiab tawm tsam peb. Tiam sis, yog peb tsis muaj dab tsi puv peb sab ntsuj plig, peb tsis muaj zog kom tiv tau tej yam hauv lub ntiaj teb thiab peb yuav raug tsuam thaum peb raug tej xwm txheej ntawd.
Dab Ntxwg Nyoog paub tias yog peb thiab peb tsev neeg yuav tiv tau lub ntiaj teb tej kev nyuaj, ces peb yuav tsum muaj qhov kaj thiab qhov tseeb puv npo. Yog li ntawd nws ua txhua yam nws ua tau kom hloov txoj moo zoo thiab muab qhov tseeb puas tsuaj thiab ua rau peb nyob deb ntawm qhov tseeb ntawd.
Peb feem ntau tau ua kev cai raus dej thiab txais lub txiaj ntsim Vaj Ntsuj Plig Dawb Huv, uas yuav tshwm sim thiab qhia qhov tseeb txog txhua yam.2 Nrog rau lub txiaj ntsim ntawd peb yuav tsum nrhiav qhov tseeb, ua neej raws li qhov tseeb uas peb paub lawm, thiab qhia thiab tiv thaiv qhov tseeb.
Qhov chaw zoo tshaj plaws kom muaj qhov kaj thiab qhov tseeb puv npo yog nyob hauv peb tsev. Zaj nkauj uas peb mloog muaj tej lus uas ua rau peb nco qab tias, “Vajtswv muab ib tsev neeg rau peb kom peb thiaj li ua zoo tau li nws xav kom peb ua.”3 Tsev neeg yog tus Tswv qhov chaw ua hauj lwm hauv lub ntiaj teb kom peb kawm thiab ua neej raws li txoj moo zoo. Peb muaj lub luag hauj lwm nyob hauv peb tsev neeg kom peb ib leeg txhawb nqa ib leeg sab ntsuj plig.
Tej tsev neeg nyob mus ib txhis uas muaj zog thiab muaj tus Ntsuj Plig tsis tshwm sim kiag xwb. Yuav tsum siv zog, siv sij hawm, thiab txhua tus hauv yus tsev neeg nyias yuav tsum ua nyias qhov kom pab tau. Txhua lub tsev nyias txawv nyias, tiam sis tsuas yog muaj ib tug neeg nrhiav qhov tseeb, ces yuav pab tau tsev neeg ntawd.
Peb cov thawj coj pheej ntuas peb kom peb paub tej yam ntawm sab ntsuj plig ntxiv los ntawm kev thov Vajtswv thiab kev kawm thiab kev xav txog cov vaj lug kub thiab cov lus ntawm cov yaj saub tam sim no. Nyob hauv nws zaj lus hauv lub tuam rooj sab laj hais txog kev txais ib zaj lus tim khawv txog qhov kaj thiab qhov tseeb, Thawj Tswj Hwm Dieter F. Uchtdorf hais tias:
Vajtswv tus uas Nyob Kav Ib Txhis thiab Siab Tshaj Plaws … yuav hais lus rau cov uas thov Nws nrog ib lub siab dawb paug thiab thov tiag tiag.
“Nws yuav hais lus rau lawv nyob hauv tej zaj npau suav, tej kev ua yog toog, thiab tej kev xav.”
Thawj Tswj Hwm Uchtdorf hais ntxiv hais tias: “Vajtswv yeej hlub nej. Nws yuav mloog thiab Nws yuav teb nej tej lus nug. Raws li txoj kev thiab lub sij hawm uas Nws pom zoo, Nws yuav teb nej tej lus thov, thiab yog li ntawd, nej yuav tsum kawm mloog Nws lub suab.”4
Ib zaj dab neeg los ntawm kuv tsev neeg zaj keeb kwm qhia txog qhov no.
Ob peb hlis tas los kuv tau nyeem kuv tus yawg koob tus muam Elizabeth Staheli Walker zaj lus tim khawv. Thaum Elizabeth yog ib tug me nyuam, nws tuaj rau Amelikas los ntawm Switzerland nrog nws tsev neeg.
Tom qab Elizabeth yuav txiv, nws thiab nws tus txiv thiab cov me nyuam nyob ze ciaj ciam av Nevada, nyob ntawd lawv ua hauj lwm rau ib qhov chaw xa ntawv. Cov neeg uas taug kev tau pw hauv nkawd lub tsev. Tas hnub tas hmo lawv yuav tsum npaj ua mov thiab muab mov rau cov neeg no noj. Yeej yog ib txoj hauj lwm sab heev, thiab lawv tsis tau kev so. Tiam sis qhov uas ua rau Elizabeth txhawj tshaj plaws yog tej lus uas cov neeg no hais.
Elizabeth hais tias thaum yav tas los nws ib txwm xav tias Phau Ntawv Maumoos muaj tseeb, Vajtswv tau tso cai rau tus Yaj Saub Yauxej Xamiv ua li nws tau ua, thiab nws zaj xov yog txoj kev cawm seej. Tiam sis thaum lub sij hawm ntawd nws lub neej yeej tsis txhawb nqa txoj kev ntseeg ntawd.
Ib txhia ntawm cov neeg ncig thaj chaw ntawd yog neeg kawm txawj kawm ntse thiab lawv sib tham hais tias Yauxej Xamiv yog ib tug “txawj ntxias lwm tus” uas tau sau Phau Ntawv Maumoos nws tus kheej ces muab luam tawm kom tau nyiaj. Lawv hais zoo li tus uas xav txawv ntawm lawv yog neeg vwm; lawv hais tias “kev ntseeg Maumoos yog kev dag xwb.”
Tej kev sib tham no ua rau Elizabeth xav tias nws nyob nws ib leeg thiab kho siab. Tsis muaj leej twg nrog nws tham, tsis muaj sij hawm thov Vajtswv—tiam sis nws kuj thov Vajtswv thaum nws ua hauj lwm. Nws ntshai hais dab tsi rau cov neeg uas thuam nws txoj kev ntseeg. Nws hais tias nws tsis paub lawv puas hais lus tseeb, thiab nws xav tias nws yuav tsis paub tiv thaiv nws txoj kev ntseeg yog nws sim ua li ntawd.
Tom qab ntawd, Elizabeth thiab nws tsev neeg tsiv tsev. Elizabeth hais tias nws muaj sij hawm ntxiv xav txog qhov no thiab tsis ua rau nws nyuaj siab tas li. Nws pheej mus rau hauv chav hauv qab lub tsev thiab thov Leej Txiv Saum Ntuj Ceeb Tsheej txog tej yam uas ua rau nws txhawj—txog tej zaj dab neeg uas cov txiv neej txawj ntse tau hais txog, hais tias txoj moo zoo tsis muaj tseeb thiab txog Yauxej Xamiv thiab Phau Ntawv Maumoos.
Muaj ib hmo Elizabeth ua npau suav. Nws hais tias: “Zoo li kuv sawv ze rau ntawm ib txoj kev rau cov tsheb thauj khoom, uas ncig mus ib lub toj: ib nrab pem lub toj ntawd kuv tau pom ib tug txiv neej hais lus, los yog zoo li nws hais lus rau ib tug tub hluas uas txhos caug; thiab sawv ze rau ib lub qhov hauv av. Nws xyab tes thiab zoo nkaus li nws nrhiav ib qho nyob hauv lub qhov. Kuv tau pom lub hau zeb uas zoo li twb tshem ntawm lub qhov uas tus tub hluas saib haud. Nyob ntawm txoj kev muaj neeg coob, tiam sis zoo nkaus li lawv txhua tus tsis quav ntsej ob tug txiv neej ua dab tsi pem toj. Muaj ib yam dab tsi uas tshoov kuv lub siab heev nrog rau zaj npau suav ntawd kuv thiaj li tsim dheev; … kuv tsis xav qhia kuv zaj npau suav rau leej twg tiam sis ua rau kuv xav tias yog tus Tim Tswv Maulaunais uas qhia tus tub hluas Yauxej thaum lub sij hawm nws tau txais cov phiaj.”
Thaum xyoo 1893 lub caij nplooj ntoo hlav, Elizabeth mus rau Salt Lake City thaum lawv muab lub tuam tsev fij tseg. Nws piav hais tias: “Nyob ntawd kuv tau pom tib daim duab uas kuv pom hauv kuv zaj npau suav; kuv xav tias yog ib lub qhov rais uas muaj xim. Kuv xav tias yog kuv pom lub Toj Khumaulas tiag tiag, ces yeej yuav zoo ib yam li kuv pom. Kuv paub tias nyob hauv kuv zaj npau suav kuv pom ib daim duab txog tus Tim Tswv Maulaunais uas muab cov phiaj kub rau Yauxej Xamiv.”
Ntau xyoo tom qab nws ua npau suav li no thiab ob peb hlis ua ntej nws tso lub ntiaj teb no tseg thaum nws muaj 88 xyoo, Elizabeth txais kev tshoov siab. Nws hais tias, “Ib qho kev xav tau los rau kuv … muaj hwj chim ib yam li tib neeg tau hais lus rau kuv, … ‘Tsis txhob muab koj zaj lus tim khawv faus rau hauv av.’”5
Ntau tiam neeg tom qab ntawd, Elizabeth zaj lus tim khawv tseem ntxiv dag zog rau nws cov xeeb leej xeeb ntxwv. Zoo ib yam li Elizabeth, peb ua neej nyob hauv ib lub ntiaj teb uas muaj neeg ua xyem xyav thiab thuam thiab cem thiab tawm tsam tej qhov tseeb uas peb ntseeg. Tej zaum peb yuav hnov tej zaj dab neeg thiab zaj xov txawv. Ib yam li Elizabeth, peb yuav tsum ua zoo npaum li peb ua tau kom tuav nkaus qhov kaj thiab qhov tseeb uas peb muaj tam sim no, qhov tseem ceeb yog thaum peb raug xwm txheej nyuaj. Tej zaum Vajtswv yuav tsis teb peb tej lus thov zoo ib yam li ntawd, tiam sis peb yuav tsum nrhiav sij hawm kom txais tau qhov kaj thiab qhov tseeb ntxiv. Thiab thaum peb txais tej ntawd, peb yuav tsum ua neej, qhia lwm tus thiab tiv thaiv tej ntawd.
Kuv hais lus tim khawv rau nej tias kuv paub thaum peb muab tus Cawm Seej txoj kev kaj thiab qhov tseeb puv peb lub siab thiab peb tsev neeg, peb yuav muaj zog txaus tiv tau txhua yam. Los ntawm Yexus Khetos lub npe, amees.