2010–2019
Yog Koj Yuav Muaj Kev Lav Ris
April 2015


Yog Koj Yuav Muaj Kev Lav Ris

Cia peb mus lawm tom ntej thaum peb kawm peb txoj ntiag tug hauj lwm, ua raws li tej kev txiav txim, thiab kam ua raws li peb Leej Txiv lub siab nyiam.

Kuv tsuas muaj 12 xyoos thaum cov tub txib xub los tshaj tawm txoj moo zoo hauv lub nroog uas kuv yug los hauv teb chaws Chile pem qaum teb. Muaj ib Hnub Caiv, kuv twb mus koom lawv ceg ntseeg me me tau rau lub hli lawm, ib tug tub txib tau cev ib qho khob cij rau kuv thaum nws yais lub cim nco txog. Kuv ntsia nws thiab ntxhi lus hais tias, ”Kuv noj tsis tau.”

Nws teb hais tias “Ua cas?”

Kuv qhia nws tias, “Rau qhov kuv tsis yog ib tug mej zeej hauv lub Koom Txoos.”1

Tus txib ntawd ntseeg tsis tau. Nws qhov muag ci ntsa iab. Kuv xav tias tej zaum nws xav hais tias, “Tab sis mas tus tub hluas no tuaj koom txhua txoj kev sib ntsib nev! Ua li cas nws thiaj tsis yog ib tug mej zeej hauv lub Koom Txoos?”

Hnub tom qab ntawd, ob tug tub txib txawm tuaj xyuas kuv tom tsev, thiab lawv tau ua txhua yam lawv ua tau los qhia tag nrho kuv tsev neeg. Tiam sis vim kuv tsev neeg tsis nyiam li, tsuas yog qhov uas kuv mus koom lub Koom Txoos txhua txhua lim piam tau ntev tshaj rau lub hlis ob tug tub txib thiaj li ua siab loj tuaj qhia peb. Thaum kawg, kuv yeej tos ntsoov thaum txog lub sij hawm uas nkawd thiaj tau caw kuv los ua ib tug mej zeej hauv Yexus Khetos lub Koom Txoos. Ob tug tub txib qhia tias vim kuv tseem hluas, kuv niam txiv yuav tsum tso lus rau kuv. Kuv tau nrog ob tug tub txib mus ntsib kuv txiv, xav hais tias nws yuav teb hais tias “Me tub, thaum koj muaj hnub nyoog txaus, koj mam li txiav txim rau koj tus kheej mas.”

Thaum ob tug tub txib tseem nrog nws tham, kuv tau rau siab thov Vajtswv kom nws yuav ua siab mos siab muag es tso lus rau kuv ua kev cai raus dej. Nws teb ob tug tub txib hais tias: “Ob tug txwj laug es, hauv rau lub hlis tas los no, kuv pom kuv tus tub Jorge sawv ntxov txhua Hnub Caiv, hnav ris tsho zoo, thiab taug kev mus rau lub koom txoos. Kuv tsuas pom hais tias lub Koom Txoos ua tej yam zoo hauv nws lub neej.” Ces, nws hais lus rau kuv, es ua rau kuv xav tsis thoob tias, “Me tub, yog tias koj yuav lav ris txoj kev txiav txim no, ces kuv tso lus rau koj ua kev cai raus dej.” Kuv khawm kuv txiv, tau nwj nws, thiab ua nws tsaug vim nws ua li ntawd. Hnub tom qab ntawd kuv tau ua kev cai raus dej. Lub lim piam tas los lawm yog 47 xyoos txij thaum muaj qhov tseem ceeb ntawd hauv kuv lub neej.

Ua cov mej zeej hauv Yexus Khetos lub Koom Txoos peb muaj kev lav ris dab tsi? Thawj Tswj Hwm Joseph Fielding Smith piav li no hais tias: “Peb los muaj ob txoj kev lav ris loj loj no. … Qhov thib ib, nrhiav kom tau peb txoj kev cawm dim; thiab, qhov thib ob, peb txoj kev lav ris rau tib neeg.”2

Yog li ntawd, ob txoj kev lav ris tseem ceeb uas Leej Txiv muab rau peb yog: kom nrhiav tau peb txoj kev cawm dim thiab pab lwm tus neeg txais kev cawm dim thiab, peb yuav tsum to taub tias txoj kev cawm dim txhais tau hais tias txais yuav lub yeeb koob siab tshaj plaws uas peb Leej Txiv npaj tseg rau Nws cov me nyuam uas mloog lus.3 Peb muaj ob txoj kev lav ris no—peb yeej zoo siab los muaj kev lav ris no—ua li ntawd ces peb yuav tsum tsa tej hom phiaj, peb tej kev xav, peb tej kev txiav txim, thiab txhua yam uas peb ua kom coj raws li ntawd.

Rau ib tug uas to taub tias vim muaj Yexus Khetos txoj Kev Theej Txhoj, peb yeej txais tau kev tsa nto, yog peb tsis tau ces qhov ntawd yog kev raug txim ntag. Yog li ntawd qhov fab ntxeev rau kev cawm dim yog kev raug txim, ib yam li qhov fab ntxeev rau kev ua tau zoo yog kev poob qab. Thawj Tswj Hwm Thomas S. Monson tau qhia peb tias “tib neeg yuav tsis txaus siab rau lawv tus kheej thaum lawv pom tau hais tias lawv ncav tau qhov zoo kawg nkaus.”4 Ua li cas, peb yuav ua li cas thiaj txaus siab rau ib yam twg uas tsis yog kev tsa nto yog peb paub tias peb yeej txais tau kev tsa nto?

Cia kuv qhia nej txog plaub txoj ntsiab cai tseem ceeb uas pab peb ua raws peb Leej Txiv Saum Ntuj Ceeb Tsheej xav thiab yuav pab tau peb rais los mus ua neeg zoo li Nws xav uas yog kom peb ua neeg zoo li Nws.

1. Kawm Peb txoj Ntiag Tug Hauj Lwm

Yog peb yuav ua raws li Vajtswv lub siab nyiam, yog peb yuav ua raws li Nws txib, peb yuav tsum pib kawm, to taub, txais yuav, thiab ua neej nyob raws li Nws xav kom peb ua. Tus Tswv hais kom peb txhua tus neeg kawm txog peb ntiag tug hauj lwm, thiab rau siab ua peb tes hauj lwm, thiab coj ua raws li txoj hauj lwm uas peb raug xaiv los mus ua, raws li qhov rau siab ua tiag.5 Thaum muaj lub siab xav ua qhov yog tsis txaus yog tias peb tsis to taub tias peb Leej Txiv xav kom peb ua.

Nyob hauv zaj dab neeg uas piav txog tus ntxhais Alice in Wonderland, Alice tsis pom qab yuav taug txoj kev twg, ces nws nug tus Miv Luag Nyav hais tias, “Thov koj pab qhia kuv seb kuv yuav tau taug txoj kev twg?”

Tus miv teb hais tias, “Qhov ntawm ko nyob ntawm seb koj xav mus txog qhov twg.”

Ces Alice hais tias, “Kuv twb tsis khe yuav mus qhov twg.”

Ces tus miv teb hais tias “Yog li ntawd koj yuav taug txoj twg los tsis ua li cas.”6

Tiam sis peb paub tias txoj kev uas coj peb mus rau ”tsob ntoo, uas muaj cov txiv uas ua rau neeg zoo siab”7—“txoj kev, uas yuav coj mus rau txoj sia”—yeej ti ti. Yuav tau sib zog taug txoj kev ntawd, thiab tsuas “muaj tsawg tus thiaj li nrhiav tau nws.”8

Nifais qhia peb hais tias “Khetos tej lus yuav qhia nej txhua txhia yam tsav uas nej yuav tsum ua.”9 Ces nws hais ntxiv hais tias “tus Vaj Ntsuj Plig Dawb Huv … yuav qhia rau nej txhua txhia yam uas nej yuav tsum ua.”10 Yog li ntawd, tej yam uas cia peb kawm peb tej hauj lwm yog Khetos cov lus uas peb txais dhau ntawm cov yaj saub thaum ub thiab cov uas tseem muaj sia nyob thiab tej kev tshwm sim uas peb txais dhau ntawm tus Vaj Ntsuj Plig Dawb Huv.

2. Ua tej Kev Txiav Txim

Txawm peb tau kawm txog txoj kev muab txoj moo zoo Txum Tim Rov Qab Los, ib txoj kev cai, tej hauj lwm uas yus ua hauv ib txoj hauj lwm, los sis tej kev khi lus hauv lub tuam tsev los, peb muaj kev ywj siab xaiv seb peb puas yuav ua raws li qhov uas peb nyuam qhuav kawm paub ntawd. Txhua tus neeg muaj kev ywj siab xaiv seb nws puas yuav ua raws li tej kev khi lus dawb ceev los sis tej kab ke hauv lub tuam tsev. Vim hais tias thaum ub tib neeg feem coob ua tej kev cog lus hauv lawv txoj kev teev ntuj, txoj kev cai qub hais tias “tsis txhob tuav kuv lub npe cog lus tsis tseeb.”11 Tiam sis, hauv lub caij nyoog nruab nrab sij hawm, tus Cawm Seej qhia txog ib txoj kev cai ceev cov lus txib uas siab dua thaum Nws hais tias tau txhais tau hais tias tau thiab tsis tau txhais tau hais tias tsis tau.12 Ib tug neeg txoj kev cog lus yuav tsum txaus los qhia hais tias nws hais qhov tseeb thiab yeej muab siab npuab rau lwm tus neeg thiab haj yam muaj siab npuab rau tus ntawd uas yog peb Leej Txiv Saum Ntuj Ceeb Tsheej. Txoj kev ua raws li peb txoj kev cog lus yeej qhia tseeb hais tias peb txoj lus muaj tseeb thiab peb yog neeg ncaj ncees.

3. Ua Raws Nraim Li

After learning our duty and making the decisions that are associated with that learning and understanding, we must act accordingly.

Ib tug yam ntxwv zoo txog txoj kev rau siab ntso ua raws li Nws txoj kev cog lus nrog Nws Txiv yog thaum lawv coj ib tug neeg uas tuag tes tuag taw los cuag tus Cawm Seej xav kom Nws muab kho. “Thaum Yexus pom hais tias lawv muaj kev ntseeg heev, Yexus txawm hais rau tus txiv neej uas tuag tes tuag taw ntawd hais tias, Me tub, kuv twb zam koj lub txim lawm.”13 Peb los paub tseeb hais tias yuav tsum muaj Yexus Khetos txoj Kev Theej Txhoj peb thiaj tau kev zam rau peb tej kev txog txhaum, tiam sis thaum tab tom kho tus neeg uas tuag tes tuag taw ntawd, tseem tsis tau muaj qhov ntawd; tseem tsis tau muaj qhov xwm hauv lub Vaj Khexemanes li. Tiam sis, Yexus twb foom koob hmoov rau tus neeg uas tuag tes tug taw kom nws muaj cuab kav sawv thiab taug kev, tab sis mas Nws kuj zam txim rau nws, yog li ntawd thiaj tau qhia tseeb hais tias Nws yeej yuav tsis poob qab, tias Nws yuav ua raws li Nws tau cog lus rau Nws Txiv, thiab tias hauv lub Vaj Khexemanes thiab saum tus ntoo khaub lig Nws yuav ua raws li Nws tau cog lus tseg lawm.

Txoj kev uas peb xaiv los taug yeej ti ti. Thaum tab tom taug kev peb yuav muaj teeb meem uas ua rau peb xav tau txoj kev ntseeg Yexus Khetos thiab peb yuav tau rau siab ntso taug txoj kev thiab mus lawm tom ntej. Peb yuav tsum hloov siab lees txim thiab mloog lus thiab ua siab ntev, tab txawm peb tsis to taub txhua yam uas nyob ntawm peb ib ncig. Peb yuav tsum zam txim rau lwm tus neeg thiab ua raws li tej yam uas peb kawm lawm thiab lees yuav tej yam uas kawj los tom qab peb txiav txim ua ib yam dab tsi.

4. Zoo Siab Hlo Ua Raws li Leej Txiv lub Siab Nyiam

Txoj kev ua ib tug ntseeg yuam kom peb kawm peb txoj ntiag tug hauj lwm, txiav txim siab zoo, thiab ua raws li tej kev txiav txim, tiam sis tsis tas li ntawd xwb peb yuav tsum kawm muaj lub siab kam ua raws li Vajtswv lub siab nyiam, tab txawm qhov ntawd tsis phim peb tej kev xav uas ncaj ncees los sis tsis phim peb lub siab.

Kuv yeej qhuas tus neeg uas mob ruas uas tuaj cuag tus Tswv, “Nws txhos caug ntua ntawm Yexus ko taw thiab thov hais tias, Yog koj txaus siab kho kuv tus mob, koj yeej kho tau.”14 Tus neeg mob ruas tsis yuam kom nws ua dab tsi, tab txawm xav li ntawd los yuav ncaj ncees los, nws kam ua raws li tus Tswv lub siab nyiam.

Ntau xyoo tas los lawm, muaj ib khub niam txiv uas yog kuv ob tug phooj ywg, nkawd twb thov Vajtswv ntau xyoo ces nkawd muaj hmoov thiaj yug tau ib tug tub. Nkawd tsev muaj kev hlub puv npo thaum wb ob tug phooj ywg thiab nkawd tib leeg ntxhais, zoo siab tos txais tus me nyuam tub tshiab tshiab ntawd. Tiam sis, muaj ib hnub tau muaj xwm txheej tsis zoo: tus me tub, uas muaj peb xyoos xwb, txawm mob es tsis nco qab lawm. Thaum kuv kawm txog qhov no, kuv hu kuv tus phooj ywg qhia tias wb pab nkawd tu siab thiab xav txhawb pab nkawd lub sij hawm nyuaj nyuaj no. Tiam sis nws lo lus teb yog ib zaj lus qhia rau kuv. Nws hais tias, “Yog tias Leej Txiv xav coj nws mus cuag Vajtswv, ces wb yeej pom zoo ua li ntawd.” Kuv tus phooj ywg cov lus ntawd tsis yog yws yws, tsis txaus siab, los sis chim siab dab tsi li. Tab sis mas, kuv tsuas hnov nws ua Vajtswv tsaug vim nkawd tau muaj sij hawm muaj tus tub no, thiab nws yeej kam ua raws nraim li Leej Txiv lub siab xav kom nkawd ua. Ob peb hnub tom qab ntawd, tus tub ntawd tau raug coj mus nyob saum lub ntuj ceeb tsheej xilethi-aus.

Cia peb mus lawm tom ntej thaum peb kawm peb txoj ntiag tug hauj lwm, ua raws li tej kev txiav txim, thiab kam ua raws li peb Leej Txiv lub siab nyiam.

Kuv muaj kev ris txiaj thiab zoo siab heev vim kuv txiv tau cia kuv txiav txim li ntawd 47 xyoo tas los lawm. Nyob nyob ces, kuv to taub tias nws tau tsa kev cai li cas rau kuv—uas yog kom lav ris txoj kev txiav txim ntawd—txhais tau hais tias lav ris rau kuv Leej Txiv Saum Ntuj Ceeb Tsheej thiab nrhiav kom tau kuv txoj kev cawm dim thiab pab tib neeg tau kev cawm dim thiab, ua li ntawd thiaj rais los mus ua neeg zoo li Leej Txiv xav kom kuv ua. Hnub tshwj xeeb no, kuv hais lus tim khawv tias Vajtswv peb Leej Txiv thiab Nws Leej Tub muaj sia nyob. Los ntawm Yexus Khetos lub npe, amees.