Nej Puas Xav tias Txoj Moo Zoo Tseem Zoo Kawg Nkaus?
Los ntawm Npisov Gérald Caussé
Tus Pab Cuam thib Ib hauv Thawj Pawg Npisov
Qhov uas peb xav tsis thoob txog tej yam zoo kawg nkaus ntawm txoj moo zoo yog ib lub cim txog peb txoj kev ntseeg. Yog qhov uas peb pom tus Tswv txoj kev pab hauv peb lub neej thiab txhua yam uas nyob ib puag ncig peb.
Kuv tus poj niam thiab kuv zoo siab uas wb tu wb tsib tug me nyuam nyob ze lub nroog zoo Paris. Thaum ntawd wb xav kom lawv muaj cib fim ntau pom tej yam zoo heev nyob hauv lub ntiaj teb no. Txhua lub caij sov, peb tsev neeg tau mus deb mus xyuas tej qhov chaw nco txog, tej qhov chaw keeb kwm, thiab tej qhov chaw zoo nkauj uas tseem ceeb tshaj nyob hauv Europe. Ces, tom qab peb nyob hauv Paris tau 22 xyoos, peb npaj tsiv tsev. Kuv tseem nco qab hnub uas kuv cov me nyuam los rau kuv thiab hais tias, “Txiv, ua cas! Peb twb nyob no tas peb lub neej, es peb twb tsis tau mus xyuas lub Eiffel Tower nev!”
Muaj tej yam zoo kawg nkaus ntau heev nyob hauv lub ntiaj teb no. Tiam sis, thaum peb pom tej no tas li, ua rau peb tsis saib tej no rau nqi. Peb pom, tiam sis peb tsis saib tiag tiag, peb hnov, tiam sis peb tsis mloog tiag tiag.
Thaum Nws ua hauj lwm hauv lub ntiaj teb, Yexus hais rau Nws cov thwj tim tias:
“Tej uas nej pom no, yog nej muaj hmoo kawg nej thiaj pom:”
“Kuv qhia rau nej hais tias, cov [yaj saub] thiab cov vaj ntxwv ntau leej xav pom tej uas nej pom, tiam sis lawv tsis tau pom, lawv xav hnov tej uas nej hnov, tiam sis lawv tsis tau hnov.”1
Muaj ntau zaus kuv tau xav seb yuav zoo li cas yog kuv ua neej nyob thaum Yexus tau nyob. Seb yuav zoo li cas yog tias nej zaum ntawm Nws ko taw? yog Nws puag nej? yog nej saib Nws pab lwm tus? Tiam sis neeg coob uas ntsib Nws tsis tau paub—tsis tau “pom”—hais tias Vajtswv Leej Tub nrog lawv nyob.
Peb kuj nyob hauv ib lub caij nyoog zoo kawg. Cov yaj saub thaum ub pom tej hauj lwm ntawm txoj Kev Txum Tim txoj Moo Zoo Rov Qab Los yog txoj hauj lwm zoo kawg nkaus thiab ib qho txuj ci tseem ceeb.2 Tsis muaj lwm lub caij nyoog uas tau muaj cov tub txib coob npaum li no, muaj ntau lub teb chaws uas tau qhib kev txais txoj moo zoo npaum li no, thiab ntau lub tuam tsev uas nyob thoob plaws lub ntiaj teb npaum li lub caij nyoog no muaj.
Peb cov Neeg Ntseeg hauv Hnub Nyoog Kawg muaj tej yam zoo kawg nkaus hauv peb lub neej thiab. Tej no yog peb txoj kev hloov siab los ntseeg, tej lus teb rau peb tej lus thov, thiab cov koob hmoov uas Vajtswv niaj hnub pub rau peb.
Qhov uas peb xav tsis thoob txog tej yam zoo kawg nkaus ntawm txoj moo zoo yog ib lub cim txog peb txoj kev ntseeg. Yog qhov uas peb pom tus Tswv txoj kev pab hauv peb lub neej thiab txhua yam uas nyob ib puag ncig peb. Qhov uas peb xav tsis thoob ua rau peb muaj zog ntawm sab ntsuj plig. Thiab ua rau peb muaj zog kom peb rau siab ntseeg thiab mob siab ua txoj hauj lwm cawm seej no.
Tiam sis peb yuav tsum ceev faj. Qhov uas peb xav tsis thoob tawg tau yooj yim. Yog peb lam ua raws li tej lus txib, tsis tshua xav li cas, los yog nkees ua zoo tau ntev ces ntshe peb yuav tsis pom tej txuj ci tseem ceeb thiab tej lub cim zoo kawg nkaus ntawm txoj moo zoo.
Phau Ntawv Maumoos piav txog ib lub caij nyoog zoo nkaus li peb lub, ua ntej tus Mexiyas los rau Amelikas. Tej lub cim txog Nws txoj kev yug los twb tshwm kiag saum ntuj. Cov neeg no xav tsis thoob es lawv thiaj li txo hwj chim, thiab yuav luag txhua tus hloov siab los ntseeg. Tiam sis, plaub xyoos tom qab ntawd xwb, “cov neeg tau pib hnov qab tej cim thiab tej kev xav tsis thoob ntawd uas lawv tau hnov, thiab tau pib tsis yoob rau ib lub cim los sis ib txoj kev xav tsis thoob uas los saum ntuj los, … thiab tau pib tsis ntseeg tag nrho tej uas lawv tau hnov thiab tau pom.”3
Kuv cov kwv tij thiab cov muam, nej puas tseem xav tias txoj moo zoo zoo kawg nkaus? Nej puas pom, hnov, thiab xav tsis thoob? Los yog nej txoj kev txawj hnov ntawm sab ntsuj plig puas tsaug zog? Txawm nej zoo li cas los, kuv caw nej ua peb qho ntawm no.
Qhov ib, tsis txhob nkees nrhiav los sis rov qab nrhiav qhov tseeb ntawm txoj moo zoo. Tus kws sau ntawv Marcel Proust hais tias, “Kev nrhiav tau tiag tiag tsis yog los ntawm kev nrhiav tej qhov chaw tshiab, tiam sis yog thaum yus pom kev nrog qhov muag tshiab.”4 Nej puas nco qab thawj thawj zaug uas nej nyeem ib nqe vaj lug kub thiab nej xav tias tus Tswv hais kiag rau nej? Nej puas nco qab thawj thawj zaug uas nej tau hnov tus Vaj Ntsuj Plig Dawb Huv, tej zaum ua ntej nej tau paub tias yog tus Vaj Ntsuj Plig Dawb Huv? Tej lub sij hawm no yeej dawb ceev thiab tshwj xeeb heev yom?
Peb yuav tsum mob siab nrhiav kev txawj ntse ntawm sab ntsuj plig txhua hnub. Peb ua tau li no thaum peb kawm ntawv, siv sij hawm xav hauv peb lub siab, thiab thov Vajtswv. Tej lub sij hawm peb yuav raug ntxias xav hais tias, “Kuv tsis tas kawm vaj lug kub hnub no; kuv twb nyeem txhua nqe lawm” los sis “kuv tsis tas koom lub koom txoos hnub no; tsis muaj dab tsi tshiab.”
Tiam sis txoj moo zoo yog lub hauv paus ntawm kev txawj ntse uas yeej tsis qhuav. Yeej muaj tej yam tshiab uas nej kawm tau thiab hnov tau txhua Hnub Caiv, nyob hauv txhua txoj kev sib ntsib, thiab txhua nqe vaj lug kub. Peb muaj kev ntseeg tias yuav muaj raws li kev cog lus uas hais tias yog peb “nrhiav, … [peb] yeej yuav nrhiav tau.”5
Qhov ob, muab nej txoj kev ntseeg tsom ntsoov rau qhov tseeb ntawm txoj moo zoo uas yooj yim to taub. Peb yuav tsum tsom ntsoov rau tej ntsiab cai tseem ceeb ntawm peb txoj kev ntseeg, peb tej kev khi lus dawb huv, thiab ua tej yam kom teev tiam Vajtswv.
Ib tug ntxhais txib qhia ib zaj dab neeg txog peb tug txiv neej uas nws ntsib nyob hauv koog chaw rooj sab laj nyob hauv Africa Teb. Lawv tuaj ntawm ib lub zos nyob deb heev tuaj uas nyob hauv ib qhov chaw uas lub Koom Txoos tseem tsis tau txhim tsa tiam sis muaj 15 tus mej zeej thiab yuav luag 20 leej uas kawm txog txoj moo zoo. Tau ob lub lim tiam tawm cov txiv neej no twb mus ko taw tshaj 300 mais tawm (480 km), taug tej kev av nkos vim yog lub caij ntuj los nag ntau, es lawv ua li no kom lawv thiaj li koom tau rooj sab laj thiab them ib feem kaum uas cov mej zeej tau muab rau lawv nqa tuaj. Lawv tau npaj nyob tau ib lub lim tiam lawv thiaj yuav muaj sij hawm txais lub cim nco txog thaum Hnub Caiv ces lawv cia siab tias yuav nqa ob peb lub thawv ntawv uas muaj tej Phau Ntawv Maumoos nyob saum lawv taub hau mus rau lawv cov neeg hauv lawv lub zos.
Tus ntxhais txib ua tim khawv tias qhov uas tshoov nws lub siab yog qhov uas cov kwv tij no xav tsis thoob txog thiab txaus siab ua txhua yam kom tau tej yam uas nws ib txwm muaj tas li.
Tus ntxhais txib no hais tias, “Nyob hauv Arizona, yog muaj ib Hnub Caiv es kuv sawv thiab kuv lub tsheb tsis khiav, kuv puas mus ko taw rau kuv lub tsev koom txoos deb li ob peb block ntawm kuv lub tsev?” Los yog kuv puas nyob hauv tsev xwb vim kuv xav tias deb dhau los yog ntuj los nag?”6 Tej lus nug no yeej zoo rau peb sawv daws xav.
Qhov kawg, kuv caw nej nrhiav thiab muab siab npuab tus Vaj Ntsuj Plig Dawb Huv. Tej yam zoo kawg nkaus ntawm txoj moo zoo los peb tsis pom thiab hnov ntawm peb qhov muag thiab pob ntseg. Muaj tej yam uas “qhov muag tsis tau pom los sis qhov ntsej tsis tau hnov,… Vajtswv npaj tej ntawd tseg rau cov neeg uas hlub Vajtswv lawm.”7
Thaum peb muaj tus Ntsuj Plig nrog peb, peb haj yam hnov tej yam ntawm sab ntsuj plig thiab peb lub cim xeeb txawj nco ntsoov tej txuj ci tseem ceeb thiab tej lub cim uas peb twb pom lawm. Tej zaum yog vim li ntawd, cov Neeg Nifais uas yog Yexus cov thwj tim, thaum lawv paub tias Yexus yuav ncaim lawv, lawv rau siab thov “rau yam uas lawv xav tau tshaj; thiab lawv tau xav kom tus Vaj Ntsuj Plig Dawb Huv yuav raug muab rau lawv.”8
Txawm tias lawv twb pom tus Cawm Seej lawv tus kheej lawm thiab tau xuas tej qhov txhab caws pliav los, lawv paub tias lawv tej zaj lus tim khawv yuav ploj mus yog tias tsis muaj Vajtswv tus Ntsuj Plig lub hwj chim txhawb nqa lawv. Kuv cov kwv tij thiab cov muam, tsis txhob ua ib yam dab tsi kom poob lub txiaj ntsim zoo kawg nkaus uas muaj nqi heev—tus Vaj Ntsuj Plig Dawb Huv. Nrhiav nws los ntawm kev rau siab thov Vajtswv thiab kev ua neej ncaj ncees.
Kuv ua tim khawv tias txoj hauj lwm uas peb ua no yog “ib txoj hauj lwm zoo kawg nkaus thiab ib qho txuj ci tseem ceeb.” Thaum peb coj raws li Yexus Khetos, Vajtswv ua tim khawv rau peb “ua tej txuj ci loj thiab tseem ceeb thiab ua tej uas qhia nws lub hwj chim rau sawv daws pom hais tias yeej muaj li lawv hais tiag. Thiab Vajtswv pub tus Vaj Ntsuj Plig Dawb Huv rau sawv daws raws li Vajtswv pom zoo pub.”9 Hnub tshwj xeeb no, kuv ua ti khawv tias tej yam zoo kawg nkaus thiab tej txuj ci tseem ceeb ntawm txoj moo zoo yeej los ntawm Vajtswv lub txiaj ntsim zoo tshaj plaws—tus Cawm Seej txoj Kev Theej Txhoj. Qhov no yog lub txiaj ntsim zoo tag nrho ntawm kev hlub uas Leej Txiv thiab Nws Leej Tub, uas koom siab koom ntsws, tau muab rau peb txhua tus. Nrog nej sawv daws, “Kuv zoo siab Yexus hlub kuv thiab foom koob hmoov rau kuv. … Auj, kuv zoo siab kawg nkaus, zoo siab ua nws tsaug!”10
Kuv thov kom peb yuav muaj qhov muag uas pom kev, pob ntseg uas hnov lus, thiab tej siab uas to taub tej yam zoo kawg nkaus ntawm txoj moo zoo, los ntawm Yexus Khetos lub npe, amees.