E Pil Kapkaperen ong uhkete?

Ngehi oh ahi pwoud peren laud ni aht apwalihda nait seri limen limwahn kahnihmw en Paris. Nan pahr akau me se mihmi mwo se men irail en ahneki ansou mwahu en kilangidi soang tohto me kaselel nan sampah. Nan ehu ehu summer, aht peneinei kin mwomweitla wasa poadoapoadih laud kan en nan Europe. Murin sounpar [rieisek riau] 22 me se koukousoanki limahn Paris, se kaukaunopehr se pahn kosou sang wasahu. I kak tamtamante rahn me nei serihkau kohdo oh ndahngie, “Pahpa, udahn e sto mwahu! Pwe kitail mihmihki wasah pali laud en atail mour, ah kitail ahpw saikinte mwomweitla Eiffel Tower!”

Diren mehkot kaselel nan sampah. Ahpw, ekei pak ansou kitail kin kalapw kilikilang, kitail kin sohla katapaniki. Kitail kilang, ahpw kitail sohte udahn kilang; kitail rong, ahpw kitail sohte udahn rong.

Ni ah ketin ketket pohn sampah, Sises mahsanih ohng sapwelime tohn padahko:

“Meid pai kumwail me uduhdiahlehr mehkan me kumwail uduhdiahl met:

“Kumwail en ese pwe soukohp tohto oh nanmwarki tohto ngoangkilahr en udiahl mehkan me kumwail uduhdial met; re ahpw soht kak; re pil men iang rong mehkan me kumwail rongorong met, re ahpw sohte kak”¹

Pak tohto I kin kamedowehdo ia pahn mwomwen momour nan ansouo me atail Soundoro ketket pohn sampah. Kumwail kak medewehiong mwomwohd limwahn alualuwehko? Kehn Sapwellime peren? Kadehdeh Ah ketin Papah mehteikan? Ahpw tohto me pil kilangidi me sohte kasawih—de “tehk”—me Sapwellimen Koht Iehros iei me ketket rehrail.

Kitail pil iang paieki momour ansou kesemwpwal. Soukohp en kawa ko kilangedi doadoahk en kopwurupwudohu nin duwen eh wia doadoak kopwuriamwei oh kesemwpwal.”²Sohte ehu mwei mahs me diren misineri malipilip da duwehte mwei wet, tohto wei kan me mweidada kalohk en rongamwahu en wiawi, oh tohto en tehnpas sarawi kokouda nan sampah.

Ong kitail, ni atail wia Souleng en Imwin-rahn akan, doadoahk kopwuriamwei pil kin wiawi nan atail mour. Me pwukat iangahki atail weliakapw, pasapeng me kitail kin alehdi sang atail kapakap kan, oh kapai limpoak me Koht ketin kamwerehdiong kitail rahn koaros.

Kapingki doadoahk kopwuriamwei en rongamwaho iei kilel en pwoson. Met iei kasawihda sapwellimen Kauno doadoahk nan atail mour oh mehkoaros rehtail. Atail pwuriamweiki pahn kiheng kitail kehlail. E pahn kiong kitail kehlail en katengehdi atail pwoson oh iang wia doadoahk en komourla.

Ahpw kitail en kanaiehng. Atail pwuriamweiki kak mengei en ohla. Mwurin ahnsou kis, soukautih en momourki kosonned akan, dangapaur, de pil pwangahki kakete kahrehda atail sohla kehn doadoahk kopwuriamwei en rongamwaho.

Pwuhk en Mormon kawehweda ansou ehu, me duwehte atail ansou, mwohnte Mesaia Ah ketla nan America. Kilel kei wiahkinteh iou pwarada nanleng. Aramasoko udahn pwuriamwei mehlel oh karakarahkala, oh kereniong koaros en weliakapwal. Ahpw, sounpar pahiou mwuri, aramasoko tepda moanokehla kilel kopwuriamwei ko nin duwen arail rongehr, oh tepida ekis ekis sohsohla pwuriamweiki kilel kopwuriamwei me sansal ong irail …oh tepda peikasalki dahme irail rongehr oh kilang.³

Riei ohl oh lih akan, rongamwahwet kaperenehnguhkte? Ke kakete kilang, rong, pehm, reriki, oh pwuriamweiki? De amwail selin pepehm en palingehn luwetalahr? Sohte lipilipl soangen mour dah me kitail mih loale, I luke kumwail en wia soang siluh.

Keieu, dehr pwangahkihda esehla de pwurehng esehla mehlel en rongamwahuo. Soun nting Marcel Proust nda, “Udahn seilok en rapahki sohte kin roporopte wasa kapw ahpw rapahki ehusoangen wiepe.”⁴Kumwail kak katamando tepin amwail wadek irehieu nan pwuhk sarawi oh kehn Kauno Ah ketin mahmahseniong uhk? Ke kak tamanda ansou me ke tepin kehn pepehm en Ngehn Sarawi, ele mwein mwohn ahmw esehda me Ngehn Sarawi mwo? Me pwukat sou ansou kesempwal oh sarawi kei?

Kitail anahne inganih rahn koaros en alehdi eripit nan palingehn. Wiepe wet pahn pweida ni atail pahn onop, medemedewe, oh kapakap. Ekei pak kitail pahn kin lel kasongosong pwe kitail en medewe, “I sohte anahne onopiki pwuhk sarawih kan rahn wet; I wadekehr rahn teiko” de “I sohte anahne kohla sarawi rahnwet; sohte mehkot kapw mwo.”

Ahpw nan rongamwahu wet e sohte kak nekla dahme kitail pahn esehla. Rahn sarawi koaros mie mehkot kapw me kitail pahn esehla oh kehn, nan mihting koaros, oh nan iren pwuhk sarawi koaros. Ni pwoson kitail kin tamataman inouo me ma kitail “rapahki, …[kitail] pahn diar.”⁵

Keriau, katengehdi amwail pwoson nan poahson en padahk kan en rongamwahu. Atail pwuraimweiki rongamwahu wet anahne tengedi nan poahson en padahk en Krais, nan atail kolokol inou kan oh tiahk sarawih kan ni mwakelekel, oh ni atail wiwiahkan oh atail wiwiah kan.

Sister misinerih men soiahda ohl silemen me e tuhwong nan district conference ehu nan Africa. Irail kohsang nan kahn ihmw ehu me diren aramas oh Mwomwohdiso saikinte lella mwo ahpw mie towe loaloapwot [ehk limen] 15 oh kereniong meh [riehk] wia investigator kei. Ohlakau sapsapalki rahn kei tohtohki sang wihk riau, me reireiki mwail 300 (480 km) nan ahl me kin pwelmatakda pwehki kotou, pwe irail en kak iang conference oh wahla ahn arail pwihn arail meirong en mwohni. Irail koasonehdi me irail pahn mihmi mwo nan wihko pwe irail en kak ale kamadipw sarawi rahn sarawi oh ahpw mweselda kapaik pohn mongerail koakon me diren pwuhk en Mormon pwe irail en kak kiheng aramas en nan arail kahnihmwo.

Misineri menet kadehdehki pepehm me e kehn sang doadoahk kopwuriamwei me ohloko kasalehda sang ni arail mongiong unsek arail tohnmetei pwe irail en kak alehdi dahme apwal ong irail apw ong ih soahng pwuko ansou koaros kin mie.

E medewe: Ma I pirida nimenseng en Rahn sarawi nan Arizona oh diarada me werei sdohsa ohla, I pahn aluhla sarawi wasa sohte nohn dohsang imweo? De I pahn mihmihte nimweio pwehki I doh ki de e wie kotkotou?”⁶ Mie kalelapak mwahu kei me kitail anahne medemedewe.

Kesiluh, I luke kumwail en rapahki oh kesempwalki Ngehn Sarawi en wia iengemwail. Pali laud en doadoahk kopwuriamwei en rongamwahu sohte kak dierekda sang pein kitail. Irail iei soang kan me “pwoaren mesetail sohte kak kilang, de salengetail sohte kak rong, … soang kan me Koht kaunopadahng irail me poakong.⁷

Ansou me Ngehno kin ieiang kitail, atail selin pepehm en palingehn kin mwahula oh atail madamadau kin pirida pwe kitail en dehr monokehla atail kadehde kilel kopwuriamwei kan. Ihme kahreda, Sapwellimen Sises tohnpadahk en Nephite kau ni arail ese me E pahn mwesel sang irail, irail ngidingidki peki reh en ketin ketkiong irail Ngehn Sarawi pwe ihme irail kupwurki.⁸

Mehndahte arail kilangkier meserail oh doahkehkier pehrail lipwen ohlan Soundoro, irail ese me arail kadehde kan kak luwetala ma irail sohte pahn kalapw alahle kakehlail sang manaman en Sapwellimen Koht Ngehno. Riei ohl oh lih akan, dehr wia mehkot me pahn kahrehda amwail pahn sohla ahneki kisakis kesemwpwal wet—me iei ianganki Ngehn Sarawi. Rapahki sang ni kapakap ngidingid oh mour pwung.

I kadehdehki me doadoahk me kitail mih loale iei doadoahk kopwuriamwei oh kesemwpwal. Ni atail pahn idawehn Sises Krais, Koht pahn kadehde ohng kitail “kilel oh soangen doadoahk manaman kowpuriamwei kan, oh kisakis en Ngehn Sarawi.”⁹ Rahn kesempwal wet, I kadehdehki me doadoahk kowpuriamwei koaros en rongamwahu wet kin pwulisang kisakis en Koht me keieu kesemwpwal—Tohmwpen Soundoro. Met iei kisakis unsek en limpok me Sahmo oh Sapwelimeo, ehukipene, kihong emen emen kitail. I iang kumwail “Pwuriamweiki limpoak me Sises ketkihdo. ... Oh, e kesempwal, kesemwpwal ongie!”¹⁰

Pwe kitail en kalapw kilangki mesetail me kak kilang, rongki salenge me kak rong, oh mongiong me kak kasawih doadoahk kopwuriamwei en rongamwahuo iei Ih me I kapakapki ni mwaren Sises Krais, amen.