2010–2019
“Puas Yog txoj Kev Cai Yoo Mov uas Kuv Txaus Siab Ua Yog Li No?”
April 2015


“Puas Yog txoj Kev Cai Yoo Mov uas Kuv Txaus Siab Ua Yog Li No?”

Nej cov nyiaj yoo mov yuav pab ntau tshaj qhov uas pab pub mov noj thiab pab muab ris tsho hnav. Nej cov nyiaj yoo mov yuav pab kho thiab hloov tej siab tej ntsws.

Kuv cov kwv tij thiab cov muam uas kuv hlub, kuv zoo siab heev uas kuv qhia tau kuv txoj kev hlub rau nej hauv lub tuam rooj sab laj no ntawm Yexus Khetos lub Koom Txoos ntawm Tsoom Haiv Neeg Ntseeg ntawm Hnub Nyoog Kawg. Txoj kev zoo siab ntawd los ntawm qhov tim khawv ntawm tus Ntsuj Plig uas hais tias tus Cawm Seej txoj kev hlub npog nej txhua tus thiab npog tag nrho peb Leej Txiv Saum Ntuj Ceeb Tsheej cov me nyuam. Peb Leej Txiv Saum Ntuj Ceeb Tsheej xav foom koob hmoov rau Nws cov me nyuam txawm yog ntawm sab ntsuj plig los yog ntawm lub cev nqaij daim tawv huv tib si. Nws to taub saib lawv txhua tus xav tau dab tsi tiag, lawv tej kev mob nkeeg, thiab lawv tej kev cia siab.

Thaum peb cev tes mus pab leej twg, ces tus Cawm Seej saib qhov ntawd zoo nkaus li peb tau cev tes mus pab Nws ntag.

Nws qhia peb tias qhov ntawd muaj tseeb thaum Nws hais txog ib lub sij hawm yav tom ntej thaum peb txhua tus yuav pom Nws tom qab peb lub neej hauv ntiaj teb no tiav tas. Qhov uas kuv pom thaum kuv xav txog hnub ntawd tau rais los mus ua ib qho pom meej meej dua thaum kuv tau thov Vajtswv thiab yoo mov kom thiaj paub saib kuv yuav hais li cas tag kis no. Tus Tswv tau piav rau Nws cov thwj tim hais txog qhov kev xam phaj ntawd uas peb yuav muaj yav tom ntej, thiab Nws zaj lus ntawd piav txog qhov uas peb cia siab rau kawg siab kawg ntsws thiab:

“Thaum ntawd Vaj Ntxwv yuav hais rau cov neeg uas nyob ntawm nws sab xis hais tias, Nej cov uas tau kuv Txiv txoj koob hmoov, nej cia li los kav lub teb chaws uas twb npaj rau nej thaum tsim lub ntiaj teb los lawm:

“Thaum kuv tshaib plab, nej pub mov rau kuv noj, thaum kuv nqhis dej; nej pub dej rau kuv haus; thaum kuv tuaj ua qhua, nej hu kuv los hauv nej tsev:

“Thaum kuv tsis muaj ris tsho hnav; nej muab rau kuv hnav. Thaum kuv muaj mob, nej tuaj tu kuv. Thaum kuv raug kaw rau hauv tsev loj cuj, nej tuaj saib kuv.

“Thaum cov neeg ncaj ncees hnov li ntawd lawv yuav teb hais tias, Tus Tswv, thaum twg ais peb pom koj tshaib plab peb tau muab mov rau koj noj? los sis pom koj nqhis dej thiab muab dej rau koj haus no?

“Thaum twg ais koj tuaj ua qhua peb tau hu koj los so hauv peb tsev? los sis pom koj tsis muaj tsoos tsho hnav, thiab peb muab rau koj hnav no?

“Thaum twg ais peb pom koj muaj mob los sis pom koj raug kaw hauv tsev loj cuj peb tau tuaj xyuas koj no?

“Vaj Ntxwv yuav teb hais tias, Kuv qhia tseeb rau nej hais tias, thaum nej pab kuv cov kwv tij no ib tug, txawm yog tus ntawd tsis muaj hwj chim dab tsi li los yog, nej tseem pab nws thiab, qhov uas nej pab li ntawd twb yog nej pab kuv ntag.”1

Nej thiab kuv xav hnov tus Cawm Seej hais cov lus zoo siab txais tos ntawd tiag. Tiam sis peb yuav ua li cas qhia tias peb tsim nyog txais? Yeej muaj peb Leej Txiv Saum Ntuj Ceeb Tsheej cov me nyuam coob tug uas tshaib plab, tsis muaj tsev nyob, thiab kho siab, thiab peb tsis muaj peev xwm pab lawv txhua tus. Thiab lawv cov no txawm coob zuj zus tuaj.

Thaum peb ua zoo npaum li peb ua tau, tus Tswv yuav nyob nrog peb. Yog ib txoj lus txib uas yooj yim heev ua raws li, npaum li tias ib tug me nyuam to taub tau. Yog ib txoj lus txib uas muaj lus cog tseg rau lawv cov uas xav tau kev pab thiab rau peb sawv daws huv tib si.

Twb yog txoj kev cai ntawm kev yoo mov. Cov lus hauv phau Yaxayas yog cov lus uas tus Tswv siv piav txog txoj lus txib no thiab tej koob hmoov uas muaj los rau peb cov uas koom Nws lub Koom Txoos, hais tias:

“Txoj kev cai yoo mov uas kuv txaus siab ua yog li no: Daws tej saw hlau ntawm txoj kev tsim txom thiab txo tus quab ntawm txoj kev tsis ncaj ncees, thiab tso cov neeg uas nej tsim txom tawm mus.

“Faib nej tej zaub mov rau cov neeg tshaib plab noj thiab qhib qhov rooj rau cov neeg pluag uas tsis muaj tsev nyob. Pub ris tsho rau cov neeg txom nyem tau hnav, thiab yuav tsum pab nej tej kwv tij.

“Ces kuv txoj kev kaj yuav ci rau nej ib yam li lub hnub ci thaum sawv ntxov, thiab nej tej qhov txhab yuav zoo sai. Kuv yuav nrog nraim nej thiab ua nej tus cawm seej; kuv lub hwj chim yuav tsom kwm puag ncig nej.

“Ces thaum nej thov, tus Tswv yuav teb nej; thaum nej hu kom nws pab, nws yuav teb hais tias kuv nyob ntawm no. Yog nej tshem tus quab, tej kev taw tes, thiab tej kev hais lus khav theeb tawm ntawm nej;

“Yog nej pub zaub mov rau cov neeg tshaib plab noj thiab pab cov neeg txom nyem; ces tej kev tsaus ntuj uas nyob ib ncig nej yuav hloov ua lub teeb ci rau nej pom kev ib yam li thaum tav su.

“Kuv yuav ua tus coj nej kev mus ib txhis thiab pub txhua yam zoo rau nej kom txaus nej siab.”2

Ces tus Tswv tau muab ib txoj lus txib yooj yim rau peb uas muaj ib los lus cog tseg zoo kawg nkaus. Hauv lub Koom Txoos hnub no peb muaj lub cib fim yoo mov ib hlis ib zaug thiab muab nyiaj yoo mov rau peb tus npisov los yog ceg ntseeg tus thawj tswj hwm kom pab cov pluag thiab cov xav tau kev pab. Cov nyiaj pub no ib txhia yuav siv kom pab cov neeg ib ncig ntawm nej, tej zaum ib tug neeg hauv nej tsev neeg. Tus Tswv cov tub qhe yuav thov Vajtswv thiab yoo mov kom tau kev tshwm sim thiab kom paub saib yuav tsum pab leej twg thiab yuav tsum muab pub li cas. Cov nyiaj uas tsis tas siv kom pab cov neeg hauv koj pawg ntseeg yuav muab siv kom pab lwm cov mej zeej ntawm lub Koom Txoos, nyob thoob plaws lub ntiaj teb no.

Txoj lus txib kom yoo mov pab cov pluag yeej muaj tej koob hmoov ntau uas los tau rau yus. Thawj Tswj Hwm Spencer W. Kimball hais tias qhov uas tsis ua raws li ib txoj kev cai ib qho kev txhaum vim yog tsis ua es tus nqi hnyav heev. Nws sau ntawv hais tias: “Tus Tswv tau cog lus zoo kawg nkaus li rau lawv cov uas yoo mov thiab pab cov neeg pluag. … Kev tshoov siab thiab kev coj ntawm sab ntsuj plig yuav los rau yus thiab yus yuav nyob ze dua peb Leej Txiv Saum Ntuj Ceeb Tsheej. Yog peb tsis coj ncaj ncees thiab yoo mov, ces peb yuav tsis tau tej koob hmoov no.”3

Kuv tau txais ib qho koob hmoov zoo li ntawd ob peb lim tiam tas los no xwb. Vim lub tuam rooj sab laj no muaj rau ib hnub vas xaum vas thiv uas feem ntau yog lub sij hawm yoo mov thiab ua tim khawv, hnub vas xaum vas thiv tas los no kuv tau yoo mov thiab thov Vajtswv kom paub saib kuv yuav ua li cas kom thiaj ua raws li txoj lus txib kom saib xyuas thiab pab cov uas xav tau kev pab.

Thaum hnub Saturday, kuv tseem yoo mov, kuv sawv thaum 6:00 thiab thov Vajtswv ib zaug ntxiv. Kuv txais kev tshoov siab kom saib xov xwm ntiaj teb. Ces kuv txawm nyeem tsab ntawv xov xwm no hais tias:

Qhov Khaub Zig Cua Pam tau ua rau ntau lub tsev puas tsuaj thaum nws nplawm lub nroog Port Vila, lub tuam ceeb ntawm Vanuatu. Rau tus neeg hauv Vanuatu raug tuag vim yog qhov khaub zig cua no, thawj qhov xov xwm uas paub tseeb los ntawm qhov khaub zig cua muaj hwj chim ntau no.

“Twb tsis muaj ib tsob ntoo li uas sawv ntseg thaum qhov khaub zig cua los nplawm” lub pov txwv hauv dej Pacific no.4

World Vision pawg neeg pab saib xyuas kam ceev tau npaj siab xyuas saib txhua qhov txhia chaw zoo li cas tom qab qhov khaub zig cua mus dhau lawm. 

Lawv tau qhia lawv cov neeg kom nrhiav kev tiv thaiv hauv tej tsev khov kho xws li tsev kawm ntawv.

Thiab lawv txawm hais tias: “‛Tej tsev uas muaj zog tshaj plaws yog tej tsev teev ntuj,’ Inga Mepham [los ntawm] CARE International hais. … ‛Lawv ib txhia tsis muaj tej tsev zoo li ntawd thiab. Yeej nyuaj nrhiav kom tau ib lub tsev uas yuav tiv tau ib qho khaub zig cua Theem 5 (cua daj cua dub).’”5

Thaum kuv nyeem qhov ntawd, kuv nco qab thaum kuv tau mus xyuas tej tsev nyob ntawm Vanuatu. Kuv xav txog qhov uas kuv paub tias lawv tej tsev tsis khov txaus yuav tiv tau tej cua daj cua dub. Thiab kuv nco qab txog qhov uas cov neeg Vanuatu tau txais tos kuv yam zoo siab li. Kuv xav txog lawv thiab lawv cov neeg uas tab tom nkaum hauv peb lub tsev teev ntuj uas khov kho.

Ces xav txog tus npisov thiab tus thawj tswj hwm ntawm lub Koom Haum Niam Tsev uas yuav mus xyuas lawv cov txom nyem, nplij lawv tej siab tej ntsws, muab zaub mov rau lawv noj, thiab dej rau lawv haus. Kuv xav txog qhov uas cov me nyuam puav leej sib sau ua ke yam ntshai heev li.

Lawv puav leej nyob deb deb ntawm qhov chaw uas kuv nyeem tsab ntawv xov xwm ntawd, thiab txawm yog li ntawd kuv paub saib tus Tswv yuav ua li cas dhau ntawm Nws cov tub qhe. Kuv paub hais tias cov nyiaj yoo mov yog kom pab Leej Txiv Saum Ntuj cov me nyuam, cov nyiaj yoo mov ntawd yog pub dawb los ntawm tus Tswv cov thwj tim uas nyob deb deb tiam sis nyob ze tus Tswv.

Ces kuv tsis tos hnub Sunday. Kuv cia li nqa kuv cov nyiaj yoo mov mus rau kuv tus npisov tag kis ntawd. Kuv paub hais tias kuv tus npisov thiab tus thawj tswj hwm ntawm Koom Haum Niam Tsev hauv kuv pawg ntseeg siv tau cov nyiaj yoo mov ntawd pab ib tug neeg hauv kuv tsev neeg. Tej zaum kuv qhov nyiaj yoo mov me me yuav tsis tas siv nyob ze kuv tsev neeg thiab qhov chaw kuv nyob, tiam sis tej zaum qhov seem ntawm cov nyiaj yoo mov uas siv nyob ze yuav txog lub teb chaws Vanuatu.

Tiam sis lwm kob cua daj cua dub thiab lwm yam kev txom nyem yuav raug rau cov neeg uas tus Tswv hlub. Ib feem ntawm nej cov nyiaj yoo mov thiab ib feem ntawm kuv li lub koom txoos mam li siv kom pab ib tug neeg twg, txawm nyob qhov twg, uas yuav zoo siab vim tus Tswv tau pab nws.

Nej cov nyiaj yoo mov yuav pab ntau tshaj qhov uas pab pub mov noj thiab pab muab ris tsho hnav. Nej cov nyiaj yoo mov yuav pab kho thiab hloov tej siab tej ntsws. Tej txiv uas txi los ntawm cov nyiaj yoo mov uas nej muab pub tej zaum yuav yog tus neeg uas txais kev pab ntawd yuav xav pab lwm tus neeg thiab. Yeej muaj li ntawd nyob thoob plaws lub ntiaj teb.

Tau muaj los rau tus Muam Abie Turay, uas nyob hauv lub teb chaws Sierra Leone. Muaj ib qho kev tsov rog hauv lawv lub teb chaws ntawd thaum xyoo 1991. Tsov rog no muaj ntau xyoo. Sierra Leone twb yog ib lub teb chaws pluag heev hauv lub ntiaj teb. “Thaum lub teb chaws ua tsov ua rog, peb tsis paub tseeb leej twg yog tus uas tswj tuav lub teb chaws—tsev cia nyiaj … kaw, tseem fwv tej hoob kas kaw, tej tub ceev xwm [kov yeej tsis tau cov neeg ntxeev teb chaws], … thiab yeej muaj kev kub ntxhov, kev tua thiab kev quaj nyiav. Vam vam leej neeg tas sim neej thiab ntau tshaj ib puas vam leej neeg khiav tawm ntawm lawv tej vaj tse kom thiaj dim kev ploj kev tuag.”6

Txawm muaj li ntawd los, Yexus Khetos lub Koom Txoos ntawm Tsoom Haiv Neeg Ntseeg ntawm Hnub Nyoog Kawg tseem loj hlob tuaj.

Muaj ib ceg ntseeg uas raug txhim tsa hauv lub nroog uas Muam Turay nyob. Nws tus txiv yog thawj tug thawj tswj hwm rau ceg ntseeg ntawd. Thaum tseem muaj tsov rog nws tau ua tus thawj tswj hwm rau koog chaw.

“Thaum qhua tuaj xyuas Muam Turay lub tsev [tam sim no], nws nyiam muab ob [qho khoom plig] uas nws txais thaum teb chaws kub rau lawv saib: ib lub tsho [uas nws tau txais] los ntawm pob ris tsho qub [uas yog cov mej zeej ntawm lub Koom Txoos muab] thiab ib daim pam uas nim no to qhov ntau.”7

Nws hais tias, “Lub tsho no yog thawj cev … khaub ncaws uas kuv tau [txais]. … Kuv tau hnav lub tsho no mus ua hauj lwm—nws yeej zoo heev. [Nws ua rau kuv xav tias kuv zoo nkauj me ntsis.] Kuv tsis muaj dua ib ce ris tsho li.

“Thaum muaj tsov rog, daim pam no ua rau peb sov, kuv thiab kuv cov me nyuam. Thaum cov neeg ntxeev teb chaws [yuav] los tua peb, daim pam no yog tib qho uas kuv [muaj peev xwm] muab thaum [peb khiav mus nkaum hav zoov]. Ces peb [yuav] nqa daim pam nrog peb mus. Daim pam yuav ua rau peb sov thiab tiv thaiv peb ntawm cov yoov tshaj cum.”8

“Muam Turay hais txog qhov uas nws ris tus thawj tswj hwm ntawm qhov chaw tshaj tawm txoj moo zoo uas yuav nqa nyiaj tuaj pub rau lawv txawm tias ua li ntawd yeej as tas laib heev.” Cov nyiaj pub ntawd, los ntawm cov nyiaj yoo mov uas nej ib tug twg tau muab pub, tau cia Tsoom Haiv Neeg Ntseeg yuav zaub mov uas cov neeg Sierra Leone feem coob tsis muaj nyiaj yuav tau.9

Muam Turay, hais txog lawv cov uas ua siab dawb txaus muab tej khoom tseem ceeb pub rau lawv pab cawm lawv txoj sia, hais tias, “Thaum kuv xav [txog] cov neeg uas tau pab li no … Kuv xav hais tias [lawv yog] Vajtswv xa tuaj, vim tib neeg ntiaj teb tau ua siab zoo li no rau [peb].”10

Ib tug neeg uas tuaj Teb Chaws Amelikas tuaj tau nrog Abie zaum ua ke sib xyuas tsis ntev tas los no. Thaum nws siv sij hawm nrog nws, nws txawm pom “ib co vaj lug kub uas nyob saum lub rooj.” Nws pom tau hais tias tus muam ntawd saib cov vaj lug kub rau nqi, “vim tus muam cov vaj lug kub muaj lus cim ntau sau rau. Tej phab ntawd twb yaig lawm; ob peb phab ntawv twb ntuag lawm thiab. Daim plhaub twb tsis lo rau cov ntawv lawm.”

Tus neeg tuaj xyuas ntawd tuav tus muam cov vaj lug kub hauv nws “txhais tes thiab maj mam ntxeev cov ntawv. Nws [txawm nrhiav tau] ib daim ntawv teev nyiaj them ib feem kaum. [Nws] pom tau hais tias, hauv ib lub teb chaws uas saib ib daus las [muaj nuj nqi ntau heev], Abie Turay tau them ib dauslas ua nws cov nyiaj ib feem kaum, ib dauslas mus pab cov tub txib qhia txoj moo zoo, thiab ib daus las ua nyiaj yoo mov rau lawv cov uas, siv nws yam lus, yog ‘neeg pluag tiag.’”

Tus neeg tuaj xyuas txawm muab Muam Turay cov vaj lug kub kaw thiab xav hais tias nws tab tom tsuj ib daim dawb ceev.11

Ib yam li thaum ib tug neeg txais tau nej thiab kuv cov nyiaj yoo mov los pab foom koob hmoov rau nws, qhov uas peb yoo mov kom lwm tus neeg tau koob hmoov kuj pab thiab. Twb yog ib tug me nyuam paub tau li ntawd.

Me nyuam coob heev, thiab ib txhia neeg laus, kuj xav hais tias qhov uas yoo mov 24 teev nyuaj heev. Tej zaum, ib yam li Yaxayas cov lus, kev yoo mov kuj “ua tau rau yus sab ntsuj plig txom nyem me ntsis.” Cov niam txiv uas txawj ntse paub li ntawd thiab ua tib zoo ua raws li cov lus qhia ntawm Thawj Tswj Hwm Joseph F. Smith: “Zoo dua uas qhia cov me nyuam txoj ntsiab cai, thiab cia lawv ua raws li txoj ntsiab cai ntawd thaum lawv loj hlob tuaj txaus kom xaiv ua raws li.”12

Kuv pom tau qhov koob hmoov uas los tau los ntawm cov lus qhia ntawd tsis ntev tas los no. Kuv ib tug tub xeeb ntxwv nyiaj tsis tau qhov uas yoo mov 24 teev. Tiam sis nws niam txiv tseem qhia txoj ntsiab cai rau nws. Nws ib tug phooj ywg tom tsev kawm ntawv ib tug npawg tau tas sim neej. Muaj ib hnub yoo mov, thaum yuav txog lub sij hawm uas kuv tus tub xeeb ntxwv nyiaj tsis tau feem ntau, nws tau noog nws niam saib puas yuav pab nws tus phooj ywg uas tu siab ntawd yog tias nws yeej meem yoo mov ntxeem kom dhau.

Nws lo lus noog ntawd yog lub ntsiab ntawm Thawj Tswj Hwm Joseph F. Smith tej lus ntuas. Kuv tus tub xeeb ntxwv tau kawm paub hais tias tsis yog nws to taub saib txoj ntsiab cai ntawm kev yoo mov zoo li cas tiag, tiam sis txoj ntsiab cai ntawd twb nyob hauv nws lub siab lawm thiab. Nws tau kawm hais tias nws txoj kev yoo mov thiab thov Vajtswv yuav pab tau nws ib tug phooj ywg uas xav tau koob hmoov ntawm Vajtswv. Yog tias kuv tus tub xeeb ntxwv ua raws li txoj ntsiab cai ntawd ntau txaus, tus Tswv cog lus tias nws yuav tau koob hmoov ntau hauv nws lub neej. Nws yuav muaj hwj chim ntawm sab ntsuj plig kom txais tau kev tshoov siab thiab tiv tau kev haub kev ntxias.

Peb tsis paub tag nrho yog vim li cas Yexu Khetos cia li mus rau tej qhov chaw tsis muaj neeg kom yoo mov thiab thov Vajtswv. Tiam sis qhov tsawg kawg nkaus peb paub tau muaj li cas: tus Cawm Seej tiv tau Ntxwg Nyoog tej kev haub kev ntxias kom siv Nws lub hwj chim dawb huv raws li qhov tsis zoo.

Lub sij hawm uas peb yoo mov txhua hli tsawg heev thiab qhov nyiaj yoo mov me me uas peb muab pub tej zaum yuav pab peb me me kom hloov peb tus kheej kom tsis txhob muaj ib lub siab ua phem ntxiv. Tiam sis yeej muaj ib los lus cog tseg zoo kawg, twb yog thaum peb ua txhua yam peb ua tau kom thov Vajtswv, yoo mov, thiab muab nyiaj yoo mov pub pab lawv cov uas xav tau kev pab:

“Ces kuv txoj kev kaj yuav ci rau nej ib yam li lub hnub ci thaum sawv ntxov, thiab nej tej qhov txhab yuav zoo sai. Kuv yuav nrog nraim nej thiab ua nej tus cawm seej; kuv lub hwj chim yuav tsom kwm puag ncig nej.

“Ces thaum nej thov, tus Tswv yuav teb nej; thaum nej hu kom nws pab, nws yuav teb hais tias, Kuv nyob ntawm no.”13

Kuv thov Vajtswv hais tias peb yuav txais tau tej koob hmoov uas hais no rau peb tus kheej thiab peb tej tsev neeg.

Kuv ua tim khawv hais tias Yexus yog tus Khetos, tias nyob hauv Nws lub Koom Txoos Nws caw peb los pab Nws saib xyuas cov neeg pluag raws li Nws txoj kev pab, thiab tias Nws cog lus hais tias peb yuav tau koob hmoov thaum peb pab Nws li no. Los ntawm Yexus Khetos lub npe dawb ceev, amees.

Lus Cim

  1. Mathais 25:34–40.

  2. Yaxayas 58:6–11.

  3. Spencer W. Kimball, The Miracle of Forgiveness (1969), 98.

  4. Saib Steve Amassy, Ben Brumfield, and Laura Smith-Spark, “Cleanup Begins in Vanuatu after Cyclone Batters Islands,” Peb Hlis Ntuj 14, 2015, edition.cnn.com.

  5. Saib Sean Morris, Steve Amassy, and Laura Smith-Spark, “‘Unbelievable Destruction’ Reported in Tropical Cyclone Pam’s Wake,” Peb Hlis Ntuj 14, 2015, edition.cnn.com.

  6. Peter F. Evans, “Sister Abie Turay’s Story,” ib co ntawv uas tsis tau luam tawm.

  7. Peter F. Evans, “Sister Abie Turay’s Story.”

  8. Abie Turay, raws li hais nyob hauv Petus F. Evans, “Sister Abie Turay’s Story.”

  9. Peter F. Evans, “Sister Abie Turay’s Story.”

  10. Abie Turay, raws li hais nyob hauv Petus F. Evans, “Sister Abie Turay’s Story.”

  11. Petus F. Evans, “Sister Abie Turay’s Story”; ib daim vidi-aus hais txog Sister Turay, “We Did Not Stand Alone,” muaj rau ntawm lds.org/media-library.

  12. Joseph F. Smith, “Editor’s Table,” Improvement Era, Kaum Ob Hlis Ntuj 1903, 149.

  13. Yaxayas 58:8–9.