2010–2019
Mwet Luhlahlfongi ke Lwen-sahflah uh Kalweni na Srihke
April 2015

Mwet Luhlahlfongi ke Lwen-sahflah uh Kalweni na Srihke

Sel Elder Dale G. Renlund

Ke Mwet Itngucul

Petsac

Ke kuht srihke, kampare, ac kahsruh mwet sahyac in oruh oacpacna, na kuht Mwet Luhlahlfongi ke Lwen-sahflah na pwacye.

Tamuhlwel ac tahmtahel sacohk luhk, ke Tisacmpuh (luo tausin singucul tolu) 2013 facluh ahsorkihn misac lal Nelson Mandela. Tukun yac (longoul itkohsr) 27 ke el oasr in kaclpous ke srihpen orekma lal in lain srisrielihk luhn kain mwet fin acn Africa ah, Mandela pa prestuhn se emet luhn South Africa suc suleyucklac ke democracy. Nuhnak muhnahs lal nuh selos suc sruohkuhl in kaclpous ah arulacna wo. Acn nuh kwewa kaksakuhnuhl. 1 Mandela el kwacna srihke in lain kaksyak nuh sel ke el fahk, “Nga tiac mwet luhlahlfongi—kuh, sahp fin kowos muh mwet luhlahlfongi se el mwet koluk se suc kalweni na in srihke.”2

Fahk se inge—“mwet luhlahlfongi se el mwet koluk se suc kalweni na in srihke”—kuh in ahkkweye ac kahsruh mempucr luhn Alu uh. Kuht finne akihlenyuck oacna “Mwet Luhlahlfongi ke Lwen-sahflah uh,” kuhtuh pacl uh kuht tahfuhluo ke ine sacn. KahsMwet Luhlahlfongi uh kwacna orekmakihnyuck in ahkuhtwelosi suc sun ohiyac fuhlwact ke muhtahliyac kuh finne ohiyac suwohswohs. Ac kuht etuh suwohs muh kuht tiac suwohswohs.

Luhlahlfongi lasr uh luti kuht, finne ohinge, muh kuht kuh in ahksuwohswohsyeyucklac ke kuht kalweni ac lihksreni oaru in luhlahlfongi ke mwe luti luhn Kraist: in orekmakihn luhlahlfongi Kacl, auliyak, ipeis ke kuhfa luhn Leum in ahksasucye olwelah ac mwe insewowo luhn pacptais, ac in eis Nguhn Muhtahl in wi kuht pacl nuh kwewa yohk likina met ah. Ke kuht oruh ohinge, kuht eklac in oacna Kraist ac kampare nuh ke sahflah.3 Ke kahs ma fihsrwacsr kuhtuh, God El fosrngah yohk lah suc kuht ingena ac lah meac kuht eklac nuh kac yohk liki fosrngah lah suc kuht met ah.4 El elyah lah kuht ac kalweni na in srihke.

Mwe tahfuhnkahs se pahngpahng As You Like It,sihmlac sin mwet sihm English se William Shakespeare, ahkuhtweyac sie eklac yohk ke moul luhn sie mwet kac. Sie tamuhlwel mahtuh el srihke in oruh mukul srihsrihk se wiyacl an in acnwucki. Finne el etuh kac, tamuhlwel srihsrihk sac el loangwelah tamuhlwel koluk se wiyacl ah ke el apkuhran in acnwucki. Ke tamuhlwel mahtuh sac el etwaclah ke nuhnak muhnahs sacn ma tiac fal elan eis ah, el eklac na pwacye ac nwe tok ac el puhla ma el pahngon sie “eklac.” Tohkoh muhtwacn ekahsr tuhkuh nuh yurin tamuhlwel mahtuh sac ac siyuck, “Kuh kom pa kwacna plwacn in uniyac tamuhlwel wiom ah?”

Tamuhlwel mahtuh sac topuk, “Nga pa ngwacn met; tuhsruhk tiac pa nga ingena: Nga tiac mwekihn in fahk nuh suwos lah suc nga met, mweyen eklac luhk arulacna emwem, ke srihpen suc nga ingena uh.”5

Kacsr, ke srihpen pahkotwen luhn God ac Iwaclah luhn Jisus Kraist, kain eklac se inge tiac ma na ke ma sihmlac uh. Sel Ezekiel, Leum el fahkwack:

“Sie mwet koluk el fin tui liki orekma koluk lal, el ac fah tia kalyeiyuk, …

“… El fin tui liki orekma koluk lal, ac oru ma wo ac suwohs;

“…  folokunla mwe akpwaye nu sin mwet se ma ngusr mani sel, ku el folokunla ma el tuh pisrala—el fin tui liki orekma koluk lal, ac moul fal nu ke ma sap … el fah moul. …

“Nga ac fah nunak munas ke ma koluk nukewa el tuh orala, na el ac fah moul mweyen el oru ma wo ac suwohs.”6

Ke pahkotwen Lal, God El olwelah nuhnak muhnahs ke kuht auliyak ac forlah liki ma koluk—ohiyac fal tuh ma koluk lasr ah fah tiac fwack nuh sesr. Kacsr, ke srihpen Iwaclah luhn Kraist ac auliyak lasr, kuht kuh in liye orekma lasr met ah ac fahk, “Nga pa ngwacn met; tuhsruhk tiac pa nga ingena.” Oacna sie luhpan kolukiyac, kuht kuh in fahk, “Nga pa ngwacn met. Tuhsruhk mwet koluk mahtuh sacn tiac pa nga ingena.”7

Prestuhn Thomas S. Monson el tuh luti, “Sie sin mwe sang ma yohk emet sin God nuh sesr pa mwe engan se in sifilpac srihke, mweyen wacngihn tahfonglac enenuh in pa sahflah.”8Finne kuht etuh, ac insese in oruh ma koluk kuh kalweni na sun tahfonglac ac suhpwacr, pacl se na ma kuht sulwaclah in sifilpac srihke, Iwaclah luhn Kraist uh kuh in kahsrwe kuht. Ac kuht enenuh in esam muh tiac Nguhn Muhtahl pa fahk nuh sesr muh kuht koluklaclac ac tiac kuh in fohlohk oruh kuht enenuh in fuhlweack.

Kena se luhn God ma Mwet Luhlahlfongi ke Lwen-sahflah uh kalweni na srihke tahfwelah pac ahluhkwelah kuht in kuhtanglah ma koluk. Kuht finne kweok ke srihpen kuhpahsr upac, elyah luhn mani, kuh mas kuh ke srihpen ma koluk luhn mwet sahyac, Iwaclah ma pahtpaht luhn Mwet Lahngo uh kuh in onwelah finne—ac sahp yohk—elos suc kweok tuh wacngihn mwacta. El kahlwem suwohs ke ohiyacn kweok ke wacngihn mwacta ke srihpen tahfonglac luhn mwet sahyac. Oacna ke palyeyuck ah, mwet Lahngo El fah oracni inse muhsahllah, … sang … kahto nuh ke mulut, oil in engan nuh ke yoksrah, [ac] karmacn in kaksyakihn nuh ke nguhn inkuhsrao.”9 Finne kuhtwena ma, ke kahsruh Lal, God el finsrak tuh Mwet Luhlahlfongi ke Lwen-Sahflah uh fah kalweni na in srihke.

pacl ah, ke Julia ac Thoba elos wi alu, elos puhla muh kuhtuh mempucr fasrfasr uh elos tiac arulacna kuhlwacng nuh selos. Ke elos som, Thoba el tohrkahskahs upac nuh sin ninac kiyacl ah. Julia el porongo ke inse mihs nuh ke Thoba el tari ke tohrkahskahs lal ah. Na Julia el fahk, “Oh, Thoba, Alu uh oacna sie lohm ono luhlahp, ac kuht nohfohn mas ke ohiyac lasr sifacna. Kuht tuhkuh nuh ke alu uh in kahsrweyuck.”

Kahs lal Julia ahkkahlwemye sie nuhnak sacohk. Kuht tiac enenuh in lwelah muhkwena ke mwet sahyac elos srihke in kuhtanglah mas ke nguhn lalos; kuht enenuh pac in kuhlwacng, mongfihsrwacsr, kahsruh, ac kahlwem. Oacna God El kwacfe kuht in kalweni na in srihke, El finsrak tuh kuht in lwelah pac pacl wo nuh sin mwet sahyac in oruh oacpacna, ke muhi lalos sifacna. Iwaclah uh fah tuhkuh nuh in moul lasr yohk liki met. Na kuht fah akihlen lah finne meac akihlenyuck in siena, kuht nohfohn enenuh Iwaclah ma pahtpaht se pacna.

Yac puhs somlah ah sie mukul wolacna inel pa Curtis el pahngonyuck in kuhlwacnsap ke sie misin. El sie kain misineri ma prestuhn nuh kwewa luhn misin pruhe in eis uh. El insacnweacng ac orekma upac. Ke sie pacl ah el eis sie companion suc oacna tuhlihk se, tiac arulacna pah inmahsrlon mwet, ac tiac arulacna pwacr in orekma.

Sie lwen ke elos kahsruhsr ke pwacskuhl ukwaclos ah, Curtis el tahpuhllac ac liye lah companion se lal ah srolah liki pwacskuhl okoacl ah ac fahsr ke wacngihn ahkuhtweyac. Mihslac na, Curtis el ahkkahlwemye ahngyahng lal nuh sin God; upac na pwacye in wi companion se suc enenuh kwacfe yohk elan oruh kuhtwena ma. Kihtin na pacl tohkoh, Curtis el eis nuhnak na pihrihkyuck se, oacna God Elan fahk nuh sel, “Kom etuh, Curtis, ke luhmweyuck nuh sihk, kowos tiac arulacna siena.” Curtis el etwaclah muh el enenuh in mongfihsrwacsr ke sie companion suc tiac suwohs tuhsruhk suc srihke ke ohiyac lal sifacna.

Mwe suli luhk nuh sesr kwewa pa in tuni moul lasr, auliyak, ac kalweni na in srihke. Kuht fin tiac srihke, na kuht mwet koluk na ke lwen-sahflah; kuht fin tiac kampare, na kuht mwet fuhlweack ke lwen-sahflah; ac kuht fin tiac lwelah mwet sahyac in srihke, na kuht mwet wosounkacs ke lwen-sahflah.10 Ke kuht srihke, kampare, ac kahsruh mwet sahyac in oruh oacpacna, na kuht Mwet Luhlahlfongi ke Lwen-sahflah na pwacye. Ke kuht eklac, kuht fah konwacack tuh pwacye God El fohsrngah yohk lah suc kuht ingena ac lah meac kuht eklac nuh kac, yohk liki fohsrngah lah suc kuht met ah.11

Nga srui yohk ke Mwet Lahngo, ke Iwaclah ma pahtpaht Lal, ac ke mwet pahluh ke lwen-sahflah suc kwacfe kuht in ekihn Mwet Luhlahlfongi ke Lwen-sahflah, in kalweni na in srihke.12 Nga lohoh ke moul pwacye luhn Mwet Lahngo ke inen Jisus Kraist, amen.

Mwe Kahsruh

  1. Liye Nelson Rolihlahla Mandla,Long Walk to Freedom (1994); “Biography of Nelson Mandela,” nelsonmandela.org/content/page/biography; ac sramsram lal Prestuhn Barack Obama Tisacmpuh 10, 2013, ke mas lal Nelson Mandela, ke whitehouse.gov/the-press-office/2013/12/10/remarks-president-obama-memorial-service-former-south-african-president. Kain puhkantwen ke opi uh ahkkahlwemyeyuhk ke Mandela el eis Nobel Peace Prize, United States Presidential Medal of Freedom, ac Soviet Order of Lenin.

  2. Liye, ke srihkasrak, mwe fahkwack lal Nelson Mandela ke Baker Institute luhn Rice University ke Ohktohpa 26, 1999, bakerinstitute.org/events/1221. Sahp el fahk oacna fahk etweyuck se ma ahkuhtweyucki muh ma sel Robert Louis Stevenson: “Mwet luhlahlfongi uh pa mwet koluk suc kalweni na in srihke.” Ke pacl puhs oasr mwet suc fahk oacna. Srihkasrak, Confucius el akihlenyuck ke fahk, “Wolacna lasr ma yohk emet uh tiac pa in tiac puhtatlac tuhsruhk in tuyak pacl nuh kwewa kuht puhtatlac uh.”

  3. Liye, ke srihkasrak,2 Nephi 31:2–21;3 Nephi 11:23–31;27:13–21;Moroni 6:6;Doctrine and Covenants 20:77, 79;59:8–9; Handbook 2: Administering the Church (2010), 2.1.2.

  4. In fahk muh God El fosrngah yohk lah suc kuht ingena ac lah meac kuht eklac nuh kac yohk liki fosrngah lah suc kuht met ah tiac kalmac pa Mwet Lahngo El tiac nuhnkuh ke ma sikyak nuh sin mwet sahyac ke srihpen ma koluk luhn sie. Pwacye, Mwet Lahngo El fosrngah yohk kwaclos suc kweokkihn ngal, kweok, kuh ahsor ke srihpen tahfonglac luhn sie sahyac. Mwet Lahngo “El fah eis nuh Facl mas lalos, tuh insiacl in sesseslah ke pahkotwen, fal nuh ke mahno, tuh Elan kuh in etuh fal nuh ke mahno lah El ac kahsruh fuhkah mwet Lal fal nuh ke mas lalos” (Alma 7:12).

  5. William Shakespeare, As You Like It, act 4, scene 3, lines 134–37.

  6. Ezekiel 33:12, 14–16.

  7. Orekmakihnyacn kahs ma ahkuhtweyac lah ma se sikyak ingena uh akihlenyuck ke ma suhmuhslah puhs ma sramsram ke Nuhnuhnkuh Sahflah uh. Liye, ke srihkasrak, 2 Nephi 9:16; Mormon 9:14; Doctrine and Covenants 58:42–43.

  8. Thomas  S. Monson, “The Will Within,” Ensign, Mei 1987, 68.

  9. Isaiah 61:1–3; lie pac Luke 4:16–21.

  10. Kahs mwet wosounkacs oacna orekmakihnyuck ke Wuhlweacng Sasuc uh kuh in lwenglah ke kahs Greek ke kahs “mwet kikiacp”; “kahs Greek sac kalmac pa ‘mwet actor se,’ kuh ‘sie suc kikiacp in oruh, oruh tuh yohk ma akihlenyuck, kuh oruh ip se yohklaclac’” (Matthew 6:2, footnote a). Kuht fin tiacna sang pacl wo nuh sin mwet sahyac in eklac ke muhi lalos sifacna, kuht kikiacp na in Mwet Luhlahlfongi ke Lwen-sahflah.

  11. Liye mwe kahsruh 4, lucng.

  12. Pihsen pacl ma pweng se inge orekmakihnyuck ke sramsram luhn Prestuhnsi Se Met ac U luhn Mwet Sap Singucul luo uh mwe lut. Prestuhn Dieter F. Uchtdorf el ahkuhtweyac ma se inge ke el fahk, “Ke mwe luti nuh kwewa ma lutiyuck sin mwet pahluh ke lusen pacl uh, sie ma sifilpac na sifilpac akihlenyuck uh pa pweng ma sesseslah ke finsrak ac ahkengan muh mwet uh kuh in auliyak, ekuhllah inkacnek, ac fohlohk nuh ke inkacnek pwacye luhn sie mwet tuhma lutlut” (“Kowos Kuh in Oruh Ingena!” Ensign kuh Liahona, Nohfuhmpuh 2013, 56).