Sa Pagkamangin-tunay

Bahin ini sang kinaiya sang tawo nga magpakita sang ila pinakamaayo. Ini amó kon ngaa kita nagapangabudlay sing daku sa pagpatahom sang gwa sang aton mga balay kag kon ngaa ang mga kauturan sa Aaronic Priesthood nagaseguro nga ang kada nahot sang ila buhok nahusay sing maayo kay basi sila makasalapo sinang isa ka espesyal para sa ila. Walâ sing salâ sa pagpahining sang mga sapatos, pagpahamot sing labing maayo, ukon bisan pagtago sang aton mga gingamit nga mga pinggan bag-o mag-abot ang mga home teacher. Ugaling, kon ini may mga kasobrahan, ining luyag sa pagpadungog sang iban magbaylo gikan sa mapuslanon kag magkadto sa pagkamadayaon.

Ang mga propeta sang Diyos nagpahayag sang ila paandam supak sa yadtong mga ”nagapalapit [sa Ginuo] sa ila ginahambal, kag sang ila mga bibig nagapadungog sa [Iya], apang ang ila tagipusuon malayo sa [Iya].”¹

Ang Manluluwas nakahangop kag may kaluoy sa mga makasasalà nga mapainubuson kag sinsero. Apang Siya nagsilakbo sa kaakig supak sa mga salimpapaw katulad sang mga manunudlo sang kasulatan, mga Pariseyo, kag mga Saduseyo—mga yadtong naghimud-os sa pagpakita nga sila matarong agud maangkon ang pagdayaw, ang impluhensya, kag ang manggad sang kalibutan, samtang gina-ulipon ang mga tawo nga dapat nila alagaran. Ang Manluluwas nagpa-anggid sa ila sa ”mga lulubngan nga ginpintahan sang puti,kag matahom tan-awon sa gwa, apang punô sang tul-an sang mga patay, kag kagarukan sa sulod.”²

Sa aton adlaw, ang Ginuo may mga pulong man nga mabaskog katulad sina sa aton mga nagakapot sang priesthood nga naga ”tago [sang ila] mga salâ, ukon nagapadala-dala sa [ila] kahambugan, [ukon sa ila] walay pulos nga halangdon.” Kon ila ini ginahimo, Siya nagsiling, ”ang mga kalangitan nagabiya sa ila; ang Espiritu sang Ginuo nagakasubo; kag kon ini nagabiya, Katapusan sa sinang priesthood ukon awtoridad sinang tawo.”³

Ngaa balá nagakatabo ini? Ngaa balá nga kon kaisa nagapakita kita nga aktibo, mahamungaya, kag aktibo sa gwa bisan nga sa sulod—sa ginsiling sang Manugbugna sang mga Ephesian—kita ”nagbiya sang [aton] paghigugma sa iya sang una”?⁴

Sa iban nga mga kahimtangan, ini simpli lang nga nadulaan kita sang pagtumod sa tunay kahulugan sang ebanghelyo, ginbaylohan naton ang ”dagway sang pagkadiyosnon” para sa awtoridad sini”⁵ Ini labi nga delikado kon aton ginadirekta ang aton ginapakita nga mga hinimuan sang pagkasumulunod sa paghaylo sa iban nga kita makaangkon sang padya ukon impluhensya. Ini dayon nga nagadala sa aton sa katalagman nga mangin kasubong sang mga Pariseyo, kag amó na ini ang tion nga magsayasat kita sang aton mga tagipusuon kag gilayon nga tadlungon ang mga ini.

Ining pagsulay nga magpakita nga mas maayo kita sang sa matuod-tuod nga kahimtangan indi lang sa aton personal nga mga kabuhi apang yara man sa aton mga katungdanan sa Simbahan.

Halimbawa, nakahibalo ako sang stake nga ang mga lider nagplano nga maghimo sang mga mataas nga hilimuon sa bilog nga tuig. Bisan nga ang mga katuyuan puro maayo, sila nagtumod sa mga butang nga halangdon kag ila mapabugal ukon sa pagpataas sang ila mga numero kag porsiyento.

Matapos nga makasugilanunay sila kag nag-ugyon sa sining hilimuon, may isa ka bagay nga nagtublag sa presidente sang stake. Nagpaino-ino siya sang mga miyembro sang iya stake—subong sang isa ka batan-on nga iloy nga may magagmay nga kabataan kag nabalo sa sining karon lang. Nagpanumdom siya sang mga miyembro nga nabudlayan sa ila mga pangduhaduha ukon kasubo ukon may malala nga mga balatian kag walâ sing paniguro sa kaayuhan sang lawas. Nagpanumdom siya sang mga miyembro nga nagahiwaos sa naguba nga mga pag-asawahay, pagkadula sang trabaho, kag balatian sang huna-huna. Kag samtang mas nagdaku ang iya pagpanumdom sa ila, mas nagdaku ang iya mailob nga pamangkutanon: ang aton bag-o nga mga plano ayhan makabulig sa sining mga miyembro?

Siya nagsugod nga magtaka kon paano ayhan nagbaylo ang ila mga katuyuan kon anay una sila nga nagpamangkot, ”Ano ang aton pag-alagad?”

Gani, ining presidente sang stake nagbalik sa iya mga konseho, kag sila ululupod nga nagbaylo sang ila buluhaton. Ginpat-od nila nga importante nga ”indi [nila] pagpabayaan kag ukon indi pagsapakon ang mga nagutuman, ... ang mga nagakinahanglan, ... ang mga walâ sing bayo, ... ang mga balati-anon kag ang mga nasablagan.”⁶

Sila nagtukod sang bag-o nga mga plano, nga nagkilala nga ang kadalag-an sining mga mga katuyuan masami nga indi matakos, labi na nga indi matakos sang tawo—kay paano sang isa matakos ang personal nga panaksi, ang paghigugma sa Diyos, ukon ang kaluoy sa iban?

Pero nakahibalo man sila nga ”madamo sa mga butang nga sarang maisip, walâ sing pulós. Madamo sa mga butang nga imo naisip nga walay pulos, matuod nga may pulós.”⁷

Ako nagaduha-duha kon ang aton mga buluhaton sa organisasyon kag personal kon kaisa amó ang moderno nga katumbas sang baranggay ni Potemkin. Ayhan balá sa malayo sila dalayawon sa panan-awan apang walay pulos nga magbulig sa matuod-tuod nga mga kinahanglanon sang aton pinalangga nga mga isigkatawo.

Akon pinalangga nga mga abyan kag kaupod nga nagakapot sang priesthood, kon si JesuCristo upód nga magpungko diri sa aton kag magkuha sang report sang aton pag-alagad, ako nagaduha-duha kon siya magpasulabi sa mga buluhaton kag estadistika. Ang Iya luyag mahibal-an amó ang sulod sang aton tagipusuon. Luyag Niya nga mahibal-an kon ano ang aton pagpalangga kag kon paano kita nagaalagad sa aton ginaalagaran, kag kon paano kita nagapalangga sa aton asawa kag panimalay kag kon paano naton napamag-an ang ila pang-adlaw-adlaw nga kabudlay. Kag ang aton Manluluwas gusto makahibalo kon paano kamo kag ako magtubò nga malapit sa Iya kag sa aton Langitnon nga Amay.

Ayhan mapuslanon kon kita nagasayasat sa aton mga tagipusuon. Halimbawa, ayhan pamangkuton naton ang aton mga kaugalingon, ngaa balá kita nagaalagad sa Simbahan ni JesuCristo?

Ayhan kita makapamangkot pa gid, ngaa balá yari kita sa sining miting subong?

Ginahuna-huna ko nga kon ako magsabat sina nga pamangkot sa hapaw nga talaksan, makasiling ako nga tungod gin-asayn ako ni Presidente Monson nga maghambal.

Gani, matuod nga walâ gid ako sing mahimo.

Luwas dira, ang akon asawa nagapaabot nga ako magtambong. Kag paano ako makapangindi sa iya?

Paro kita nakahibalo nga may mas maayo pa nga mga rason kon ngaa kita nagatambong sang aton mga miting kag kon ngaa kita nagakabuhi nga matutom nga mga sumulunod ni JesuCristo.

Yari ako diri tungod nagahandom ako sing tudok sa akon tagipusuon nga magsunod sa akon Manunudlo, nga si JesuCristo. Nagahandom ako nga maghimo sang tanan nga Iya ginapahimo sa akon sa sining daku nga kabangdanan. Nagahandom ako nga pakamaayuhon sang Balaan nga Espiritu kag makabati sang tingog sang Diyos samtang Siya nagahambal paagi sa Iya ginpakabalaan nga mga alagad. Yari ako diri nga mangin mas maayo nga tawo, nga matib-ong sang inspirado nga mga ehemplo sang akon mga kauturan kay Cristo, kag makahangop kon paano mangin isa ka mas epektibo nga alagad sang mga nagakinahanglanon.

Sa malip-ot nga sugilanon, yari ako diri tungod ako nagahigugma sa akon Langitnon nga Amay kag sa Iya Anak nga si JesuCristo.

Pat-od ako nga amó man ini ang inyo rason. Gani amó ini kon ngaa kita handa nga maghimo sing mabudlay kag indi lang nga maghambal sa pagsunod sa Manluluwas. Amó ini kon ngaa kita may dungog nga nagakapot sang Iya balaan nga Priesthood.

Kon balá ang inyo panaksi nagatubo kag maayo ukon ang inyo buhat sa Simbahan daw katumbas sang baranggay ni Potemkin, ang maayong balita amó nga kamo makapasad suno sa inyo kabakod. Diri sa Simbahan ni JesuCristo kamo sarang nga magtubo sing espirituhanon kag makapalapit sa Manluluwas paagi sa pagtuman sang mga prinsipyo sang ebanghelyo sa tagsa ka adlaw.

Sa pagpasensya kag pagpadayon, bisan pa ang pinakadiutay nga buhat sang pagkasumulunod ukon ang labing diutay nga buhat sang pagtuo mangin isa ka nagadabdab nga kalayo sang isa ka ginpakabalaan nga kabuhi. Sa kamatuoran, amó ina ang ginasuguran sang kadam-an sang nagadabdab nga kalayo—bilang isa ka gamay nga kidlab.

Gani kon kamo nagabatyag sang kagamay kag kaluya, kabay pa nga magpalapit kamo kay Cristo, nga nagapabakod sang mahuyang nga mga butang.⁸Ang pinakamahuyang sa aton, paagi sa grasya sang Diyos, mapabakod sing espirituhanon, tungod ang Diyos ”alalangay ang pagkabig sa tanan nga mga tawo.”⁹ Siya ang aton ”mainunungon nga Diyos, nga nagatuman sang iya kasugtanan kag nagakaluoy sa ila nga nagapalangga sa iya kag nagatuman sang iya mga kasuguan.”¹⁰

Ako may hugot nga pagtuo nga kon ang Diyos makabulig kag magsakdag sa isa ka pobre nga manlalagyo halin sa isa ka kubos nga panimalay sang nalat-an-sang-inaway nga pungsod nga tunga sa kalibutan nga malayo sa pangulohang opisina sang Simbahan, gani Siya makadab-ot man sa inyo.

Akon mga pinalangga kay Cristo, ang Diyos sang Tinuga, nga nagahatag sang kabuhi sa kalibutan, pat-od nga may gahum sa paghatag sang kabuhi sa inyo. Pat-od nga Siya makahimo sa inyo nga tunay, espirituhanon nga nilalang sang kapawa kag kamatuoran nga inyo ginahandom.

Ang mga panaad sang Diyos pat-od kag segurado. Sarang kita mapatawad sang aton mga salâ kag matinluan kita sa tanan naton nga mga kalautan.¹¹Kag kon kita padayon nga nagabaton kag nagatuman sang sang matuod nga mga prinsipyo sa aton personal nga mga kahimtangan kag sa aton mga panimalay, kita makaabot sa kahimtangan nga sa diin kita ”indi na gid paggutumon, ukon pag-uhawon, ... Kay ang Kordero nga yara sa tunga sang trono amó ang magapakaon [sa aton], kag magatuytoy [sa aton] sa mga tuburan sang tubig nga buhi: kag ang Diyos magapahid sang tagsa ka tulô nga luha [sang aton] mga mata.”¹²

Apang indi ini matabo kon kita nagapanago sa likod sang mga pakuno-kuno nga personal, espirituhanon nga mga panudlo, ukon sa atubang sang mga tulumanon. Inang hapaw nga pagkasumulunod indi lang nga nagatapna nga aton makita ang matuod-tuod naton nga mga kaugalingon, apang ini nagatapna man sa aton sa matuod-tuod nga pagbag-o paagi sa milagro sang Pagpasag-uli sang Manluluwas.

Ang Simbahan indi isa ka lugar-pasundayagan sang mga kotse—isa ka lugar nga ginapasundayagan sang aton mga kaugalingon agud nga ang iban makahangad sang aton pagka-espirituhanon, ikasarang, ukon kauswagan. Ini labi nga daw isa ka sentro sang pagserbisyo, nga sa diin ang mga salakyan nga kinahanglan kaayuhon nagakadto para masostener kag mapabalik sa maayo nga kondisyon.

Kag indi balá, nga tanan kita, nagakinahanglan nga kaayuhon, sosteneron, kag pabalikon sa maayo nga kondisyon?

Nagakadto kita sa Simbahan indi nga magtago sang aton mga problema apang sa pagpaayo sa ila.

Bilang mga nagakapot sang priesthood, kita may dugang nga katungdanan—nga ”magtatap sang panong sang Diyos … , indi bangud nga kita napilitan lamang, apang bangud sa aton mismo kabubut-on; indi para sa [personal nga ganar], apang sa isa ka matuod-tuod nga handom sa pag-alagad; indi sa mga pagkahari-hari sa mga gintugyan nga tatapon, apang magmangin su[lundan] sang panong.”¹³

Dumduma ninyo, mga kauturan, ”ang Diyos [naga]sugpo sa mga bugalon, apang [naga]hatag sing grasya sa mga mapainubuson.”¹⁴

Ang pinakamaayo, ang pinakatakos, ang pinakamadinalag-on nga tawo nga nagkabuhi diri sa duta sang bisan san-o pa man, amó man ang pinakamapainubuson. Ginhimo Niya ang kadam-an sang pinakadungganon nga mga pag-alagad sa pribado nga mga tinion, nga may diutay lamang ang mga nakakita, nga Iya ginsilingan ”indi kamo magsugid bisan kay sin-o man” sang Iya ginhimo.¹⁵Sang Siya gintawag nga ”maayo,” gilayon Niya nga ginlikawan ini nga pagdayaw kag nagpilit nga walâ gid sing iban nga maayo kundi ang Diyos lamang.¹⁶Maathag nga ang pagdayaw sang kalibutan walâ sing pulos sa Iya; Ang Iya lamang tuyò amó ang pag-alagad sa Iya Amay kag ”ginahimo ko sa gihapon ang Iya nahamut-an.”¹⁷ Mangin maayo man kita kon aton ginasunod ang ehemplo sang aton Agalon.

Mga kauturan, ini ang aton mataas kag balaan nga pag-alagad—nga mangin mga representante ni JesuCristo, nga magpalangga subong sang Iya pagpalangga, nga mag-alagad subong sang Iya pag-alagad, nga ”mag-alsa sang mga kamot nga nagaluyloy, kag magpalig-on sa maluya nga mga tuhod,”¹⁸nga ”magtatap [sa] mga pobre kag mga nagakinahanglanon,”¹⁹ kag magsapupo sa mga balo kag mga nailo.²⁰

Nagapangamuyo ako, mga kauturan, nga samtang kita nagaalagad sa aton mga panimalay, mga korum, mga ward, mga stake, mga komunidad, kag mga kapungsuran, sumpungon naton ang pagsulay nga magdala sang atensyon sa aton mga kaugalingon kag sa tigaylo, magtinguha sa pag-angkon sang mas maayo pa nga kadungganan: mangin mapainubuson, tunay nga mga sumulunod sang aton Ginuo kag Manluluwas nga si JesuCristo. Samtang aton ini ginahimo, magalakat kita sa dalan nga nagapadulong sa aton pinakamaayo, pinakamatuod-tuod, kag pinakadungganon nga mga kaugalingon. Sa sini ako nagapamatuod sa ngalan sang aton Manunudlo, nga si JesuCristo, amen.