2010–2019
Eļan̄n̄e Elukkuun M̧ool
Eprōļ 2015


Eļan̄n̄e Elukkuun M̧ool

Ij jar bwe jenaaj jum̧ae kapo ko n̄an leļo̧k kōj make im, ijjelo̧kin, kajjieon̄ kōļapļo̧k nōbar; n̄an ettā, erom rikam̧ool ro rettā an Jisōs Kraist.

Ilo kar jōmļo̧kin ļo̧k kein 18 epepen ko, Catherine eo Euteej ilo Russia ekar kōjjelā ke enaaj loļo̧k jikin ko irear in laļ in an, ippānļo̧k enaaj jejjo ambassador ro n̄an laļ ko ilikin. Kōbna eo an eria eo, Grigory Potemkin, ekar lukkuun kōnaan kabwilōn̄ rilotok ro. Kōn menin ear etal wōt ļōmņak in im kwaļo̧k tōprak ko an lal eo.

Ejja mōttan wōt tūreep in, Catherine ekar iuwe ioon wa ilo̧k ilo Dnieper Reba, emōnōnō im kwaļo̧k bukwōn jidik ko rejeram̧m̧an itōrerein lojet, robrak kōn armej ro remōnōnō im eowan. Kar juon wōt men errōļo̧k: aolepān tūreep eo kar n̄an wōt alooj. Kar ba bwe Potemkin ekar kajutak riab in m̧ōn wia ko im m̧ōko im̧ōn armej kōm̧m̧an jān bo̧o̧k ko remāni. Ekar barāinwōt kōm̧m̧an annan̄ ko āinwōt armej reboub ilo jerbal n̄e laļ eo eļap an jeram̧m̧an. Ak ke armej ro rej penjakļo̧k, Rijerbal ro an Potemkin rej mōkaj im bōke riab in em ko im kaiurļo̧k im bar kōpooji n̄an jikin eo juon Catherine ej itōn deļo̧n̄e.

Men̄e ribwebwenato ro rekar kajjitōk m̧ool eo an bwebwenato in, naan in “Bukwōn an Potemkin” emōj an erom an laļ in vocabulary. Kiiō meļeļe eo an n̄an kajjieon̄ kōtōmak armej bwe eļapļo̧k ad em̧m̧an jān ad ļōmņak.

Būruwōd Ej Ke Pād ilo Jikin eo Ejim̧we?

Ej m̧ōttan wōt mour in bwe jen lukkuun kōkm̧anm̧an kōj. Ej un eo etke elōn̄ iaadwōj rej buuļ jerbal im kakōm̧anm̧an tulkin m̧ōko im̧ōd im unin an Aaronic Priesthood ro lukkuun lale bwe aolep koolan bōraer en jejjet, bwe ren lak baj iion juon armej eo ejej uwaan. Ejjeļo̧k bōd ilo kōrabōlbōl juju ko ad, kōn̄ajn̄aj, ak bar nooj kōnno ko rōtoon m̧okta jen an itok rūkaki in lotok ro. Bōtab, eļan̄n̄e eļap ad ļōmņake, ļōmņak in kakkōl in emaron̄ in oktak jān wōrtokjen n̄an moņ.

Rikanaan ro an Irooj rekar kakkōl ņae ro rej “ruwaaktok n̄an ippa, kōn kōn an lo̧n̄ier im tieir kautiej Eō, a raar kōm̧m̧akūt būrueir ettoļo̧k jān N̄a.”1

Rilo̧mo̧o̧r eo ekar meļeļe im tiriam̧o̧ kōn rijerawiwi ro, ro būruweer rettā im m̧ool. Ak E ej jutak ilo jim̧we im illu ņae rijeļā moņ ro āinwōt skraib ro, Parisi ro, im Saddusi ro—ro rekar kajjieon̄ kwaļo̧k aer jim̧we n̄an bōk nōbar, kajoor, im m̧weie an laļ, ejja iien in wōt, rej kiene armej ro rej aikuj in kōjeram̧m̧an er. Rilo̧mo̧o̧r eo ekar keidi er n̄an “kom̧ āinwōt wūliej ko re mouj, ko rem̧m̧an bōtata ilikir, a ilowaan re lōn̄ kōn di in armej im nana otemjej.”2

Ilo raan kein ad, Irooj ewōr bar an naan ko rekajoor āinwōt kein n̄an rikabwijer priesthood ro, ro rej kajjieon̄ ņooj jerawiwi ko aer, ak n̄an kam̧ōņōņōik juon, ak jerbal nana ko aer. Eļan̄n̄e rej kōm̧m̧ane menin, E ekar ba, lan̄ ko rej kilōk im jetōb eo an Irooj ej bōrom̧ōj im n̄e ej em̧m̧akūt, amen n̄an priesthood eo ak mālim eo an armej eo.3

Etke menin ej waļo̧k? Etke jet iien jej kajjieon̄ kwaļo̧k jeniknik, jeram̧m̧an, im wūjlepļo̧k tulikid ak itulowa—āinwōt an Rikkwaļo̧k revelesōn eo ba kake RiEpesōs—, jeram̧m̧an im niknik jen tulikid ak itulowa–āinwōt an ribōk madenļo̧k eo ba kake ri Epsōs–“A men in Ippa ej notam̧, bwe kwaar ilo̧k jān am yokwe m̧okta.”?4

Ilo jet jekjek, emaron̄ jako ad ļōmņak im jibadbad eo an gospel eo, bōd ad kōjerbal wāween m̧wil em̧m̧an kōn kajoor eo An.5 Menin eļaptata an kauwōtata ilo ad kwaļo̧k jān tulik wāween ad rikaļoor n̄an kwaļo̧k n̄an ro jet n̄an ļapļo̧k eo ad make ak kajoor. Innām bwe jej pād ilo kauwōtata im delo̧n̄eļo̧k jikin RiParisi ro, im kiiō etōreen etale būruwōd n̄an mōkaj in kōm̧m̧ani oktak ko remenin aikuj.

Būrookraam̧ ko an Potemkin

Kapo in n̄an kwaļo̧k ad em̧m̧anļo̧k jān ad lo kōj ilo mour ko ad make ak emaron̄ in waļo̧k ilo jerbal ko ad ilo Kabun̄ eo ad barāinwōt.

N̄an waanjon̄ak, ijeļā kōn juon stake ritōl ro ie rej kōm̧m̧ani jet kōttōbar ko rem̧m̧an n̄an iiō eo. Ke rej loe ke kōttōbar ko ewōr tokjāer, rej kalimjōk wōt ijo eutieej im kōmeļeļe ko rekabwilōn̄lōn̄ ak bōnbōn im bōjāān ko.

Ālkin arto artak im errā kōn kōttōbar kein, juon men ejino kabōņōņōik stake būreejtōn eo. Ekar kōļmenļo̧kjeņ kōn member in stake eo an—āinwōt juon m̧am̧a edik ewōr nejin ajri ro reddik eo im emej pāleen. Ej kōļmenļo̧kjeņ kōn membōr ro repere im ajim̧akeke ak kōn ewōr nan̄inmej ko reļļap im ejjeļo̧k aer insurance. Ej kōļmenļo̧kjeņ kōn membōr ro rej jelm̧ae jepel jān m̧are, an̄ūrlep ko, rejjab jerbal, im jorrāān in kōmālij. Im eļak ļapļo̧k an ļōmņak kōn er, eļapļo̧k an kajjitōk kajjitōk in ippān make: kōttōbar kein ad renaaj ke kōm̧m̧an oktak ilo mour kein an membōr rein?

Ekar jino kōļmenļo̧kjeņ kōn wāween an kōttōbar kein an stake kar maron̄ oktak eļan̄n̄e er ren kar kajjitōk m̧okta, “Ta jerbal eo ad?”

Innām stake būreejtōn in ekar bar ro̧o̧lļo̧k n̄an ko̧o̧njeļ ko an, ippān doon rekar ukōt jibadbad eo aer. Er rekar ļōmake bwe ren jab kōtļo̧k “ri kwōle, … ri aikuj, … kelwaan, … ri nan̄inmej im en̄taan n̄an eļļāļo̧k jān [er], im jab kile er.”6

Rekar kōm̧m̧ani kōttōbar ko rekāāl, kile bwe jeram̧m̧an eo kōn kōttōbar ko rekāāl jab maron̄ aolep iien jon̄i, armej reban—bwe ewi wāween an juon jon̄e naan in kam̧ool an juon make, iakwe an Anij, ak tiriam̧o̧ n̄an ro jet?

Ak rekar barāinwōt jeļā bwe “elōn̄ wōt iaan men ko komaron̄ bwini, rej jab aikuj bōnbōn. Elōn̄ iaan men ko kwojjab maron̄ bwini, rej aikuj bōnbōn.”7

Ij kōļmenļo̧kjeņ eļan̄n̄e doulul ko ad im kōttōbar ko ad make rej jet iien rej waanjon̄ak ko raan kein āinwōt juon bukwōn an Potemkin. Rekabwilōn̄lōn̄ n̄e rej jāltok jān ettoļo̧k ak relikjab n̄an kwaļo̧k lukkuun aikuj ko an ro jeid im jatid rejitōn bōro?

Ro jeiū im jatū im rikabwijer priesthood ro m̧ōtta, eļan̄n̄e Jisōs Kraist en kar jijet ippād im kajjitōk juon bōnbōn in ad bōk eddo, ijjab lukkuun jeļā bwe E enaaj kar kalimjek wōt būrookraam̧ ko im bōnbōn ko. Ta eo Rilo̧mo̧o̧r eo enaaj kar kōņaan in jeļā jekjek in būruwōd. Enaaj kar kōņaan in jeļā ewi wāween ad iakwe im jerbal n̄an ro repād ilo ad kōjparok, ewi wāween ad kwaļo̧k ad iakwe n̄an kōrā ro pāleed im baam̧le eo, im ewi wāween adkōmeraik ļo̧k eddo ko aer. Rilo̧mo̧o̧r eo enaaj kar kōņaan jeļā ewi wāween arro epaakeļo̧k E Jemedwōj Ilan̄.

Etke Jej Ped Ijin?

Bōlen emaron̄ jipan̄ etale būrwōd make. N̄an waanjon̄ak, jemaron̄ kajjitikin kōj make, etke jej jerbal ilo Kabun̄ eo an Jisōs Kraist?

Jemaron̄ kar make kajjitōk, etke jej pād ijin ilo kweilo̧k in rainin?

Ij tōmak eļan̄n̄e iaar uwaake kajjitōk in ilo jon̄an eo ejim̧we tata, in kar ba ij pād ijin kōnke Būreejtōn Monson ekar kajjitōk bwe in kōnono.

Im elukkuun ejjeļo̧k juon aō kālet.

Ijjeļo̧kin menin, kōrā eo pāleeō ej kōtmāne aō pād. Im ewi wāween aō maron̄ ba jab n̄ane?

Ak jooj aolep jeļā bwe ebar lōn̄ un ko rem̧m̧anļo̧k unin ad pād ilo kweilo̧k ko im mour ko ad ilo ad wūjlepļo̧k āinwōt rikaļoor ro an Jisōs Kraist.

Ij pād ijin kōnke ilukkuun in kōņaan kōn aolepān būruwō n̄an ļoor M̧aajta eo, Jisōs Kraist. Ij jānuwade n̄an kōm̧m̧ani aolep men ko ippa kōn unin eļap. Ij kwōle kōn im̧we eo an Jetōb Kwojarjar eo im ron̄jake ainikien Anij ilo An kōnono jān rikarejar ro an em̧ōj kapit er. Ij pād ijin n̄an aō erom juon armej em̧m̧anļo̧k, n̄an aō maron̄ ebbōkak jān waanjon̄ak ko reim̧we an em̧m̧aan im kōrā ro jeiū im jatū ilo Kraist, im n̄an katak wāween wājepdikļo̧k jerbal n̄an ro raikuj.

Ilo tukadu, Ij pād kōnke ij iakwe Jemedwōj Ilan̄ im Nejin, Jisōs Kraist.

Ijeļā unin ej ami barāinwōt. En̄in ej etke jej m̧ōņōņō in kōm̧m̧an ujlepļo̧k ko im jab baj naan in kōmlet ko n̄an ļoor Rilo̧mo̧o̧r eo. En̄in ej etke jej kotak ilo uteij priesthood eo An ekwojarjar.

Jān Kakijekeek n̄an Kijeek Euruur

Mekarta naan in kam̧ool eo am̧ ej wōnm̧aanļo̧k im ājijomourur ak m̧akūtkūt ko am̧ ilo Kabun̄ in renan̄in annen̄eļo̧k wōt bukwōn eo an Potemkin, nuuj eo em̧m̧an ej bwe komaron̄ kalōke kōn kajoor otemjej ewōr ippām̧. Ijin ilo Kabun̄ eo an Jisōs Kraist, komaron̄ kekemo̧o̧jļo̧k im epaakeļo̧k Rilo̧mo̧o̧r eo jān kōjerbal pedped in gospel eo raan n̄an raan.

Kōn kijenmej im meanwōd, jekdo̧o̧n jidik wōt jerbal in rikaļoor ak tōmake eo ediktata emaron̄ erom̧ kijeek eurur ilo juon mour ewūjlepļo̧k. Ilo m̧ool, āindein wāween an aolep kijeek ko reurur ijjino—āinwōt juon kakijekeej jidikdik.

Eļan̄n̄e kwoj en̄jake am̧ dik im mōjņo̧, jouj itok n̄an Kraist, eo ej kōm̧m̧an bwe mōjņo̧ ko ren kajoor.8 Men eo emōjņo̧tata ilubwiljid, kōn tiriam̧o̧ an Anij, emaron̄ erom juon jetōb ekajoor, kōnke Anij “ejab ļōmņak kōn oktan armej.”9 E ej ad “Anij e tiljek, Eo ej kōjparok bujen im tūriam̧o ipān ro rej yokwe E im pokake kien ko An.”10

Ej aō kam̧ool bwe eļan̄n̄e Anij emaron̄ kar pukōtļo̧k im jipan̄ juon Rijapne ejerata jān juon ekilep ilo laļ eo ekar jorrāān jān tariņae ettoļo̧k jān opiij ko reļļap an Kabun̄ in, innām emaron̄ bar pukōtwaj eok im jipan̄ eok.

Em̧m̧aan ro jeiū im jatū ilo Kraist, Anij eo an Menin Kōm̧anm̧an ko, Eo ekar letok kitwōn menono n̄an lan̄ ko, em̧ool ewōr An kajoor n̄an lewaj kitwōn menono n̄an eok. Em̧ool emaron̄ in kōm̧m̧an bwe kwōn em̧m̧an, jetōb eo eobrak kōn meram im m̧ool eo kokwōņaan erom.

Kallim̧ur ko am Amij rem̧ool im jejjet. Jemaron̄ in bōk jeorļo̧k bōd in jerawiwi ko ad im erreo jān aolep jab wānōk.11 Im eļan̄n̄e jej wōnm̧aanļo̧k wōt errā im bōk pedped ko rem̧ool ilo jekjek ko ad make im ilo baam̧le ko ad, jenaaj tōpar jon̄ak eo ijo jej “jāmin bar kwōle, re jāmin bar maro. … Bwe Lamb eo Ej eoļōpan tūroon Enaaj naajdik [kōj], im Enaaj tōl [kōj] n̄an unin dān ko dān in mour; im Anij enaaj kōm̧ōrāik dānnin kōmjaaļaļ jān [mejād].”12

Kabun̄ in Ej juon Jikin Kōmour, Jab Tileekek

Ak wāween in ej jāmin waļo̧k eļan̄n̄e jej tileekek ilowaad, ak āinwōt rikūrijin im ad uwaan doulul ko jej pād ie. Ilo ad bajjōk m̧antin rikaļoor ejjab dābij wōt ad lo wōn kōj make, ak barāinwōt ekaban̄ ak lukkuun oktak kōn kabwilōn̄lōn̄ eo an Pinmuur eo an Rilo̧mo̧o̧r eo.

Kabun̄ in ejjab jikin alooj wa—juon jikin n̄an kwaļo̧k kōj bwe ro jet ren nōbar jetōb ko ad, māletlet eo ad, ak m̧weie. Ej āinļo̧k wōt juon service center, ijo aolep wa ko rej aikuj kōkāāl rej itok im kōkāāl im kōkm̧anm̧anļo̧ki.

Im ta ej jab bar kōj, kōj aolep, jaikuj ke kōkkāāl, karpen im kōkm̧anm̧anļo̧k?

Jej itok n̄an Kabun̄ jab n̄an jab ņooj jorrāān ko ad ak n̄an kōmouri.

Āinwōt ro rej kabwijer priesthood, ebar wōr ad eddo—n̄an “naajdik jiip ko an Anij … , jab ilo m̧akoko, ak kōn ami kōņaan; jab kōn oņān [jeram̧m̧an eo am̧], ak kōn ami kōņaan jipan̄; im Kwom̧win jab irooj ioon ro me emōj likūte ņa ippemi, a kom̧win make jon̄ak n̄an bwij eo”13

Keememej, em̧m̧aan ro jeiū im jatū “Anij ej jum̧ae ro ri juwa, a Ej leļo̧k jouj n̄an ro ri ettā” 14

Armej eo eļaptata, ekajoor tata, eļaptata tōprak ippān ej eo ear etetal ion lal in e barāinwōt eo ettā tata buruwōn. Eaar kōm̧man jet ian jerbal ko An rekabwilōn̄lōn̄tata ilo an make ian, im jet wōt rej loe, ro Eaar ba ren jab “ba kaki” men eo Eaar kōmane.15Ke juon armej ej kūr E “em̧m̧an,” Im Jisōs e ba n̄an e, “Etke kwōj ba N̄a I m̧an? Ejjeļo̧k en em̧m̧an, a juon wōt, Anij. 16 Ealikar bwe nōbar an laļ in ejjeļo̧k tokjen Ippān; Un eo An deeo ej n̄an jerbal n̄an Jemān im “bwe iien otemjej Ij kōm̧m̧an men ko rej kabun̄būruon”17

Jen Iakwe Āinwōt E Ej Iakwe

Em̧m̧aan ro rejitōn bōro, en̄in ej kūr eo ad euteej im ekwōjarjar in—bwe jen rijerbal an Jisōs Kraist, im iakwe āinwōt an iakwe, n̄an jerbal āinwōt Ej jerbal, n̄an jipan̄ pā ko rōmōjno̧, kōkajoor n̄e ko rōmōjno̧18 n̄an lale ro riaikuj,19im lale ro emej limaro emej pāleer im ajir ro ejjeļo̧k jemāer.20

Ij jar, em̧m̧aan ro jeiū im jatū, bwe ilo ad jerbal ilo baam̧le ko ad, doulul ko an ward ko, stake ko, jukjukinped ko, im laļ ko jenaaj bōprae kapo ko im ron̄jake kōj make im, ijjeļo̧kin, kate kōj n̄an eļapļo̧k utiej: n̄an erom ettā bōro, lukkuun rikaļooran ad Irooj im Rilo̧mo̧or, Jisōs Kraist. Ilo ad kōm̧mane menin, jenaj lo ad etetal ilo iiaļ eo ej tōlļo̧k n̄an ijo em̧m̧an tata n̄an kōj, lukkuun in m̧ool, im lukkuun karbab. Ij kam̧ool kōn menin ilo etan Majta eo ad, Jisōs Kraist, amen.