2010–2019
Tiv Thaiv Kev Ywj Siab Xaiv, Pov Hwm Kev Ywj Siab Teev Ntuj
April 2015


Tiv Thaiv Kev Ywj Siab Xaiv, Pov Hwm Kev Ywj Siab Teev Ntuj

Yog peb xav siv peb txoj kev ywj siab xaiv raws li kev ncaj ncees peb yuav tsum muaj kev ywj siab teev ntuj.

Hnub no yog Hnub Caiv Easter: ib hnub rau peb ua Vajtswv tsaug thiab nco txog peb tus Cawm Seej Yexus Khetos txoj Kev Theej Txhoj thiab txoj Kev Sawv Rov Los rau tag nrho cov tib neeg. Peb teev tiam Nws; peb zoo siab vim peb muaj kev ywj siab teev ntuj, kev ywj siab koom ua ke, ywj siab hais lus, thiab peb muaj kev ywj siab xaiv.

Ib yam li cov yaj saub hais txog hnub nyoog kawg uas peb nyob no, muaj ntau tus neeg uas tsis paub peb yog leej twg thiab peb ntseeg dab tsi. Ib txhia “nyiam taug xaiv … [thiab] tsis nyiam [cov uas] ua zoo.”1 Lwm tus “hu qhov phem ua qhov zoo; [thiab] hu txoj kev tsaus ntuj ua txoj kev kaj thiab hu txoj kev kaj ua txoj kev tsaus ntuj.”2

Thaum cov uas nyob ib puag ncig peb txiav txim siab lawv yuav ua li cas rau peb txoj kev ntseeg, peb yuav tsum nco ntsoov tias peb txoj kev ywj siab coj ncaj ncees yog ib qho tseem ceeb ntawm Vajtswv txoj hau kev rau tag nrho Nws cov me nyuam. Nyob hauv Kev Sab Laj Saum Ntuj ua ntej lub neej no, Vajtswv tau qhia txoj hau kev no rau peb, tsis hais kev ywj siab los yog.3

Nyob hauv Pawg Sab Laj Loj ntawd, Luxifaws, uas yog Dab Ntxwg Nyoog, tau siv nws txoj kev ywj siab xaiv kom tawm tsam Vajtswv txoj hau kev. Vajtswv hais tias vim Dab Ntxwg Nyoog ntxeev siab rau Nws, thiab xav ua rau tib neeg txoj kev ywj siab xaiv puas tsuaj, uas tus Tswv Vajtswv tau muab, ces Vajtswv tau txib kom muab Dab Ntxwg Nyoog ntiab tawm.4

Thiab Dab Ntxwg Nyoog coj ib feem peb ntawm cov neeg nyob saum ntuj ceeb tsheej tawm tsam Vajtswv vim lawv muaj kev ywj siab xaiv.5

Yog li ntawd, Leej Txiv Saum Ntuj Ceeb Tsheej cov me nyuam ntsuj plig uas tau xaiv xyeej Vajtswv txoj hau kev thiab ua raws li Luxifaws hais lawv tau poob lawv txoj koob hmoov.

Yexus Khetos, uas siv Nws txoj kev ywj siab xaiv, hais tias:

“Kuv nyob no, xa kuv mus.”6

Nws tau ua raws li Leej Txiv lub siab nyiam, kom Leej Txiv tau lub yeeb koob mus ib txhis.7

Yexus yog tus uas siv Nws txoj kev ywj siab kom txhawb nqa Leej Txiv Saum Ntuj Ceeb Tsheej txoj hau kev, es Leej Txiv pom zoo rau Nws ua peb tus Cawm Seej, tus uas Vajtswv tsa kom theej peb sawv daws lub txhoj. Ib yam li ntawd, thaum peb siv peb txoj kev ywj siab ua raws li cov lus txib peb thiaj to taub zoo hais tias peb yog leej twg thiab txais tag nrho cov koob hmoov uas peb Leej Txiv Saum Ntuj Ceeb Tsheej muaj—tsis hais lub cib fim muaj ib lub cev, kev vam meej, muaj kev xyiv fab, muaj tsev neeg, thiab muaj txoj sia nyob mus ib txhis los yog.

Yog peb xav ua raws li cov lus txib, peb yuav tsum paub cov lus qhuab qhia ntawm lub Koom Txoos peb thiaj yuav tsis txhob xyeej Yexus Khetos mus coj raws li lwm tus.

Cov koob hmoov uas peb muaj tam sim no, peb muaj vim peb tau xaiv ua raws li tus Cawm Seej ua ntej lub neej no. Rau tag nrho cov uas mloog los yog nyeem tej lus no, txawm nej yog leej twg thiab txawm nej tau ua dab tsi dhau los, cia li nco ntsoov tias: yeej tshuav sij hawm rov qab xaiv ua li ntawd thiab nrog Nws mus.

Dhau los ntawm peb txoj kev ntseeg Yexus Khetos, thiab nws txoj Kev Theej Txhoj, kev hloov siab lees txim, thiab ua kev cai raus dej, peb yuav tau txais lub txiaj ntsim Vaj Ntsuj Plig Dawb Huv. Lub txiaj ntsim no ua rau peb txais tau kev txawj ntse thiab kev to taub, kev coj thiab lub dag zog kom kawm thiab tau ib zaj lus tim khawv thiab lub hwj chim kov yeej kev txhaum, thiab txais tau kev nplij siab thiab kev txhawb nqa kom rau siab ntseeg thaum peb raug teeb meem. Cov koob hmoov zoo kawg no los ntawm tus Ntsuj Plig ua rau peb haj yam muaj kev ywj siab thiab lub hwj chim ua qhov yog, vim “yog tus Tswv tus Ntsuj Plig nyob qhov twg, qhov ntawd muaj kev thaj yeeb.”8

Thaum peb taug txoj kev ywj siab ntawm sab ntsuj plig hauv hnub nyoog kawg no, peb yuav tsum to taub tias yog peb xav siv peb txoj kev ywj siab xaiv raws li kev ncaj ncees ces peb yuav tsum muaj kev ywj siab teev ntuj. Peb yeej paub hais tias Dab Ntxwg Nyoog tsis xav kom peb muaj kev ywj siab no. Nws twb xav ua rau peb txoj kev ywj siab xaiv kev ncaj ncees puas tsuaj nyob saum ntuj ceeb tsheej, thiab nyob hauv lub ntiaj teb nws rau siab tawm tsam, tab kaum thiab dag txog kev ywj siab teev ntuj—ua rau neeg tsis paub vim li cas yuav tsum muaj kev ywj siab no kom txais tau kev cawm seej.

Muaj plaub qho tseem ceeb los ntawm kev ywj siab teev ntuj uas peb Haiv Neeg Ntseeg hauv Hnub Nyoog Kawg yuav tsum pov hwm thiab tso siab rau.

Qhov ib yog kev ywj siab ntseeg. Yuav tsum tsis txhob cem, tsim txom, los yog tawm tsam cov neeg los yog tseem fwv rau tej yam uas lawv ntseeg txog Vajtswv. Yog ib qho tseem ceeb heev. Ib zaj lus txog tej yam uas peb ntseeg txog kev ywj siab teev ntuj hais tias

tsis muaj ib yam tseem fwv uas yuav muaj kev thaj yeeb, tsuas yog muab tej kev cai ntawd tsim thiab ceev tsis pub rhuav, kom thiaj muab tau txoj kev ywj siab xaiv li siab xav rau txhua tus

kom tej nom tswv tswj tej kev txhaum cai, tiam sis tsis txhob tswj neeg tej kev xav hlo li, es tsis txhob muab tus ntsuj plig txoj kev ywj pheej quab yuam tsuj nthi.9

Lub Koom Haum United Nations nyob hauv zaj Universal Declaration of Human Rights thiab lwm zaj uas hais txog tib neeg tej txoj cai nyob thoob plaws lub ntiaj teb twb pom zoo tias tib neeg yuav tsum muaj kev ywj siab ntseeg li no.10

Qhov tseem ceeb thib ob ntawm kev ywj siab teev ntuj yog kev ywj pheej kom qhia peb txoj kev ntseeg rau lwm tus. Tus Tswv txib peb hais tias peb yuav tsum qhia txoj moo zoo rau peb cov me nyuam thaum nej nyob hauv tsev.11 Yexus kuj hais rau cov thwj tim hais tias, “Nej cia li mus thoob plaws lub ntiaj teb no thiab qhia txoj moo zoo kom sawv daws hnov.”12 Peb cov niam tsev txiv tsev, cov tub txib, thiab cov mej zeej, peb cia siab rau kev ywj siab teev ntuj kom qhia tau tus Tswv cov lus qhuab qhia nyob hauv peb tsev neeg thiab nyob thoob plaws lub ntiaj teb.

Qhov tseem ceeb thib peb los ntawm kev ywj siab teev ntuj yog kev ywj pheej txhim tsa ib lub koom haum teev ntuj thiab teev tiam nrog lwm tus ua ke. Tej nqe kev ntseeg thib kaum ib hais tias, “Peb qhia tias peb muaj cai teev tiam Vajtswv tus Uas Muaj Hwj Chim raws li peb lub siab nyiam, thiab cia tib neeg muaj tib txoj cai ntawd, cia lawv teev tiam li cas, qhov twg, los sis dab tsi uas lawv nyiam.” Tej zaj hais txog tib neeg txoj cai thiab ntau lub teb chaws zaj txhooj lij choj txhawb nqa lub ntsiab cai no.

Qhov tseem ceeb thib plaub los ntawm kev ywj siab teev ntuj yog kev ywj pheej kom ua neej raws li peb txoj kev ntseeg—tsis yog kev ywj siab ntseeg nyob hauv tsev thiab lub tsev teev ntuj tiam sis nyob nrog cov pej xeem thiab. Tsis yog tus Tswv txib kom peb thov Vajtswv peb tus kheej xwb13 tiam sis peb kuj yuav tsum mus thiab “ci rau sawv daws pom tej hauj lwm zoo uas [peb] ua, [thiab] qhuas [peb] Leej Txiv tus uas nyob saum ntuj ceeb tsheej.”14

Ib txhia tu siab thaum peb teev ntuj rau cov pej xeem pom, tiam sis cov uas xav kom lwm tus saib taus lawv tej kev xav thiab tej yam lawv ua nyob hauv peb lub sawm fem ntshe lawv feem coob saib tsis taus cov ntseeg uas kuj xav kom lwm tus saib taus lawv tej kev xav thiab tej yam lawv ua. Qhov uas cov pej xeem saib tsis taus tej kev xav los ntawm kev teev ntuj ntshe ua rau lub sawm fem thiab cov tswj kav saib tsis taus cov ntseeg thiab tej lub koom haum teev ntuj.

Thaum lwm tus xav yuam peb ua raws li cov pej xeem tej kev xav, tso peb tej kev ywj siab teev ntuj tseg, thiab tso peb txoj kev ywj siab xaiv tseg, cia li xav txog qhov uas Phau Ntawv Maumoos qhia peb tias peb tej kev lav ris yog dab tsi. Nyob hauv phau Amas peb nyeem txog Alixais, ib tug “neeg txawj ntse” thiab “neeg phem” uas xav ua tus vaj ntxwv thiab “nyiag lawv tej kev muaj cai thiab tej kev muaj cib fim,” uas “ncha rau cov neeg ntawm lub koom txoos.”15 Tus Vaj Ntxwv Mauxiyas tau qhia kom lawv tsa suab hais tej yam uas lawv xav tias yog qhov zoo.16 Yog li ntawd lawv “sib sau tuaj ua ke thoob plaws hauv thaj av, txhua tus neeg raws li nws lub tswv yim, seb yuav nrog los sis tawm tsam Alixais, nyob rau hauv tej pab pawg, tau muaj kev sib cam ntau … ib leeg … rau ib leeg.”17

Nyob hauv zaj no, cov mej zeej ntawm lub Koom Txoos thiab lwm tus muaj cib fim sib sau ua ke, koom siab koom ntsws, thiab txais tus Vaj Ntsuj Plig Dawb Huv tej kev tshoov siab. “Thiab tau muaj tias cov neeg lub suab tau los tawm tsam Alixais, kom nws tsis tau raug muab ua vaj ntxwv kav cov neeg.”18

Vim peb yog Yexus Khetos cov thwj tim peb muaj kev lav ris ua hauj lwm ua ke nrog cov uas ntseeg zoo li peb, kom tsa suab hais qhov yog. Txawm yog cov mej zeej yuav tsis txhob hais tias lawv sawv cev rau lub Koom Txoos hais lus los, vim peb yog cov pej xeem, peb txhua tus muaj cai rau siab hais peb zaj lus tim khawv nrog kev hlub—“txhua tus neeg raws li nws lub tswv yim.”19

Tus Yaj Saub Yauxej Xamiv hais tias:

“Kuv yeej ua siab loj tshaj tawm twv lub Ntuj Ceeb Tsheej hais tias kuv los yeej zoo siab hlo txo kuv txoj sia tiv thaiv cov neeg Presbyterian, cov neeg Baptist, los sis ib tug txiv neej zoo hauv lwm txoj kev teev ntuj tej cai thiab; rau tib lub ntsiab cai ntawd uas yuav tswj kav ib Tsoom Haiv Neeg Ntseeg hauv Hnub Nyoog Kawg tej cai yeej yuav tswj kav cov Neeg Txiv Plig tej cai thiab, los sis lwm txoj kev teev ntuj uas tsis nto moo thiab tsis muaj zog txaus tiv thaiv lawv tus kheej.

“Twb yog kuv txoj kev nyiam kev ywj pheej uas tshoov kuv lub siab—tib neeg sawv daws txoj kev ywj pheej ntawm tej kev cai lis choj thiab kev teev ntuj tib si.”20

Cov kwv tij thiab cov muam, peb lav ris saib xyuas tej kev ywj siab thiab txoj cai dawb ceev rau peb tus kheej thiab peb xeeb leej xeeb ntxwv. Peb yuav ua li cas?

Qhov ib, peb yuav tsum kawm. Cia li kawm txog tej teeb meem nyob hauv nej zej zog uas tej zaum yuav ua li cas rau kev ywj siab teev ntuj.

Qhov ob, raws li nej ua tau, koom ua ke nrog cov uas xav zoo ib yam txog kev ywj siab teev ntuj. Ua hauj lwm ua ke kom pov hwm kev ywj siab teev ntuj.

Qhov peb, ua neej zoo kom coj yam ntxwv zoo li tej yam uas nej ntseeg—thaum nej hais lus thiab ua tej yam nej ua. Qhov uas peb ua neej raws li peb txoj kev teev ntuj yeej tseem ceeb tshaj tej yam uas peb hais txog peb txoj kev teev ntuj.

Tsis ntev rau yav tom ntej, peb tus Cawm Seej yuav rov qab los. Cia peb tsis txhob sej ua hauj lwm no. Cia li nco ntsoov tias tus Thawj Tub Rog Maulaunais uas tsa tus chij ntawm kev ywj siab tau sau tej lus no “Rau txoj kev nco txog peb tus Vajtswv, peb txoj kev teev ntuj, thiab txoj kev ywj pheej, thiab peb txoj kev thaj yeeb, peb tej poj niam, thiab peb tej me nyuam.”21 Cia peb nco ntsoov cov neeg tau teb li cas: lawv siv lawv txoj kev ywj siab xaiv, thiab lawv “khiav zom zaws ua ke” thiab ua kev khi lus tias lawv yuav ua.22

Kuv cov kwv tij thiab cov muam, tsis txhob lam taug kev xwb! Cia li khiav! Cia li khiav kom txais tau cov koob hmoov los ntawm kev ywj siab thaum nej ua raws li tus Vaj Ntsuj Plig Dawb Huv thiab siv nej txoj kev ywj siab uas Vajtswv tau muab rau peb kom ua raws li Nws lub siab nyiam.

Thaum hnub Easter tshwj xeeb no, kuv ua tim khawv tias Yexus Khetos tau siv Nws txoj kev ywj siab xaiv ua raws li peb Leej Txiv lub siab nyiam.

Peb hu nkauj txog peb tus Cawm Seej hais tias Nws zoo siab cia nws cov ntshav ntws; Nws txo Nws txoj sia tseg.23 Thiab vim Nws ua li no, peb muaj cib fim “muaj kev ywj siab xaiv txoj kev nyob ywj siab thiab txoj sia nyob mus ib txhis” dhau los ntawm cov koob hmoov ntawm Nws txoj Kev Theej Txhoj.24 Thov kom peb yuav xaiv coj raws li Nws hnub no thiab mus ib txhis, kuv thov los ntawm Nws lub npe dawb huv, Yexus Khetos, amees.