Lub Pov Thawj Hwj thiab Kev Thov Vajtswv

Kuv zoo siab uas kuv muaj sij hawm hais lus rau cov uas tuav Vajtswv lub pov thawj hwj nyob thoob plaws lub ntiaj teb. Kuv paub tias lub cib fim no muaj nqi heev vim kuv paub me ntsis txog qhov uas tus Tswv tau tso siab rau nej. Vim nej tau txais lub pov thawj hwj, nej muaj cai hais lus thiab ua tej yam los ntawm Vajtswv lub npe.

Yuav muaj raws li nej txoj cai tsuas yog nej txais kev tshwm sim los ntawm Vajtswv. Ces nej yuav muaj cai hais lus los ntawm Nws lub npe. Thiab nej yuav muaj cai ua tej yam los ntawm Nws lub npe. Tej zaum nej tau ua yuam kev xav hais tias, “Li ntawd mas tsis nyuaj os. Yooj yim rau kuv txais kev tshoov siab yog tias kuv yuav hais lus los sis kuv yuav tsum foom koob hmoov pov thawj hwj rau ib tug.” Los yog tus dikas los sis tus xib hwb xav hais tias, “Thaum kuv loj hlob lawm los yog thaum kuv ua tub txib, ces kuv mam paub tias Vajtswv yuav hais li cas thiab ua li cas.”

Cia li xav txog hnub uas nej yuav tsum paub tias Vajtswv yuav hais li cas thiab ua li cas. Twb txog hnub ntawd lawm—txawm nej ua hauj lwm dab tsi nyob hauv lub pov thawj hwj. Kuv loj hlob nyob hauv lub Teb Chaws Amelikas sab hnub tuaj thaum muaj Kev Tsov Rog Thoob Ntiaj Teb thib Ob. Cov mej zeej nyias nyob deb nyias, thiab lub tseem fwv faib cov roj me ntsis xwb. Kuv yog tib tug dikas hauv peb ceg ntseeg. Cov mej zeej tau muab lawv hnab ntawv tso nyiaj yoo mov rau ceg ntseeg tus thawj tswj hwm thaum lawv tuaj rau kev sib ntsib yoo mov nyob hauv peb lub tsev.

Thaum kuv muaj 13 xyoos, peb tsiv tsev mus rau Utah nyob hauv ib pawg ntseeg loj. Kuv nco qab thawj zaug kuv taug kev mus sau cov nyiaj yoo mov. Kuv tau pom ib lub npe uas sau rau ib hnab ntawv thiab pom tias nws lub xeem yog tib lub xeem ntawm ib tug los ntawm Peb tug Tim Khawv txog Phau Ntawv Maumoos. Kuv ua siab loj khob qhov rooj. Tus txiv neej qhib qhov rooj, ntsia kuv, ua ntsej muag hnya, ces qw kom kuv khiav mus. Kuv nyo hau thiab mus.

Thaum ntawd yog 70 xyoos tas los lawm, tiam sis kuv tseem nco qab tias kuv xav li cas thaum kuv nyob ntawm nws lub qhov rooj thiab muaj dab tsi uas kuv xav tias kuv yuav tsum hais los yog ua. Yog tias hnub ntawd kuv tau thov Vajtswv thaum kuv mus, ces tej zaum kuv yuav txais kev tshoov siab kom sawv ib me pliag ntxiv, luag nyav, thiab hais ib yam xws li: “Zoo siab ntsib koj. Ua tsaug rau tej uas koj thiab koj tsev neeg tau ua dhau los. Zoo siab uas kuv yuav ntsib koj thaum lub hlis tom ntej.”

Yog tias kuv hais thiab ua li ntawd, tej zaum yuav ua rau nws npau taws ntxiv—tej zaum nws yuav tu siab. Tiam sis kuv paub tias kuv yuav xav li cas hauv kuv lub siab. Kuv yuav tsis nyuaj siab thaum kuv taug kev mus, tiam sis kuv yuav xav hauv kuv lub siab hais tias: “Koj ua zoo.”

Peb txhua tus yuav tsum hais lus thiab ua tej yam los ntawm Vajtsv lub npe thaum tej lub sij hawm peb yuav tsum muaj kev tshoov siab kom pab peb txiav txim siab tau. Yuav muaj tej lub sij hawm zoo li no thaum peb tsis tau muaj cib fim npaj siab. Twb muaj li no rau kuv ntau zaus. Ntau xyoo tas los nyob hauv ib lub tsev kho mob ib leej txiv hais tias cov kws kho mob qhia nws tias nws tus ntxhais uas muaj peb xyoos tshuav ob peb feeb xwb es nws yuav tas sim neej. Thaum kuv tso kuv tes saum ib qho chaw ntawm nws lub taub hau uas lawv tsis tau muab qhwv tas, vim kuv yog Vajtswv tus tub qhe, kuv yuav tsum paub Nws yuav ua li cas thiab hais li cas.

Ua rau kuv xav thiab hais tias nws yuav ua neej nyob ntxiv. Tus kws kho mob uas sawv ze kuv ua pa sib zog heev yam li tsis ntseeg thiab hais kom kuv txhob tab kaum nws. Kuv muaj kev kaj siab lug thiab kev hlub hauv kuv lub siab thaum kuv tawm lub tsev kho mob ntawd. Tus me nyuam ntxhais tsis tau tas sim neej thiab nws taug kev mus rau hauv nws txoj kev sib ntsib txais lub cim nco txog thaum hnub kawg uas kuv nyob hauv lub nroog ntawd. Kuv tseem nco txog kev xyiv fab thiab kev txaus siab vim kuv tau hais thiab ua li ntawd thaum kuv ua tus Tswv txoj hauj lwm pab tus me nyuam ntxhais thiab nws tsev neeg.

Qhov sib txawv ntawm kuv txoj kev xav hauv lub tsev kho mob thiab kuv txoj kev nyuaj siab thaum kuv taug kev ntawm lub qhov rooj ntawd mus thaum kuv yog ib tug dikas nyob ntawm tej yam uas kuv tau kawm txog qhov uas kev thov Vajtswv thiab lub hwj chim pov thawj hwj koom ua ke li cas. Thaum kuv yog ib tug dikas, kuv tseem tsis tau kawm tias yuav tsum txais kev tshwm sim kom hais tau thiab ua tej yam los ntawm Vajtswv lub npe, thiab yog peb xav tau ces peb yuav tsum thov Vajtswv thiab muaj kev ntseeg ua hauj lwm kom txais tau tus Vaj Ntsuj Plig Dawb Huv.

Hmo ua ntej kuv mus sau nyiaj yoo mov, kuv twb thov Vajtswv ua ntej kuv pw. Tiam sis tau ntau lub lim tiam thiab ntau lub hlis ua ntej kuv teb xov tooj ntawm lub tsev kho mob ntawd, kuv twb thov Vajtswv thiab rau siab ua hauj lwm zoo li Thawj Tswj Hwm Joseph F. Smith qhia tias yuav cia Vajtswv pub kev tshwm sim rau peb kom peb muaj hwj chim ntawm lub pov thawj hwj. Nws hais li no tias:

“Peb tsis tas hais lus ntau. Peb tsis tas ua rau nws nkees mloog peb thaum peb thov ntev. Tiam sis, vim peb yog Haiv Neeg Ntseeg hauv Hnub Nyoog Kawg, peb yuav tsum thov nws ntau zaus, kom ua tim khawv rau nws tias peb nco txog nws thiab peb txaus siab ris nws lub npe, ua raws li nws cov lus txib, thiab ua tej hauj lwm ncaj ncees; thiab peb xav tau nws tus Ntsuj Plig los pab peb.”¹

Ces Thawj Tswj Hwm Smith qhia peb tias peb yuav tsum thov rau yam dab tsi, vim peb yog cov tub qhe uas cog lus tias peb yuav hais thiab ua tej yam rau Vajtswv. Nws hais tias: “Nej yuav thov Vajtswv kom tau dab tsi? Nej yuav thov kom Vajtswv pom nej, kom nws hnov nej tej lus thov, thiab nws yuav tso nws tus Ntsuj Plig nrog nraim nej.”²

Peb hais tej lus dab tsi los tsis ua li cas, tiam sis yuav tsum ua siab ntev. Nej thov nej Leej Txiv Saum Ntuj Ceeb Tsheej kom Nws paub nej. Nws yog Vajtswv, Leej Txiv ntawm txhua tus, tiam sis Nws txaus siab tsom ntsoov rau Nws ib tug me nyuam. Tej zaum yog vim li no tus Cawm Seej thiaj li hais tej lus no “Peb Leej Txiv tus uas nyob saum ntuj ceeb tsheej; Thov kom sawv daws hwm koj lub npe.”³

Yog nej txhos caug los yog nyo hau ces yooj yim nyob tswm seeb, tiam sis nej muaj peev xwm txo hwj chim rau nej Leej Txiv Saum Ntuj Ceeb Tsheej thaum nej thov Vajtswv hauv nej lub siab, ib yam li nej yuav ua ntau zaus thaum nej ua hauj lwm pov thawj hwj. Ntau zaus yuav muaj tej suab nrov thiab tib neeg nyob ib puag ncig nej. Vajtswv hnov nej tej lus thov Nws uas nej tsis hais nrov, tiam sis nej yuav tsum kawm kom tsom ntsoov rau Nws vim tej zaum nej yuav tsum thov Vajtswv thaum tsis muaj ib qho chaw ntsiag to.

Thawj Tswj Hwm Smith hais tias nej yuav tsum thov kom Vajtswv paub tias nej txaus siab ua Nws txoj hauj lwm. Nws yeej paub tag nrho txog nej txoj kev hu lawm. Nws yog tus uas hu nej, thiab thaum nej thov Nws txog qhov uas Nws hu nej ua, ces yuav tshwm sim ntxiv rau nej paub.⁴

Kuv yuav qhia ib zaj lus piv txwv rau nej qhia nej tias tej zaum ib tug neeg qhia tom tsev yuav ua dab tsi thaum nws thov Vajtswv. Tej zaum nej twb paub tias nej yuav tsum:

Mus xyuas txhua tus mej zeej tom tsev, thiab ntuas kom lawv thov Vajtswv nrov nrov thiab ntsiag to thiab kom ua tag nrho tsev neeg tej dej num. …

“… Saib xyuas cov ntseeg txhua lub sij hawm, thiab nyob nrog lawv thiab txhawb lawv lub zog;

Thiab xyuas kom tsis txhob muaj kev ua phem nyob hauv lub koom txoos, thiab kom txhob muaj kev ib leeg ua nyuaj nyuaj rau ib leeg, thiab kom txhob dag, txhob taug xaiv, thiab txhob hais lus phem txog lwm tus;

Thiab xyuas kom cov ntseeg nquag tuaj sib ntsib ua ke, thiab xyuas kom tag nrho cov mej zeej ua lawv qhov dej num thiab.⁵

Txawm yog ib tug neeg qhia tom tsev thiab nws tus khub paub ntau los, nkawd yeej ua tsis tau tej no yog tsis muaj tus Vaj Ntsuj Plig Dawb Huv txoj kev pab. Cia li xav txog tej tsev neeg los yog tej neeg uas Vajtswv hu koj mus pab. Nej tej kev txiav txim thiab tej kev xav ua zoo yeej yuav tsis txaus.

Yog li ntawd nej yuav thov Vajtswv kom paub lawv lub siab, kom paub tias muaj xwm txheej dab tsi hauv lawv lub neej thiab to taub cov neeg uas nej tsis paub zoo lub siab. Nej yuav tsum paub tias Vajtswv xav kom nej ua li cas kom pab lawv thiab ua txhua yam nej ua tau, nrog rau Vajtswv txoj kev hlub rau lawv.

Yog vim nej muaj tej hauj lwm pov thawj hwj tseem ceeb thiab nyuaj, Thawj Tswj Hwm Smith thiaj li qhia tias thaum nej thov Vajtswv, nej yuav tsum thov kom Nws xa Nws tus Ntsuj Plig. Nej yuav tsum muaj tus Vaj Ntsuj Plig Dawb Huv tsis yog ib zaug xwb tiam sis txhua zaus uas Vajtswv yuav pub Nws los nyob nrog nej. Peb thiaj yuav tsum thov kom Vajtswv coj peb kev thaum peb ua hauj lwm pab Nws cov me nyuam txhua lub sij hawm.

Vim nej yuav tsum muaj tus Ntsuj Plig nrog nraim nej nyob, tus yeeb ncuab uas tawm tsam txhua yam kev zoo siab yeej tsom ntsoov rau nej. Yog nws ntxias tsis tau kom nej ua txhaum, nws yuav ua rau nej tsis txawj mloog tus Ntsuj Plig thiaj li ua rau nej lub hwj chim pov thawj hwj nqig mus. Vim li no Thawj Tswj Hwm Smith hais tias nej yuav tsum thov Vajtswv kom Nws ceeb toom nej thiab pov hwm nej kom txhob raug kev phem.⁶

Nws ua ntau yam kom ceeb toom peb. Tej lus ceeb toom yeej yog ib feem ntawm txoj kev cawm seej. Cov yaj saub, cov thwj tim, ceg txheem ntseeg cov thawj tswj hwm, cov npisov, thiab cov tub txib puav leej tsa suab ceeb toom kom pab dim teeb meem dhau los ntawm kev ntseeg Yexus Khetos, kev hloov siab lees txim, thiab kev ua raws li tej kev khi lus.

Vim nej tuav lub pov thawj hwj, nej yog tus Tswv lub suab uas ceeb toom lwm tus. Tiam sis nej yuav tsum ua raws li lus ceeb toom ib yam thiab. Nej sab ntsuj plig tiv tsis taus yog tsis muaj kev pov hwm ntawm tus Vaj Ntsuj Plig Dawb Huv nyob hauv nej lub neej niaj hnub.

Nej yuav tsum thov Vajtswv thiab rau siab ua hauj lwm kom muaj li ntawd. Tsuas yog nej muaj tus Vaj Ntsuj Plig Dawb Huv nej thia yuav taug txoj kev ti thiab nqaim kom dhau tej kev phem tej huab zig niab. Tus Vaj Ntsuj Plig Dawb Huv yuav coj nej kev thaum nws qhia qhov tseeb rau nej thaum nej kawm cov yaj saub tej lus.

Nej yuav tsum rau siab mloog thiab nyeem yog nej xav tau nws txoj kev coj. Nej yuav tsum thov Vajtswv thiab rau siab ntseeg kom cog tej lus tseeb rau hauv nej lub siab. Nej yuav tsum thov kom Vajtswv yuav pub Nws tus Ntsuj Plig rau nej, kom Nws coj nej mus rau qhov tseeb thiab qhia txoj kev yog rau nej. Nws yuav ceeb toom thiab coj nej li no mus rau txoj kev zoo nyob hauv nej lub neej thiab nyob hauv nej txoj hauj lwm pov thawj hwj.

Lub tuam rooj sab laj no yog ib lub cib fim zoo kom cia tus Tswv txhawb nej lub hwj chim thaum nej ua hauj lwm rau Vajtswv lub pov thawj hwj. Nej npaj tau nej tus kheej thaum nej thov Vajtswv, ib yam li nej tau npaj rau lub rooj sab laj no. Nej koom tau nej txoj kev ntseeg nrog cov uas yuav thov Vajtswv hauv lub rooj sab laj no. Lawv yuav thov Vajtswv kom ntau tus neeg txais koob hmoov ntau.

Lawv yuav thov kom tus Ntsuj Plig qhia tus yaj saub uas yog tus sawv cev rau tus Tswv. Lawv yuav thov Vajtswv pab cov Thwj Tim thiab tag nrho cov tub qhe uas Vajtswv hu. Nej sawv daws yog Vajtswv cov tub qhe, txij ntawm tus dikas tshiab tshaj mus rau tus pov thawj hlob laus, tsis hais cov laus thiab cov hluas, uas tej zaum tsis ntev yuav mus rau lub ntuj ntsuj plig, es lawv yuav hnov, “Tus tub qhe zoo thiab ncaj ncees, koj ua zoo lawm.”⁷

Yuav hais li ntawd rau ib txhia uas tsis tau xav tias lawv yuav hnov. Tej zaum lawv tsis tau ua ib tug thawj coj hauv Vajtswv lub nceeg vaj nyob hauv lub ntiaj teb. Tej zaum ib txhia xav tias tsis muaj dab tsi uas los ntawm lawv tej hauj lwm los yog pom tias tsis tau muaj cib fim pab lwm tus. Ib txhia yuav xav tias lawv tsis tau muaj sij hawm pab lwm tus npaum li lawv xav muaj.

Tus Tswv yuav tsis saib qhov uas peb yog ib tug thawj coj los yog peb siv sij hawm ntev li cas. Peb paub li no los ntawm tus Tswv zaj lus piv txwv txog cov tub zog hauv lub vaj txiv hmab, es lawv txais nqi zog zoo ib yam txawm yog lawv ua hauj lwm ntev li cas los ua hauj lwm qhov twg los yog. Lawv yuav txais nqi zog los ntawm qhov uas lawv ua hauj lwm li cas.⁸

Kuv paub ib tug txiv neej uas tsis ntev saum no nws lub sij hawm ua hauj lwm hauv lub vaj txiv hmab tiav thaum 11:00 nag hmo. Tau ntau xyoo lawv sim kho nws qhov mob cancer. Thaum lawv tseem sim kho nws tus mob, cov thawj coj hu nws ua kev sib ntsib thiab lav ris rau cov mej zeej hauv nws pawg ntseeg uas lawv cov me nyuam tsis nyob hauv tsev lawm; ib txhia yog cov poj ntsuam. Nws yuav tsum pab lawv muaj neeg nrog lawv sib tham thiab kawm txog txoj moo zoo.

Thaum cov kws kho mob qhia nws tias tshuav tsis ntev es nws yuav tas sim neej, nws tus npisov twb mus deb ua lag ua luam. Ob hnub tom qab ntawd, nws xa xov xwm rau tus npisov dhau los ntawm nws pawg pov thawj hlob tus thawj coj. Nws hais li no txog nws txoj hauj lwm: “Kuv paub tias tus npisov tsis nyob, yog li ntawd kuv yuav ua li no. Kuv xav tias peb pawg yuav muaj kev sib ntsib thaum hnub Monday. Ob tug mej zeej yuav coj peb mus xyuas lub Tsev rau Rooj Sab Laj. Peb xav tau ob peb tug mej zeej thauj lawv mus thiab ob peb tug Scout thawb cov rooj muaj log. Nyob ntawm seb leej twg sau npe, tej zaum peb yuav muaj cov neeg laus txaus ua peb tus kheej, tiam sis yuav zoo yog tias peb muaj neeg uas pab tau thiab. Tej zaum yog ib hmo zoo rau cov neeg uas pab kom coj lawv tsev neeg tuaj thiab. Li ntawd ces qhia kuv paub ua ntej kuv xa lub tswv yim no. … Ua tsaug.”

Ces nws cia li hu tuaj rau nws tus npisov. Nws tsis tau hais txog nws qhov teeb meem los yog nws txoj hauj lwm, es nws nug hais tias, “Npisov, puas muaj dab tsi kuv ua tau kom pab koj?” Tsuas yog tus Vaj Ntsuj Plig Dawb Huv xwb yuav cia nws xav txog tus npisov lub nra thaum nws muaj nws tus kheej lub nra hnyav thiab. Thiab yog tus Ntsuj Plig xwb uas qhib kev rau nws npaj ib txoj kev pab nws cov kwv tij thiab cov muam zoo npaum li nws twb npaj rau cov Scout thaum nws tseem hluas.

Thaum peb thov Vajtswv nrog kev ntseeg, Vajtswv yuav muab hwj chim los ntawm lub pov thawj hwj rau peb txawm peb raug xwm txheej dab tsi los yog. Peb yuav tsum txo hwj chim thov Nws xwb kom tus Ntsuj Plig qhia peb tias Vajtswv xav kom peb hais li cas thiab ua li cas, ces peb yuav tsum ua li ntawd thiab ua neej tsim nyog txais lub txiaj ntsim tas mus li.

Kuv ua tim khawv hais tias Vajtswv Leej Txiv muaj txoj sia nyob, hlub peb, thiab hnov peb tej lus thov. Kuv ua tim khawv tias Yexus yog tus Khetos, es Nws txoj Kev Theej Txhoj qhib kev rau peb ua neeg dawb huv thiab tsim nyog muaj tus Vaj Ntsuj Plig Dawb Huv nrog peb nyob. Kuv ua tim khawv tias yog peb ntseeg thiab rau siab, muaj ib hnub peb yuav hnov tej lus uas ua rau peb xyiv fab heev: “Tus tub qhe zoo thiab ncaj ncees, koj ua zoo lawm.”⁹ Kuv thov kom ib hnub tus Xib Hwb yuav hais li ntawd txog peb txhua tus. Los ntawm Yexus Khetos lub npe, amees.