Eresan Ahyɛ Gyedzi Dzen

President Monson, Easter anapa yi ɔyɛ hɛn enyisɔ dɛ yɛabɛtse hɛn nkɔnhyɛnyi tseasefo ne ndze. Wo nsɛm, a w’afotu dɛ “Nya enyigye wɔ akwantu no mu”¹ na “Ndaamba no hyerɛn dɛ mbrɛ wo gyedzi tse”² kã ho no som hɛn bo.

Afe yi, Primary mbofra rekyɛ enyigye na mbrɛ hɔn gyedzi a ɔwɔ Jesus Christ mu si hyerɛn ber a wɔtow ndwom “I Know That My Savior Loves Me.” Wɔtow nokwar no “Minyim dɛ Ɔtse ase!” ... Medze m’akoma ma No.”³ Tse dɛ Primary mbofra no, hɛn mu kor biara botum ahyɛ hɛn gyedzi a ɔwɔ Jesus Christ mu no dzen wɔ hɛn ankorankor akwantu mu na yeenya enyigye.

Relief Society nhyiamu bi a ɔnnkyɛree ase no, metsie enã kumabaa bi a ɔkyɛɛ ne nsakyeree akwantu ho asɛm mu bi. Onyinii wɔ Asɔr no mu a n’awofo kyerɛkyerɛɛ no asɛmpa no. Ɔkɔɔr Primary, Young Women, and seminary. Nna ɔdɔ adzesũa a ɔhwehwɛ kopue nokwar do. Nna daa n’ahwehwɛdze nye ɔpɛ dɛ ohu adze ne siantsir. Elder Russeil M. Nelson akã dɛ, “Ewuradze botum akyerɛ adwen a ɔpɛ nhwehwɛmu.”⁴Na akataasia no pɛ adzesũa.

Owie nsɔdo skuul no ɔkɔɔr esuapɔn mu, na wɔsɔɔw ɔno na asɛmpakafo a owiei n’edwuma ano temple mu, na wɔdze mba afɛɛfɛw hyira hɔn.

Ɔdze ebisabisa sunsum no, enã yi kɔɔr do bisaa nsɛm mu. Mbom ber a nsɛmbisa no reyɛ dzen no, nna nyiano no so dɛmara. —’ Na ɔtɔfabi a, nna nyiano nnyi hɔ—anaa nyiano biara a ɔdze asombwee ba. Ewiei no, ber a ɔrohwehwɛ nyiano no, nna nsɛmbisa no so reyɛ pii, ma ɔhyɛɛ ase dɛ ɔregye ne gyedzi fapem noara bi ho kyim.

Adwensɛɛ mber yi no, hɔn a wɔbɛn no bi see dɛ, “Ɔwo twer me gyedzi ara,” Na ɔdween dɛ, “Murunntum. Hom nntse ase; nnyɛ hom na nsɛm yinom rehaw hom.” Ɔkyerɛkyerɛɛ mu dɛ, “Nna mepɛ dɛ medze enyidzi ma hɔn a wonnyi ekyingye, sɛ hɔn so wobedzi me nyi a.” Na dodowara yɛe.

Ɔkaa dɛ, “Nna m’awofo nyim dza me tse na wɔammfa asɛm no annhaw me. Wɔdɔɔ me ber a nna morobɔ mbɔdzen na mankansa mahwehwɛ ama moho no.” Dɛmara, nna enã kumabaa yi ne bishop nye no taa dzi ehyia na ɔkã n’awerɛhymu a ɔwɔ wɔ no mu no(enã kumabaa) .

Wardmba so anntweɔntweɔn dɛ wɔbɛkyerɛ ɔdɔ ama no, na ɔtsee dɛ ɔka hɔnho. Nna no ward nnyɛ bea a hɔn a wodzi mu wɔ, nna ɔyɛ ntsetsee bea.

Ɔkãa dɛ, “Nna ɔyɛ egyigye mpo kwa.” Mber yi mu no, metsee me nananom a woewu dɛ ampara hɛn ntamu ntsetsewee. Nna wɔroboa me na wɔrehyɛ me nkuran dɛ monkɔ do mbɔ mbɔdzen. Nna ɔyɛ me dɛ wɔrekã dɛ, ‘Tsim wɔ dza nyim noara do.’”

Mboa ara mpo a onyae ekyir no, ɔbɛyɛɛ akɔtrɔbɔdwe. Ɔkãa dɛ, “Mammpaa moho emmfi Asɔr no ho dɛ osian suban bɔn, sunsum mu ndzɛmba mmfa moho, moronnhwehwɛ nndzi mbrasɛm no do, anaa mepɛ kwan bi a ɔyɛ mberɛw ntsi a. Metsee dɛ nna mehia mbuae ma asɛmbisa dɛ ‘Ebɛnadze na megye dzi ankasa?’”

Bɛyɛ mber yi mu na ɔkenkan Mother Teresa ne nkyerɛwee buukuu bi a, ɔakyɛ ne nkã tse wɔ asɛmbisa yi ara ho. Afe 1953 krataa mu no, Mother Teresa kyerɛɛw dɛ: “Meserɛ bɔ mpaa soronko ma me amma mannsɛɛ N’edwuma na Hɛn Ewuradze ada Noho edzi akyerɛ me—osiandɛ sum huhuuhu bi tse mo mu, tse dɛ mbrɛ biribiara ewu. Ɔayɛ dɛm yi mber a ofi ber to ber a, mehyɛɛ ‘edwuma no ase no.’ Bisa hɛn Ewuradze dɛ ɔma me akokodur.”

Archbishop Périer buaa dɛ: “Mother dɔfo, Nyankopɔn ma wo akwankyerɛ, innyi sum mu dodow dɛ mbrɛ edwen no. Anamɔnkwan a ɔsɛ dɛ efa do no nnkɛyɛ pefee mprɛmprɛn. Bɔ mpaa gye kan, mma nnsi egyinae ntsɛmntsɛm, tsie dza binom wɔwɔ kã, susu hɔn siantsir no. Ibenya biribi a ɔbɔboa wo. … Gyedzi, mpaabɔ, nye adwenpa ho siantsir yɛ wo kwankyerɛfo, ewɔ dza ɔdɔɔsõ.”⁵

Me nyɛnko no dwendwen ho dɛ sɛ Mother Teresa tumii dze ne nyamesom bɔɔ bra a onyaa nyiano nyina na ndzɛmba nyina ho nkã tse nnyɛ pefee a, ebia ɔno so botum. Obotum etu anamɔn kor ara akɔ kan wɔ gyedzi mu—na nkyii kor so. Obotum etsim wɔ nokwar no a ɔgye dzi no do na ɔama dɛm nokwar no ahyɛ n’adwen na n’akoma mu mã.

Ber a ɔdwendwen dza osii no ho no, ɔkãa dɛ, “Nna me dasegye abɛyɛ dɛ nsõ a osum hɔ. Nna ne nyina ahyew dwɛɛ. Dza nna aka ara nye Jesus Christ.” Ɔkɔɔr do dɛ, “Naaso Onngyaa wo ber a ewɔ nsɛmbisa no. Sɛ obiara bɔ mbɔdzen dɛ obesie mbrasɛm no a, woebuei abow no tɛtɛɛtɛr. Mpaabɔ na kyerɛwsɛm no nsũae bɛyɛɛ adze tsitsir.”

N’anamɔn a odzi kan a ɔsanee dze nyaa ne gyedzi nye dɛ ɔdze asɛmpa fapem nokwar no hyɛɛ ase. Ɔtɔɔ Primary adwontow buukuu na ɔhyɛɛ ase dɛ ɔrekenkan ndwom ne nkasafua no. Nna ɔyɛ akoradze ma no. Ɔbɔɔ mpaa serɛ gyedzi dze epegya no ho.

Osũaa dɛ sɛ ohyia asɛmkã bi a ɔma onya ho ekyingye a “otum gyina, hwɛ asɛm ne nyina emudzi mu bio, na ɔma asɛmpa no fa nankasa noho.” Ɔkãa dɛ, “mibisa dɛ, Anna iyi nye anamɔnkwan no a oye ma emi nye m’ebusua a?” Ɔtɔfabi a mibisa moho dɛ, “Ebɛnadze na morohwehwɛ ama me mba? Mohun dɛ mepɛ dɛ wonya temple awar. Ɔno na ɔdze gyedzi sanee baa m’akoma mu bio.”

Elder Jeffrey R. Holland akã dɛ, “Ahobrɛadze, gyedzi, na Sunsum Krɔnkrɔn ne nhyɛdo daapem no bɛyɛ] nokwar n’ahwehwɛdze biara n’adzebɔdze.”⁶

Nna ɔwɔ mu dɛ ɔwɔ nsɛmbisa wɔ mbrɛ Mormon Nwoma no sii bɔbɔ adze dze, na onntum mmpow nokwar no a ɔwɔ Mormon Nwoma mu no. Nna ɔdze n’enyiwa esi Ahyɛmu Fofor no nsũae do dɛ ɔbɛtse Agyenkwa no ase yie. “Mbom ewiei no,” ɔkãa dɛ, “Mesaan m’ekyir kɛkenkan Mormon Nwoma no bio osiandɛ nna modɔ dza nna metse ber a merekenkan Jesus Christ na No Werdambɔ ho nsɛm no.”

Owiee dɛ, “Ɔsɛ dɛ woara inya wankasa wo sunsum mu sũahu a ɔfa dɛm nwoma no no nokwar ho,” na ɔno dze orinya bi. Ɔkyerɛkyerɛɛ mu dɛ, “Mekenkan wɔ Mosiah mu no metsee nkã dɛ meenya m’akwankyerɛ no ewie, “Hom ngye Nyame ndzi, hom ngye ndzi dɛ ɔwɔ hɔ, na dɛ ɔno na ɔbɔɔ adze nyina … ; hom ngye ndzi dɛ ɔwɔ nyansa nyina, nye tum a ɔwɔ sor nye ase nyina; hom ngye ndzi dɛ nyimpa runntum nnhu adze nyina a Ewuradze nyim.’⁷”

Dɛm ber noara na onyaa ɔfrɛ dɛ ɔbɔsom dɛ Primary sankubɔnyi. Ɔkãa dɛ “Nna ɔyɛ ahotɔ, na mepɛ dɛ me mba kɔ Primary, na sesei menye hɔn bɔwɔ hɔ. Eso nna mennyɛ krado dɛ mebɛkyerɛ adze. Ber a ɔrosom no, nna ɔkɔ do tse hɔn a woetwa noho ehyia no hɔn nsato: “Bra, mbrɛ wo gyinabew tse biara yɛbɛgye wo atõ mu, yebehyia wo wɔ hɔ. Ma hɛn dza ewɔ biara a edze ma.”

Ɔrobɔ Primary ndwom no, nna ɔnoara taa dwendwen dɛ: “Ha na nokwar a modɔ no wɔ. Mubotum ada ho agye dase. Mebɛkã ndzɛmba a minyim na megye dzi ara. Ebia ɔrennyɛ me nyimdzee odzi mu a medze rema, naaso ɔbɛyɛ dza mo wɔ dze ma. Dza metsim do no tserɛw kɔ mo mu. Ɔyɛ ahomka dɛ ibetsim wɔ asɛmpa no ne fapem ndzɛmba no, na aatse ne pefeeyɛ nkã.”

Dɛm Kwesida anapa no, ber a metsie akyerɛbaa kumabaa a ɔrekyɛ n’akwantu nsɛm no, ɔkaa me dɛ hɛn pomfo no botan do na otwar dɛ hɛn nyina yɛtow hɛn fapem.⁸ Ɔsan so kaa me Elder Jeffrey R. Holland n’afotu no: “Suo dza inyim no dadaw no mu pintsinn na gyina dzen kɛpem dɛ nyimdzee bɛba abakã ho.”⁹

N’adzesua ber mu no, mobohun dzendzenndzen dɛ hɛn nokwar nsɛmbisa ne nyiano ba mber a enyiberdo no yɛhwehwɛ na sɛ yɛdze mbrasɛm no bɔ bra a. Ɔkaa me dɛ hɛn gyedzi botum aboa hɛn ma yaagye ndzɛmba edzi a adwendwen mu no nyansa biara nnyi mu mma hɛn mber no.

O, na mbrɛ mesi pɛ dɛ meyɛ tse dɛ hɔn a wotwaa hyia enã kumabaa yi, wɔdɔ no na wɔboa no. Dɛ mbrɛ President Dieter F. Uchtdorf kãe no: Hɛn nyina yɛyɛ ahohɔ a yɛrohwehwɛ Nyame ne kan ber a yɛwɔ osũanyiyɛ akwantu mu yi. Yemmbu binom fɔ wɔ kan dodow a wɔwɔ anaa wonnyi ho; mbom yɛnyɛn hɔn na yɛhyɛ hɔn nkuran kɛpem dɛ kan biara bɛhyerɛn pefee, hyɛnhyɛn, na nokwar mu.”¹⁰

Sɛ Primary mbofra tow “Abofra ne Mpaabɔ,” wobisa dɛ: “Ɔsor Egya, ana ewɔ hɔ ampa a? Na itse na iyi abofra biara ne mpaabɔ ano a?”¹¹

Hɛn so yɛbosusu dɛ, “Ana Ɔsor Egya wɔ hɔ ampa a?” dɛ yebedzi ehurusi—dɛmara dɛ me nyɛnko no yɛe—sɛ nyiano no nam dzinn, awerɛhyɛmu tsiabaa do a. Megye dase dɛ awerɛhyɛmu tsiabaa no ba ber a Ne pɛ bɛyɛ hɛn dze no. Megye dase dɛ nokwar no wɔ asaase do ndɛ na N’asɛmpa no wohu no wɔ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo mu. Jesus Christ ne dzin mu, amen.