Rov Qab Los Muaj Kev Ntseeg

Hnub Easter no, Thawj Tswj Hwm Monson, peb zoo siab tau hnov peb tus yaj saub uas muaj sia nyob lub suab. Peb saib koj tej lus rau nqi, los mus rau koj tej lus qhia tias: “Nrhiav kev zoo siab hauv yus lub neej”¹ thiab “Yav tom ntej yeej ci npaum li nej txoj kev ntseeg.”²

Xyoo no cov me nyuam hauv lub Koom Haum Me Nyuam Yaus xyaum qhia lawv tej kev zoo siab thiab seb lawv tej kev ntseeg Yexus Khetos ci npaum li cas thaum lawv hu zaj nkauj “Kuv Paub Kuv tus Cawm Seej Hlub Kuv.” Lawv hu qhov tseeb: “Nws muaj txoj sia! ... Kuv yuav tso siab rau Nws.”³ Peb sawv daws txhua tus yeej ua kom peb txoj kev ntseeg Yexus Khetos muaj zog thaum peb ua neej nyob thiab nrhiav kev zoo siab.

Tsis ntev tas los no hauv ib pawg Koom Haum Niam Tsev, kuv mloog ib tug leej niam uas tseem hluas piav txog nws txoj kev pauv siab los ntseeg. Nws yeej loj hlob hauv ib tsev neeg uas muaj niam thiab txiv uas qhia nws txog txoj moo zoo. Nws yeej tau mus hauv Koom Haum Me Nyuam Yaus, Koom Haum Ntxhais Hluas, thiab kev kawm vaj lug kub seminary. Nws tau kawm thiab nrhiav tej kev tseeb. Nws yeej ib txwm xav paub seb yog vim li cas. Txwj Laug Russell M. Nelson tau hais tias, “Tus Tswv tsuas qhia tau tus uas xav kawm.”⁴ Thiab tus poj niam hluas no yeej xav kawm.

Tom qab kawm ntawv high school tag nws mus kawm ntawv qib siab, mus ua kev sib khi hauv lub tuam tsev rau ib tug uas mus ua tub txib lawm, thiab yug tau ib co me nyuam zoo nkauj zoo nraug kawg li.

Vim hais tias nws yeej xav paub, ces tus niam tsev no rau siab nug. Tiam sis thaum cov lus nug pib nyuaj zuj zus ces lus teb kuj nyuaj zuj zus thiab. Thiab tej thaum ho tsis muaj lus teb li—los sis tsis tau lo lus teb uas muaj thaj yeeb nyab xeeb. Nyob nyob ces, nws pheej xav paub thiab nug ntxiv, ces haj yam muaj lus nug ntxiv xwb thiab nws pib nug txog tej kev tseeb uas nws twb paub lawm.

Thaum muaj tej lus noog no, ib txhia uas nyob puag ncig nws hais tias, “Cia li siv kuv tej kev ntseeg xwb mas.” Tiam sis nws xav hais tias, “Kuv ua tsis tau. Koj tsis to taub; koj tsis muaj tej lus nug txog tej teeb meem no.” Nws piav tias, “Kuv zoo siab hlo ua siab zoo rau cov uas muaj kev nug, es xav kom lawv ua siab zoo rau kuv.” Thiab ntau tus kuj ua li ntawd.

Nws hais tias, “Kuv niam kuv txiv paub kuv lub siab thiab ua siab ntev rau kuv. Nkawd txiav txim los hlub kuv thaum kuv sim kawm kom paub rau kuv tus kheej.” Tus niam tsev no tus npisov ib sij ntsib nws ib zaug thiab hais rau nws hais tias tus npisov yeej tso siab rau nws.

Cov mej zeej hauv nws pawg ntseeg yeej hlub nws, thiab ntaus kev phooj ywg nrog nws. Nws pawg ntseeg tsis yog ib qho chaw uas nws yuav tsum zais seb nws yog leej twg tiag tiag; yog ib qho chaw uas hlub nws.

Nws nco qab tias “Lub sij hawm no, ua rau kuv hnov kuv cov poj koob yawm txwv uas tau tuag lawm. Zoo li lawv xav pab thiab xav kom kuv rau rau siab ua. Zoo nkaus li lawv hais tias, ‘Ua tej yam uas koj paub tseeb lawm.’”

Tiam sis txawm nws tau kev txhawb nqa los, nws cia li tsum tsis tshua muaj siab ntseeg lawm. Nws hais tias, “Kuv tsis tso lub Koom Txoos tseg vim kuv tsis hnov tus ntsuj plig los sis tsis xav ua raws li cov lus txib, los sis xav ua qhov yooj yim xwb. Zoo li kuv xav tau lus teb rau lo lus noog uas hais tias ‘Seb kuv ntseeg dab tsi tiag?’”

Lub sij hawm no nws nyeem ib phau ntawv uas Mother Teresa tau sau txog nws tej lus xav uas yog ib yam li no thiab. Xyoo 1953, Mother Teresa sau ib tsab ntawv tias: “Thov Vajtswv rau kuv kom kuv tsis txhob ua kom Leej Txiv txoj hauj lwm puas tsuaj mus thiab kom peb tus Tswv tshwm rau kuv pom—vim ntawd no kuv muaj kev tsaus ntuj nti thiab zoo li txhua yam tsis muaj txoj sia nyob lawm. Yeej zoo li no txij li ntawm kuv pib ‘txoj hauj lwm no.’ Thov kom Peb tus Tswv pab muab siab loj rau kuv.”

Tus Archbishop Périer teb hais tias: “Vajtswv yeej coj koj kev, me Leej Niam; koj tsis nyob hauv qhov tsaus ntuj nti npaum li koj xav. Txoj kev uas yus taug yeej yuav pom tsis tseeb txhua lub sij hawm. Thov kom muaj lub teeb ci kom pom kev, tsis txhob txiav txim siab sai sai, hloov seb lwm tus hais li cas, xav txog lawv tej lus. Koj yeej yuav nrhiav tau ib yam uas yuav pab tau koj. … Koj txoj kev ntseeg, kev thov Vajtswv thiab tej yam zoo uas koj xav paub tej zaum koj twb paub lawm.”⁵

Ces kuv tus phooj ywg xav tias yog Mother Teresa ua tau raws li nws txoj kev ntseeg txawm tias nws tsis paub txhua yam tseeb tseeb, ces tej zaum nws ua tau thiab. Nws cia li chais ruam ib taw zuj zus ntawm nws txoj kev ntseeg. Cia li xav txog tej yam tseeb uas nws paub thiab ntseeg thiab cia tej kev tseeb ntawd loj hlob hauv nws siab thiab paj hlwb.

Thaum nws xav rov qab txog lub sij hawm ntawd, nws hais tias, “Kuv txoj lus tim khawv cia li zoo li ib pawg plua tshauv. Nws kub hnyiab tag lawm. Tsuas tshuav Yexus Khetos xwb.” Nws piav ntxiv tias, “Tiam sis Nws tsis tso yus tseg thaum yus muaj lus nug. Thaum ib tug neeg sim ua raws li cov lus txib, ces lub qhov rooj qhib plho. Txoj kev thov Vajtswv thiab kev kawm vaj lug kub tseem ceeb heev.”

Thawj ruam taw uas nws chais rau nws txoj kev ntseeg yog tej kev uas tseeb ntawm txoj moo zoo. Nws yuav tau ib phau nkauj rau lub Koom Haum Me Nyuam Yaus thiab pib nyeem cov lus hauv cov nkauj. Tej no muaj nqi heev rau nws. Nws thov Vajtswv kom tej kev ntseeg yuav pab nqa nws tej nra.

Nws kawm paub tias thaum muaj ib kab lus uas ua rau nws poob siab ces, nws “yuav nres, saib tag nrho tej xov xwm, thiab muab txoj moo zoo piv rau nws tus kheej.” Nws hais tias, “Kuv yuav nug seb, ‘Nov puas yog txoj kev yog rau kuv thiab kuv tsev neeg?’ Tej thaum kuv yuav nug kuv tus kheej, ‘Kuv xav tau dab tsi rau kuv cov me nyuam?’ Kuv txawm paub tias kuv xav kom lawv sib yuav hauv lub tuam tsev. Thaum ntawd kuv thiaj rov qab muaj kev ntseeg hauv kuv lub siab.”

Txwj Laug Jeffrey R. Holland tau hais tias, “Kev txo hwj chim, kev ntseeg, thiab tus Vaj Ntsuj Plig Dawb Huv tej kev tshoov siab yeej [yuav] yog tej yam ntawm txhua txoj kev nrhiav kom tau qhov tseeb.”⁶

Txawm nws muaj lus nug seb ua li cas thiaj tau Phau Ntawv Maumoos, nws yeej paub hais tias tej kev tseeb hauv Phau Ntawv Maumoos muaj tseeb. Nws rau siab ntso kawm Phau Tshiab kom nws yuav to taub ntxiv txog tus Cawm Seej. Thaum kawg nws hais tias, “Kuv rov qab los kawm hauv Phau Ntawv Maumoos vim kuv nyiam nyeem txog Yexus Khetos thiab Nws txoj Kev Theej Txhoj.”

Nws xaus nws cov lus tias, “Yus yuav tsum kawm rau yus tus kheej hais tias tej yam hauv phau ntawv no muaj tseeb,” es nws tab tom ua li ntawd. Nws piav tias, “Kuv nyeem hauv Mauxiyas thiab tau kev coj hais tias: ‘Cia li ntseeg Vajtswv; ntseeg tias muaj nws, thiab tias nws tsim tag nrho ib puas yam tsav … ; ntseeg tias nws muaj tej kev txawj ntse tag nrho huv tib si, thiab muaj tag nrho tej hwj chim, tag nrho saum ntuj ceeb tsheej thiab hauv ntiaj teb; ntseeg tias tib neeg yeej tsis to taub tag nrho ib puas yam tsav uas tus Tswv muaj peev xwm to taub.’⁷”

Lub sij hawm no nws raug hu los ua tus ntaus nkauj hauv lub Koom Haum Me Nyuam Yaus. Nws tias, “Yog ib txoj hauj lwm uas puaj phais. Kuv xav kom kuv cov me nyuam yuav nyob hauv lub Koom Haum Me Nyuam Yaus, thiab nim no kuv yuav nrog lawv nyob. Thiab kuv tseem tsis tau npaj siab los qhia neeg.” Thaum nws ua hauj lwm, nws hnov lwm tus uas nyob ntawm nws ib ncig hais tias: “Los, peb xav tau koj txawm koj nyob qhov twg, es peb mam li ntsib koj ntawd. Yam twg uas koj muab cia li muab rau peb.”

Thaum nws ntaus cov nkauj hauv lub Koom Haum Me Nyuam Yaus, nws xav rau nws tus kheej tias: “Nov yog tej kev tseeb uas kuv nyiam. Kuv tseem hais tau ib zaj lus tim khawv. Kuv mam li hais txog tej yam uas kuv paub thiab tso siab rau. Txawm hais tias tsis yog qhov kev paub zoo tag nrho los, yog qhov uas kuv muab pub tam sim no. Yam uas kuv xav txog yeej loj hlob tuaj hauv kuv lub siab. Qhov uas kuv rov qab kawm txog lub hauv paus rau txoj moo zoo yog ib qho zoo uas pab kuv pom kev meej.”

Hnub Caiv yav sawv ntxov ntawd, thaum kuv mloog tus viv ncaus no qhia nws zaj dab neeg, kuv nco qab hais tias peb ”yuav tsum txhim tsa peb lub hauv paus rau ntawm peb tus Txhiv Dim”.⁸ Kuv kuj nco qab txog Txwj Laug Jeffrey R. Holland cov lus ntuas uas hais tias: “Cia li tuav nkaus tej yam uas nej paub lawm thiab nyob ruaj khov kho mus txog thaum nej paub ntxiv.”⁹

Hauv nws zaj lus qhia, kuv paub tseeb hais tias peb yuav tau tej lus teb rau peb cov lus noog thaum peb rau siab nrhiav thiab thaum peb ua raws li cov lus txib. Kuv kawm tau hais tias peb txoj kev ntseeg yeej loj dua peb qhov peb xav tam sim no.

Kuv yeej xav ua neeg zoo li cov neeg uas nyob ib ncig tus niam tsev hluas no, cov uas hlub thiab txhawb pab nws. Xws li Thawj Tswj Hwm Dieter F. Uchtdorf hais: “Peb txhua tus nrhiav Vajtswv txoj kev kaj thaum peb taug kev ua Nws cov thwj tim. Peb tsis rau txim rau lwm tus vim lawv tsis muaj qhov kaj ntau; tiam sis, peb tu qhov kaj kom mus txog thaum qhov kaj ci ntsa iab, meej thiab tseeb.”¹⁰

Thaum cov me nyuam hauv lub Koom Haum Me Nyuam Yaus hu zaj “Ib tug Me Nyuam Zaj Lus Thov,” lawv nug hais tias: “Leej Txiv Saum Ntuj Ceeb Tsheej, koj puas nyob ntawd tiag? Thiab koj puas hnov thiab teb txhua tus me nyuam zaj lus thov Vajtswv?”¹¹

Peb los kuj xav paub seb, “Leej Txiv Saum Ntuj Ceeb Tsheej puas nyob ntawd tiag?” es yuav tau kev zoo siab—ib yam li kuv tus phooj ywg no—thaum peb tau tej lus teb uas ntsiag to thiab qhia qhov tseeb. Kuv ua tim khawv tias tej kev tseeb los rau peb thaum peb pauv peb lub siab los ua zoo li Nws lub siab. Kuv hais lus tim khawv tias niaj hnub no qhov tseeb nyob hauv ntiaj teb no thiab yus nrhiav pom Nws txoj moo zoo hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Los ntawm Yexus Khetos lub npe, amees.