2010–2019
Ro̧o̧ltok n̄an Tōmak eo
Eprōļ 2015


Ro̧o̧ltok n̄an Tōmak eo

Kōjwōj aolep maron̄ kōkajoorļo̧k tōmak eo ad ilo Jisōs Kraist ilo ito itak in ad kajjojo im maron̄ lo m̧ōņōņō.

Ilo jibbon̄ in Ijtō in, Būreejtōn Monson, kōm̧ij m̧ōņōņō in ron̄jake ainikien rikanaan eo am emour. Kōm̧ij kaorōk naan ko am̧, ekoba kapilōk ko am̧: “Pukōt lan̄lōn̄ ilo iaļ in ito itak in” 1 im “Ilju im jekļaj ej em̧m̧an āinwōt ami tōmak.”2

Iiō in ajri in Būraimere ro rej kwaļo̧k lan̄lōn̄ eo im em̧m̧an eo an tōmak eo aer ilo Jisōs Kraist n̄e rej al al eo “I Know That My Savior Loves Me.” Rej al kōn m̧ool eo: “Ijeļā Ej mour! … Būruwō ij leļo̧k n̄an E.”3Āinwōt ajri in Būraimere ro, kōj aolep maron̄ kōkajoorļo̧k tōmak eo ad ilo Jisōs Kraist ilo iaļ in ito itak eo ad make im maron̄ pukōt m̧ōņōņō.

Ilo juon kweilo̧k an Doulul eo an Kōrā, ikar ron̄jake juon jiron̄ ej kwaļo̧k jidik in wāween an kar oktak. Ekar dik im rūttoļo̧k ilo Kabun̄ in ippān jinen im jemān ro rekar katakin e gospel eo. Ekar pād ilo Būraimere, Doulul eo an Jiron̄ ro, im jemenere. Em̧m̧an ippān ekkatak im pukōt m̧ool ko. Ekkatak in an ekar n̄an jeļā etke. Elder Russell M. Nelson ekar ba, “Irooj emaron̄ wōt katakin juon ļōmņak ekōņaan jeļā.”4 Im jiron̄ in ekar penawiie.

Ālkin high jikuuļ ekar etal n̄an juon iunibōjiti, kar liāp ilo tampeļ eo ippān juon eo ekar mijenede, im kar jeram̧m̧an kōn ajri ro reaiboojoj.

Kōn jetōb in etale in, m̧am̧a in ekar wōnm̧aanļo̧k im kajjitōk kajjitōk ko. Ak ilo an kajjitōk ko penļo̧k, barāinwōt uwaak ko. Jet iien ekar ejjeļo̧k uwaak—ak ejjeļo̧k uwaak ko rekar bōktok aenōm̧m̧an. Kōn menin ekar pukōt mejļan n̄an loe uwaak ko, elōn̄ im lōn̄ļo̧k kajjitōk ko rekar jerjer im ekar jino kajjitōkin jet iaan pedped in tōmak eo an.

Iien in ej iien eo ekapokpok, jet iaan ro ipeļaakin rekar ba, “Baj dāpdep wōt ilo tōmak eo aō,” ak ekar ba, “Ijjab maron̄. Kwoj jab meļeļe; kwoj jab jelm̧ae un kein.” Ekar kōmeļeļeiki, “Ikar m̧ōņōņō in leļo̧k kōņaan eo aō n̄an ro ejjeļo̧k pere ippāer, eļan̄n̄e renaaj letok kōņaan ko aer n̄an n̄a.” Im elōn̄ rekar.

Ekar ba, “Jinō im jema rejeļā būruwō im rekar ņa jikū ippeer. Rekar kālet bwe ren iakwe eō ijjelo̧kin ikar aikuj kajjieon̄ pukōte n̄an n̄a make.” Āinļo̧k wōt, bisop eo an m̧am̧a in edik ekkā an ioon e im kwaļo̧k an lōke ilo e.

Ward membōr ro rekar barāinwōt jab āliklik in kwaļo̧k aer iakwe, im ekar en̄jake ke ejjab make iaan. Ward eo an ekar jab juon jikin eo me armej ro rej kajjieon̄ kwaļo̧k aer wāppen, ekar juon jikin ekkatak.

“Ekar kam̧ōņōņō,” ej keememej. “Ilo iien in, ikar en̄jake juon jem̧jerā ekajoor n̄an ro jibū im jim̧aaō ro rekar mej. Rekar kate er kōn n̄a im rōjan̄ eō bwe in wōnm̧aanļo̧k im kajjieon̄. Ikar en̄jake ta eo rekar ba, ‘Leļo̧k wōt am̧ n̄an ta eo kwojeļā.’”

Men̄e etar jān jon̄an an ļap jipan̄ ko kar leļo̧k n̄ane, ekar jino jāniknik. Ekar ba, “Ijjab kōjeno̧lo̧k n̄a make jān Kabun̄ in kōnke enana m̧wiliō, jab kea kōn men ko an jetōb, kappok jekpen bwe in jab mour kōn kien ko, ak pukōt juon wāween aō diwōjļo̧k jān Kabun̄ in. Ikar en̄jake bwe ij aikuji uwaak ko n̄an kajjitōk eo ‘Ta eo Ij lukkuun tōmake?’”

Ilo iien in ekar riiti juon bok jeje jān Mother Teresa, eo ekar kwaļo̧k ejja en̄jake kein wōt. Ilo juon leta ilo 1953, Mother Teresa ekar je: “Jouj jar eļaptata kōn n̄a bwe in maron̄ jab kakkure jerbal in An im Ad Irooj en maron̄ kwaļo̧k E Make—bwe ewōr maroklep enana ilo n̄a, āinwōt n̄e men otemjej rekar mej. Ekar āinwōt āindein jān jinoin ke ikar ijjino ‘jerbal in.’ Kajjitōk ippān Ad Irooj bwe en letok n̄an n̄a peran.”

Archbishop Périer ekar uwaak: “Anij en tōl eok, Jinō jitōn bōro; ejjab ļap am̧ pād ilo marok āinwōt am̧ ļōmņak. Iaļ eo n̄an ļo̧o̧re aolep iien emaron̄ jab alikkar ilo juon wōt iien. Jar kōn meram; jab m̧ōkaj am̧ kālet, ron̄jake ta eo ro jet rej ba, ļōmņak kōn meļeļe ko aer. Kwonaaj aolep iien lo juon men n̄an jipan̄ eok. … Tōl jān tōmak jān jar im jān un eo ewōr juon kōņaan ejim̧we im ebwe ippam̧.”5

Eo mōtta ekar ļōmņak n̄e Mother Teresa ekar mour kōn kabun̄ eo an ilo an ejjeļo̧k uwaak ko im ejjeļo̧k juon en̄jake ej alikkar ilo men otemjej, bōlen emaron̄ kar barāinwōt. Ekar maron̄ bōk juon bun̄tōn m̧aanļo̧k ilo tōmak—im bar juon. Ekar maron̄ pedped wōt ilo m̧ool ko ekar tōmaki im kōm̧m̧an bwe m̧ool kein ren kobrak an ļōmņak im būruwōn.

Ke ej keememeji tok, ekar ba, “Naan in kam̧ool eo aō ekar erom juon ejojūk eobrak kōn melkwaraar. Rekar aolep bwil. Men eo wōt ekar pād wōt ekar Jisōs Kraist.” Ekar wōnm̧aanļo̧k wōt, “Ak E kar etal jān eok ke ekar lōn̄ am̧ kajjitōk. N̄e jabdewōt rej kajjieon̄ kōjparok kien ko, kōjem̧ eo elukkuun peļļo̧k. Jar im ekkatak jeje ko rekwojarjar rej erom lukkuun aorōk.”

Bun̄tōn eo an kein kajuon n̄an bar kalōk tōmak eo an ekar jino m̧ool ko an gospel eo. Ekar bōktok juon bok in Būraimere im jino riiti naan ko an al ko. Rekar men ko raorōk n̄an e. Ekar jar kōn tōmak n̄an ļōn̄aj men eo eddo ej en̄jake.

Ekar katak bwe n̄e enaaj jelm̧ae juon ennaan ej kōm̧m̧an an pere, emaron̄ “bōjrak, kalimjōke aolepān pija eo, im kejōkļo̧kjeņ kōn wāween an gospel eo jelet mour eo an.” Ekar ba, “Inaaj kajjitōk, ‘Ej ke iaļ eo in ejim̧we n̄an n̄a im baam̧le eo aō?’ Jet iien inaaj kajjitōkin eō make, ‘Ta eo ikōņaan n̄an ajri ro nejū?’ Ikar kile bwe ikōņaan bwe ren m̧are ilo tampeļ. En̄in ekar iien eo tōmak eo ekar bar ro̧o̧ltok n̄an būruwō.”

Eļtōr Jeffrey R. Holland ekar ba, “Ettā bōro, tōmak, im kareel eo an Jetōb Kwojarjar [renaaj] aolep iien erom m̧ōttan ko an aolep kajjitōk kōn m̧ool eo.”6

Men̄e ekar wōr an kajjitōk ko kōn wāween an Bok in Mormon kar waļo̧k, ekar jab kariab m̧ool ko ekar jeļā ilo Bok in Mormon. Ekar leļo̧k an ilo ekkatak Kallim̧ur Ekāāl n̄an an meļeļeļo̧k kōn Rilo̧mo̧o̧r eo. “Ak tokālik,” ekar ba, “Ikar loe eō make ilo Bok in Mormon kōnke ikar iakwe ta eo ikar en̄jake n̄e ij riit kōn Jisōs Kraist im Pinmuur eo An.”

Ekar kōjem̧ļo̧ke, “Ej aikuj wōr am̧ make en̄jake ko ilo jetōb kōn m̧ool ko ilo bok in,” im ekar wōr ippān en̄jake kein. Ekar kōmeļeļeik, “Ikar riit ilo Mosaia im kar lukkuun en̄jake:  ; ‘Tōmak Anij, tōmak bwe E emour, im bwe Eaar kōm̧anm̧an men otemjej … ; kom̧in leke bwe Ippān epād jeļā otemjelo̧k, im kajoor otemjelo̧k, jim̧or ilo lan̄ im ilo laļ; kom̧win leke bwe armej ej jab jeļā aolep men ko Irooj E jeļā.’7

Ilo iien in juon kūr ekar itok n̄an jerbal āinwōt juon riokwōn an Būraimere. “Ekar koņ,” ekar ba. “Ikar kōņaan bwe ajri ro nejū ren pād ilo Būraimere, im kiiō imaron̄ pād ippāer. Im ikar jab pojak n̄an katakin.” Ke ekar jerbal, ekar wōnm̧aanļo̧k wōt im en̄jake jān ro ipeļaakin: “Itok, kōm̧ naaj bōk eok jekdo̧o̧n kajoor in jetōb eo ippam̧, im kōm̧ naaj jerbal ippam̧. Letok jabdewōt men komaron̄ in letok.”

Kōjan̄jan̄ al in Būraimere, ekkā an ļōmņake ippān make: “Er kein rej m̧ool ko em̧m̧an ippa. Imaron̄ in kwaļo̧k aō naan in kam̧ool. Inaaj ba men ko ijeļā im lōki. Emaron̄ jab juon kajjitōk ewāppen an jeļāļo̧kjeņ, ak enaaj kajjitōk eo aō. Ikar bōk juon naan in kam̧ool ekajoorļo̧k jān men ko ij kam̧ool kaki. Elukkuun aiboojoj n̄an bar ro̧o̧ltok n̄an wāween ko an gospel eo im lukkuun en̄jake.”

Ilo jibbon̄ in Jabōt eo, ke ij ron̄jake an leddik in jeid im jatid kwaļo̧k bwebwenato in wāween an kar oktak, ekar kakeememej eō bwe ej ioon ejm̧aan in ad Ri Pinmuur, eo jej aikuj kalek pedped ko ad.8 Ikar barāinwōt keememej kapilōk eo an Eļtōr Jeffrey R. Holland: “Dāpdep wōt n̄an ta eo em̧ōj am̧ jeļā kadede im jutak pen m̧ae iien jeļāļo̧kjeņ ko jet rej itok.”9

Ilo katak eo an, ikar jino jeļā eļapļo̧k bwe uwaak ko n̄an kajjitōk ko ad rem̧ool rej itok n̄e jej m̧ool in pukōti im n̄e jej mour kōn kien ko. Ikar keememej bwe tōmak eo ad emaron̄ jipan̄ kōj tōmak men ko jejjab lukkuun meļeļe kaki ilo iien eo.

Im, o, ewi jon̄an aō kōņaan āinwōt ro rej jebooļ m̧am̧a in edik, ro rej iakwe im rie e. Āinwōt an Būreejtōn Dieter F. Uchtdorf kar ba: “Jej aolep ripukot meram an Anij ilo ad etal ilo iaļ in ad ļo̧k āinwōt rikaļooraņ. Jejjab kakkure ro jet kōn jon̄an meram eo ippāer ak emaron̄ in ejjeļo̧k; ijoke, jej kōkaajriri im rōjan̄ aolep meram m̧ae ealikkar aer meram, rom̧aak, im m̧ool.”10

N̄e ajri in Būraimere ro rej al “A Child’s Prayer,” rej kajjitōk: “Jemedwōj Ilan̄, kwōj ke lukkuun pād ijeņe? Im kwoj ke ron̄jake im uwaake aolep jar an aolep ajri?”11

Kōj barāinwōt maron̄ kōļmenļo̧kjeņ, “Jemedwōj Ilan̄ ej ke lukkuun pād ijeņ?” n̄an wōt lan̄lōn̄—āinwōt ro m̧ōtta—n̄e uwaak ko rej itok ilo kam̧ool ko rej unoojdikdik, meļak. Ij kam̧ool bwe kam̧ool kein remeļak rej itok āinwōt an Ankilaan naaj erom ad. Ij kam̧ool bwe m̧ool eo ej pād ioon laļ in rainin im gospel eo An ej waļo̧k ilo Kabun̄ eo an Jisōs Kraist im Armej ro Rekwojarjar ilo Raan-ko Āliktata, amen.

Kakeememej ko

  1. Thomas S. Monson, “Finding Joy in the Journey,” Ensign ak Liahona, Nov. 2008, 85.

  2. Thomas S. Monson, “Be of Good Cheer,” Ensign or Liahona, May 2009, 92.

  3. “I Know That My Savior Loves Me,” in I Know My Savior Lives: 2015 Outline for Sharing Time (2014), 29.

  4. Russell M. Nelson, in M. Russell Ballard, “What Came from Kirtland” (Brigham Young University fireside, Nov. 6, 1994); speeches.byu.edu.

  5. Ilo Mother Teresa: Come Be My Light; The Private Writings of the Saint of Calcutta, ed. Brian Kolodiejchuk (2007), 149–50; punctuation standardized.

  6. Jeffrey R. Holland, “Be Not Afraid, Only Believe” (evening with Elder Jeffrey R. Holland, Feb. 6, 2015); lds.org/broadcasts.

  7. Mosaia 4:9.

  8. Lale Hilamōn 5:12.

  9. Jeffrey R. Holland, “Lord, I Believe,” Ensign ak Liahona, May 2013, 94.

  10. Dieter F. Uchtdorf, “Bōk juon Naan in Kam̧ool kōn Meram im M̧ool,” Ensign ak Liahona, Nov. 2014, 22.

  11. “A Child’s Prayer,” Children’s Songbook, 12.