2010–2019
Nrhiav tus Tswv
April 2015


Nrhiav tus Tswv

Thaum peb haj yam to taub tus Cawm Seej, peb haj yam xav ua neej xyiv fab thiab paub tseeb tias peb txais tau kev xyiv fab ntawd.

Kuv cov kwv tij thiab cov muam, kuv muaj kev xyiv fab sawv ntawm nej thaum peb koom ua ke hauv lub tuam rooj sab laj no. Qhov uas Muam Teixeira, wb tsev neeg, thiab kuv mloog tej lus ntuas, qhuab qhia, nplij siab, thiab lus ceeb toom nyob hauv lub tuam rooj sab laj tau ntau xyoo no yog ib qho koob hmoov uas muaj nqi heev.

Nyob hauv lub caij tshwj xeeb no, uas yog Hnub Caiv Easter, kuv xav txog qhov uas tus Cawm Seej tej lus qhia thiab Nws tus yam ntxwv ua neeg siab zoo tseem ceeb npaum li cas hauv kuv lub neej.

Peb yim to taub txog Yexus Khetos ces peb yim cia siab rau yav tom ntej, thiab txawm peb tsis yog neeg zoo tag nrho los, peb yuav ntseeg tias peb ua tau raws li peb tej hom phiaj ncaj ncees. Qhov no kuj yuav ua rau peb xav pab peb cov neeg zej zog.

Tus Tswv hais kom peb nrhiav nws nrog txhua txoj kev xav; tsis txhob xyem xyav, tsis txhob ntshai.1 Kev nrhiav tus Tswv thiab kev paub tias Nws nyob yog ib qho tsim nyog ua txhua hnub.

Cov kwv tij thiab cov muam, niaj hnub nim no peb muaj tej kev pab thiab tej cib fim zoo tshaj plaws kom to taub Yexus Khetos tej lus qhia thiab Nws txoj Kev Theej Txhoj. Yog peb siv tej kev pab no yam li tsim nyog ces tej no yuav pab peb ua neej vam meej uas muaj kev xyiv fab puv npo.

Thaum tus Cawm Seej hais lus piv txwv txog txoj hmab thiab tej ceg hmab, Nws hais tias, “Nej cia li txuas rau ntawm kuv thiab kuv yuav txuas rau ntawm nej. Tus ceg hmab uas tsis txuas rau ntawm txoj hmab yeej txi tsis taus txiv. Ib yam li ntawd, yog nej tsis txuas rau ntawm kuv, nej yeej txi tsis taus txiv.”2

Thaum peb to taub Yexus Khetos lub luag hauj lwm zoo kawg nkaus hauv peb lub neej, ces peb to taub vim li cas peb nyob hauv lub ntiaj teb no, uas yog kom peb muaj kev xyiv fab. Tiam sis kev xyiv fab ntawd tsis tiv thaiv peb kom tsis txhob raug tej kev sim siab thiab kev txom nyem, muaj tej yam kev txom nyem uas tej lub sib hawm loj heev uas ua rau peb xav tias peb muaj tsis taus kev zoo siab thaum peb raug tej ntawd.

Kuv paub ntawm kuv tus kheej hais tias peb muaj tau kev xyiv fab uas los ntawm kev ua neeg ncaj ncees thiab kev muab siab npuab Yexus Khetos txawm peb raug teeb meem nyob hauv lub ntiaj teb no los. Thaum kawg, tej teeb meem no yuav pab peb thiab coj peb kom to taub vim li cas peb nyob no thiab vim li cas muaj Yexus Khetos txoj Kev Theej Txhoj. Muaj tseeb tiag, peb yuav muaj kev xyiv fab dhau los ntawm Yexus Khetos xwb.3

Nws hais tias, “Kuv yog tsob hmab, nej yog cov ceg. Tus uas txuas rau ntawm kuv, thiab kuv txuas rau ntawm nws, tus ntawd yuav txi txiv ncw; yog nej tsis txuas rau ntawm kuv, nej yeej ua tsis tau ib yam dab tsi li.”4

Kuv ntseeg hais tias thaum peb haj yam to taub tus Cawm Seej, peb haj yam xav ua neej xyiv fab thiab paub tseeb tias peb txais tau kev xyiv fab ntawd. Yog li ntawd, peb yuav muaj peev xwm mus ub mus no txhua hnub thiab muaj siab xav ua neej nyob thiab muaj siab xav ua raws li Vajtswv tej lus txib, txawm nyuaj npaum li cas los.

Tsis txhob ncua tej yam kom ua tag kis yog peb ua tau tej ntawd hnub no. Peb yuav tsum los cuag Khetos tam sim no vim yog peb ntseeg Nws, peb yuav ua hauj lwm hnub no.5

Txhua hnub peb yuav tsum xav seb peb yuav ua li cas kom ua raws li Yexus Khetos tej lus qhia. Tej yam me me uas peb ua niaj hnub yuav:

  1. Pab peb to taub tias tus Tswv tseem ceeb npaum li cas nyob hauv peb lub neej, thiab

  2. Pab qhia qhov no rau tej tiam neeg uas tab tom loj hlob tuaj, cov no yuav paub txog Leej Txiv Saum Ntuj Ceeb Tsheej thiab Nws Leej Tub, Yexus Khetos, txoj kev hlub, thaum lawv pom peb coj yam ntxwv ua raws li txoj moo zoo.

Yog li ntawd niaj hnub nim no peb yuav ua li cas kom nplij peb sab ntsuj plig thiab txhawb nqa peb zaj lus tim khawv txog Yexus Khetos thiab Nws txoj hauj lwm?

Daim Duab
Woman on a train with a cell phone illuminating her face.

Nyob hauv xyoo 2014, phau xov xwm National Geographic muaj kev sib tw seb daim duab twg zoo tshaj es lawv txais 9,200 daim duab los ntawm cov kws thaij duab thiab cov uas nyiam thaij duab nyob hauv 150 tawm lub teb chaws.  Daim duab uas yeej kev sib tw ntawd muaj ib tug poj niam zaum hauv ib lub tsheb nqaj hlau uas muaj neeg coob caij. Qhov kaj ntawm nws lub xov tooj ntawm tes ci rau nws lub ntsej muag. Tus poj niam qhia meej rau cov neeg caij tsheb nqaj hlau ntawd hais tias: txawm nws lub cev nqaij daim tawv nyob ntawd los, nws tsis nyob tiag tiag.6

Cov xov xwm ntawm xov tooj ntawm tes, thiab kev sib tham hauv Internet tau hloov peb lub neej hauv lub ntiaj teb no thiab peb txoj kev sib txuas lus nrog lwm tus.

Nyob hauv lub caij nyoog no, yeej yooj yim rau peb mus rau tej qhov chaw thiab ua tej yam ntxim siab ntxim ua uas tshem peb tawm ntawm tej yam tseem ceeb uas yuav ua rau peb muaj kev xyiv fab tas peb sim neej no.

Yog tias peb tsis saib xyuas zoo, peb lub neej uas sib txuas rau txhua yam no, yuav ua rau peb saib cov neeg uas peb tsis paub rau nqi tshaj cov neeg uas nrog peb nyob—kuj hais txog peb tsev neeg!

Txawm li ntawd los, peb sawv daws paub tias muaj tej kev pab nyob hauv Internet zoo, tsis hais tej uas lub Koom Txoos tau tsim xws li cov ntawv thiab cov lus hais ntawm cov vaj lug kub thiab lub tuam rooj sab laj, tej kev ua yeeb yam video txog Yexus Khetos lub neej thiab tej lus qhia, cov app uas sau peb tsev neeg zaj keeb kwm, thiab cib fim mloog nkauj uas tshoov peb lub siab.

Tej yam peb xaiv thiab saib rau nqi nyob hauv Internet yeej hloov tau peb. Tej ntawd yuav hloov peb txoj kev muaj peev xwm loj hlob ntawm sab ntsuj plig thiab txoj moo zoo thiab yuav hloov peb txoj kev xav ua zoo hauv lub ntiaj teb thiab ua neej vam meej.

Yog li ntawd, kuv xav qhia nej txog peb tug cwj pwm me me uas yuav pab ua tej yam tsim nyog online. Tej cwj pwm no yuav pab nej niaj hnub xav txog tej yam uas peb yuav tsum ua kom ua raws li peb Leej Txiv Saum Ntuj Ceeb Tsheej thiab Nws Leej Tub, Yexus Khetos tej lus qhia.

Tus Cwj Pwm thib 1: Txuas rau lub Koom Txoos tej Website Nrhiav Kev Pab

Thaum peb saib tej kev pab no ntau zaus txhua lub lim tiam yuav pab peb xav ua raws li tej lus qhia ntawm txoj moo zoo thiab yaum peb tsev neeg thiab phooj ywg kom lawv xav txog tej yam uas muaj nqi tshaj.

Tus Cwj Pwm thib 2: Sau Npe Kom Txais lub Koom Txoos tej Kev Sib Tham hauv Internet

Yog nej xaiv ua li no, ces nej yuav saib tej yam uas pab nej nrhiav tus Tswv thiab Nws tej lus qhia thiab txhawb nqa nej txoj kev xav to taub txoj moo zoo. Qhov tseem ceeb tshaj, qhov no yuav pab nej nco qab tias Yexus Khetos xav kom peb txhua tus ua dab tsi.

Ib yam li “tsis muaj av zoo yog tsis muaj tus neeg ua liaj teb zoo,”7 ces yuav tsis muaj dab tsi zoo los ntawm tej yam peb ua online yog tias peb saib tej yam twg tseem ceeb tshaj rau peb tej tes thiab peb lub siab.

Tus Cwj Pwm thib 3: Tseg Sij Hawm Kom Muab Yus lub Xov Tooj ntawm Tes Tso Cia

Tej lub sij hawm yog ib qho zoo muab yus tej xov tooj tso cia thiab nyeem vaj lug kub los yog siv sij hawm sib tham nrog nej tsev neeg thiab phooj ywg. Hais txog tus Tswv hnub, cia li muaj kev kaj siab lug koom kev sib ntsib txais lub cim nco txog thaum nej tsis tas saib puas muaj dab tsi tshiab uas lwm tus sau rau nej.

Tus cwj pwm muab peb tej xov tooj tso cia rau ib chim yuav pab peb to taub peb lub neej, vim peb lub neej yeej tsis nyob hauv ib daim uas ntev li plaub inch (10-cm).

Tus Tswv Yexus Khetos hais tias, “Kuv hlub nej ib yam li kuv Txiv hlub kuv; nej yuav tsum muaj lub siab hlub ib yam li kuv.”8 Vajtswv xav kom peb muaj kev xyiv fab thiab paub txog Nws txoj kev hlub. Yexus Khetos ua rau peb txhua tus txais tau kev xyiv fab zoo li no. Peb sawv daws yeej paub tau Nws zoo dua li qub thiab muaj peev xwm ua neej raws li Nws txoj moo zoo.

Kuv ua tim khawv txog kev xyiv fab uas muaj thaum peb ua raws li cov lus txib thiab txog kev kaj siab lug uas peb muaj thaum peb paub txog Leej Txiv Saum Ntuj Ceeb Tsheej thiab Nws Leej Tub, peb tus Cawm Seej, txoj kev hlub. Los ntawm Yexus Khetos lub npe, amees.