ການສະແຫວງຫາພຣະຜູ້ເປັນເຈົ້າ
ໂດຍ ແອວເດີ ໂຮເຊ ເອ ເທເຊຣາ
ແຫ່ງສາວົກເຈັດສິບ
ເມື່ອເຮົາເຮັດໃຫ້ຄວາມເຂົ້າໃຈຂອງເຮົາເຖິງພຣະຜູ້ຊ່ອຍໃຫ້ລອດເລິກຊຶ້ງຂຶ້ນ, ເຮົາຈະມີຄວາມປາດຖະໜາຫລາຍຂຶ້ນທີ່ຈະດຳລົງຊີວິດຢ່າງມີຄວາມສຸກ ແລະ ມີຄວາມເຊື່ອໝັ້ນວ່າ ເຮົາຈະມີຄວາມສຸກໄດ້.
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ດ້ວຍຄວາມປິຕິຍິນດີອັນຍິ່ງໃຫຍ່ ທີ່ຂ້າພະເຈົ້າໄດ້ມາຢືນຢູ່ນີ້ຕໍ່ໜ້າພວກທ່ານ ຂະນະທີ່ເຮົາມີສ່ວນຮ່ວມໃນກອງປະຊຸມໃຫຍ່ສາມັນຄັ້ງນີ້ນຳກັນ. ການຮັບຟັງຖ້ອຍຄຳແຫ່ງປັນຍາ, ຄຳແນະນຳ, ຄຳປອບໂຍນ, ແລະ ຄຳຕັກເຕືອນໃນກອງປະຊຸມໃຫຍ່ສາມັນເປັນເວລາຫລາຍປີ ໄດ້ເປັນພອນທີ່ຍິ່ງໃຫຍ່ສຳລັບ ຊິດສະເຕີ ເທເຊຣາ, ຄອບຄົວຂອງພວກເຮົາ, ແລະ ຕໍ່ຂ້າພະເຈົ້າ.
ໃນລະຫວ່າງເທດສະການພິເສດຂອງປີນີ້, ໂດຍສະເພາະວັນຊະບາໂຕອິດສະເຕີນີ້, ຂ້າພະເຈົ້າຕ້ອງໄຕ່ຕອງເຖິງຄວາມສຳຄັນຂອງຄຳສອນຂອງພຣະຜູ້ຊ່ອຍໃຫ້ລອດ ແລະ ຕົວຢ່າງທີ່ມີເມດຕາ ແລະ ຄວາມຮັກຂອງພຣະອົງໃນຊີວິດຂອງຂ້າພະເຈົ້າ.
ຄວາມເຂົ້າໃຈອັນເລິກຊຶ້ງເຖິງພຣະເຢຊູຄຣິດຈະໃຫ້ເຮົາມີຄວາມຫວັງຫລາຍຂຶ້ນ ສຳລັບອະນາຄົດ, ເຖິງແມ່ນເຮົາຈະມີຄວາມບົກພ່ອງກໍຕາມ, ໃຫ້ມີຄວາມໝັ້ນໃຈຫລາຍຂຶ້ນໃນການບັນລຸເປົ້າໝາຍທີ່ຊອບທຳຂອງເຮົາ. ສິ່ງນີ້ຈະໃຫ້ເຮົາມີຄວາມປາດຖະໜາຫລາຍຂຶ້ນທີ່ຈະຮັບໃຊ້ເພື່ອນມະນຸດຂອງເຮົານຳອີກ.
ພຣະຜູ້ເປັນເຈົ້າໄດ້ບັນຊາເຮົາ ໃຫ້ເບິ່ງທີ່ພຣະອົງໃນຄວາມນຶກຄິດທຸກຢ່າງ; ບໍ່ໃຫ້ສົງໄສ, ບໍ່ໃຫ້ຢ້ານ.1 ການສະແຫວງຫາພຣະຜູ້ເປັນເຈົ້າ ແລະ ຮູ້ສຶກເຖິງຄວາມສະຖິດຢູ່ຂອງພຣະອົງເປັນການສະແຫວງຫາທຸກວັນ, ເປັນຄວາມພະຍາຍາມທີ່ກຸ້ມຄ່າ.
ອ້າຍເອື້ອຍນ້ອງທັງຫລາຍ, ໃນວັນເວລານີ້ຫລາຍກວ່າໃນວັນເວລາອື່ນ, ເຮົາມີໂອກາດ ແລະ ແຫລ່ງຊ່ອຍເຫລືອທີ່ພິເສດ ທີ່ຈະເຮັດໃຫ້ຄວາມເຂົ້າໃຈຂອງເຮົາເຖິງຄຳສອນຂອງພຣະເຢຊູຄຣິດ ແລະ ການຊົດໃຊ້ຂອງພຣະອົງເລິກຊຶ້ງຂຶ້ນ. ການນຳໃຊ້ແຫລ່ງຊ່ອຍເຫລືອເຫລົ່ານີ້ຢ່າງຖືກຕ້ອງຈະຊ່ອຍເຮົາໃຫ້ດຳລົງຊີວິດທີ່ມີຜົນດີ ທີ່ເຕັມໄປດ້ວຍຄວາມສຸກ.
ໃນການປຽບທຽບຂອງພຣະຜູ້ຊ່ອຍໃຫ້ລອດເຖິງເຄືອ ແລະ ກິ່ງ, ພຣະອົງໄດ້ກ່າວວ່າ: “ຈົ່ງເຂົ້າສະໜິດຢູ່ໃນເຮົາ, ແລະ ເຮົາເຂົ້າສະໜິດຢູ່ໃນພວກເຈົ້າ. ກິ່ງຈະເກີດຜົນເອງບໍ່ໄດ້, ນອກຈາກຈະຕິດຢູ່ກັບເຄືອສັນໃດ ພວກເຈົ້າຈະເກີດຜົນເອງບໍ່ໄດ້, ນອກຈາກພວກເຈົ້າຈະເຂົ້າສະໜິດຢູ່ໃນເຮົາສັນນັ້ນ.”2
ເມື່ອເຮົາເຂົ້າໃຈບົດບາດທີ່ປະເສີດຂອງພຣະຄຣິດຫລາຍຂຶ້ນເທົ່າໃດໃນຊີວິດຂອງເຮົາ, ເຮົາແຮ່ງຈະເຂົ້າໃຈຈຸດປະສົງຂອງເຮົາໃນຊີວິດມະຕະຫລາຍຂຶ້ນເທົ່ານັ້ນ, ຄືທີ່ຈະມີຄວາມສຸກ. ເຖິງຢ່າງໃດກໍຕາມ, ຄວາມສຸກນັ້ນຈະບໍ່ປ້ອງກັນເຮົາຈາກການປະສົບການທົດລອງ ແລະ ຄວາມຫຍຸ້ງຍາກ, ແມ່ນແຕ່ບາງຢ່າງກໍໜັກໜ່ວງ ແລະ ສັບຊ້ອນ ຈົນມັນອາດເຮັດໃຫ້ເຮົາຄິດວ່າ ເປັນໄປບໍ່ໄດ້ທີ່ຈະມີຄວາມສຸກໃນສະຖານະການເຊັ່ນນີ້.
ຂ້າພະເຈົ້າຮູ້ຈາກປະສົບການສ່ວນຕົວວ່າຄວາມສຸກຂອງການດຳລົງຊີວິດໃນຄວາມຊອບທຳ ແລະ ແນບສະໜິດຢູ່ໃນພຣະຄຣິດ ສາມາດເປັນຢູ່ຕໍ່ໄປ ເຖິງແມ່ນຈະມີຄວາມຍາກລຳບາກ ທີ່ຕາມປົກກະຕິແລ້ວ ຈະເກີດໃນຊີວິດມະຕະນີ້. ໃນທີ່ສຸດ, ຄວາມຍາກລຳບາກເຫລົ່ານີ້ມັກຈະເສີມສ້າງ, ປ່ຽນແປງ, ແລະ ຊີ້ນຳເຮົາໄປສູ່ຄວາມເຂົ້າໃຈຈຸດປະສົງຂອງຄວາມເປັນຢູ່ໃນຊ່ວງມະຕະນີ້ຂອງເຮົາ ແລະ ການຊົດໃຊ້ຂອງພຣະເຢຊູຄຣິດ. ແທ້ຈິງແລ້ວ, ເຮົາສາມາດບັນລຸເຖິງຄວາມສົມບູນຂອງຄວາມສຸກນັ້ນໄດ້ ຜ່ານພຣະເຢຊູຄຣິດ.3
ພຣະອົງໄດ້ກ່າວວ່າ, “ເຮົາເປັນເຄືອອະງຸ່ນ ພວກເຈົ້າເປັນກິ່ງ: ຜູ້ໃດທີ່ຢູ່ໃນເຮົາ, ແລະ ເຮົາຢູ່ໃນຜູ້ນັ້ນ, ຜູ້ນັ້ນແຫລະຈະເກີດຜົນຫລາຍ: ເພາະຖ້າແຍກຈາກເຮົາແລ້ວ, ພວກເຈົ້າບໍ່ສາມາດເຮັດສິ່ງໃດໄດ້.”4
ຂ້າພະເຈົ້າເຊື່ອວ່າ ເມື່ອເຮົາເຮັດໃຫ້ຄວາມເຂົ້າໃຈຂອງເຮົາເຖິງພຣະຜູ້ຊ່ອຍໃຫ້ລອດເລິກຊຶ້ງຂຶ້ນ, ເຮົາຈະມີຄວາມປາດຖະໜາຫລາຍຂຶ້ນທີ່ຈະດຳລົງຊີວິດຢ່າງມີຄວາມສຸກ ແລະ ມີຄວາມເຊື່ອໝັ້ນວ່າ ເຮົາຈະມີຄວາມສຸກໄດ້. ສະນັ້ນ, ເຮົາຈະມີຄວາມສາມາດຫລາຍຂຶ້ນທີ່ຈະມີຊີວິດຢູ່ແຕ່ລະວັນດ້ວຍຄວາມກະຕືລືລົ້ນຫລາຍຂຶ້ນສຳລັບຊີວິດ ແລະ ສຳລັບການຮັກສາພຣະບັນຍັດຂອງພຣະເຈົ້າ, ແມ່ນແຕ່ໃນສະຖານະການທີ່ທ້າທາຍ.
ຢ່າປະສິ່ງທີ່ເຮົາເຮັດໄດ້ໃນມື້ນີ້ ເພື່ອເອົາໄວ້ເຮັດໃນມື້ອື່ນ. ເຮົາຕ້ອງມາຫາພຣະຄຣິດໃນເວລານີ້ ເພາະວ່າ ຖ້າຫາກ [ພວກເຮົາ] ເຊື່ອ [ພຣະອົງ], [ພວກເຮົາ] ຈະທຳງານໃນຂະນະທີ່ເອີ້ນວ່າ ວັນນີ້.”5
ທຸກໆວັນ, ເຮົາຄວນພິຈາລະນາ ຮ່ວມທັງການປະຕິບັດຕໍ່ກັນເລື້ອຍໆ ກັບຄຳສອນຂອງພຣະຄຣິດ. ທ່າທາງ ແລະ ການກະທຳເລັກໆນ້ອຍໆ ແລະ ລຽບງ່າຍທີ່ເຮົາໄດ້ເຮັດລົງໄປທຸກໆວັນຈະ:
-
ເຮັດໃຫ້ຄວາມເຂົ້າໃຈຂອງເຮົາເລິກຊຶ້ງຂຶ້ນ ເຖິງຄວາມສຳຄັນຂອງພຣະຜູ້ເປັນເຈົ້າໃນຊີວິດຂອງເຮົາ ແລະ
-
ຊ່ອຍເຮົາແບ່ງປັນຄວາມເຂົ້າໃຈນີ້ໃຫ້ກັບຄົນລຸ້ນຕໍ່ໄປ, ຜູ້ທີ່ຈະຮູ້ສຶກເຖິງຄວາມຮັກຂອງພຣະບິດາເທິງສະຫວັນ ແລະ ພຣະບຸດຂອງພຣະອົງ, ພຣະເຢຊູຄຣິດຢ່າງແນ່ນອນ, ເມື່ອພວກເຂົາເຫັນຕົວຢ່າງຂອງເຮົາ ໃນການດຳລົງຊີວິດຕາມພຣະກິດຕິຄຸນຢ່າງຈິງໃຈ.
ສະນັ້ນ ແມ່ນຫຍັງຄືພຶດຕິກຳທີ່ລຽບງ່າຍບາງຢ່າງ ໃນຍຸກສະໄໝໃໝ່ນີ້ ທີ່ຈະກາຍເປັນຫວ້ານຢາສຳລັບຈິດວິນຍານຂອງເຮົາ ໃນການເຮັດໃຫ້ປະຈັກພະຍານຂອງເຮົາ ເຖິງພຣະຄຣິດ ແລະ ພາລະກິດຂອງພຣະອົງເຂັ້ມແຂງຂຶ້ນ?
ໃນປີ 2014, ການແຂ່ງຂັນຮູບພາບ ວາລະສານ National Geographic ໄດ້ຮັບຮູບຫລາຍກວ່າ 9,200 ແຜ່ນ ທີ່ສົ່ງເຂົ້າມາໂດຍນັກຖ່າຍພາບມືອາຊີບ ແລະ ຜູ້ທີ່ກະຕືລືລົ້ນ ຈາກຫລາຍກວ່າ 150 ປະເທດ. ຮູບພາບທີ່ຊະນະນັ້ນສະແດງໃຫ້ເຫັນ ຍິງຄົນໜຶ່ງຢູ່ໃນໃຈກາງຂອງລົດໄຟທີ່ເຕັມໄປດ້ວຍຜູ້ໂດຍສານ. ແສງສະຫວ່າງທີ່ອອກມາຈາກໂທລະສັບມືຖືຂອງນາງສ່ອງແສງໃສ່ໃບໜ້າຂອງນາງ. ນາງຖ່າຍທອດຂ່າວສານທີ່ແຈ່ມແຈ້ງຕໍ່ຜູ້ໂດຍສານຄົນອື່ນໆວ່າ: ເຖິງແມ່ນວ່າຕົວຂອງນາງຢູ່ທີ່ນັ້ນ, ແຕ່ນາງເອົາໃຈໃສ່ສິ່ງອື່ນ.6
ຂໍ້ມູນທາງອິນເຕີແນັດ, ໂທລະສັບມືຖື, ແລະ ເຄືອຂ່າຍທາງສັງຄົມໄດ້ປ່ຽນແປງວິທີທີ່ເຮົາເປັນຢູ່ຫລາຍ ຢູ່ໃນໂລກ ແລະ ວິທີທີ່ເຮົາສື່ສານກັບຄົນອື່ນ.
ໃນວັນເວລາຂອງເຄື່ອງມືຖືນີ້, ເຮົາສາມາດສົ່ງຕົວເຮົາເອງຢ່າງວ່ອງໄວ ໄປຫາສະຖານທີ່ ແລະ ກິດຈະກຳທີ່ສາມາດດຶງຕົວເຮົາອອກໄປຢ່າງວ່ອງໄວນຳອີກ ຈາກສິ່ງທີ່ຈຳເປັນສຳລັບຊີວິດທີ່ເຕັມໄປດ້ວຍຄວາມສຸກທີ່ທົນທານ.
ຖ້າເຮົາບໍ່ຄວບຄຸມມັນ, ເວລາທີ່ເຮົາໃຊ້ນຳອິນເຕີແນັດ ຈະມີຄວາມສຳຄັນສູງກວ່າກັບຄວາມສຳພັນທີ່ເຮົາມີກັບຜູ້ຄົນທີ່ເຮົາບໍ່ຮູ້ຈັກ ຫລື ບໍ່ເຄີຍພົບ, ແທນທີ່ຈະໃຊ້ເວລາກັບຄົນທີ່ເຮົາອາໄສຢູ່ນຳ, ດັ່ງຄອບຄົວຂອງເຮົາເອງ!
ກົງກັນຂ້າມ ເຮົາທຸກຄົນຮູ້ວ່າເຮົາໄດ້ຮັບພອນດ້ວຍແຫລ່ງທາງອິນເຕີແນັດທີ່ດີ, ຮ່ວມທັງແຫລ່ງທີ່ສາດສະໜາຈັກໄດ້ຈັດແຈ່ງຂຶ້ນມາ ດັ່ງເຊັ່ນ ພຣະຄຳພີສັກສິດທີ່ອ່ານໄດ້ ແລະ ສຽງທີ່ຟັງໄດ້, ແລະ ກອງປະຊຸມ ໃຫຍ່ສາມັນ, ການຜະລິດວິດີໂອເຖິງຊີວິດ ແລະ ຄຳສອນຂອງພຣະເຢຊູຄຣິດ, ແອບສ໌ ທີ່ຈະບັນທຶກປະຫວັດຂອງຄອບຄົວ, ແລະ ໂອກາດອື່ນໆທີ່ຈະຟັງເພງທີ່ດົນໃຈ.
ການເລືອກ ແລະ ລະດັບຄວາມສຳຄັນທີ່ເຮົາເຮັດກັບເວລາຂອງເຮົາກັບອິນເຕີແນັດ ແມ່ນມີອິດທິພົນຫລາຍແທ້ໆ. ມັນສາມາດກຳນົດຄວາມກ້າວໜ້າທາງວິນຍານຂອງເຮົາ ແລະ ການເຕີບໂຕຂອງເຮົາໃນພຣະກິດຕິຄຸນ ແລະ ຄວາມປາດຖະໜາຂອງເຮົາທີ່ຈະມີສ່ວນບໍລິຈາກໃຫ້ແກ່ໂລກທີ່ດີກວ່າ ແລະ ເພື່ອຈະດຳລົງຊີວິດທີ່ມີປະໂຫຍດຫລາຍຂຶ້ນ.
ສຳລັບເຫດຜົນເຫລົ່ານີ້, ມື້ນີ້ ຂ້າພະເຈົ້າຢາກຈະກ່າວເຖິງນິໄສທີ່ລຽບງ່າຍສາມຢ່າງ ທີ່ຈະຈັດກິດຈະກຳທາງອິນເຕີແນັດທີ່ດີ. ນິໄສເຫລົ່ານີ້ຈະຊ່ອຍກໍ່ໃຫ້ເກີດການປະເມີນຕົວເອງທຸກໆວັນ ທີ່ຈຳເປັນສຳລັບເຮົາ ທີ່ຈະໃກ້ຊິດກັບຄຳສອນຂອງພຣະບິດາເທິງສະຫວັນຂອງເຮົາ ແລະ ພຣະບຸດຂອງພຣະອົງ, ພຣະເຢຊູຄຣິດຫລາຍຂຶ້ນ.
ນິໄສທີ 1: ເຂົ້າຊົມເວບໄຊ້ທີ່ເປັນທາງການຂອງສາດສະໜາຈັກສຳລັບແຫລ່ງຊ່ອຍເຫລືອ
ສ່ວນຫລາຍແລ້ວ, ການເຂົ້າຢ້ຽມຢາມແຫລ່ງເຫລົ່ານີ້ລະຫວ່າງອາທິດຈະຊ່ອຍເຮົາໃຫ້ຮູ້ສຶກໄວຕໍ່ຄຳສອນຂອງພຣະກິດຕິຄຸນ ແລະ ຊຸກຍູ້ຄອບຄົວ ແລະ ໝູ່ເພື່ອນຂອງເຮົາໃຫ້ຄິດເຖິງ ແລະ ໄຕ່ຕອງສິ່ງທີ່ສຳຄັນທີ່ສຸດ.
ນິໄສທີ 2: ຈົດທະບຽນເຂົ້າຫາເຄືອຂ່າຍສື່ສານທາງສັງຄົມທີ່ເປັນທາງການຂອງສາດສະໜາຈັກ
ການເລືອກນີ້ຈະນຳເນື້ອຄວາມມາສູ່ຈໍຂອງທ່ານ ທີ່ຈຳເປັນທີ່ຈະເຮັດໃຫ້ການຄົ້ນຄວ້າ ແລະ ການສະແຫວງຫາພຣະຜູ້ເປັນເຈົ້າ ແລະ ຄຳສອນຂອງພຣະອົງເລິກຊຶ້ງຂຶ້ນ ແລະ ມັນຈະເຮັດໃຫ້ທ່ານມີຄວາມປາດຖະໜາຢາກເຂົ້າໃຈຫລາຍຂຶ້ນ ເຖິງພຣະກິດຕິຄຸນ. ສຳຄັນໄປກວ່ານັ້ນຄື, ສິ່ງນີ້ຈະຊ່ອຍທ່ານໃຫ້ຈົດຈຳສິ່ງທີ່ ພຣະຄຣິດຄາດຫວັງຈາກເຮົາແຕ່ລະຄົນ.
ເຊັ່ນດຽວກັບ “ບໍ່ມີຂີ້ດິນດີທີ່ປາດສະຈາກພໍ່ນາດີ,”7 ຈະບໍ່ມີການເກັບກ່ຽວທີ່ດີຢູ່ໃນອິນເຕີແນັດເລີຍ ເວັ້ນເສຍແຕ່ເຮົາຈະຈັດລຳດັບຄວາມສຳຄັນຕັ້ງແຕ່ຕົ້ນກັບສິ່ງທີ່ນິ້ວມື ແລະ ຈິດໃຈຂອງເຮົາຈະເຂົ້າເຖິງໄດ້.
ນິໄສທີ 3: ຈັດເວລາທີ່ຈະວາງເຄື່ອງມືຖືຂອງທ່ານລົງໄວ້
ມັນເປັນສິ່ງທີ່ສົດຊື່ນທີ່ຈະວາງເຄື່ອງມືຖືເອເລັກທຣອນນິກຂອງເຮົາລົງໄວ້ຈັກຊ່ວງໜຶ່ງ ແລະ ເປີດພຣະຄຳພີອ່ານ ຫລື ໃຊ້ເວລາສົນທະນາກັບຄົນໃນຄອບຄົວ ແລະ ໝູ່ເພື່ອນ. ໂດຍສະເພາະໃນວັນຂອງພຣະຜູ້ເປັນເຈົ້າ, ວັນຊະບາໂຕ, ເພື່ອມີຄວາມສະຫງົບສຸກໃນການມີສ່ວນຮ່ວມໃນກອງປະຊຸມສິນລະລຶກ ປາດສະຈາກຄວາມຢາກກວດເບິ່ງເລື້ອຍໆ ວ່າມີຂໍ້ຄວາມໃໝ່ ຫລື ວ່າມີຄົນສົ່ງຂ່າວໃໝ່ໆເຂົ້າມາຫລືບໍ່.
ນິໄສຂອງການວາງເຄື່ອງມືຖືຂອງທ່ານລົງໄດ້ເປັນໄລຍະເວລາ ຈະເພີ່ມຄຸນນະພາບ ແລະ ເຮັດໃຫ້ທັດສະນະໃນຊີວິດຂອງທ່ານເປີດກວ້າງອອກໄປ, ເພາະວ່າຊີວິດບໍ່ໄດ້ຢູ່ໃນຈໍນ້ອຍໆນັ້ນ.
ອົງພຣະເຢຊູຄຣິດເຈົ້າ ໄດ້ກ່າວວ່າ, “ພຣະບິດາຮັກເຮົາຢ່າງໃດ, ເຮົາກໍຮັກພວກເຈົ້າຢ່າງນັ້ນ: ຈົ່ງຕັ້ງຢູ່ໃນຄວາມຮັກຂອງເຮົາ.”8 ພຣະເຈົ້າປະສົງໃຫ້ເຮົາມີຄວາມສຸກ ແລະ ຮູ້ສຶກເຖິງຄວາມຮັກຂອງພຣະອົງ. ພຣະຄຣິດຊ່ອຍເຫລືອເຮົາແຕ່ລະຄົນໃຫ້ສາມາດມີຄວາມສຸກນີ້ໄດ້. ເຮົາມີວິທີທີ່ຈະຮູ້ຈັກພຣະອົງດີຂຶ້ນ ແລະ ດຳລົງຊີວິດຕາມພຣະກິດຕິຄຸນຂອງພຣະອົງ.
ຂ້າພະເຈົ້າກ່າວປະຈັກພະຍານເຖິງຄວາມສຸກທີ່ມີຢູ່ ເມື່ອເຮົາຮັກສາພຣະບັນຍັດ ແລະ ເຖິງຄວາມສັນຕິສຸກ ແລະ ຄວາມປອດໄພ ທີ່ເຮົາຮູ້ສຶກເຖິງ ເມື່ອເຮົາຄົງຢູ່ໃນຄວາມຮັກຂອງພຣະບິດາເທິງສະຫວັນ ແລະ ພຣະບຸດຂອງພຣະອົງ, ພຣະຜູ້ຊ່ອຍໃຫ້ລອດຂອງເຮົາ. ໃນພຣະນາມຂອງພຣະເຢຊູຄຣິດ, ອາແມນ.