Nyob Rawv ntawm Tsob Ntoo

Lihais pib thaum nws nyob nws tus kheej “nyob hauv ib qhov chaw uas muaj kev tsaus ntuj thiab kev nyuaj siab.”² Peb txhua tus muaj tej lub sij hawm nyob hauv kev tsaus ntuj thiab muaj kev kho siab. “Thaum muaj kev nyuaj siab kev quaj ntsuag, Nco ntsoov thov Vaj-tswv.”³ Ua raws li Thawj Tswj Hwm Heber J. Grant tus yam ntxwv. Thov Vajtswv thiaj muaj zog nyiaj kom mus txog thaum kawg. Nug Leej Txiv Saum Ntuj Ceeb Tsheej hais tias “Koj xav kom kuv ua dab tsi ntxiv?”

Tus ntoo cawm txoj sia yog qhov tseem ceeb nyob hauv Lihais zaj npau suav. Txhua yam tsom ntsoov rau tus ntoo cawm txoj sia. Tus ntoo piv rau Yexus Khetos, tus uas Vajtswv xa los vim Vajtswv hlub peb. Cov txiv yog Nws txoj Kev Theej Txhoj thiab qhia tias Vajtswv hlub peb. Txoj sia nyob mus ib txhis nrog cov uas peb hlub yeej qab zib tshaj txhua yam tsav. Yog peb xav tau lub txiaj ntsim no peb yuav tsum los cuag Khetos thiab ua neeg zoo tag nrho dhau los ntawm nws.⁴ Nws yog “txoj kev, qhov tseeb, thiab yog txoj sia.”⁵ Peb muaj peev xwm ua zoo thiab vam meej hauv lub neej no, tiam sis thaum kawg yog peb tsis khi lus ua raws li Yexus Khetos thiab rau siab ua raws li tej kev khi lus ntawd, ces ntshe peb yuav tsis ua raws li peb lub hom phiaj tiag tiag.

Muaj ib txoj kev uas mus rau tus ntoo cawm txoj sia, rau Yexus Khetos. Yog ib txoj kev ti thiab nqaim thiab ncaj. Vajtswv tej lus txib yeej ncaj tiam sis tsis nruj heev. Nws tej lus txib pov hwm peb kom tsis txhob raug xwm txheej ntawm sab ntsuj plig thiab sab cev nqaij daim tawv, thiab pab kom peb tsis txhob poob zoo.

Kev mloog lus pab peb ntseeg Yexus Khetos. Kev ntseeg yog ib lub ntsiab cai ntawm kev muaj peev xwm thiab hwj chim. Thaum peb pheej ua raws li tus Cawm Seej tus yam ntxwv peb muaj hwj chim thiab peev xwm ntawm sab ntsuj plig. Yog tsis muaj lub hwj chim ntawm txoj Kev Theej Txhoj uas ntxiv dag zog rau peb, ces peb tsis muaj peev xwm taug txoj kev thiab nyiaj mus.

“Thawb mus lawm tom hauv ntej nrog txoj kev ntseeg … Khetos.”⁶

Peb lub neej yeej nyuaj heev. Yooj yim rau peb tsom ntsoov rau lwm yam, ua loj leeb tsis taug txoj kev, thiab poob zoo. Peb yeej yuav raug kev txom nyem hauv lub neej no vim kev txom nyem yog ib qho tseem ceeb uas pab peb vam meej mus ib txhis. Thaum muaj tej teeb meem, tsis txhob cia ib yam uas nej tsis to taub ua rau txhua yam uas nej twb paub lawm puas tsuaj. Ua siab ntev, ua raws li qhov tseeb; ces nej yuav to taub thaum yav tom ntej. Kev sim siab yeej zoo li qhov kev tsaus ntuj uas muaj huab zig niab uas ua rau peb tsis pom kev thiab ua rau peb muaj siab tawv. Yog peb tsis “tuav [Vajtswv txoj lus] ruaj ruaj”⁷ thiab ua raws li Nws txoj lus, ces peb yuav dig muag ntawm sab ntsuj plig. Cia li nrhiav hauv Phau Ntawv Maumoos thiab cov yaj saub tej lus txhua txhua hnub, tsis tu tsis tseg! Qhov no yog tus yuam sij uas pab kom tsis txhob raug ntxias thiab txhawb nqa yus sab ntsuj plig. Yog peb tsis ua li no, ces peb tus ntsuj plig yuav poob zoo.

Kev mloog lus txhais hais tias yus tsom ntsoov rau ib yam dab tsi. Kev mloog cov uas tsis ntseeg Yexus Khetos lus yuav tsis pab nej nrhiav tau Nws. Qhov uas nej nrhiav #spaciousbuilding kom tau kev txawj ntse yeej yuav tsis pab nej nrhiav qhov tseeb. Qhov tseeb tsis nyob ntawd. Tus Cawm Seej ib leeg xwb muaj tej lus ntawm txoj sia nyob mus ib txhis.⁸ Txhua yam ntxiv yeej yog tej lus xwb. Lub tsev loj thiab dav yog ib lub cim txog “txoj kev xav khav theeb thiab txoj kev muab hlob”⁹ ntawm neeg ntiaj teb—los yog, kev ua tsom ntsoov rau lwm yam thiab kev ntxias. Lub tsev no puv nrog cov neeg uas ua zam thiab zoo li lawv muaj txhua yam. Tiam sis lawv thuam tus Cawm Seej thiab cov uas nrog Nws mus. Lawv “niaj hnub kawm, tiam sis lawv tsis paub hais tias lub ntsiab lus yog li cas tiag.”¹⁰ Tej zaum lawv hais lus kom haum cov pej xeem lub siab, tiam sis lawv poob zoo ntawm sab ntsuj plig.

Lihais hais kom peb nyob rawv ntawm tsob ntoo. Peb nyob vim peb twb hloov siab los ntseeg tus Tswv. Amas qhia hais tias, “Saib seb, nws tau hloov lawv tej siab tej ntsws, muaj tseeb tiag, nws tau tsa lawv tsim ntawm ib tug dab ntub hnyav, thiab lawv sawv los mus cuag Vajtswv.”¹¹ Thaum peb tso siab rau Vajtswv, tus Vaj Ntsuj Plig Dawb Huv hloov peb lub siab, peb hloov siab los ntseeg tus Tswv, thiab peb tsis nrhiav lub tsev dav ntawd. Yog peb tsum tsis ua tej yam uas ua rau peb hloov siab los ntseeg no, ces peb poob ntawm sab ntsuj plig. Kev tso qhov tseeb tseg yog qhov fab ntxeev ntawm kev hloov siab los ntseeg.

Rau tag nrho cov tub txib thaum yav tas los thiab niaj hnub nim no: cov txwj laug thiab cov muam, yog nej mus ua tub txib thiab rov los tsev, ces nej cia li ua zoo li neeg Npanpiloos ua, thiab siv sij hawm ntau tsis ntau ua si video game uas tsis muaj nqi, ces nej yuav tsaug zog ntawm sab ntsuj plig. Yog nej saib duab liab qab thiab saib kev tsim txiaj thiab kev coj dawb huv tsis muaj nqi ces nej yuav raug xwm txheej phem heev ntawm sab ntsuj plig. Yog nej poob tus Ntsuj Plig, ces nej yeej poob zoo. Tsis txhob tig rau lwm yam thiab raug ntxias.

Cov ntseeg tiag tiag yuav thov Vajtswv txhua hnub, kawm cov vaj lug kub, coj raws li tej lus txib, thiab pab lwm tus. Cia li nyob rawv ntawm tsob ntoo thiab txhob tsaug zog.

Ntau xyoo tas los, lawv hu kuv thiab kuv tus poj niam tswj hwm Qhov Chaw Tshaj Tawm Txoj Moo Zoo Washington Tacoma. Wb tsis tau paub lawv yuav hu wb ua li no hlo li. Kuv ntshai me ntsis thaum kuv ntsib tus CEO ntawm lub koom haum uas kuv ua hauj lwm rau thiab qhia nws txog kuv txoj kev yuav mus ua tub txib. Lawv tu siab txog qhov uas kuv txiav txim siab tias kuv yuav tawm peb lub koom haum mus. Lawv nug hais tias “Koj txiav txim siab ua li no thaum twg lawm, thiab vim li cas koj tsis tau sib tham nrog peb txog qhov no?”

Yog ib lub sij hawm uas ua rau kuv paub meej hais tias kuv yuav teb li cas. Kuv hais tias, “Kuv twb txiav txim siab ua li no thaum kuv muaj 19 xyoos, thaum kuv khi lus nrog Vajtswv nyob hauv lub tuam tsev kom coj raws li tus Cawm Seej. Kuv twb ua raws li kuv tej kev khi lus tas kuv lub neej, thiab kuv txiav txim siab yuav ua raws li tej kev khi lus tam sim no thiab.”

Thaum peb khi lus nrog Vajtswv, peb thim tsis tau. Yeej tsis pub peb ua raws li feem coob ua, tsis pub peb tsum, thiab qaug zog. Nyob hauv Vajtswv lub nceeg vaj, muaj tej kev cai kom ua zoo thiaj txais tau kev tsa nto. Peb yuav tsum rau siab ntseeg! Tsis muaj chaw rau cov uas lam ntseeg xwb. Qhov uas nej lam coj raws li qhov yog yuav tab kaum nej kom txhob nyiaj kom mus txog thaum kawg.

Yog tias nej nyuaj siab, tsis to taub, los yog poob zoo ntawm sab ntsuj plig, kuv yaum kom nej ua tib qho uas yuav pab nej rov qab taug txoj kev yog. Cia li rov qab kawm Phau Ntawv Maumoos thiab ua raws li phau no tej lus qhia txhua txhua hnub, tsis tu tsis tseg! Kuv ua tim khawv txog lub hwj chim loj los ntawm Phau Ntawv Maumoos uas yuav hloov nej lub neej thiab pab kom nej yuav xav ua raws li Yexus Khetos qhia. Tus Vaj Ntsuj Plig Dawb Huv yuav hloov nej lub siab thiab pab nej saib “tej yam raws li qhov yog.”¹² Nws yuav qhia nej paub tias nej yuav tsum ua dab tsi tom qab ntawd. Nov yog qhov uas Nifais cog lus rau nej:

“Thiab kuv tau hais rau lawv tias … cov uas yuav mloog Vajtswv txoj lus, thiab tuav txoj lus no tsis tso, lawv yuav tsis piam sij ib zaug li; txoj kev dag ntxias thiab yeeb ncuab xib xub hluav taws yuav kov tsis yeej kom lawv poob rau hauv txoj kev dig muag, es coj lawv mus rau txoj kev puas tsuaj puas ntsoog.

“Yog li ntawd, kuv, … tau ntuas kom lawv … mloog Vajtswv txoj lus thiab nco ntsoov [ua raws li] nws tej lus txib txhua lub caij nyoog rau txhua yam.”¹³

Cov kwv tij thiab cov muam, kev nyiaj kom mus txog thaum kawg yog qhov uas sim peb siab seb peb puas yog Vajtswv cov ntseeg. Tej yam peb ua niaj hnub yuav hloov peb txoj hmoov nyob mus ib txhis. Cia li mloog Vajtswv lus, ua raws li qhov tseeb, ua raws li tej kev khi lus ntawm lub tuam tsev, thiab nyob rawv ntawm tsob ntoo!

Kuv ua tim khawv txog Yexus Khetos uas sawv rov los. Kuv paub tias Nws muaj txoj sia nyob. Kuv xav rau siab ntseeg thiab nyiaj kom mus txog thaum kawg ua raws li Nws tus yam ntxwv zoo. Los ntawm tus Tswv Yexus Khetos lub npe dawb ceev, a-mees.