ຢູ່ໃກ້ຕົ້ນໄມ້ແຫ່ງຊີວິດ
ໂດຍ ແອວເດີ ເຄວິນ ດັບເບິນຢູ ເພຍສັນ
ແຫ່ງສາວົກເຈັດສິບ
ພາບນິມິດຂອງລີໄຮເຖິງຕົ້ນໄມ້ແຫ່ງຊີວິດ ກໍເປັນຄຳອຸປະມາທີ່ມີພະລັງໃນການອົດທົນຈົນເຖິງທີ່ສຸດ.
ບໍ່ດົນກ່ອນປະທານ ຮີເບີ ເຈ ກະແຣນ ໄດ້ເສຍຊີວິດໄປ, ເຈົ້າໜ້າທີ່ຊັ້ນຜູ້ໃຫຍ່ຄົນໜຶ່ງໄດ້ໄປຢ້ຽມຢາມບ້ານຂອງເພິ່ນ. ກ່ອນເພິ່ນໄດ້ຈາກໄປ, ປະທານ ກະແຣນ ໄດ້ອະທິຖານວ່າ, “ໂອ້ພຣະອົງເຈົ້າ, ຂໍຈົ່ງປະທານພອນໃຫ້ຂ້າພຣະອົງແດ່ ເພື່ອວ່າຂ້າພຣະອົງຈະບໍ່ໄດ້ສູນເສຍປະຈັກພະຍານຂອງຂ້າພຣະອົງ ແລະ ຊື່ສັດຕໍ່ໄປຈົນເຖິງທີ່ສຸດ!”1 ຫລັງຈາກເກືອບ 27 ປີ ທີ່ໄດ້ເປັນປະທານຂອງສາດສະໜາຈັກ, ນີ້ຄືຄຳອະທິຖານຂອງເພິ່ນ. ຕົວຢ່າງຂອງເພິ່ນກໍເປັນການເຕືອນໃຈທີ່ມີພະລັງ ທີ່ວ່າບໍ່ມີຄົນໃດ, ບໍ່ວ່າຈະມີອາຍຸເທົ່າໃດກໍຕາມ, ທີ່ປອດໄພຈາກອິດທິພົນຂອງຊາຕານ. ຍຸດທະວິທີສອງຢ່າງທີ່ມີພະລັງຫລາຍທີ່ສຸດຂອງຊາຕານຄື ສິ່ງທີ່ດຶງດູດຄວາມສົນໃຈ ແລະ ການຫລອກລວງ.
ການອົດທົນຈົນເຖິງທີ່ສຸດເປັນຄຸນລັກສະນະຂອງການເປັນສານຸສິດທີ່ແທ້ຈິງ ແລະ ມັນຈຳເປັນຕໍ່ຊີວິດນິລັນດອນ. ແຕ່ເມື່ອການທົດລອງ ແລະ ການທ້າທາຍເຂົ້າມາໃນຊີວິດຂອງເຮົາ, ເຮົາມັກຈະຖືກບອກວ່າໃຫ້ “ອົດທົນຕໍ່ໄປ.” ຂ້າພະເຈົ້າຂໍບອກຢ່າງແຈ່ມແຈ້ງວ່າ ທີ່ຈະ, “ອົດທົນຕໍ່ໄປ” ບໍ່ໄດ້ເປັນຫລັກທຳຂອງພຣະກິດຕິຄຸນ. ການອົດທົນຈົນເຖິງທີ່ສຸດໝາຍຄວາມວ່າ ການມາຫາພຣະຄຣິດ ແລະ ຖືກເຮັດໃຫ້ດີພ້ອມໃນພຣະອົງເລື້ອຍໄປ.
ຖ້າຫາກການອົດທົນຈົນເຖິງທີ່ສຸດຈຳເປັນຕໍ່ຊີວິດນິລັນດອນ, ເປັນຫຍັງເຮົາຈຶ່ງດີ້ນລົນທີ່ຈະເປັນຄົນຊື່ສັດ? ເຮົາດີ້ນລົນເມື່ອເຮົາຕ້ອງເລືອກລະຫວ່າງລະດັບຄວາມສຳຄັນທີ່ແຂ່ງຂັນກັນ. ການເຊື່ອຟັງຢ່າງບໍ່ເອົາໃຈໃສ່ ແລະ ຄຳໝັ້ນສັນຍາທີ່ບໍ່ເຕັມໃຈ ຈະເຮັດໃຫ້ສັດທາອ່ອນແອລົງ. ການອົດທົນຈົນເຖິງທີ່ສຸດຮຽກຮ້ອງຄຳໝັ້ນສັນຍາທັງໝົດຕໍ່ພຣະຜູ້ຊ່ອຍໃຫ້ລອດ ແລະ ຕໍ່ພັນທະສັນຍາຂອງເຮົາ.
ພາບນິມິດຂອງລີໄຮເຖິງຕົ້ນໄມ້ແຫ່ງຊີວິດ ກໍເປັນຄຳອຸປະມາທີ່ມີພະລັງໃນການອົດທົນຈົນເຖິງທີ່ສຸດ. ຂໍໃຫ້ສຶກສາ ແລະ ໄຕ່ຕອງຄວາມຝັນຂອງລີໄຮດ້ວຍການອະທິຖານ; ແລ້ວປຽບທຽບມັນກັບຕົວຂອງທ່ານເອງ. ເມື່ອທ່ານເຮັດດັ່ງນັ້ນ, ຂໍໃຫ້ພິຈາລະນາຫລັກທຳສຳຄັນຫົກຂໍ້ນີ້ຢ່າງລະມັດລະວັງ ທີ່ຈະຊ່ອຍເຮົາໃຫ້ອົດທົນຈົນເຖິງທີ່ສຸດ.
1. ຢ່າລືມອະທິຖານ
ເຮົາຈະເລີ່ມຕົ້ນດ້ວຍລີໄຮ ທີ່ຢູ່ຕາມລຳພັງ “ໃນຄວາມມືດ ແລະ ຄວາມເສົ້າໝອງ.”2 ເຮົາແຕ່ລະຄົນປະສົບຊ່ວງເວລາທີ່ມືດມົນ ແລະ ເປົ່າປ່ຽວດຽວດາຍ. “ເມື່ອຊີວິດມືດມົນ ແລະ ລຳບາກ, ຢ່າລືມອະທິຖານ.”3 ຂໍໃຫ້ຕິດຕາມຕົວຢ່າງຂອງປະທານ ຮີເບີ ເຈ ກະແຣນ. ຂໍໃຫ້ອະທິຖານທູນຂໍພະລັງທີ່ຈະອົດທົນຈົນເຖິງທີ່ສຸດ. ໃຫ້ທູນຖາມພຣະບິດາເທິງສະຫວັນວ່າ, “ມີຫຍັງອີກບໍທີ່ພຣະອົງປະສົງໃຫ້ຂ້າພຣະອົງເຮັດ?”
2. ມາຫາພຣະຄຣິດ ແລະ ຖືກເຮັດໃຫ້ດີພ້ອມໃນພຣະອົງ
ຕົ້ນໄມ້ແຫ່ງຊີວິດເປັນຈຸດໃຈກາງທີ່ສຳຄັນໃນຄວາມຝັນຂອງລີໄຮ. ທຸກໆຈຸດເຈາະຈົງໃສ່ຕົ້ນໄມ້ແຫ່ງຊີວິດນັ້ນ. ຕົ້ນໄມ້ເປັນຕົວແທນໃຫ້ແກ່ພຣະຄຣິດ, ຜູ້ຊຶ່ງໄດ້ສະແດງໃຫ້ປະຈັກຢ່າງແຈ່ມແຈ້ງເຖິງຄວາມຮັກຂອງພຣະເຈົ້າ. ໝາກໄມ້ຄືການຊົດໃຊ້ທີ່ບໍ່ມີຂອບເຂດຂອງພຣະອົງ ແລະ ເປັນຫລັກຖານທີ່ຍິ່ງໃຫຍ່ຂອງຄວາມຮັກຂອງພຣະເຈົ້າ. ຊີວິດນິລັນດອນຢູ່ກັບຄົນທີ່ເຮົາຮັກ ເປັນສິ່ງທີ່ຫວານຊື່ນ ແລະ ເພິ່ງປາດຖະໜາຫລາຍກວ່າສິ່ງອື່ນໃດ. ເພື່ອຈະໄດ້ຮັບຂອງປະທານນີ້, ເຮົາຕ້ອງ “ມາຫາພຣະຄຣິດ, ແລະ ຖືກເຮັດໃຫ້ເປັນຄົນດີພ້ອມໃນພຣະອົງ.”4 ພຣະອົງ “ເປັນຄວາມຈິງ ແລະ ເປັນຊີວິດ.”5 ເຮົາສາມາດເຮັດໃຫ້ຊີວິດຂອງເຮົາເຕັມໄປດ້ວຍຄວາມສຳເລັດຜົນ ແລະ ການກະທຳດີ, ແຕ່ໃນທີ່ສຸດ, ຖ້າຫາກເຮົາບໍ່ເຂົ້າເຮັດພັນທະສັນຍາສັກສິດທີ່ຈະຕິດຕາມພຣະຄຣິດ ແລະ ຮັກສາມັນຢ່າງຊື່ສັດ, ແລ້ວເຮົາຈະບໍ່ເຂົ້າໃຈຈຸດປະສົງທີ່ແທ້ຈິງຂອງເຮົາຈັກຢ່າງເລີຍ.
3. ມຸ້ງໜ້າດ້ວຍສັດທາ
ມີເສັ້ນທາງທີ່ນຳໄປສູ່ຕົ້ນໄມ້ແຫ່ງຊີວິດ, ໄປສູ່ພຣະຄຣິດ. ມັນຄັບແຄບ, ເຄັ່ງຄັດ ແລະ ແນ່ນອນ. ພຣະບັນຍັດຂອງພຣະເຈົ້າແມ່ນເຄັ່ງຄັດ ແຕ່ບໍ່ຈຳກັດ. ມັນປົກປ້ອງເຮົາຈາກອັນຕະລາຍທາງວິນຍານ ແລະ ຮ່າງກາຍ ແລະ ປ້ອງກັນເຮົາຈາກການຫລົງທາງໄປ.
ການເຊື່ອຟັງ ຈະສ້າງສັດທາໃນພຣະຄຣິດ. ສັດທາຄືຫລັກທຳຂອງການກະທຳ ແລະ ອຳນາດ. ການຕິດຕາມຕົວຢ່າງຂອງພຣະຜູ້ຊ່ອຍໃຫ້ລອດຢ່າງສະໝ່ຳສະເໝີ ຈະສ້າງອຳນາດ ແລະ ຄວາມສາມາດທາງວິນຍານ. ປາດສະຈາກອຳນາດທີ່ເພີ່ມຄວາມເຂັ້ມແຂງ ແລະ ເຮັດໃຫ້ສາມາດ ແຫ່ງການຊົດໃຊ້, ມັນຈະເປັນໄປບໍ່ໄດ້ທີ່ຈະຄົງຢູ່ໃນເສັ້ນທາງ ແລະ ອົດທົນ.
“ຈົ່ງມຸ້ງໜ້າດ້ວຍຄວາມໝັ້ນຄົງໃນພຣະຄຣິດ.”6
4. ພຣະຄຳພີມໍມອນເປັນຂໍກະແຈທີ່ນຳໄປສູ່ຄວາມລອດທາງວິນຍານ
ການເດີນທາງໃນຊີວິດເປັນເລື່ອງທ້າທາຍ. ມັນງ່າຍທີ່ຈະຖືກເຮັດໃຫ້ສັບສົນ, ອອກໄປຈາກເສັ້ນທາງ ແລະ ຫລົງທາງໄປ. ຄວາມຍາກລຳບາກນັ້ນແມ່ນແນ່ນອນ ແລະ ເປັນພາກສ່ວນທີ່ຈຳເປັນຂອງຄວາມກ້າວໜ້ານິລັນດອນຂອງເຮົາ. ເມື່ອປະເຊີນກັບຄວາມຍາກລຳບາກ, ຢ່າປ່ອຍໃຫ້ສິ່ງທີ່ທ່ານບໍ່ເຂົ້າໃຈທັງໝົດທຳລາຍທຸກສິ່ງທີ່ທ່ານຮູ້ຢູ່ແລ້ວ. ໃຫ້ອົດທົນ, ຈັບເອົາຄວາມຈິງນັ້ນໄວ້ໃຫ້ແໜ້ນ; ຄວາມເຂົ້າໃຈຈະຕິດຕາມມາ. ບັນຫາກໍເໝືອນໝອກແຫ່ງຄວາມມືດອັນຕຶບໜາ ທີ່ສາມາດເຮັດໃຫ້ເຮົາຕາບອດ ແລະ ເຮັດໃຫ້ໃຈຂອງເຮົາແຂງກະດ້າງ. ຖ້າຫາກເຮົາບໍ່ຈັບພຣະຄຳຂອງພຣະເຈົ້າ “ໄວ້ໃຫ້ແໜ້ນຕະຫລອດເວລາ,”7 ແລະ ດຳລົງຊີວິດຕາມພຣະຄຳຂອງພຣະເຈົ້າ, ເຮົາຈະສັບສົນທາງວິນຍານ ແທນທີ່ຈະມີຈິດໃຈທີ່ສະແຫວງຫາສິນທຳ. ຈົ່ງຄົ້ນຄວ້າພຣະຄຳພີມໍມອນ ແລະ ຖ້ອຍຄຳຂອງສາດສະດາທີ່ມີຊີວິດຢູ່ ທຸກໆມື້, ທຸກໆມື້, ທຸກໆມື້! ມັນເປັນຂໍກະແຈທີ່ນຳໄປສູ່ຄວາມລອດທາງວິນຍານ ແລະ ຫລີກລ້ຽງການຫລອກລວງ. ປາດສະຈາກສິ່ງນີ້, ເຮົາຈະຫລົງທາງ ທາງວິນຍານ.
5. ຢ່າປ່ອຍຕົວໃຫ້ສັບສົນ ແລະ ຖືກຫລອກລອງ
ທີ່ຈະເອົາໃຈໃສ່ຄື ທີ່ຈະໃຫ້ຄວາມສົນໃຈຢ່າງລະມັດລະວັງ. ການເອົາໃຈໃສ່ຜູ້ຄົນທີ່ບໍ່ເຊື່ອໃນພຣະຄຣິດຈະບໍ່ຊ່ອຍໃຫ້ທ່ານພົບພຣະອົງ. ການຊອກຫາຄວາມຮູ້ຂອງຄຳສັບ #spaciousbuilding ໃນອິນເຕີແນັດ ຈະບໍ່ນຳທ່ານໄປສູ່ຄວາມຈິງ. ຈະຫາມັນບໍ່ພົບຢູ່ທີ່ນັ້ນ. ມີພຽງແຕ່ພຣະຜູ້ຊ່ອຍໃຫ້ລອດເທົ່ານັ້ນທີ່ມີ “ຖ້ອຍຄຳແຫ່ງຊີວິດນິລັນດອນ.”8 ທຸກສິ່ງອື່ນທັງໝົດບໍ່ສຳຄັນເລີຍ. ອາຄານຫລັງກວ້າງໃຫຍ່ນັ້ນຄື “ຄວາມຄິດຝັນອັນບໍ່ມີປະໂຫຍດ ແລະ ຄວາມທະນົງໃຈ”9 ຂອງໂລກ, ອີກໃນຄຳໜຶ່ງ ກໍຄືສິ່ງທີ່ດຶງດູດຄວາມສົນໃຈ ແລະ ເປັນການຫລອກລວງ. ມັນເຕັມໄປດ້ວຍຜູ້ຄົນທີ່ແຕ່ງຕົວດີ ຜູ້ທີ່ເບິ່ງຄືວ່າມີທຸກສິ່ງ. ແຕ່ເຂົາເຈົ້າເຍາະເຍີ້ຍພຣະຜູ້ຊ່ອຍໃຫ້ລອດ ແລະ ຜູ້ທີ່ຕິດຕາມພຣະອົງ. ເຂົາເຈົ້າ “ຍອມຮ່ຳຮຽນຢູ່ສະເໝີ ແຕ່ບໍ່ອາດຈະເຖິງການສັງເກດຮູ້ຄວາມຈິງໄດ້ຈັກເທື່ອ.”10 ເຂົາເຈົ້າອາດຖືກຕ້ອງຕາມຄວາມເຫັນຊອບຂອງໂລກ, ແຕ່ເຂົາເຈົ້າໄດ້ຫລົງທາງ ທາງວິນຍານ.
6. ຢູ່ໃກ້ຕົ້ນໄມ້ແຫ່ງຊີວິດນັ້ນ
ຂ່າວສານຂອງລີໄຮແມ່ນໃຫ້ຢູ່ໃກ້ຕົ້ນໄມ້. ເຮົາຢູ່ທີ່ນີ້ເພາະເຮົາໄດ້ປ່ຽນໃຈເຫລື້ອໃສຕໍ່ພຣະຜູ້ເປັນເຈົ້າ. ແອວມາໄດ້ສອນວ່າ, “ຈົ່ງເບິ່ງ, ພຣະອົງໄດ້ປ່ຽນໃຈຂອງເຂົາເຈົ້າ; ແທ້ຈິງແລ້ວ, ພຣະອົງໄດ້ປຸກໃຫ້ເຂົາເຈົ້າຕື່ນຈາກການນອນຫລັບສະໜິດ, ແລະ ເຂົາເຈົ້າໄດ້ຕື່ນຂຶ້ນມາຫາພຣະເຈົ້າ.”11 ຂະນະທີ່ເຮົາຍອມຖະຫວາຍໃຈຂອງເຮົາໃຫ້ແດ່ພຣະເຈົ້າ, ພຣະວິນຍານບໍລິສຸດຈະປ່ຽນທຳມະຊາດແທ້ໆຂອງເຮົາ, ເຮົາຈະເຫລື້ອມໃສແດ່ພຣະຜູ້ເປັນເຈົ້າ, ແລະ ຈະບໍ່ສະແຫວງຫາອາຄານຫລັງກວ້າງໃຫຍ່ນັ້ນ. ຖ້າຫາກເຮົາເຊົາເຮັດສິ່ງເຫລົ່ານັ້ນທີ່ນຳການເຫລື້ອມໃສທີ່ເລິກຊຶ້ງມາໃຫ້, ເຮົາຈະອ່ອນແອທາງວິນຍານ. ການປະຖິ້ມຄວາມເຊື່ອແມ່ນກົງກັນຂ້າມກັບການເຫລື້ອມໃສ.
ຕໍ່ຜູ້ສອນສາດສະໜາໃນອາດີດ ແລະ ໃນປະຈຸບັນ: ແອວເດີ ແລະ ຊິດສະເຕີທັງຫລາຍ, ທ່ານບໍ່ສາມາດກັບຈາກການເຜີຍແຜ່ສາດສະໜາ, ກັບຄືນໄປສູ່ວິຖີທາງຂອງໂລກ, ແລະ ໃຊ້ເວລາຫລາຍໆຊົ່ວໂມງເອົາຄະແນນໃນວິດີໂອເກມທີ່ໄຮ້ປະໂຫຍດ ປາດສະຈາກການເຮັດໃຫ້ທາງວິນຍານຂອງທ່ານອ່ອນແອລົງ. ທັງພວກທ່ານບໍ່ສາມາດປ່ອຍຕົວໃຫ້ພົວພັນກັບຮູບພາບລາມົກໃນອິນເຕີແນັດ ແລະ ບໍ່ເອົາໃຈໃສ່ຄຸນນະທຳ ແລະ ພົມມະຈັນ ປາດສະຈາກຜົນສະທ້ອນທີ່ຮ້າຍແຮງທາງວິນຍານ. ຖ້າຫາກທ່ານສູນເສຍພຣະວິນຍານ, ທ່ານກໍໄດ້ຫລົງທາງໄປແລ້ວ. ຢ່າປ່ອຍຕົວໃຫ້ສັບສົນ ແລະ ຖືກຫລອກລວງ.
ສານຸສິດທີ່ແທ້ຈິງ ໄດ້ຕື່ນຂຶ້ນມາ ຢູ່ໃນພຣະເຈົ້າຕໍ່ໄປ ແຕ່ລະວັນ ໃນການອະທິຖານເປັນສ່ວນຕົວທີ່ມີຄວາມໝາຍ, ໃນການສຶກສາພຣະຄຳພີຢ່າງຕັ້ງໃຈ, ໃນການເຊື່ອຟັງ, ແລະ ໃນການຮັບໃຊ້ທີ່ບໍ່ເຫັນແກ່ຕົວ. ຈົ່ງຢູ່ໃກ້ຕົ້ນໄມ້ແຫ່ງຊີວິດນັ້ນ ແລະ ຈົ່ງຕື່ນຢູ່ຕໍ່ໄປ.
ເມື່ອຫລາຍປີກ່ອນ, ຊິດສະເຕີເພຍສັນ ແລະ ຂ້າພະເຈົ້າໄດ້ຖືກເອີ້ນໃຫ້ເປັນປະທານເຜີຍແຜ່ຢູ່ ເມືອງຕາໂຄມາ ລັດວໍຊິງຕັນ. ການເອີ້ນນັ້ນເປັນເລື່ອງທີ່ປະຫລາດໃຈແທ້ໆ. ດ້ວຍຄວາມກັງວົນເລັກນ້ອຍ ຂ້າພະເຈົ້າໄດ້ຂໍເຂົ້າພົບ ທ່ານປະທານ ແລະ ຜູ້ບໍລິຫານບໍລິສັດ ບ່ອນທີ່ຂ້າພະເຈົ້າໄດ້ທຳງານ ແລະ ໄດ້ແຈ້ງໃຫ້ເຂົາເຈົ້າຮູ້ເຖິງການເອີ້ນໄປເຜີຍແຜ່ຂອງຂ້າພະເຈົ້າ. ກໍເຫັນໄດ້ຢ່າງແຈ່ມແຈ້ງວ່າ ເຂົາເຈົ້າບໍ່ພໍໃຈນຳການຕັດສິນໃຈຂອງຂ້າພະເຈົ້າທີ່ຈະໄປຈາກບໍລິສັດ. ເຂົ້າເຈົ້າໄດ້ຖາມວ່າ, “ເຈົ້າໄດ້ຕັດສິນໃຈເຮັດສິ່ງນີ້ ແຕ່ຕອນໃດ, ແລະ ເປັນຫຍັງເຈົ້າຈຶ່ງບໍ່ໄດ້ບອກເລື່ອງນີ້ກັບພວກເຮົາໄວກວ່ານີ້?”
ທັນໃດນັ້ນ, ຄຳຕອບທີ່ເລິກຊຶ້ງໄດ້ເຂົ້າມາໃນຈິດໃຈຂອງຂ້າພະເຈົ້າ. ຂ້າພະເຈົ້າໄດ້ຕອບວ່າ, “ຂ້ອຍໄດ້ຕັດສິນໃຈເລື່ອງນີ້ຕອນເປັນຊາຍໜຸ່ມອາຍຸ 19 ປີ, ເມື່ອຂ້ອຍໄດ້ເຮັດພັນທະສັນຍາສັກສິດກັບພຣະເຈົ້າໃນພຣະວິຫານທີ່ຈະຕິດຕາມພຣະຜູ້ຊ່ອຍໃຫ້ລອດ. ຂ້ອຍໄດ້ສ້າງພື້ນຖານຂອງຊີວິດຢູ່ເທິງພັນທະສັນຍາເຫລົ່ານັ້ນຕະຫລອດມາ, ແລະ ຂ້ອຍຕັ້ງໃຈຢ່າງເຕັມທີ ທີ່ຈະຮັກສາມັນໃນເວລານີ້.”
ເມື່ອເຮົາໄດ້ເຂົ້າເຮັດພັນທະສັນຍາກັບພຣະເຈົ້າແລ້ວ, ຈະຄືນຄຳສັນຍາບໍ່ໄດ້. ການຍິນຍອມ, ການຍອມແພ້, ແລະ ການສູນເສຍພະລັງບໍ່ແມ່ນທາງເລືອກ. ໃນອານາຈັກຂອງພຣະເຈົ້າ, ມີມາດຕະຖານແຫ່ງຄວາມດີເລີດສຳລັບຄວາມສູງສົ່ງ. ມັນຮຽກຮ້ອງການເປັນສານຸສິດທີ່ກ້າຫານ! ບໍ່ມີບ່ອນຫວ່າງສຳລັບສານຸສິດລະດັບປານກາງ ຫລື ທີ່ພໍໃຈໃນຕົນເອງ. ລະດັບປານກາງເປັນສັດຕູກັບຄວາມດີເລີດ, ແລະ ຄຳໝັ້ນສັນຍາລະດັບປານກາງ ຈະຂັດຂວາງທ່ານຈາກການອົດທົນຈົນເຖິງທີ່ສຸດ.
ຖ້າຫາກທ່ານດີ້ນລົນຢູ່, ສັບສົນ, ຫລື ໄດ້ຫລົງທາງ ທາງວິນຍານ, ຂ້າພະເຈົ້າຊຸກຍູ້ທ່ານໃຫ້ເຮັດສິ່ງໜຶ່ງທີ່ຂ້າພະເຈົ້າຮູ້ວ່າຈະຊ່ອຍໃຫ້ທ່ານກັບຄືນມາເຮັດສິ່ງທີ່ພຣະຜູ້ເປັນເຈົ້າຄາດຫວັງ. ໃຫ້ເລີ່ມສຶກສາພຣະຄຳພີມໍມອນພ້ອມດ້ວຍການອະທິຖານຄືນອີກ ແລະ ດຳລົງຊີວິດຕາມຄຳສອນຈາກນັ້ນ, ທຸກໆມື້, ທຸກໆມື້, ທຸກໆມື້! ຂ້າພະເຈົ້າເປັນພະຍານເຖິງອຳນາດທີ່ເລິກຊຶ້ງໃນພຣະຄຳພີມໍມອນ ທີ່ຈະປ່ຽນຊີວິດຂອງທ່ານ ແລະ ເສີມສ້າງຄວາມຕັ້ງໃຈຂອງທ່ານທີ່ຈະຕິດຕາມພຣະຄຣິດ. ພຣະວິນຍານບໍລິສຸດຈະປ່ຽນໃຈຂອງທ່ານ, ແລະ ຊ່ອຍໃຫ້ທ່ານເຫັນເລື່ອງດັ່ງທີ່ເປັນຈິງ.12 ພຣະອົງຈະສະແດງໃຫ້ທ່ານເຫັນສິ່ງທີ່ທ່ານຕ້ອງເຮັດຕໍ່ໄປ. ຕໍ່ໄປນີ້ຄືຄຳສັນຍາຂອງນີໄຟຕໍ່ທ່ານວ່າ:
“ແລະ ຂ້າພະເຈົ້າຕອບພວກເຂົາ … ຜູ້ໃດທີ່ຈະເຊື່ອຟັງພຣະຄຳຂອງພຣະເຈົ້າ ແລະ ຈະຍຶດໝັ້ນແລ້ວ, ພວກເຂົາຈະບໍ່ຕາຍເລີຍ; ທັງສິ່ງລໍ້ລວງ ແລະ ລູກສອນໄຟຂອງຄູ່ຕໍ່ສູ້ກໍຈະບໍ່ອາດເອົາຊະນະໂດຍຈະເຮັດໃຫ້ພວກເຂົາຕາບອດ ເພື່ອຈະນຳພວກເຂົາໄປສູ່ຄວາມພິນາດໄດ້.
“ດັ່ງນັ້ນ, ຂ້າພະເຈົ້າ … ໄດ້ຊັກຊວນໃຫ້ພວກເຂົາເອົາໃຈໃສ່ພຣະຄຳຂອງພຣະເຈົ້າ ແລະ ຈື່ຈຳທີ່ຈະຮັກສາພຣະບັນຍັດຂອງພຣະອົງສະເໝີໄປໃນທຸກສິ່ງ.”13
ອ້າຍເອື້ອຍນ້ອງທັງຫລາຍ, ການອົດທົນຈົນເຖິງທີ່ສຸດ ເປັນການທົດສອບທີ່ຍິ່ງໃຫຍ່ ຂອງການເປັນສານຸສິດ. ການເປັນສານຸສິດຂອງເຮົາທຸກໆວັນ ຈະກຳນົດຈຸດໝາຍປາຍທາງນິລັນດອນຂອງເຮົາ. ຈົ່ງຕື່ນຂຶ້ນຫາພຣະເຈົ້າເຖີດ, ຈົ່ງຍຶດໝັ້ນຢູ່ກັບຄວາມຈິງ, ຈົ່ງຮັກສາພັນທະສັນຍາອັນສັກສິດຂອງພຣະວິຫານຂອງທ່ານ, ແລະ ຈົ່ງຢືນຢູ່ໃກ້ຕົ້ນໄມ້ແຫ່ງຊີວິດນັ້ນ!
ຂ້າພະເຈົ້າເປັນພະຍານເຖິງພຣະຄຣິດຜູ້ໄດ້ຟື້ນຄືນພຣະຊົນແລ້ວ. ຂ້າພະເຈົ້າຮູ້ວ່າ ພຣະອົງຊົງພຣະຊົນຢູ່. ຄວາມປາດຖະໜາທີ່ຍິ່ງໃຫຍ່ຂອງຂ້າພະເຈົ້າແມ່ນວ່າ ຂ້າພະເຈົ້າຈະຈິງຈັງ ແລະ ຊື່ສັດຈົນເຖິງວາລະສຸດທ້າຍ ໃນການຕິດຕາມຕົວຢ່າງທີ່ສະຫງ່າງາມຂອງພຣະອົງ. ໃນພຣະນາມອັນສັກສິດຂອງພຣະຜູ້ເປັນເຈົ້າ ພຣະເຢຊູຄຣິດ, ອາແມນ.