Mihmi Limwahn Tuhkehu

Sang Elder Kevin W. Pearson

En Isiakan

Kilel

En Lehi ah ouraman duwen tuhkehn komouro wia mehn karasaras kehlail ehu ohng me pid duwen dadaur lel ni imwi.

Mwohnte President Heber J. Grant ah kapilsalehdala, emen Kaun Lapalap en Mwomwohdiso pwarala imwehu. Mwohn ah pahn mwesel, President Grant kapakap mahsanih, “Maing Koht, kapaiehda pwe I en dehr kesehla ahi kadehde oh I en loaloapwoat lel imwi.” ¹ Mwurin ah wia President en Mwomwohdiso kerenieng soupar 27, ih ah kapakap en me. Ah karasaras wia mehn kataman mwahu ehu me sohte aramas emen, me saledek sang songosong en Sehdan. Nein Sehdan dipwsou kehlail riau iei kedirapwa oh pitihdi

Dadaur lel imwi iei wiwiahn tohnpadahk mehlel oh e kesempwal ong mour soutuk. Ahpw ansou me kitail kin loieng nan kasongsong oh kahpwal, kitail kin kalapw rong “katengetengdi wasahn.” Mweidehngie I pahn kawehwe ni sansal me “katengetengdi wasahn” e sohte wia padahk en wiwiahn rongamwahuo. Dadaur lel imwi wehwehki kalapw kohkohdo rehn Krais oh unsekla reh.

Ma dadaur lel imwi kesempwal ohng mour soutuk, dahme kahreda kitail kin apwaliki loalaopwoat? Kitail kin luwet ansou me kitail kin mihla nan pwungen pilipil riau. Peik ahpw sohte inangih oh sohte kolokol inou koaros kin kawehla pwoson. Dadaur lel imwi kin anahne kitail en udahn mehlel ong Soundoro oh atail inou kan.

Ahn Lehi auraman en tuhkehn komouro iei soi en karasaras mwahu ohng dadaur lel imwi. Menlau kapakap oh onopiki oh medemedewe auraman en Lehi; oh kahpw karasahieng pein kowe. Ni ahmw pahn wia, medemedewe padahk en wiwia weneu me pahn soweseikitail dadaur lel imwi.

1. Dehr Monokehla Kapakap

Ahn Lehi auramano tepida wasa me rotorot oh sakanakan. ²Emen emen kitail kehnehr ahnsou rotorot oh kalapwuk. “Ahnsou me mour kin rotorotala oh kasangat, dehr moanokehla kapakap.” ³ Idawehn karasaras en President Heber J. Grant. Kapakapki kehl en dadaur lel imwi. Kalelapak rehn Sahm Nanleng, “Dahme komwi kupwuriki I en wia?”

2. Kohdo rehn Krais oh Unsekla Reh

Tuhkehn komouro iei poahson en ahn Lehi auramano. Soahng koaros kin doke tuhkehn komouro. Tuhkehu rasohng Krais, me wia kadehdepen limpoak en Koht. Wahn tuhkehu iei Sapwellime Tomw poatoapoato oh e wia kadehdepen limpoak en Koht. Mour soutuk rehn irail akan me kitail poakpoake udahn mwahu sang meh koaros. Pwe kitail en wehwehki kisakiswet, kitail udahn anahne kohdo rehn Krais oh unsekla reh. ⁴Ih me ahl, me mehlel, oh mour. ⁵ Wiahda oh kolokol inou sarawih kan pahn sowese kitail en tengedi rehn Krais. Kitail kak alehdi soangen pweidah kei nan atail mour oh wiwia, ahpw ni imwilahu, ma kitail sohte alehda inou sarawih kan en idawehn Krais oh loaloapwoatohng inou kan, kitail udahn sohte wehwehki kahrepen atail mour.

3. Sokala Mwowe ni Pwoson

Mie ahl ehu me kohla ni tuhkehn komouro, ong Krais. E inen oh tehtik, kehlail oh pwung. Sapwellimen Koht kosonned akan kehlail ahpw sohte idi. Irail kin doare kitail sang kahpwal en palingehn oh paliwar oh sile kitail sang salongala

Peik kin kakehlailiala pwoson Krais. Pwoson iei padahk en wiwia oh manaman. Kalapw ididawehn karasaras en Soundoro kin kapwurehdo manaman oh katehlapiala koaiek nan palingehn. Ma sohte kakehlailpen oh sawasepen Tomwo, e pahn apwalen kekeid nan ahlo oh dadaur.

“Kitail anahne sokala mwowe oh tengediong rehn Krais.”⁶

4. Pwuhk en Mormon Iei Kih en Momour Nan Palingen

Seilok en nan mour wet e apwal. E mengei kitail en kediropwkihla ehu soahng, aluhsang pohn ahlo oh salongala. Kitail sohte kak ruksang apwal oh e kesempwalohng kitail ni atail kekeirdahng mour soutuk. Ahnsou me kasongosong kin kohdo, dehr mweidehng mehkot me ke sohte nohn wehwehki, en kawehla soang koaros me ke ese. Kanangamah, koledi teng me mehlel; weweh pahn kohdo. Apwal akan duwehte ediniei rotorot me kak kamaskunihla palingenetail oh kakelwakahla mongiong kan. ⁷ Ma kitail sohte pahn kalapw kolokoleteng mahsen en Koht, oh momouriki, palingenetail pahn maskunla. Wadek Pwuhk en Mormon oh mahsen en soukohp ieias akan rahn koaros, rahn koaros, rahn koaros! E wia kih en momour ni palingehn oh dorehsang lohdi. Ma soh, kitail pahn salongala ni palingehn.

5. Dehr Kediropwkihla ehu soang oh Lohdi

Kilang wehwehki kasawih mwahu. Kilikilang irail me sohte kamehlele Krais sohte pahn soweseiuk diar Ih. Raparapahki eripit nan dipsou en media kan sohte pahn kahluwaiuklahng mehlel. E sohte pahn dierek wasahu. Ihte Soundoro me sapwellimaniki “mahsen en mour soutuk.” ⁸ Soang koaros sohte katepe. Ihmw lapalahu rasohng “madamadau likamw akan oh kahngodi⁹ en sampah, me pil wehwehki, mehkot me kin kedirapwaiuk oh pitihiuk. E audauki diren aramas me kapwat lingan oh mwomwen me irail ahneki mehkoaros. Ahpw irail kin kepitiki Soundoro oh irail akan me kin idawehn ih. Irail kin kalakaludehla arail loalokong ahpw sohte kak esehla me mehlelo. ¹⁰ Irail kak pwung mwohn aramas, ahpw palingenirail salongala.

6. Mihmihte limahn Tuhkehu

Ahn Lehi kaweido iei en mihmihte limahn tuhkehu. Kitail mihmi pwe kitail wiliakapwehng Kauno. Alma padahngki me Kauno wekidala arail mongiong kan, E ketin kapiriraildahsang meir kelik ehu, oh irail piridahng arail Koht. ¹¹ Ni atail pahn mweidehng Koht atail mongiong kan, Ngehn Sarawi pahn wekidala mwomwotail kan, oh kitail pahn wiliakapwehng Kauno, oh sohla rapahki ihmw lapalahu. Ma kitail pahn udihsang wia soang kan me kin kakairada atail wiliakapw, kitail pahn kaluwetehla palingenetail. Salongala iei wikedek en wilakapwala.

Ong missionary koaros mahs oh met: elder oh sister kan, kumwail sohte kak pwurasang amwail misin, pwurehng pwuralahng mour en mahs, oh kawehkihla mwahl amwail ansou mwadmwadongki video games sohte katepe kan oh kaluwetehla nan palingehn. De pil kamwaitkinuhk kilang kilel suwed kan oh soikala mwakelekel oh sohte ale kalokepe. Ma Ngehno sohla ianguhk, ke pahn salongala. Dehr kediropwkihla soang pwuko oh lohdi.

Tohn padahk mehlel kan kin kalapw piridahng Koht rahn koaros ni arail kin wia kapakap, wadek pwuhk sarawi, pein peik, oh papah. Mihmi limwahn tuhkehu oh pepehd.

Sounpar kei samwalahro, Sister Pearson oh Ngehi malipilipieng en apwalih Misin en Washington Tacoma. Malipilipo udahn koapwuriamwei. Ni masopwehk, I tuhwong chairman oh CEO en kompani me I kin doadoahkehngo oh wewehkihengirail duwen ahi malipilipo. Irail nsensuedkihla ahi pilipil en kohkohsang kompanio. “Iahd ke wiahda pilipil en, oh dahme kahreda ke sohte ndahieng kiht mwowe?” Irail idek,

Nan ahnsouohte, pasapeng kehlail ehu kohdo nan ahi madmadau. I nda, “I wiahda pilipilwet ansou me I sounpar 19, ahnsou me I wiahda inou kan rehn Koht nan tehnpas sarawi pwe I en idawehn Soundoro. Ahi mour poahsondahsang nan inou pwukat, oh I pil pahn kapwaiadahte inou kau rahn wet.”

Ansou me kitail kin alehdahier inou kan rehn Koht, kitail sohte kak pwurala mwuri. Luwet, pwangahki, sohla kak sohte wia ahl ehu. Nan wein Koht, mie koasondi ehu ong pweidahn mour en Koht de lapalapala. Koasondio anahne tohn padahk loaloapwoat! Sohte pere ong tohn padahk me average me duweht pali laud. Average iei imwintihti en pweida, oh inou en average kan pahn kahrehda ahmw sohte pahn kak dadaur lel imwi.

Ma ke luluwet, sawehwe, de salongala ni palingehn, I lukeiuk ken wia dahme I ese pahn soweseiuk pwurodo nan ahlo. Tepda pwurehng onopiki Pwuhk en Mormon oh momourki padahngkan, rahn koaros, rahn koaros, rahn koaros! I kadehdehki manaman en Pwuhk en Mormon me pahn wekidala ahmw mour oh kakehlailiala ahmw inangih idawehn Krais. Ngehn Sarawi pahn wekidala ahmw mongiong, oh soweseiuk kilang mehkot nin duwen udahn mwomwerail. ¹² E pahn kasalehieng uhk dahme ke pahn anahne wia mwuri. Ih inou me Nephi inoukihonguhk me:

“Nehpi patawanohng irail … mehmen me pahn karonge mahsen en Koht, oh kohlokol tehng, irail sohte pahn kamwomwala; pil iangahki songosong kan oh kahpwal akan sohte pahn kalowehkiniraildi maskun, oh wairailahng mehla laud.

Ngehi eri … kaweidkin ira … me ira anahne alehda mahsen en Koht oh tamataman kolokol sapwellime kosonned akan ansou koaros ¹³

Riei ohl oh lih akan, dadaur lel imwi iei des laud ehu ohng tohnpadahk. Atail wiwiahn tohnpadahk rahn koaros pahn koasonehdi wasa kitail pahn kohla mwurin mour wet. Piridahng Koht, koledi teng mehleo, kolokol amwail inou en nan tehnpas sarawih kan, oh mihmite limahn tuhkehu!

I kadehdehki Krais me asadahro. I ese me E ketin ieias. Dahme I keieu mwahuki iei meI pahn mehlel oh loaloapwoatehng indawehn Sapwellime karasaras mahu lau lel imwi. Ni mwar sarawi en Sises Krais, ahmen.