Tus Nplij Siab

Kuv cov muam, kuv zoo siab uas kuv koom nrog nej. Ua rau kuv xav txog kuv niam, kuv tus poj niam, kuv cov ntxhais, kuv cov nyab, kuv cov ntxhais xeeb ntxwv—feem coob nyob no. Kev sib ntsib no ua rau kuv ris lawv txiaj heev. Kuv paub tias qhov us kuv muaj tsev neeg zoo li no thiab tsev neeg lub neej uas zoo kawg twb yog vim lawv sawv daws muaj tus Cawm Seej nyob hauv lawv lub neej. Hmo no peb tau nco txog Nws thaum peb hu nkauj, thov Vajtswv, thiab mloog tej zaj lus zoo. Ib qho cwj pwm ntawm tus Cawm Seej uas ua rau peb zoo siab tshaj plaws yog Nws txoj kev khuv leej uas nyob tas mus li.

Hmo no nej paub tias Nws paub nej thiab Nws hlub nej. Nej paub tias Nws hlub cov uas nyob ib puag ncig nej. Lawv yog nej cov viv ncaus, cov ntxhais ntsuj plig ntawm peb Leej Txiv Saum Ntuj Ceeb Tsheej. Nws hlub lawv ib yam li Nws hlub nej. Nws to taub lawv tej kev nyuaj siab. Nws xav tsom kwm lawv.

Kuv zaj lus hais rau nej hmo no yog ib zaj uas hais tias nej yuav tsum pab Nws nplij cov neeg uas xav tau kev nplij siab. Nej yuav ua tau nej txoj hauj lwm no zoo dua yog nej paub Nws ua li cas kom teb lawv tej lus thov.

Ntau tus thov Leej Txiv Saum Ntuj Ceeb Tsheej kom txais kev pab ris lawv tej nra uas yog kev nyuaj siab, kev kho siab, thiab kev ntshai. Leej Txiv Saum Ntuj Ceeb Tsheej yeej mloog lawv tej lus thov thiab to taub lawv xav tau dab tsi. Nws thiab Nws Leej Tub uas Nws Hlub, Yexus Khetos tus uas tau sawv rov los, tau cog lus tias lawv yuav pab.

Yexus Khetos tau cog lus li no hais tias:

“Nej cov uas sab sab vim nej ris nra hnyav, nej cia li los cuag kuv, kuv yuav cia nej so.

“Kuv yog tus muaj lub siab dawb siab zoo, nej cia li los kwv kuv tus quab thiab kawm tej uas kuv qhia, nej thiaj yuav tau so.

“Tus quab uas kuv muab rau nej kwv yooj yim kwv, thiab lub nra uas kuv muab rau nej ris, lub ntawd tsis hnyav.”¹

Nws txoj Kev Theej Txhoj ua rau tej nra uas Nws cov tub qhe zoo yuav tsum ris hauv lub neej no sib dua li qub. Kev txhaum los Nws yeej tshem tau lub nra ntawd, tiam sis tej kev sim siab ntawm lub neej no tseem yog ib lub nra hnyav rau tib neeg zoo.

Nej twb pom tib neeg zoo uas nej hlub raug tej kev sim siab hauv lawv lub neej. Nej tau xav pab lawv. Muaj ib qho vim li cas nej muaj kev khuv leej hlub lawv.

Nej yog cov mej zeej ntawm Yexus Khetos lub Koom Txoos. Nej lub siab twb pib hloov loj heev thaum nej koom Nws lub Koom Txoos. Nej tau khi lus, thiab nej tau txais kev cog lus uas ua rau nej pib rais los ua neeg tshiab.

Thaum Amas hais lus nyob ntawm Maumoos lub Pas Dej, nws piav txog qhov uas nej cog lus thaum nej ua kev cai raus dej thiab qhov ntawd lub ntsiab yog dab tsi rau nej thiab txhua tus nyob ib ncig nej. Nws tau hais rau cov uas tab tom yuav ua kev khi lus ib yam li nej tau ua lawm, thiab lawv kuj tau txais cov lus cog tseg uas tus Tswv tau cog lus rau nej:

“Saib seb, ntawm no yog cov dej Maumoos (vim lawv thiaj tau raug hu li ntawd) thiab nim no, li uas nej xav los rau hauv Vajtswv pab, thiab raug hu ua nws cov neeg, thiab ib leeg txaus siab ris ib leeg tej nra, xwv kom lawv thiaj li yuav sib;

“Muaj tseeb tiag, thiab txaus siab nyuaj siab nrog cov uas nyuaj siab; muaj tseeb tiag, thiab nplij cov uas xav tau txoj kev nplij siab, thiab sawv ua Vajtswv tej tim khawv rau txhua lub caij nyoog thiab rau tag nrho txhua txhia yam, thiab nyob tag nrho txhua qhov chaw uas nej yuav nyob, kom mus txog thaum tuag, xwv kom nej yuav raug txhiv dim los ntawm Vajtswv, thiab raug suav nrog cov uas nyob hauv thawj txoj kev sawv hauv qhov tuag rov qab los, xwv kom nej yuav tau txoj sia nyob mus ib txhis.”²

Qhov no yog vim li cas nej xav pab ib tug neeg uas ris nra hnyav vim nws nyuaj siab thiab raug teeb meem mus tom ntej. Nej tau cog lus tias nej yuav pab lawv kom lawv tej nra yuav sib thiab lawv yuav txais kev nplij siab. Nej tau txais lub hwj chim kom pab ua rau tej nra no sib thaum nej tau txais lub txiaj ntsim Vaj Ntsuj Plig Dawb Huv.

Ua ntej Nws yuav raug ntsia tus ntoo khaub lig, tus Cawm Seej piav txog txoj kev uas Nws siv kom ua rau tej nra sib thiab txhawb lawv dag zog kom lawv ris tau ua ntej Nws yuav raug ntsia saum ntoo khaub lig. Nws paub tias Nws cov thwj tim yuav tu siab. Nws paub tias lawv yuav ntshai txog yav tom ntej. Nws paub tias lawv yuav tsis paub tseeb tias lawv puas muaj peev xwm ua hauj lwm ntxiv.

Yog li ntawd Nws cog lus rau lawv ib yam li Nws cog lus rau peb thiab tag nrho Nws cov thwj tim tseeb:

“Kuv yuav thov Leej Txiv, thiab nws yuav txib dua ib tug [Nplij Siab] los, tus ntawd yuav nrog nej nyob mus ib txhis.

“Nws yog Vaj Ntsuj Plig, nws yuav qhia Vajtswv zaj uas yog qhov tseeb rau nej. Neeg ntiaj teb tsis lees yuav nws, rau qhov lawv tsis pom nws los sis tsis paub nws. Tiam sis nej paub nws, rau qhov nws nrog nej nyob thiab nws yuav nyob hauv nej lub siab.”³

Ces Nws cog lus tias:

“Tus [Nplij Siab] uas yog tus Vaj Ntsuj Plig tus Dawb Huv uas kuv thov kom Leej Txiv txib los, nws yuav qhia txhua yam rau nej thiab pab kom nej nco txhua yam uas kuv tau qhia rau nej lawm.

“Kuv muab kuv txoj kev kaj siab tso rau nej; txoj kev kaj siab uas kuv muab pub rau nej, kuv tsis muab rau nej li neeg ntiaj teb muab. Nej tsis txhob txhawj, tsis txhob nyuaj siab thiab tsis txhob ntshai.”⁴

Tau ob peb lim tiam no kuv tau pom muaj raws li kev cog lus tias yuav xa tus Vaj Ntsuj Plig Dawb Huv no nyob hauv Vajtswv cov me nyuam lub neej, cov uas thov Vajtswv kom lawv tej nra yuav sib me ntsis. Txhua lub sij hawm lawv tej nra sib me ntsis ib yam li tus Tswv cog lus. Nws thiab Leej Txiv Saum Ntuj Ceeb Tsheej tau xa tus Vaj Ntsuj Plig Dawb Huv los nplij lawv lub siab.

Tsis ntev tas los muaj peb tiam ntawm ib tsev neeg uas nyuaj siab vim ib tug me nyuam tub muaj tsib xyoo xiam lawm. Nws raug xwm txheej thaum nws tsev neeg mus ua si. Kuv twb muaj cib fim pom hais tias tus Tswv foom koob hmoov rau cov neeg rau siab ntseeg kom lawv txais kev pab thiab dag zog lawv thiaj nyiaj tau.

Kuv twb pom tus txheej txheem uas tus Tswv siv kom ua rau lawv tej nra sib. Ib yam nej yuav ua ntau zaus hauv nej lub neej, kuv yog tus Tswv tus tub qhe uas “nyuaj siab nrog cov uas nyuaj siab … thiab nplij cov uas xav tau txoj kev nplij siab.”⁵

Vim kuv paub tias qhov no muaj tseeb, kuv zoo siab thiab nyob kaj siab lug thaum tus me nyuam tub pog thiab yawg caw kuv ntsib nkawd thiab nws niam nws txiv ua ntej pib lub ntees tuag.

Kuv tau thov Vajtswv kom paub tias kuv yuav pab tus Tswv nplij lawv lub siab li cas. Lawv zaum nrog kuv nyob hauv kuv chav nyob. Kuv taws teeb rau hauv qhov cub kom chav ntawd sov sov.

Kuv tau hais rau lawv hais tias kuv hlub lawv. Kuv tau qhia lawv tias kuv tau hnov tus Tswv txoj kev hlub lawv. Kuv hais ob peb lo lus qhia lawv tias kuv pab lawv nyuaj siab tiam sis tus Tswv yog tib tug uas paub lawv txoj kev nyuaj siab tiag tiag.

Tom qab kuv hais ob peb lo lus ntawd, kuv txais kev tshoov siab kom cia lawv tham txog lawv tej kev xav.

Thaum peb sib tham ua ke tau ib teev, lawv tau hais lus ntau tshaj kuv. Kuv hnov ntawm lawv lub suab thiab pom hauv lawv qhov muag hais tias tus Vaj Ntsuj Plig Dawb Huv tau tshoov lawv lub siab. Lawv hais lus tim khawv, hais txog tej yam uas tshwm sim thiab lawv xav li cas. Tus Vaj Ntsuj Plig Dawb Huv twb muab kev kaj siab lug uas los nrog kev cia siab tias yuav muaj txoj sia nyob mus ib txhis rau lawv, lub sij hawm uas tus me nyuam tub uas tsis muaj kev txhaum thaum nws tuag no, yuav nrog nraim lawv nyob mus ib txhis.

Thaum kuv foom koob hmoov pov thawj hwj rau nkawd, kuv tau ua Vajtswv tsaug rau qhov tus Vaj Ntsuj Plig Dawb Huv nyob ntawd. Tus Nplij Siab tau los, muab kev cia siab thiab txhawb peb lub dag zog.

Hmo ntawd, kuv tau pom tias tus Tswv siv peb kom ua rau tib neeg tej nra sib dua li cas. Nej cia li nco qab hais tias nyob hauv Phau Ntawv Maumoos thaum Nws cov neeg raug txom nyem vim cov neeg coj hauj lwm tau muab hauj lwm nyuaj heev rau lawv ua.

Cov neeg tau thov Vajtswv pab, ib yam li cov uas peb hlub thiab pab thov. Nov yog zaj ntawd, ib zaj uas kuv paub tias muaj tseeb:

“Thiab kuv kuj yuav ua rau tej nra uas nyob saum nej tej xub pwg kom yooj yim, xwv kom nej yuav tsis hnov tias lawv nyob saum nej nraub qaum, thaum uas nej tseem poob cev qhev; thiab kuv yuav ua li no xwv kom nej yuav sawv ua tim khawv rau kuv txij li no mus, thiab xwv kom nej yuav paub tseeb tias kuv, tus Tswv uas yog Vajtswv, yeej los saib xyuas kuv cov neeg thaum lawv muaj kev txom nyem.

“Thiab nim no tau muaj tias tej nra hnyav uas raug tso saum Amas thiab nws cov kwv tij tau raug ua kom sib; muaj tseeb tiag, tus Tswv tau txhawb lawv lub dag lub zog ces lawv thiaj ris tau lawv tej nra hnyav sib sib, thiab lawv tau kam ua zoo siab hlo thiab ua siab ntev nyiaj rau tag nrho tej uas tus Tswv lub siab nyiam.”⁶

Kuv twb pom qhov txuj ci tseem ceeb ntau zaus. Peb ua rau lwm tus tej nra sib thaum peb pab tus Tswv txhawb lawv lub dag zog. Yog li ntawd tus Tswv hais kom peb ua tim khawv txog Nws txhua lub sij hawm thiab nyob txhua qhov chaw thaum nws txib peb nplij lwm tus lub siab.

Leej txiv thiab leej niam ntawm tus me nyuam tub ntawd ua tim khawv txog tus Cawm seej hmo ntawd nyob hauv kuv chav nyob. Tus Vaj Ntsuj Plig Dawb Huv tau los, thiab nplij txhua tus lub siab. Ob niam txiv ntawd txais kev txhawb nqa. Nkawd txoj kev nyuaj siab tsis tau ploj mus huv tib si, tiam sis nkawd txais kev txhawb nqa kom nyiaj tau. Nkawd txoj kev ntseeg loj tuaj. Thiab nkawd lub dag zog yuav loj tuaj thaum nkawd thov Vajtswv thiab ua neej tsim nyog.

Tus Ntsuj Plig zaj lus tim khawv txog txoj Kev Theej Txhoj kuj txhawb Yauj lub dag zog kom nws ris tau nws lub nra:

“Vim kuv paub tias kuv tus txhiv dim muaj sia nyob, thiab nws yeej yuav sawv saum lub ntiaj teb thaum hnub nyoog kawg:

“[Thiab] tej kab mob noj kuv cev nqaij daim tawv tas lawm los tiam neej no kuv tseem yuav pom Vajtswv.”⁷

Yog zaj lus tim khawv los ntawm tus Ntsuj plig ntawd uas ua rau nws muaj zog nyiaj tau. Nws tau nyiaj kev nyuaj siab thiab qhov uas tsis muaj leej twg nplij nws lub siab es nws pom kev xyiv fab uas los rau cov ntseeg uas muab siab rau ntseeg kov yeej lawv tej kev sim siab.

Qhov no muaj tseeb rau Yauj. Nws tau koob hmoov hauv lub neej no. Yauj zaj dab neeg kawg li no hais tias:

“Tus Tswv foom koob hmoov rau Yauj lub neej zoo heev dua thaum chiv thawj. …

“Tej poj niam uas nyob hauv ntiaj teb no tsis muaj ib tug zoo nkauj npaum li Yauj cov ntxhais. Yauj faib nws tej qub txeeg qub teg rau nws cov ntxhais ib yam li faib rau nws cov tub.

“Tom qab ntawd Yauj ua neej nyob tau ib puas plaub caug xyoo ntxiv, nws pom nws cov tub cov ntxhais tej xeeb ntxwv huv tib si.

“Ces thaum Yauj laus heev lawm nws mam li tuag.”⁸

Yog zaj lus tim khawv los ntawm tus Ntsuj Plig txog txoj Kev Theej Txhoj uas Yauj tau txais thiab tau pab nws kov yeej txhua yam kev sim siab hauv nws lub neej. Nov yog ib feem ntawm txoj kev zoo siab uas Leej Txiv tau pub rau peb. Dhau los ntawm Nws Leej Tub txoj kev theej txhoj, peb Leej Txiv muab kev nplij siab rau peb txawm nyuaj npaum li cas los.

Leej Txiv thiab Leej Tub xa tus Vaj Ntsuj Plig Dawb Huv kom nplij thiab txhawb nqa cov thwj tim ntawm tus Xib Hwb thaum lawv ua neej.

Kuv twb pom qhov txuj ci tseem ceeb no thaum kuv tuaj rau ib lub tsev koom txoos rau ib tug me nyuam tub lub ntees tuag. Ib tug ntxhais hluas zoo nkauj uas kuv tsis tau paub hais kom kuv nres. Nws hais tias nws tuaj rau lub ntees tuag no kom nplij lwm tus lub siab yog nws ua tau.

Nws hais tias nws kuj tau tuaj rau lub ntees tuag kom txais kev nplij siab nws tus kheej thiab. Nws hais tias nws thawj tus me nyuam tau xiam tsis ntev tas los. Nws puag ib tug me nyuam ntxhais zoo nkauj. Kuv saib tus me nyuam ntxhais lub ntsej muag uas luag ntxhi. Kuv nug tus niam tsev hais tias, “Nws lub npe hu li cas?” Nws teb yam li zoo siab hais tias, “Nws lub npe hu ua Joy. Kev xyiv fab yeej los tom qab kev nyuaj siab.”

Nws tau ua tim khawv rau kuv. Kuv twb pom kev nplij siab thiab kev kaj siab uas tau los rau nws los ntawm tib lub hauv paus tseeb. Tsuas yog Vajtswv paub peb lub siab, yog li ntawd Nws tib leeg hais tau hais tias, “Kuv paub koj xav dab tsi.” Yog li ntawd kuv tsis paub tseeb nws muaj kev xyiv fab thiab kev nyuaj siab npaum li cas, tiam sis tus Tswv uas hlub nws yeej paub.

Kuv tsuas paub ib feem hais tias Nws muaj kev xyiv fab npaum li cas thaum nej uas yog Nws cov thwj tim, pab Nws kom peb Leej Txiv Saum Ntuj Ceeb Tsheej ib tug me nyuam muaj kev kaj siab thiab kev xyiv fab.

Kuv ua tim khawv hais tias tus Tswv tau hais kom peb, uas yog Nws cov thwj tim, sib pab ris lawv tej nra. Peb tau cog lus hais tias peb yuav ua li no. Kuv ua tim khawv hais tias tus Tswv, dhau los ntawm Nws txoj Kev Theej Txhoj thiab Kev Sawv Rov Los, tau kov yeej kev tuag. Kuv ua tim khawv tias Yexus Khetos uas muaj txoj sia nyob xa tus Vaj Ntsuj Plig Dawb Huv, tus Nplij Siab, rau cov uas peb cog lus rau Nws tias peb yuav nplij lawv lub siab.

Nej sawv daws ua tim khawv ib yam li kuv txog qhov tseeb uas tau muab kos rau ib lub khawm uas kuv niam coj tau 20 xyoo tawm thaum nws yog ib tug mej zeej ntawm lub Koom Haum Niam Tsev pawg tuam thawj. Hais tias, “Kev Siab Hlub Yeej Tsis Plam Ib Zaug Li.”⁹ Kuv tseem tsis paub lub ntsiab tag nrho ntawm tej lus ntawd. Tiam sis kuv paub me ntsis thaum kuv pom nws ncav tes pab lwm tus. Nqe vaj lug kub qhia qhov tseeb no rau peb hais tias: “Kev siab hlub yog txoj kev hlub dawb paug ntawm Khetos.”¹⁰

Nws txoj kev hlub yeej tsis ploj, thiab peb yeej yuav xav “nyuaj siab nrog cov uas nyuaj siab … thiab nplij cov uas xav tau txoj kev nplij siab.”¹¹ Thiab thaum peb pab lwm tus Nws cog lus tias peb yuav nyob kaj siab lug tas mus li.

Vim kuv ua tim khawv txog Nws, kuv ua nej tsaug rau tej yam nej ua kom pab tus Tswv Yexus Khetos thiab tus Vaj Ntsuj Plig Dawb Huv, tus Nplij Siab, txhawb nqa cov muaj hauv caug uas tsis muaj zog thiab tej txhais tes ua tsaug lawm.¹² Kuv ris txiaj rau tag nrho cov poj niam nyob hauv kuv lub neej uas tau pab kuv thiab foom koob hmoov rau kuv vim lawv yog Yexus Khetos cov thwj tim tiag tiag. Los ntawm Yexus Khetos lub npe, amees.