Kev Pom Meej Mus Ib Txhis Los ntawm Txoj Moo Zoo

Nyob hauv ib zaj lus tshwm sim uas muab rau Mauxes, peb kawm txog Leej Txiv Saum Ntuj Ceeb Tsheej tej kev xav hais tias nws txoj hauj lwm thiab nws lub yeeb koob yog ua kom tib neeg txais tau txoj kev tsis txawj ploj tsis txawj tuag thiab txoj sia nyob mus ib txhis.¹ Raws li qhov nws hais li ntawd, Leej Txiv xav kom txhua tus muaj cib fim txais tau kev xyiv fab puv npo. Tej kev tshwm sim hauv hnub nyoog kawg no qhia tias peb Leej Txiv Saum Ntuj Ceeb Tsheej tau tsim ib txoj kev zoo siab rau tag nrho Nws cov me nyuam, ib txoj hau kev uas pab peb rov qab mus cuag Nws.

Thaum peb to taub txoj hau kev zoo siab no, ua rau peb pom meej nyob mus ib txhis thiab pab peb saib cov lus txib, cov kab ke, tej kev khi lus, thiab tej kev sim siab rau nqi.

Muaj ib lub ntsiab cai uas Amas qhia hais tias: “Yog li ntawd Vajtswv tau muab tej lus txib rau lawv, tom qab uas tau ua rau lawv paub txog txoj hau kev uas npaj tseg ntawm txoj kev txhiv dim.”²

Yeej tseem ceeb pom tus txheej txheem uas Vajtswv siv qhia peb. Peb Leej Txiv Saum Ntuj Ceeb Tsheej tau qhia Adas thiab Eva txog txoj kev txhiv dim, ces Nws muab tej lus txib rau nkawd.

Qhov no yog ib qho tseeb uas tseem ceeb. Thaum tib neeg to taub txoj hau kev no, ces yuav pab lawv ua raws li cov lus txib, txiav txim siab zoo dua li qub, thiab muaj kev mob siab xav ua zoo.

Thaum lub sij hawm kuv ua hauj lwm hauv lub Koom Txoos, kuv tau pom cov mej zeej ntawm lub Koom Txoos hauv ntau lub teb chaws uas rau siab ntseeg, txawm ib txhia lub teb chaws muaj teeb meem ntawm tseem fwv, cov pej xeem, los sis nyiaj txiag los yog. Ib qho uas kuv pom cov mej zeej rau siab ntseeg muaj yog qhov uas lawv pom meej nyob mus ib txhis. Kev pom txoj moo zoo meej nyob mus ib txhis pab peb to taub peb muaj hauj lwm dab tsi hauv Vajtswv txoj hau kev, pab peb kov yeej tej teeb meem, pab peb txiav txim siab, thiab pab peb tsom ntsoov rau qhov uas peb muaj peev xwm rais los ua neeg zoo li Vajtswv.

Kev pom meej yog qhov uas peb pom ib yam thaum peb nyob deb txaus, peb thiaj paub tias yam ntawd muaj nqi npaum li cas tiag.

Zoo li yus nyob hauv hav zoov thiab muaj ib tsob ntoo nyob kiag hauv peb ntej. Yog peb tsis mus ib ruam tom qab, ces peb yuav tsis paub tias ib lub hav zoov yog dab tsi tiag tiag. Muaj ib zaug kuv mus xyuas lub Hav Zoov Nuj Xiab Amazon nyob Leticia, Colombia, nyob ze rau tej ciaj ciam av Brazil thiab Peru. Kuv tsis tau paub tias lub hav zoov ntawd loj npaum li cas mus txog thaum kuv caij nyab hoom ces kuv thiaj pom meej.

Thaum peb cov me nyuam me me, lawv nyiam saib yeeb yam hauv TV uas muaj kev ua yeeb yam hu ua Koj Pom Dab Tsi? Muaj ib lub koos thaij duab uas tau muab tsom ze ze rau ib yam khoom thiab cov me nyuam yuav tsum twv seb yog dab tsi thaum koos thaij duab tsom deb zuj zus mus. Thaum twg yus pom tag nrho yam khoom ntawd, yeej yooj yim rau yus paub tias yog ib tug miv, ib tsob ntoo, lub txiv, li ntawd.

Kuv nco qab ib lub sij hawm thaum lawv saib kev ua yeeb yam ntawd, thiab koob thaij duab tsom ze ze rau ib qho uas lawv xav tias tsis ntxim nyiam hlo li; tiam sis thaum tsom deb zuj zus, lawv paub hais tias yog ib lub pizza qab qab heev. Ces lawv hais rau kuv tias, “Txiv es, yuav ib lub rau peb zoo li ntawd os!” Tom qab lawv to taub qhov ntawd yog dab tsi, ib yam uas thaum xub thawj ua rau lawv tsis nyiam hlo li, es thaum kawg lawv twb xav tias qhov ntawd ntxim nyiam.

Cia kuv qhia ib zaj ntxiv rau nej. Nyob hauv peb tsev neeg kuv cov me nyuam nyiam tej duab dhos ua si. Tej zaum peb txhua tus tau muab cib fim muab ib daim duab sib dhos ua ke. Ib txhia yeej muaj tej daim ntau uas me me heev. Kuv nco qab tias kuv ib tug me nyuam (kuv tsis qhia nws lub npe nej thiaj tsis paub nws yog leej twg) nws pheej tsom ntsoov rau ib daim xwb, thiab thaum nws muab tsis tau daim ntawd sib dhos rau qhov chaw nws xav tias yuav tsum muab, nws npau taws thiab xav tias daim ntawd tsis zoo thiab xav muab pov tseg. Nws twb kawm muab duab sib dhos ua ke thaum nws to taub tias txhua daim me me nyias muaj nyias qhov chaw hauv daim duab ntawd, txawm yog nws tsis tau paub yuav muab dhos li cas thaum nws tseem muab dhos ua ke.

Nov yog ib txoj kev uas pab peb to taub tus Tswv txoj hau kev. Peb tsis tas xav txog qhov uas muaj ib daim ib daim tiam sis peb yuav tsum tsom ntoov rau daim duab tag nrho, thiab nco ntsoov tias thaum kawg yuav zoo li cas. Tus Tswv paub tias yuav tso txhua yam nyob qhov twg xwv kom muaj raws li Nws txoj hau kev. Tag nrho cov lus txib yeej tseem ceeb nyob mus ib txhis nyob hauv nws txoj kev zoo siab.

Yog ib qho tseem ceeb uas peb tsis txhob txiav txim siab txog tej yam uas muaj nqi nyob mus ib txhis thaum peb pom lub neej no xwb. Yog peb xav txiav txim siab txog tej yam uas muaj nqi mus ib txhis, peb yuav tsum pom txoj moo zoo meej.

Txwj Laug Neal A. Maxwell qhia hais tias: “Txawm peb cia siab rau ib yam uas peb yuav tau thaum kawg, ntshe tej yam uas peb cia siab rau thaum tseem ua neej muaj teeb meem. Tej zaum peb xav tau nyiaj ntxiv, xav tham hluas nkauj hluas nraug, xav yeej kev sib tw, los yog xav tau ib lub tsev loj zog—tej yam uas tej zaum peb yuav tau thiab tej zaum tsis tau. Kev ntseeg Leej Txiv txoj hau kev ua rau peb nyiaj tau ntev txawm peb tsis tau qhov uas peb cia siab yuav txais tau. Kev cia siab pab peb mob siab ua qhov zoo txawm lwm tus pom tias peb yuav tsis tau dab tsi yog peb ua li ntawd. (saib Q&K 58:27).³

Qhov uas peb tsis pom meej nyob mus ib txhis, los yog tsis pom meej ntxiv, yuav ua rau peb pom lub neej no xwb thiab txiav txim siab ua tej yam uas tsis haum Vajtswv lub siab.

Phau Ntawv Maumoos hais txog Nifais tus xeeb ceem thiab Lamas thiab Lemu-ees tus xeeb ceem. Lawv peb leeg twb raug txom nyem thiab kev nyuaj siab ntau; tiam sis, lawv xeeb ceem txog tej ntawd yeej sib txawv. Nifais hais tias, “Thiab tus Tswv tau foom koob hmoov ntau kawg nkaus rau peb, txawm yog thaum peb nyob tom roob moj sab qhua es peb noj nqaij nyoos xwb los, peb cov poj niam tseem muaj mis txaus rau lawv cov me nyuam noj thiab, thiab muaj zog, muaj tseeb tiag, ib yam li cov txiv neej; thiab lawv tau pib uv taus lawv tej kev tsiv tsis yws lawm.”⁴

Tiam sis Lamas thiab Lemu-ees yws yws. “Vim li no Lamas thiab -Lemu-ees, ob tug ua tij, thiaj tau yws yws rau nkawd txiv. Thiab nkawd tseem tau yws yws vim tias nkawd tsis paub txog tej kev ua dej ua num ntawm tus Vajtswv uas tau tsim nkawd los.”⁵ Qhov uas peb tsis paub los yog peb tsis quav ntsej txog “tej kev ua dej ua num ntawm … Vajtswv” yog ib txoj kev kom poob kev pom meej mus ib txhis thiab kev yws yws yog ib qho xwb uas qhia tias peb ua li ntawd. Txawm Lamas thiab Lemuyees pom ntau yam txuj ci tseem ceeb nrog Nifais, nkawd hais tias: “Thiab peb tau ua loj leeb nyob rau hauv roob moj sab qhua tau ntau xyoo li no; thiab peb cov poj niam tseem tau raug ua hauj lwm hnyav heev, thaum xeeb me nyuam loj; thiab lawv tau tu me nyuam nyob rau tom roob moj sab qhua thiab raug ib puas tsav yam mob, tsuas yog tsis tuag xwb; thiab nws yuav zoo dua yog lawv tau tuag ua ntej lawv khiav tawm ntawm Yeluxalees es los raug kev kub ntxhov zoo li no.”⁶

Lawv yeej muaj xeeb ceem sib txawv heev, txawm yog tej kev nyuaj thiab kev txom nyem uas lawv raug yeej zoo ib yam. Lawv yeej pom tej yam no sib txawv.

Thawj Tswj Hwm Spencer W. Kimball sau li no hais tias: “Yog peb xav tias peb lub neej hauv lub ntiaj teb no yog peb lub neej tag nrho, ces ntshe kev mob kev nkeeg, kev nyuaj siab, kev swb, thiab ib lub neej tsis ntev yog kev txom nyem loj kawg. Tiam sis yog peb pom hais tias peb lub neej yuav nyob mus ib txhis uas pib puag thaum peb lub neej ua ntej yug los thiab yuav ntev nyob mus ib txhis, ces peb thiaj saib tau txhua yam uas tshwm sim raws li qhov yog.”⁷

Txwj Laug David B. Haight hais ib zaj dab neeg txog tus kws puab mlom Michelangelo xwv kom ua piv txwv txog qhov uas peb yuav tsum pom meej: “Thaum tus kws puab mlom tab tom txaug ib lub pob zeb zoo nkauj, ib tug me nyuam tub tuaj txhua hnub thiab saib. Thaum pom tias lub pob zeb muaj moj yam neeg, es txhua tus pom tau, tus me nyuam tub nug Michelangelo hais tias, ‘Ua cas koj ho paub nws nyob haud?’”⁸

Tus kws puab mlom pom meej hais tias lub pob zeb yeej txawv ntawm lub pob zeb uas tus me nyuam tub uas tuaj saib nws ua hauj lwm ho pom. Qhov uas nws pom meej hais tias yuav muaj li cas nyob hauv lub pob zeb ntawd ua rau nws muaj peev xwm ua ib tug mlom zoo nkauj kawg.

Tus Tswv paub tias Nws xav ua dab tsi nrog peb txhua tus. Nws paub tias Nws xav kho peb li cas hauv peb lub neej, thiab peb tsis muaj cai ntuas Nws. Nws tej kev xav yeej siab tshaj peb tej kev xav.⁹

Kuv ua tim khawv tias peb muaj Leej Txiv Saum Ntuj Ceeb Tsheej uas ncaj ncees, muaj kev tshav ntuj thiab hlub peb es Nws tau npaj ib txoj hau kev rau peb kom peb zoo siab mus ib txhis li. Kuv ua tim khawv tias Yexus Khetos yog Nws Leej Tub thiab tus Cawm Seej ntawm neeg ntiaj teb. Kuv paub tias Thawj Tswj Hwm Thomas S. Monson yog Vajtswv ib tug yaj saub. Kuv hais tej no los ntawm Yexus Khetos lub npe zoo, amees.