Li junelikil ilok re li evangelio

Sa’ jun li k’utb’esinb’il na’leb’ k’eeb’il re laj Moises, kiyeeman qe li rajom li qaChoxahil Yuwa’: “Xb’aan naq k’e reetal, a’in lin k’anjel ut lin loq’al: xk’eeb’al chi uxmank lix kolb’al chiru li kamk ut lix yu’am chi junelik li winq”.¹ Rik’in li yeehom a’an, li rajom li Yuwa’b’ej a’an xk’eeb’al qe chiqajunilo qahoonal re xk’ulb’al xtz’aqalil li sahil ch’oolejil. Li k’utb’esinb’il na’leb’ re li roso’jikeb’ li kutan a’in naxk’utb’esi naq li qaChoxahil Yuwa’ kixyo’ob’tesi jun xnimla k’uub’anb’il na’leb’ re sahil ch’oolejil choq’ reheb’ chixjunil li ralal xk’ajol, jun li k’uub’anb’il na’leb’ chaq’al ru re naq laa’o tooruuq chi sutq’iiq rik’in A’an.

Xtawb’al ru li k’uub’anb’il na’leb’ a’in re sahil ch’oolej naxk’e jun li junelikil ilom ut nokoxtenq’a chixk’eeb’al tz’aqal xwankil li taqlahom, li k’ojob’anb’il k’anjel, li sumwank, li yale’k ut li ch’a’ajkilal.

Jun li xb’een na’leb’ nachal rik’in laj Alma: “Jo’kan naq li Dios kixk’e xtaqlahom reheb’, chirix naq kixk’e chixnaweb’ li k’uub’anb’il na’leb’ re li tojbal-ix”.²

Aajel ru xk’eeb’al reetal chanru naq kik’ulmank li k’utum. Li qaChoxahil Yuwa’ kixk’ut xb’een wa chiru laj Adan ut xEva li k’uub’anb’il na’leb’ re li tojok ix ut chirix a’an kixk’e reheb’ lix taqlahom.

A’in jun nimla yaal. Xtawb’al ru li k’uub’anb’il na’leb’ toxtenq’a xpaab’ankileb’ li taqlahom, xb’aanunkil li us, ut reekas’inkil li qach’ool sa’ li us.

Chiru lix hoonalil lin k’anjel sa’ li Iglees, wilom lix paab’aaleb’ ut xtiikilaleb’ li komon re li Iglees sa’ jalan jalanq tenamit, junjunq reheb’ a’an wankeb’ xch’a’ajkilal jo’ tenamit ut rik’in tumin. Jun li k’a’aq re ru nintaw naq wankeb’ re chixjunileb’ li komon a’in, a’an li rilomeb’ sa’ li junelik q’e kutan. Li junelikil ilok re li evangelio nokoxk’am chixtawb’al ru li qana’aj sa’ lix k’uub’anb’il na’leb’ li Dios, xk’ulub’ankil li ch’a’ajkilal ut xchaab’ilob’resinkil qib’ chiru a’an, xb’aanunkil li us, ut xjayalinkil li qayu’am sa’ li qachoxahil eechanihom.

Li qilom a’an chanru naqil li k’a’aq re ru naq naqil chi najt ut ink’a’ nokoru rilb’al tz’aqal lix xtz’aq.

Chanchan naq wanko sa’ junaq k’iche’ rik’in junaq li che’ sa’ xnaq’ qu. Ink’a’ tooruuq chirilb’al chi us li k’a’ru wan sa’ li k’iche’ wi ink’a’ toonajto’q b’ayaq rik’in li che’ . Jun sut xinwulak chaq sa’ li nimla k’iche’ aran Leticia Colombia, nach’ rik’in lix nub’aal Brasil ut Perú. Ink’a’ xinru chirilb’al lix nimal toj reetal naq xkohin sa’ so’sol ch’iich ut xin’ilok chi us.

Naq eb’ li qakok’al toj kok’eb’ chaq neke’ ril sa’ li kaxmu jun li ch’ina k’anjel K’a’ru nakawil? xk’ab’a’, b’ar wi’ nak’utman li k’a’aq re ru chi jwal nach’ ut eb’ li kok’al tento raj te’xnaw k’a’ru li yookeb’ chirilb’al chi nim. Chirix naq li jalam-uuch na’ilmank chi jwal nim moko ch’a’aj ta rilb’al li k’a’ruhaq a’an, jo’ jun li mis, jun li pim, jun li q’een, ut wan chik xkomon.

Nanaq sa’ inch’ool naq yookeb’ chirilb’al a’an ut xk’utman jun li k’a’aq re ru li jwal yib’ ru ut kaw rilb’al, a’b’an naq yookeb’ xnimob’resinkil li jalam-uuch xe’xk’e reetal naq a’an jun li kotkookil kaxlan wa jwal atawal ru, ut xe’xye we: Yuwa’ loq’ junaq qe! Chirix naq xe’xtaw ru k’a’ru a’an, sa’ xtiklajik jwal yib’ ru naq xe’ril, ut jwal atawal chik naq’ xe’xk’e reetal.

Tinwotz jun chik lin k’ulum: Sa’ li qochoch eb’ li qakok’al nawulak chiruheb’ xk’uub’ankil li jorb’a jolom, maare chiqajunilo ak qayalom xb’aanunkil junaq. Wankeb’ jwal naab’al li kok’ raqal. Nanaq sa’ inch’ool naq jun reheb’ li qakok’al (ink’a’ tinye xk’ab’a’ re xkolb’al rix) naril chi us li kok’ raqal chi junqal, ut naq ink’a’ na’ok b’ar wi’ naraj roksinkil napo’ ut naxk’oxla naq ink’a’ us li raqal a’an ut naraj xtz’eqb’al. Sa’ xraqik kixtzol xk’uub’ankil ru naq kixtaw ru naq li junjunq raqal wan lix na’aj, us ta naq sa’ jun hoonal maji’ naxnaw b’ar na’ok.

A’an jun rilb’al lix k’uub’anb’il na’leb’ li Qaawa’. Moko tento ta taqil chi junjunq lix raqal, taqayal b’an qaq’e chirilb’al chixjunil, chi wanq sa’ qach’ool li k’a’ru taak’ulmanq sa’ roso’jik. Li Qaawa’ naxnaw b’arwan lix na’aj li junjunq lix raqal re naq tz’aqalaq ru lix k’uub’anb’il na’leb’. Chixjunil li taqlahom wan x’aajelil ru chi junelik sa’ li nimla k’uub’anb’il na’leb’ re sahil ch’oolejil.

Jwal aajel ru naq ink’a’ taqasik’ xb’aanunkil k’a’ruhaq wan xwankil sa’ li junelik q’e kutan rik’in jun ilom re li ruchich’och’. Re xsik’b’al li qab’aanuhom li te’wanq xwankil choq’ re li junelik q’e kutan, aajel ru naq wan li qilom sa’ li evangelio.

Laj Elder Neal A. Maxwell kixk’ut: “Us ta chapchookeb’ rik’in li xnimal ru yo’onihom re li junelik, maare ink’a’ taa’uxmanq jo’ naqaj li qakok’ oyb’enihom. Maare naqoyb’eni junaq xtaqsinkil qatojb’al, xnawb’al ru junaq li kristiaan, q’axok u sa’ junaq li jolomink malaj wank sa’ junaq li ochoch jwal nim—eb’ a’in taak’ulmanq tana’ malaj ut ink’a’. Li qapaab’aal k’ojob’anb’il sa’ lix k’uub’anb’il na’leb’ li Yuwa’b’ej nokoxtenq’a chi kuyuj toj sa’ roso’jik naq ink’a’ nak’ulman chixjunil li naqoyb’eni. Rik’in li yo’onihom, “[k’eeb’ilaqo qib’] chi anchal [qach’ool]” sa’ li chaab’il k’anjel us ta maare taasachmanq xwankileb’ (chi’ilmanq Tz. ut S. 58:27)”.³

Naq ink’a’ wan junaq qilom re junelik malaj naq naqatz’eq, naru nokoxk’am chixk’ulb’al junaq qilom re ruchich’och’ jo’ li naqapaab’ laa’o ut xb’aanunkil li k’a’ru ink’a’ k’ulub’ej chiru li rajom li Dios.

Lix Hu laj Mormon naxk’ut chirix lix b’aanuhom laj Nefi ut lix b’aanuhom laj Laman ut laj Lemuel. Chixjunileb’ a’an ke’xnumsi k’iila paay chi ch’a’ajkilal ut naab’al li yale’k, a’b’anan, lix b’aanuhomeb’ chiru a’an jwal jalan chiru li jun. Laj Nefi kixye: “Ut k’a’jo’ xnimal li rosob’tesihom li Qaawa’ sa’ qab’een, jo’kan naq us ta kiqatzeka li rax tib’ sa’ li yamyookil ch’och’, eb’ li ixq sa’ qayanq kitz’aqlok xya’aleb’ xtu’ choq’ reheb’ lix kok’al, ut kaweb’ chaq rib’, relik chi yaal, chanchaneb’ ajwi’ li winq; ut ke’ok chixkuyb’al lix b’eenikeb’ chi ink’a’ neke’wech’in”.⁴

A’ut, laj Laman ut laj Lemuel ke’wech’in chi kaw: “Ut chi jo’kan naq laj Laman ut laj Lemuel, asb’ejeb’ chik, ke’xwech’i rix lix yuwa’; ut ke’wech’in xb’aan naq ink’a’ ke’xnaw chanru nak’anjelak li Dios li kiyo’ob’tesink chaq reheb’ ”.⁵ Naq ink’a’ naqanaw malaj ink’a’ naqil “chanru nak’anjelak li… Dios” a’an naxb’aanu naq naqatz’eq li qilom re li junelik q’e kutan, ut li wech’ink a’an jun reheb’ a’an. Us ta naq laj Laman ut laj Lemuel ke’ril chaq naab’al li sachb’a-ch’oolej rochb’een laj Nefi, a’aneb’ ke’xye: “Ut koob’eek chiru li yamyookil ch’och’ chiru li k’iila chihab’ a’in; ut ke’k’anjelak li qixqilal, chi wankeb’ sa’ yu’am; ut ke’alan k’uula’al sa’ li yamyookil ch’och’ ut ke’xnumsi chixjunil li k’a’aq re ru, ka’aj chik li kamk ink’a’; ut us raj wi’chik choq’ reheb’ naq ke’kam chi maji’ neke’el chaq Jerusalen, chiru naq ke’xnumsi li ch’a’ajkilal a’in”.⁶

Wiib’ li b’aanuhom q’axal jalaneb’ rib’, us ta naq li ch’a’ajkilal ut li yale’k li ke’xnumsi juntaq’eet. Relik chi yaal, jaleneb’ li rilomeb’.

Li Awa’b’ej Spencer W. Kimball kixtz’iib’a a’in: “Wi naqil li li qayu’am sa’ ruchich’och’ jo’ naq a’an chixjunil li wan, taqil ajwi’ naq li rahilal, li raho’k sa’ ch’oolej, ch’a’ajkilal, t’ane’k ut li kamk chi junpaat jwal xiwxiweb’ raj. A’ut wi naqil li qayu’am jo’ li k’a’ru junelik li naxik toj najt wi’chik chiru b’ar wi’ xoowan chaq ut naxik roq toj sa’ li junelik q’e kutan, chirix a’an taaqak’e li k’a’ru nak’ulman sa’ xna’aj”.⁷

Laj Elder David B. Haight ki’aatinak chirix jun aj pech’ol pek aj Miguel Ángel re xk’utb’al lix aajelil ru rilb’al chixjunil rik’in li tz’aqal rilom: “Chixjunil li kutan, naq laj pech’ol pek yoo chixjotzb’al ru jun li chaab’il pek, jun li ch’ina’al kinach’o’ ut kich’inaril. Naq lix jalam-uuch laj David kik’utun chiru li pek, xch’aqal ru re naq te’ril chixjunil li ruchich’och’, li ch’ina’al kixpatz’ re laj Miguel Ángel: ‘Chan ru naq xanaw naq a’an wan chi sa’ li pek?’”.⁸

Li rilom laj pech’ol pek sa’ li chaab’il pek a’an jalan chiru li rilom li ch’ina’al li ki’ilok re chi k’anjelak. Li rilom laj pech’ol pek rik’in li k’a’ru naru taa’elq sa’ li pek kixb’aanu naq kixyiib’ li k’anjel a’an.

Li Qaawa’ naxnaw li k’a’ru naraj xb’aanunkil qik’in, naxnaw k’a’ paay chi yiib’aak naraj sa’ li qayu’am, ut maak’a’ qak’ulub’ xk’eeb’al xna’leb’ lix k’oxlahom. Jwal taqenaq chiru li qak’oxlahom laa’o.⁹

Ninch’olob’ xyaalal naq wan jun qaChoxahil Yuwa’ aj rahonel, tiik ut aj uxtaan, li kikawresink re jun li k’uub’anb’il na’leb’ re li qajunelikil sahil ch’oolejil. Ninch’olob’ xyaalal naq li Jesukristo a’an li Ralal li Dios ut aj Kolol re li ruchich’och’. Ninnaw naq li Awa’b’ej Thomas S. Monson a’an jun lix profeet li Dios. Ninye a’in sa’ xk’ab’a’ li Jesukristo. Amen.