Peb Tsev Neeg Los ntawm Vajtswv Los

Puas muaj ib yam dab tsi zoo mloog tshaj tej qhov tseeb dawb huv ntawm txoj moo zoo uas lawv qhia thaum lawv hu nkauj ib zaj nkauj ntawm lub Koom Haum Me Nyuam Yaus? Thiab nej cov me nyuam ntxhais uas nyob no paub txog zaj nkauj uas kuv yuav hais txog. Nej tau kawm zaj nkauj no thaum nej lub Koom Haum Me Nyuam Yaus ua yeeb yam xyoo tas los no.

Nyob hauv tej lus “Peb Tsev Neeg Los ntawm Vajtswv Los”¹—uas lawv hu nkauj hauv kev sib ntsib no—peb nco txog tej lus qhuab qhia dawb huv. Peb kawm hais tias peb tsev neeg los ntawm Vajtswv los thiab peb txhua tus yog Vajtswv tsev neeg.

Thawj kab lus ntawm zaj nkauj no qhia hais tias: “Peb Leej Txiv muaj ib tsev neeg. Yog kuv! Yog nej, thiab txhua tus: peb yog Nws cov me nyuam.” Los ntawm zaj lus tshaj tawm txog tsev neeg, peb kawm hais tias, “Nyob rau lub qub neej, tej tub ntsuj plig thiab tej ntxhais ntsuj plig tau paub thiab teev tiam Vajtswv ua lawv Leej Txiv uas Nyob Mus Ib Txhis Li.” Nyob saum ntuj, peb tau kawm txog qhov uas peb yog poj niam mus ib txhis li. Peb paub tias peb txhua tus yog “ib tug ntxhais ntawm leej niam thiab leej txiv nyob saum ntuj ceeb tsheej.”²

Peb txoj kev ua neej hauv lub ntiaj teb no tsis tau hloov tej qhov tseeb ntawd. Peb txhua tus koom nrog Vajtswv tsev neeg thiab Vajtswv xav tau peb. Tej tsev neeg hauv lub ntiaj teb nyias txawv nyias. Thiab txawm peb ua zoo npaum li peb ua tau kom muaj tsev neeg zoo li ib txwm muaj, qhov uas peb yog Vajtswv tsev neeg tsis nyob ntawm seb peb yog neeg zoo li cas—tsis hais peb yuav leej twg, peb puas yog niam tsev, peb muaj nyiaj npaum li cas, peb puas muaj npe, los sis peb sau dab tsi rau Internet.

Peb yeej koom Nws tsev neeg. “Peb yog peb Leej Txiv Saum Ntuj Ceeb Tsheej cov ntxhais. Nws hlub peb, thiab peb hlub Nws.”³

Kab lus thib ob ntawm zaj nkauj no hais ntxiv txog kab lus thib ib. “Nws xa peb kom yug los, ua neej, thiab kawm ua ke nyob hauv peb tsev neeg hauv lub ntiaj teb no.”

Nyob hauv lub neej ua ntej yug los, peb kawm tias peb yuav tsum muaj sij hawm ua neej nyob hauv lub ntiaj teb no. Peb “lees txais [Leej Txiv Saum Ntuj Ceeb Tsheej] txoj hau kev no uas qhia tias Nws cov me nyuam yuav txais ib lub cev nqaij daim tawv thiab ua neej nyob hauv lub ntiaj teb kom peb yuav vam meej mus txog thaum peb zoo tag nrho thiab peb txais txoj sia nyob mus ib txhis.”⁴

Txwj Laug Richard G. Scott piav hais tias “nyob hauv lub neej ua ntej lub neej no Vajtswv qhia peb tias peb yuav mus rau lub ntiaj teb kom sim peb lub siab thiab ua neeg zoo dua li qub.”⁵ Nyias muaj nyias kev sim siab thiab tsis muaj ob txoj kev sim siab uas zo ib yam. Kuv yeej tsis tau nyiaj ntxeem kev sib nrauj, kev mob uas muaj thaum yus niam yus txiv tso yus tseg, los sis kev lav ris uas muaj thaum yus yog ib tug niam tsev uas tsis muaj tus txiv. Kuv tsis tau muaj ib tug me nyuam tuag, tsis tau raug kev muaj tsis taus me nyuam, los yog kev poj niam nyiam poj niam. Kuv tsis tau raug ntaus, raug mob ntev heev, los yog raug kev muaj yees. Tej kev sim siab no tsis yog kuv li.

Yog li ntawd nej ib txhia xav tias, “Viv Ncaus Stephens, koj tsis to taub!” Thiab kuv teb hais tias tej zaum nej hais yog. Kuv tsis to taub nej tej kev sim siab tag nrho. Tiam sis dhau los ntawm kuv tej kev sim siab—tej kev sim siab uas ua rau kuv txhos caug—ua rau kuv paub tus uas to taub tiag tiag, tus uas “paub txog kev tu siab,”⁶ tus uas raug txhua yam, thiab to taub txhua yam. Tsis tas li ntawd, kuv tau raug txhua yam kev sim siab uas kuv tau hais txog thaum kuv ua ib tug ntxhais, ib tug niam, niam pog, viv ncaus, phauj, thiab phooj ywg.

Peb cov ntxhais uas ua raws li Vajtswv tej kev khi lus muaj cib fim kawm tau los ntawm peb tej kev sim siab; thiab peb kuj muaj cib fim koom siab muaj kev khuv leej thaum peb txhawb nqa lwm tus hauv Vajtswv tsev neeg, raws li peb tau khi lus tseg.

Thaum peb ua li no, peb yuav to taub thiab ntseeg tias tus Cawm Seej paub tias peb txoj kev nyuaj npaum li cas thiab yuav coj peb dhau txhua yam kev tu siab thiab kev poob siab uas yuav los. Nws muaj kev siab hlub tiag tiag, thiab Nws txoj kev hlub “yuav nyob tas mus li”⁷—ib feem yog dhau los ntawm peb thaum peb coj raws li Nws.

Vim peb yog Vajtswv cov ntxhais thiab Yexus Khetos cov thwj tim, peb yuav tsum “coj raws li tej kev xav uas Vajtswv tau cog rau hauv peb lub siab.”⁸ Tsis yog peb pab peb tsev neeg xwb.

Daim Duab

Photo of Sister Yazzi and Sister Yellowhair

Tsis ntev tas los kuv muaj cib fim mus xyuas Viv Ncaus Yazzie ntawm Ceg Txheem Ntseeg Chinle Arizona nyob hauv nws lub tsev. Thaum nws tos txais kuv nkag los rau hauv nws lub tsev, qhov xub thawj kuv pom yog tej daim duab txog nws tsev neeg thiab cov tub txib uas dai rau ntawm nws phab ntsa. Kuv nug hais tias, “Viv Ncaus Yazzie, koj muaj pes tsawg tus xeeb ntxwv?”

Nws tsis paub teb, nws cia li tshoom xub pwg. Kuv tsis to taub vim li cas nws ua li no, kuv thiaj li saib nws tus ntxhais, Viv Ncaus Yellowhair, uas teb hais tias, “Nws tsis paub nws muaj pes tsawg tus xeeb ntxwv. Peb tsis suav. Txhua tus me nyuam hu nws ua Pog—nws yog txhua leej tus pog.”

Tsis yog Viv Ncaus Yazzie hlub nws tsev neeg xwb. Nws to taub hais tias kev muaj peev xwm pab lwm tus txhais li cas thaum nws mus ua zoo, foom koob hmoov, tu, thiab tiv thaiv Vajtswv tsev neeg. Nws to taub hais tias “thaum ib tug poj niam txhawb ib tug me nyuam txoj kev ntseeg, nws pab kom ib tsev neeg muaj zog—tam sim ntawd thiab thaum yav tom ntej.”⁹

Kab lus thib peb ntawm zaj nkauj no qhia ntxiv txog vim li cas peb ua neej hauv lub ntiaj teb no: “Vajtswv muab ib tsev neeg rau peb kom pab peb rais los ua neeg zoo li Nws xav.” Tus Cawm Seej qhia kom peb cia li koom siab; thiab yog peb tsis koom ib lub siab, peb tsis yog Nws li.¹⁰ Kev tshaj tawm txog tsev neeg qhia hais tias vim peb yog leej niam thiab leej txiv saum ntuj ceeb tsheej cov ntxhais ntsuj plig, peb muaj cwj pwm thiab txoj hmoov los saum ntuj los. Vajtswv xav kom peb koom siab. Peb yuav tsum koom siab tiag—cov ntxhais uas ua raws li peb tej kev khi lus uas koom siab txawm peb nyias txawv nyias¹¹ cov ntxhais uas xav kawm txhua yam peb yuav tsum ua kom rov qab mus cuag Nws, khi nrog Nws ua Nws tsev neeg nyob mus ib txhis.

“Tej kab ke tseem ceeb dawb ceev thiab tej kev cog lus uas muaj hauv tej tuam tsev dawb huv ua rau [peb] rov qab mus nyob tau ntawm Vajtswv lub xub ntiag thiab ua rau tsev neeg nyob tau ua ke mus ib txhis li.”¹² Cov kab ke uas peb txais thiab kev khi lus uas peb ua thaum peb ua kev cai raus dej thiab nyob hauv tej tuam tsev dawb huv ua rau Vajtswv tsev neeg koom ua ke txawm lawv ciaj los yog tuag los yog—muab peb koom ua ke nrog peb Leej Txiv dhau los ntawm Nws Leej Tub, tus uas thov Vajtswv, “kom lawv koom ib lub siab; Txiv, thov cia lawv nyob hauv wb, ib yam li koj nyob hauv kuv thiab kuv nyob hauv koj.”¹³

Thaum peb siv sij hawm kawm thiab ua raws li tus Cawm Seej tej lus qhia, peb rais los ua neeg zoo li Nws. Peb to taub hais tias Nws yog txoj kev—tib txoj kev—uas peb yuav kov yeej tej kev sim siab hauv lub ntiaj teb, txais kev kho mob ntawm sab ntsuj plig, thiab rov qab mus rau peb tsev neeg nyob saum ntuj.

Kab lus kawg ntawm zaj nkauj no rov qab mus rau qhov pib: “Nws qhia txog Nws txoj kev hlub li no, vim peb tsev neeg los ntawm Vajtswv los.” Leej Txiv txoj hau kev rau nws cov me nyuam yog ib txoj kev hlub. Yog ib txoj hau kev kom Nws cov me nyuam—Nws tsev neeg—koom ua ke nrog Nws nyob. Txwj Laug Russell M. Nelson qhia hais tias: “Leej Txiv Saum Ntuj Ceeb Tsheej xav kom Nws cov me nyuam tau ob qho … : kev tsis txawj tuag thiab txoj sia nyob mus ib txhis, ‘uas txhais hais tias peb yuav nrog Nws nyob hauv Nws tsev neeg.’”¹⁴ Yuav muaj raws li Nws xav tsuas yog peb qhia txog Leej Txiv Saum Ntuj Ceeb Tsheej txoj kev hlub rau Nws tsev neeg thiab pab lwm tus thiab qhia lawv txog Nws txoj hau kev.

Nees nkaum xyoo tas los, Thawj Pawg Thawj Tswj Hwm thiab Pawg Kaum Ob tug Thwj Tim hais lus rau tag nrho neeg ntiaj teb thaum lawv tshaj tawm txog tsev neeg. Txij thaum ntawd, haj yam muaj neeg uas tawm tsam txhua tsev neeg.

Yog tias peb yuav ua raws li peb tej kev lav ris ua Vajtswv cov ntxhais, peb yuav tsum to taub txog qhov uas kev qhia qhov tseeb txog Leej Txiv Saum Ntuj Ceeb Tsheej txoj hau kev rau Nws tsev neeg thiab peb txoj kev lav ris tseem ceeb npaum li cas. Thawj Tswj Hwm Howard W. Hunter piav hais tias:

“Peb yuav tsum hais kom cov poj niam hauv lub Koom Txoos sawv nrog thiab pab txhawb nqa cov Kwv Tij kom tawm tsam kev phem uas nyob ib puag ncig thiab kom lawv ua tus Cawm Seej tej hauj lwm. …

“… Yog li ntawd peb yaum kom nej saib xyuas ua zoo kom txhawb nqa peb tsev neeg, peb lub koom txoos, thiab peb cov neeg zej zog.”¹⁵

Cov viv ncaus, peb yeej koom Nws tsev neeg. Nws hlub peb. Nws xav tau peb. Vajtswv muaj ib lub hom phiaj, ib txoj hauj lwm, ib qhov chaw rau peb nyob hauv lub Koom Txoos thiab Vajtswv lub nceeg vaj thiab nyob hauv Nws tsev neeg nyob mus ib txhis. Nej puas paub hauv nej lub siab tias nej Leej Txiv Saum Ntuj Ceeb Tsheej hlub nej thiab xav kom nej thiab cov uas nej hlub nrog Nws nyob? Ib yam li “Leej Txiv Saum Ntuj Ceeb Tsheej thiab Nws Leej Tub, Yexus Khetos yog neeg zoo tag nrho …, Nkawd tej kev cia siab rau peb yeej zoo tag nrho.” Nkawd txoj hau kev yeej zoo tag nrho, thiab yeej yuav muaj raws li Nkawd cov lus cog tseg. Kuv zoo siab ua tim khawv txog tej no, los ntawm Yexus Khetos lub npe, amees.