Baam̧le eo Ej An Anij

Elōn̄ ke men raiboojojļo̧k im em̧m̧anļo̧k jān m̧ool ko rerreeo im reļamwaan an gospel eo katakin ilo juon al an Būraimere? Kom̧ aolep leddik ro ilo Būraimere joteen in kom̧ jeļā etan al ij iten kōnono kake. Kom̧ ar katak kake ilo būrookraam̧ eo ami iiō eo ļo̧k.

Ilo naan ko an “Baam̧le eo Ej An Anij”¹— ekar jan̄ ekkeinļo̧k ilo kweilo̧k in—jaar kakeememej kōn katak eo erreo. Jejjab katak wōt kōn baam̧le eo ej an Anij ak bwe jej barāinwōt m̧ōttan baam̧le eo an Anij.

Ļain eo jinoin ilo al eo ej katakin: “Jemād ewōr juon an baam̧le. Ej n̄a! Ej kom̧, im aolep ro jet: jej ajri ro Nejin.” Jān naan in kean̄ eo an baam̧le, jej katak, “Ilo jikin eo ilo mour eo m̧okta, ajiri in jetōb ro nejin raar jeļā im kabun̄jar n̄an Anij āinwōt eo Jemeir Indeeo.” Ilo jikin in ilo mour eo m̧okta, jaar katak kōn kadkad eo ad kōrā indeeo. Jekar jeļā bwe kōj kajjojo rej “juon jiron̄ … jitōnbōro nejin jined im jemed ilan̄.”²

Iaļ in ito itak in ad tok n̄an laļ in ekar jab ukōt m̧ool kein. Kōj kajjojo jej an im aikuj ilo baam̧le eo an Anij. Baam̧le ko ad ioon laļ in aolep rej oktak. Im tōre in jej kōm̧m̧ane jon̄an eo em̧m̧antata n̄an ejaake imminene ko rekajoor an baam̧le ko, membōr in baam̧le eo ej an Anij ejjab jeno̧lo̧k ilo jabdewōt jekjek—eļan̄n̄e rim̧are, eļan̄n̄e m̧am̧a ak baba, joñan jāān, wāween iiaio, ak kain jekjek rot jej likūt ilo iaļan bōk meļeļe ko.

Jej an. “Jej leddik ro nejin Jemedwōj Ilan̄, eo ej iakwe kōj, im jej iakwe E.”³

Ļain eo kein karuo an al in ej ļapļo̧k ilo eo kein kajuon. “E ekar jilkintok kōj kajjojo n̄an laļ, jān ļo̧tak, n̄an mour im katak ijin ilo baam̧le ko.”

Ilo mour eo m̧okta, jaar katak bwe jenaaj aikuji juon tōre an mour in. Jekar “errā kōn karōk eo an [Jemedwōj Ilan̄] ilo wāween an ajri ro Nejin maron̄ bōk juon ānbwinnin kanniōk im bōk en̄jake jān laļ in n̄an eddōk m̧aanļo̧k m̧ae wāppen im eļaptata kile mejān kajjik eo [ad] ekwojarjar āinwōt rijolet mour indeeo.”⁴

Eļtōr Richard  G. Scott ekar kōmeļeļeik bwe “Kar katakin kōj ilo laļ eo m̧okta bwe jibadbad eo ad n̄an itok ñan ijin ej ñan idajon̄jon̄, kajjieon̄, im eddōkļo̧k.”⁵ Eddōkļo̧k in ej itok āinwōt elōn̄ jekjek ko āinwōt ewōr kajjojo rej en̄jake mālijjon̄. Ij jan̄in kar mour ilo mour in jepel, metak im jakoņ eo ej itok jān em̧m̧akūt, ak eddo eo ej ekkejelļo̧k ippān juon m̧am̧a ejjeļo̧k pāleen. Ej jan̄in wōr nejū ajri emej, jab maron̄ neji, ak kōņaan bar juon kōrā. Ij jan̄in kar ioon kōmetak ak nan̄inmej enana ak an̄ūrlep. Men kein rej jan̄in kar letok aō iien eddōkļo̧k.

Kiiō, elōn̄ jet iami rej ļōmņak, “Ekwe, Jijtōr Stephens, kwoj jab meļeļe!” Im ij uwaake kom̧ bōlen kom̧ jim̧we. Ij jab lukkun meļeļe apan̄ ko ami. Ak jān mālijjon̄ im kapo ko aō make—ko rekar kiel eō bwe in bukwelōlō im jar—Ikar lukkun jeļā kajien juon eo ej meļeļe—E eo ekar “jeļā liaajlo̧ļ,”⁶ eo ekar en̄jake aolepāer, im meļeļe aolepāer. Ilo kakkobaba, iaar en̄jake aolep mālijjon̄ ko an mour in ko ikar kwaļo̧ki jān wāween ko an leddik ro, m̧am̧a ro, bubu ro, kōrā eo jeid ak jatid, kōrā eo jined ak jemed, im ro m̧ōttad.

Eddo in ad āinwōt leddik ro nejin Anij rej kōjparok bujen ko ej jab n̄an katak wōt kōn apan̄ ko ad make; ej n̄an ippān doon ilo m̧ōņōņō im tūriam̧o̧ ilo ad rie membōr ro jet an baam̧le eo an Anij ilo kijejeto ko aer, āinwōt ad kar kōm̧m̧an bujen n̄an kōm̧m̧ane.

N̄e jej kōm̧m̧ane menin, jej barāinwōt meļeļe im lōke bwe Rilo̧mo̧o̧r eo ejeļā wāween ko reppen im Ej tōl kōj jān jabdewōt kain būrom̧ōj im inepata ko remaron̄ in itok. E ej iakwe eo erreo, im An iakwe “ej wōnm̧aanļo̧k indeeo”⁷—ilo kōj ilo ad ļoor E.

Āinwōt leddik ro nejin Anij im rikaļoor ro an Jisōs Kraist, jej “m̧akūtkūt ekkar n̄an meļeļe ko Anij ear katōk” ilo būruwōd.⁸Kareel eo ad ej jab jabwe n̄an membōr in baam̧le eo ad.

Pija

Photo of Sister Yazzi and Sister Yellowhair

Raan ko ļo̧k ekar wōr aō iien loļo̧k Yazzie eo jeid im jatid jān Chinle Arizona Stake ilo m̧weo im̧ōn. Ekar karuwaineneik eō n̄an m̧weo im̧ōn, men eo jinoin iaar loe ekar būreeim in pija in baam̧le eo im pija in mijenede ro ilo dipin m̧weo im̧ōn im ioon tebōļ ko. Kōn menin iaar kajjitōk, “Ewōr jet jibūm̧ ajri?”

Ekar ilbōk kōn kajjitōk eo aō, ekar kōm̧akūt aeran kwaļo̧k ke ejaje. Ikar pok kōn uwaak eo an, iaar reilo̧k n̄an leddik eo nejin, Jejtōr Yellowhair, eo ekar uwaak, “Ejjab jeļā ewōr jete jibūn ajri. Jej jab bon̄bon̄. Aolep ajri rej ān̄inn̄in e Bubu—e ej Bubu n̄an aolep.”

Jejtōr Yazzie ejjab jokōd an iakwe im kareel n̄an lukkuun baam̧le eo an. E emeļeļe ta meļeļein kōļapļo̧k kareel eo an ilo an wōnm̧aanļo̧k wōt im kōm̧m̧ani men ko rem̧m̧an, kōjeram̧m̧an, kōkkaajriri, im dāpij baam̧le eo ej an Anij. E emeļeļe bwe “jabdewōt iien juon kōrā ej kōkajoorļo̧k tōmak eo an juon ajri, ej jipan̄ļo̧k kajoor eo an juon baam̧le—kiiō im ilju im jekļaj.”⁹

Ļain eo kein kajilu in al eo ej kōmeļeļeikļo̧k unin mour in ad ioon laļ in: “Anij ekar letok n̄an kōj baam̧le ko n̄an jipan̄ kōj erom ta eo Ekōņaan bwe jen erom.” Jisōs ekar katakin bwe n̄e jejjab juon wōt jejjab armej ro An. ¹⁰ Naan in kean̄ eo an baam̧le ej katakin bwe āinwōt leddik in jetōb ro nejin jemedwōj ilan̄ im jinedwōj ilan̄, kōj ewōr juon ad mour kwojarjar, kadkad indeeo, im unleplep. Anij ekōņaan bwe jen juon wōt—leddik ro rej kōjparok bujen, ippān doon ilo apan̄ ko an mour ko ad kajjojo,¹¹ ro rej kōņaan in katak men otemjej ko remenin aikuj n̄an ad ro̧o̧l n̄an im̧aan Mejān, liāp n̄an E āinwōt m̧ōttan baam̧le indeeo eo An.

“Kain̄i ko rekwojarjar im bujen ko kōm̧m̧ani ilo tampeļ ko rekwojarjar rej kōmaron̄ [ad] ro̧o̧l n̄an im̧aan mejān Anij im n̄an baam̧le ko n̄an maron̄ ippān doon n̄an indeeo.”¹² Kain̄i kein jej būki im bujen kein jej kōm̧m̧ani ilo ad peptaij im ilo tampeļ ko rekwojarjar rej liāpe baam̧le eo ej an Anij jim̧or irājet ko ruo in rōn̄ōl eo—liāpe kōj n̄an Jemād kōn Nejin, eo ekar jar, “Bwe er otemjej ren juon, āinwōt Kwe, Jema ilo N̄a, im N̄a ilo Kwe, bwe er barāinwōt ren ilo Kōj, bwe laļ en tōmak bwe Kwaar jilkintok Eō.”¹³

Ilo ad kōjerbal iien eo ad ilo mour in n̄an katak im kōjerbal katak ko an Rilo̧mo̧o̧r eo, jej erom āinwōt E. Jej jino meļeļe bwe E ej iaļ eo—ejjeļo̧k ijjelo̧kin iaļ in—me jemaron̄ anjo jān apan̄ ko an wabanban, maron̄ mour, im ro̧o̧l ļo̧k n̄an kapijuknen eo ad ilan̄.

Ļain eo āliktata an al in ro̧o̧l n̄an ijo ekar ijjino ie: “En̄in ej wāween An kwaļo̧k An iakwe, n̄an baam̧le eo ej an Anij.” Karōk eo an Jemed n̄an ajri ro Nejin ej juon karōk in iakwe, im ej juon karōk n̄an kakobaik ajri ro Nejin—baam̧le eo An—Ippān. Eltōr Russell M. Nelson ekar katakin, “Jemedwōj Ilan̄ ewōr ruo men ko ekōņaan n̄an ajri ro Nejin …  : jab wabanban im mour indeeo, ‘eo me ej meļeļe mour Ippān bar ilo kapijuknen eo.’”¹⁴ Kōņaan kein maron̄ kile wōt n̄e jej kwaļo̧k iakwe eo an Jemedwōj Ilan̄ n̄an baam̧le eo ej An ilo ad pukōt ļo̧k im kwaļo̧k karōk in An ippān ro jet.

Ron̄oul iiō ko rem̧ootļo̧k, Būreejtōnji eo Kein Kajuon im Doulul eo an Jon̄oulruo Rijilōk ro raar tōpar aolepān laļ in ilo aer kar tilm̧aake juon naan in kean̄ ioon baam̧le ko. Jān iien eo, jum̧ae ko kōn baam̧le emōj aer ļapļo̧k.

Eļan̄n̄e jekōņaan wājepdik ilo eddo kein ad rekwojarjar āinwōt leddik ro nejin Anij, jej aikuj meļeļe em̧m̧an in ejjeļo̧k jem̧ļo̧kin im eddo in ad kajjojo n̄an katakin m̧ool ko ilo karōk eo an Jemedwōj Ilan̄ n̄an baam̧le eo An. Būreejtōn Howard W. Hunter ekar kōmeļeļeiki:

“Ewōr juon aikuj eļap n̄an kakuktok ippān doon kōrā in Kabun̄ in n̄an jutak ippān im n̄an Em̧m̧aan ro rejitōn bōro kabōjrak lōn̄ļo̧k in men ko renana ipeļaakid im kōm̧akūt m̧aanļo̧k jerbal in an ad Rilo̧mo̧o̧r.  …

“… Kōn menin jej kajjitōk bwe kom̧in jipan̄ kōn kareel eo ami ekajoor n̄an em̧m̧an eo n̄an kōkajoorļo̧k baam̧le ko ad, kabun̄ eo ad, im jukukinpād ko.”¹⁵

Jejtōr ro jeiū im jatū, jej an. Jej iakwe. Eļap aikuji kōj. Ewōr ippād juon un ekwojarjar, jerbal, jikin, im eddo ilo Kabun̄ in im aelōn̄ an Anij im ilo baam̧le eo An indeeo. Kom̧ij ke jeļā ilo ijo em̧wilaļ ibūruwōm̧i bwe Jemedwōj Ilan̄ ej iakwe kom̧ im Ekōņaan bwe kom̧ im ro kom̧ij iakwe ren pād Ippān? Āinwōt ba “Jemedwōj Ilan̄ im Nejin, Jisōs Kraist rej wāppen …, Aer kōjatdikdik kōn kōj ewāppen.” Karōk eo aer n̄an kōj ewāppen, im kallim̧ur ko Aer rem̧ool. Kōn m̧ool kein ij lukkun kam̧ool ilo etan Jisōs Kraist, amen.