Lub Txiaj Ntsim Tshav Ntuj
Los ntawm Thawj Tswj Hwm Dieter F. Uchtdorf
Tus Pab Cuam thib Ob hauv Thawj Pawg Thawj Tswj Hwm
Hnub no thiab nyob mus ib txhis cov uas muaj lub siab mob thiab lub siab uas xav ua zoo txais tau Vajtswv txoj kev tshav ntuj.
Thaum Hnub Easter peb ua koob tsheej txog qhov uas tib neeg tau tos ntsoov thiab yog ib qho zoo tshaj txhua yam txij thaum ntuj tsim teb raug los.
Yog ib hnub uas hloov ib puas tsav yam.
Thaum hnub ntawd, kuv lub neej tau hloov lawm.
Nej lub neej tau hloov lawm.
Tag nrho Vajtswv cov me nyuam txoj hmoov hloov lawm.
Nyob rau hnub ntawd, tib neeg tus Cawm Seej, tus uas tau ris txoj saw hlau ntawm kev txhaum thiab kev tuag uas khi peb, nws muab txoj saw hlau ntawd tu nrho thiab tso peb dim.
Vim peb tus Txhiv Dim ua kev txi no, kev tuag tsis muaj taug, lub ntxa yuav kov tsis yeej.1 Dab Ntxwg Nyoog tsis muaj hwj chim uas kav ntev, thiab Leej Txiv “tsa Yexus Khetos sawv rov los pab peb kom peb muaj txoj sia tshiab.”2
Muaj tseeb tiag, tus Thwj Tim Povlauj hais qhov yog thaum nws hais kom peb “cia li muab tej lus no nplij txhua tus lub siab.”3
Vajtswv txoj Kev Tshav Ntuj
Peb hais ntau txog tus Cawm Seej txoj Kev Theej Txhoj—thiab yeej tsim nyog ua li no!
Raws li Yakhauj hais tias, “Yog vim li cas thiaj yuav tsis qhia txog Khetos txoj kev theej txhoj, thiab txais yuav txoj kev paub meej tag nrho [txog] nws?”4 Tiam sis thaum peb “hais txog Khetos, … zoo siab txog Khetos, … qhia txog Khetos, [thiab] qhia tej yuav muaj los yav tom ntej txog Khetos”5 txhua lub sij hawm, peb yuav tsum ris Vajtswv txiaj rau Vajtswv Leej Tub txoj kev txi uas kav ib txhis.
Peb yuav tsum tsis txhob lam qhia thiab lam sib tham txog tus Cawm Seej txoj Kev Theej Txhoj. Yog ib qho dawb huv, vim dhau los ntawm “txoj kev txi loj thiab kawg” ntawm Yexus Khetos thiaj muaj “txoj kev cawm seej los rau txhua tus uas yuav ntseeg nws lub npe.”6
Kuv xav tsis thoob tias Vajtswv Leej Tub yuav nqis los cawm peb, vim peb yog neeg tsis dawb huv, tsis zoo tag nrho, uas ua yuam kev thiab tsis ris txiaj. Kuv tsis muaj peev xwm to taub tus Cawm Seej txoj Kev Theej Txhoj tag nrho, thiab thaum kawg kuv tsuas piav tau li no xwb hais tias: Vajtswv hlub peb kawg nkaus mus ib txhis li. Kuv tsis muaj peev xwm to taub “qhov dav, qhov ntev, qhov tob, thiab qhov siab … [ntawm]Yexus Khetos txoj kev hlub.”7
Ib qho uas qhia meej txog txoj kev hlub no yog qhov uas cov vaj lug kub hu ua Vajtswv txoj kev tshav ntuj—uas yog Vajtswv txoj kev pab thiab kev pub dag zog uas pab peb loj hlob tuaj ntawm cov neeg uas ua yuam kev rais los ua cov neeg ntawm qhov tseeb thiab qhov kaj, mus txog thaum peb txais yeeb koob los ntawm qhov tseeb thiab peb paub txhua yam.8
Vajtswv txoj kev tshav ntuj yog ib qho zoo kawg nkaus. Tiam sis neeg feem coob tsis to taub qhov no.9 Txawm li ntawd los, peb yuav tsum paub txog Vajtswv txoj kev tshav ntuj yog tias peb xav txais tej yam uas Nws tau npaj rau peb nyob hauv Nws lub nceeg vaj nyob mus ib txhis.
Yog li ntawd kuv xav hais lus txog kev tshav ntuj. Kuv xav hais txog qhov thib ib, qhov uas kev tshav ntuj qhib lub rooj ntug, thiab, qhov thib ob, ua rau peb txais tau cov koob hmoov saum ntuj ceeb tsheej.
Qhov Ib: Kev Tshav Ntuj Qhib lub Rooj Ntug
Rau qhov peb “txhua tus puav leej ua txhaum thiab tu ncua Vajtswv lub hwj chim lawm,”10 thiab vim “muaj tsis tau ib yam dab tsi uas vuab tsuab nkag tau mus rau hauv Vajtswv lub nceeg vaj ib zaug li,”11 peb txhua tus tsis tsim nyog rov qab mus nrog Vajtswv nyob.
Txawm peb yuav ua hauj lwm rau Vajtswv kawg siab kawg ntsws los, yeej tsis txaus nkaus, vim peb tseem yog “cov tub qhe tsis muaj nqis”.12 Peb them tsis tau nqi kom nkag mus rau hauv ntuj ceeb tsheej; kev txim lij tav peb kev, es peb kov tsis yeej qhov no peb tus kheej xwb.
Tiam sis yeej muaj ib txoj kev.
Vajtswv txoj kev tshav ntuj yog peb txoj kev cia siab uas tseem ceeb thiab kav ib txhis.
Dhau los ntawm Yexus Khetos txoj kev txi, txoj kev hlub tshua them tau tej nqi ntawm txoj kev txim lij13 “thiab ua kom muaj kev rau noob neej kom lawv yuav muaj kev ntseeg los hloov siab lees txim.”14
Peb tej kev txhaum, txawm yuav liab cuag ntshav los yuav ua kom dawb paug li daus.15 Vim peb tus Cawm Seej “muab nws txoj sia los theej sawv daws lub txhoj,”16 ces Nws qhib kev rau peb nkag mus rau hauv Nws lub nceeg vaj.17
Lub rooj ntug qhib lawm!
Tiam sis Vajtswv txoj kev tshav ntuj tsis ua rau peb rov qab rais los ua neeg uas tsis muaj txim. Yog tias kev cawm seej tshem peb tej kev ua yuam kev thiab tej kev txhaum xwb, ces txoj kev cawm seej tsis pab peb ua raws li Leej Txiv lub siab nyiam rau peb. Nws xav kom peb ua ntau ntxiv: Nws xav kom Nws cov tub thiab ntxhais rais los ua neeg zoo li Nws.
Thaum peb muaj Vajtswv lub txiaj ntsim tshav ntuj, ces kev ntseeg tsis ua rau peb mus rov qab; ua rau peb yuav mus tom ntej xwb.
Kev tshav ntuj yuav ua rau peb mus siab tshaj qhov peb to taub! Yuav ua rau peb txais tau kev tsa nto nyob hauv peb Leej Txiv Saum Ntuj Ceeb Tsheej lub nceeg vaj xilethi-aus, qhov chaw uas peb yuav nrog cov uas peb hlub txais tau tag nrho nws muaj thiab tag nrho nws lub yeeb koob.18 Txhua yam yog peb li, thiab peb yog Yexus Khetos li.19 Muaj tseeb tiag, txhua yam uas Leej Txiv muaj los Nws yuav muab rau peb.20
Yog peb xav txais lub yeeb koob no, ib lub qhov rooj uas qhib lawm yeej tsis txaus; peb yuav tsum nkag mus rau hauv ntuj ceeb tsheej nrog ib lub siab uas xav hloov—ib lub siab uas xav hloov ib yam li vaj lug kub piav txog hais tias peb “yug dua tshiab; muaj tseeb tiag yug los ntawm Vajtswv, pauv ntawm [peb] tej kev ntiaj teb thiab ntawm txoj kev poob, los rau … kev ncaj ncees, [txais tau] Vajtswv [txoj kev] txhiv dim, ciaj los mus ua nws tej tub thiab tej ntxhais.”21
Qhov Ob: Kev Tshav Ntuj Ua rau Peb Txais Tau cov Koob Hmoov Saum Ntuj Ceeb Tsheej
Ib qho ntxiv uas los ntawm Vajtswv txoj kev tshav ntuj yog qhov uas peb txais tau cov koob hmoov saum ntuj ceeb tsheej xws li lub hwj chim thiab kev dag zog, ua rau peb ua tau tej yam uas peb ua tsis tau yog peb tsis muaj Nws txoj kev tshav ntuj. Yog los ntawm Vajtswv txoj kev tshav ntuj Nws cov me nyuam thiaj paub kov yeej tus yeeb ncuab, kov yeej kev txhaum, thiab los ua neeg zoo tag nrho dhau los ntawm Khetos.22
Txawm peb txhua tus muaj tej kev qaug zog, peb kov yeej tau tej ntawd. Muaj tseeb tiag dhau los ntawm Vajtswv txoj kev tshav ntuj, yog peb txo hwj chim thiab muaj kev ntseeg, tej yam qaug zog yuav hloov los ua tej yam uas muaj zog.23
Nyob hauv peb lub neej, Vajtswv txoj kev tshav ntuj pub cov koob hmoov ntawm lub ntiaj teb no thiab tej txiaj ntsim ntawm sab ntsuj plig uas pab peb lub neej thiab txhawb nqa peb tej txuj ci. Nws txoj kev tshav ntuj hloov peb lub siab kom peb xav ua zoo. Nws txoj kev tshav ntuj pab peb ua neeg zoo.
Leej Twg Tsim Nyog Txais Tau?
Nyob hauv phau Npaiv Npaum peb nyeem txog lub sij hawm uas Yexus Khetos mus xyuas Ximoos uas yog ib tug Falixais.
Rau luag pom mas, Ximoos yog ib tug neeg zoo thiab ncaj. Nws pheej ua tej yam nws yuav tsum ua kom teev ntuj: nws ua raws li kev cai, them ib feem kaum, hwm Hnub Caiv, thov Vajtswv txhua hnub, thiab mus rau lub tsev teev ntuj.
Tiam sis thaum Yexus nrog Ximoos, ib tug poj niam tuaj, ntxuav tus Cawm Seej txhais ko taw nrog nws cov kua muag, thiab pleev roj zoo rau Nws txhais ko taw.
Ximoos tsis zoo siab txog qhov no, vim nws paub tias tus poj niam yog ib tug neeg txhaum. Ximoos xav hais tias yog Yexus tsis tau paub, ces Nws tsis yog ib tug yaj saub vim Nws yuav tsis pub tus poj niam kov Nws.
Yexus paub Ximoos tej kev xav thiab nug Ximoos ib lo lus nug. “Muaj ob tug txiv neej tshuav ib tug yawg nqi. Ib tug tshuav tsib puas lub nyiaj, ib tug tshuav tsib caug lub nyiaj.
Nkawd puav leej tsis muaj nyiaj them tus yawg ntawd, ces tus yawg ntawd txawm zam nqi rau nkawd huv tib si. Yog li, ob tug ntawd, tus twg yuav nco tus yawg ntawd txiaj ntsig heev dua?”
Ximoos teb hais tias yog tus uas tus yawg ntawd zam nqi ntau rau.
Ces Yexus qhia ib zaj tseem ceeb: “Koj puas pom tus poj niam no? … Qhov uas tus poj niam no muaj kev hlub loj npaum li no, qhia hais tias Vajtswv twb zam nws tej kev txhaum huv tib si lawm. Tiam sis tus uas Vajtswv zam txim tsawg, tus ntawd yeej nco Vajtswv txiaj ntsig tsawg.”24
Peb zoo li tus twg ntawm ob tug neeg no?
Peb puas zoo li Ximoos? Peb puas xav tias peb ua tej yam zoo, tso siab rau peb txoj kev ua ncaj ncees? Peb puas ua siab luv rau cov uas tsis ua raws li peb tej kev cai? Peb puas lam koom peb tej kev sib ntsib, rua lo nyob hauv hoob kawm txoj Moo Zoo cov Lus Qhuab Qhia, thiab saib peb xov tooj ntawm tes nyob hauv kev sib ntsib txais lub cim nco txog?
Los yog peb puas zoo li tus poj niam, tus uas xav tias nws tsis muaj kev cia siab thiab poob siab tag nrho vim yog nws tej kev txhaum?
Peb puas hlub ntau?
Peb puas to taub hais tias peb ris Leej Txiv Saum Ntuj Ceeb Tsheej txiaj thiab thov kawg siab kawg ntsws kom txais tau Vajtswv txoj kev tshav ntuj?
Thaum peb txhos caug thov Vajtswv, peb puas hais txog peb txoj kev ua ncaj ncees, los yog peb puas lees hais tias peb ua txhaum, thov kom txais Vajtswv txoj kev hlub tshua, thiab los kua muag vim peb ua Vajtswv tsaug rau txoj kev txhiv dim?25
Peb txoj kev mloog lus them tsis tau tus nqi ntawm txoj kev cawm seej; Vajtswv Leej Tub twb los ntshav kom them tus nqi ntawd.26 Qhov uas peb xav tias peb tej hauj lwm zoo them tau tus nqi ntawm kev cawm seej yeej zoo li yus yuav pib nyab hoom ces xav tias yus twb yuav tag nrho lub koom haum tsav nyab hoom. Los yog xav tias tom qab yus them nqi rau yus lub tsev, yus twb yuav tag nrho lub ntiaj teb.
Vim Li Cas Yuav Tsum Mloog Lus?
Yog tias kev tshav ntuj yog Vajtswv lub txiaj ntsim uas Nws pub rau peb, ces vim li cas peb yuav tsum ua raws li Vajtswv tej lus txib? Vim li cas peb yuav tsum coj raws li Vajtswv hais—los yog hloov siab lees txim? Vim li cas peb yuav tsis hais tias peb twb ua txhaum thiab cia Vajtswv cawm peb xwb?
Los sis, raws li Povlauj nug hais tias, “Puas tsim nyog peb pheej ua txhaum kom Vajtswv haj yam hlub peb ntxiv?” Povlauj teb meej meej hais tias: “Tsis txhob ua li ntawd.”27
Cov kwv tij thiab cov muam, peb ua raws li Vajtswv tej lus txib—vim peb hlub Nws!
Thaum peb siv zog to taub Vajtswv txoj kev tshav ntuj kawg siab kawg ntsws ua rau peb paub vim li cas peb yuav tsum txo hwj chim thiab muaj kev ris txiaj mloog peb Leej Txiv Saum Ntuj Ceeb Tsheej lus. Thaum peb taug kev zoo li Nws cov thwj tim, ces Nws txoj kev tshav ntuj pab peb, hloov peb lub siab, thiab pab peb rais los ua neeg zoo li Nws, thiab coj peb rov qab mus nrog Nws nyob. “Tus Tswv uas Muaj Hwj Chim Loj Tshaj Plaws tus Ntsuj Plig, uas tau ua ib qhov kev pauv loj nyob hauv peb, … xwv kom peb tsis muaj siab xav ua phem ntxiv lawm, tiam sis ua zoo kom tsis tu ncua mus li.”28
Yog li ntawd, peb ua raws li Vajtswv tej lus txib vim peb hlub thiab ris Vajtswv txiaj. Txoj kev hlub thiab kev ris txiaj tiag tiag zoo li no yuav ua rau peb tej hauj lwm koom ua ke nrog Vajtswv txoj kev tshav ntuj. Peb yuav xav txog kev coj dawb huv tsis tu ncua, thiab peb txoj kev tso siab yuav muaj zog nyob ntawm Vajtswv lub xub ntiag.29
Cov kwv tij thiab cov muam, kev rau siab ua neej raws li txoj moo zoo yeej tsis yog ib lub nra hnyav. Yog txoj kev xyiv fab—kev npaj txais tau lub yeeb koob uas nyob mus ib txhis ua peb tug. Peb xav mloog peb Leej Txiv Saum Ntuj Ceeb Tsheej lus vim yog peb ua li ntawd ces yuav pab peb txawj mloog tej yam ntawm sab ntsuj plig. Yuav qhib tej txoj kev uas peb tsis tau paub txog. Peb yuav to taub meej heev thaum peb ua raws li Leej Txiv lub siab nyiam.30
Txoj kev tshav ntuj yog ib lub txiaj ntsim ntawm Vajtswv, thiab thaum peb xav ua raws li Vajtswv tej lus txib ces peb ncav tes txais tau lub txiaj ntsim dawb huv los ntawm peb Leej Txiv Saum Ntuj Ceeb Tsheej.
Txhua Yam Peb Ua Tau
Tus yaj saub Nifais tau pab peb to taub Vajtswv txoj kev tshav ntuj thaum nws hais tias, “Peb rau siab ntso ua zoo … los yaum peb tej me nyuam, thiab peb cov kwv tij thiab, kom los ntseeg … Khetos, thiab rov los nrog Vajtswv sib raug zoo; vim peb paub hais tias twb yog los ntawm txoj kev zoo uas peb raug cawm dim, tom qab uas peb tau ua txhua txhia yam uas peb ua tau.”31
Tiam sis, tej lub sij hawm kuv xav tias peb tsis to taub lo lus “tom qab uas peb tau ua txhua txhia yam uas peb ua tau.” Peb yuav tsum to taub hais tias “tom qab” tsis txhais hais tias “rau qhov.”
Peb tsis dim “rau qhov” peb tau ua txhua yam peb ua tau. Puas muaj leej twg uas tau ua txhua yam peb ua tau? Vajtswv puas tos mus txog thaum peb siv dag zog tag nrho ua ntej Nws yuav cawm peb los ntawm Nws txoj kev tshav ntuj?
Ntau tus neeg poob siab thaum lawv pheej ua yuam kev. Lawv paub ntawm lawv tus kheej tias “lub siab mas kub lug, tiam sis cev nqaij daim tawv qaug zog kawg li.”32 Lawv tsa suab nrog Nifais tshaj tawm tias “kuv tus ntsuj plig muaj kev nyuaj siab yeej vim kuv tej kev tsis ncaj ncees.”33
Kuv paub tseeb tias Nifais tau paub tias tus Cawm Seej txoj kev tshav ntuj cia thiab pab peb kov yeej kev txhaum.34 Yog vim li no Nifais thiaj rau siab ntso yaum nws cov me nyuam thiab cov kwv tij “kom los ntseeg Khetos, thiab rov los nrog Vajtswv sib raug zoo.”35
Thaum kawg, li ntawdyog tej yam uas peb ua tau! Thiab peb txoj hauj lwm hauv lub neej no yeej yogli ntawd!
Txhua tus Txais Tau Kev Tshav Ntuj
Thaum kuv xav txog txhua yam uas tus Cawm Seej ua rau peb ua ntej thawj Hnub Caiv Easter, kuv xav tsa suab qhuas Vajtswv tus uas Siab Tshaj Plaws thiab Nws Leej Tub, Yexus Khetos!
Nws twb qhib rooj ntug lawm!
Nws qhib kev rau peb txais koob hmoov lawm!
Hnub no thiab nyob mus ib txhis cov uas muaj lub siab mob thiab lub siab uas xav ua zoo txais tau Vajtswv txoj kev tshav ntuj.36 Yexus Khetos tau npaj txoj kev rau peb nce siab tshaj qhov peb muaj peev xwm xav txog.37
Kuv thov kom peb yuav muaj qhov muag tshiab kom pom kev thiab muaj siab tshiab kom paub tias tus Cawm Seej txoj kev theej txhoj tseem ceeb npaum li cas. Kuv thov kom peb yuav qhia Vajtswv tias peb hlub nws thiab peb ris Nws txiaj rau Vajtswv txoj kev tshav ntuj thaum peb coj raws li Nws tej lus txib thiab muaj kev xyiv fab “ua lub neej tshiab.”38 Los ntawm peb tus Xib Hwb thiab tus Txhiv Dim, Yexus Khetos lub npe, amees.