2010–2019
O Le Meaalofa o le Alofatunoa
Aperila 2015


O Le Meaalofa o le Alofatunoa

O le asō ma aso uma o loo avanoa ai le alofatunoa o le Atua i tagata uma o o latou loto ua nutimomoia ma o latou agaga ua salamo.

I le Aso Sa o le Eseta tatou te faamanatu ai le mea mamalu na tupu i le talafaasolopito o le lalolagi sa leva ona faatalitali i ai tagata.

O le aso na suia ai mea uma.

O lena aso na suia ai lo’u olaga.

Na suia ai lou olaga.

Na suia ai le taunuuga o fanau uma a le Atua.

I lena aso faamanuiaina, o le Faaola o tagata uma, lē na tauaveina i luga o Ia Lava filifili o le agasala ma le oti ia na tatou nofopologa ai, na motusiaina na filifili ma faasaoloto i tatou.

Ona o le taulaga a lo tatou Togiola pele, ua leai ai se tui o le oti, ua le manumalo foi le tuugamau,1 ua leai se mana tumau o Satani, ma o i tatou na “fanaufouina … ina ia iu i le faamoemoe ua ola, i le toe tu mai o Iesu Keriso.”2

E sa’o lava le Aposetolo o Paulo ina ua ia saunoa e mafai ona tatou “fefaamafanafanaa’i i nei upu.”3

Alofatunoa o le Atua

Tatou te talanoa soo i le Togiola a le Faaola—ma e sa’o lena mea!

I upu a Iakopo, “Aisea tatou te lē tautatala ai e uiga i le togiola a Keriso, ma saili ia maua se malamalama atoatoa e uiga ia te ia?”4 Ae a o tatou “tautalatala e uiga ia Keriso, … olioli ia Keriso, … talai atu Keriso, [ma] vavalo e uiga ia Keriso”5 i avanoa uma, e le tatau lava ona mou ese lo tatou lagonaina o le ofo ma le lotofaafetai loloto mo le taulaga e faavavau a le Alo o le Atua.

O le Togiola a le Faaola e le mafai ona avea ma se mataupu faasamasamanoa i a tatou aoaoga, a tatou talanoaga, po o ō tatou loto. E paia ma mamalu, aua na auala mai i lenei “taulaga tele ma mulimuli” na aumaia ai e Iesu le Keriso le “olataga ia i latou uma o e e talitonu i lona suafa.”6

Ou te maofa i le mafaufau atu i le Alo o le Atua na tuu ifo o ia i lalo e laveai i tatou, ona tatou te lē atoatoa, lē mama, ma fai pea mea sese, ma le leai o se lotofaafetai e pei ona tatou matele ai. Ou te taumafai lava ia malamalama i le Togiola a le Faaola i lo’u mafaufau papa’u, ma na o le pau le faamalamalamaga ou te mauaina e faapenei: o le alofa o le Atua ia i tatou e loloto, atoatoa, ma faavavau. E le mafai ona ou faatusatusaina “le lautele, ma le umi, ma le loloto, ma le maualuga … [o le] alofa o Keriso.”7

O se faailoaga mamana o lena alofa lea e masani ona ta’ua e tusitusiga paia o le alofatunoa o le Atua—o le fesoasoaniga faalelagi ma le faaeeina mai o le malosi lea tatou te tuputupu ae ai mai tagata agasala ma tapulaa o loo tatou i ai nei, i tagata faaeaina o le “upumoni ma le malamalama, seia oo ina faamamaluina [i tatou] i le upumoni ma [iloa] mea uma.”8

O se mea sili ona ofoofogia le alofatunoa o le Atua. Ae e tele lava ina malamalama sese i ai.9 E ui e tatau ona tatou iloaina le alofatunoa o le Atua pe afai tatou te faamoemoe ia mautofi i mea ua sauniaina mo i tatou i Lona malo e faavavau.

I lena tulaga ou te fia talanoa ai i le alofatunoa. E patino lava, muamua, o le auala e tatalaina ai e le alofatunoa faitotoa o le lagi ma le lona lua, o le auala na te tatalaina ai pupuni o le lagi.

Muamua: E Tatala e le Alofatunoa Faitotoa o le Lagi

Ona o i tatou uma ua “agasala … ma ua le oo i le [mamalu] o le Atua”10 ma ona “e le mafai e se mea eleelea ona ulu atu i le malo o le Atua,”11 o i tatou uma la ua le agavaa e toe ui atu i le afioaga o le Atua.

E tusa lava pe ao ona tatou auauna atu i le Atua ma o tatou agaga atoa, e le lava lea; aua o le a avea pea i tatou ma ni “auauna lē aoga.”12 E le mafai ona tatou mauaina lo tatou ala i le lagi; o manaoga o le faamasinotonu e tu o se papupuni, lea e leai ai so tatou malosi e faatoilalo ai e i tatou lava ia.

Ae e le leiloloa tagata uma.

O le alofatunoa o le Atua o lo tatou faamoemoe sili ma le faavavau lea.

E ala i le taulaga a Iesu Keriso, le fuafuaga o le alofa mutimutivale ua faamalieina ai manaoga o le faamasinotonu 13 “ma aumai ai ala i tagata e mafai ai ona latou maua o le faatuatua e salamo ai.”14

E ui e ‘ulaula a tatou agasala, ae mafai ona sinasina e pei o le kiona.15 Ona “na foaifuaina e [lo tatou Faaola pele] Ia e fai ma togiola mo tagata uma,”16 o lea ua saunia ai mo i tatou se faitotoa e ulu atu ai i Lona malo e faavavau.17

Ua matala le faitotoa!

Ae o le alofatunoa o le Atua e le tau na ona fuata’i ai o i tatou i le tatou tulaga mama sa i ai muamua. Afai o le uiga o le faaolataga ua na o le tapeeseina ai o a tatou mea sese ma agasala, o le faaolataga la—e tusa ai ma lona matagofie—ua le faataunuuina ai sini tupito a le Tama mo i tatou. E matua maualuga atu lava Lona faamoemoega: E finagalo o Ia i Ona atalii ma afafine ia avea e faapei o Ia.

Faatasi ai ma le meaalofa o le alofatunoa o le Atua, o le ala la i le avea ma soo e le toefoi atu i tua; ae taitai atu i luga.

E taitai atu ai i tatou i mea maualuluga e seasea mafai ona tatou malamalama i ai. E taitai atu ai i le faaeaga i le malo selesitila a lo tatou Tama Faalelagi, lea e siomia ai i tatou e ē pele ia i tatou, mauaina “lona atoatoa, ma lona mamalu.”18 O mea uma e ā tatou ia, ma e ā Keriso i tatou.19 O le mea moni, o mea uma o i ai i le Tama o le a foaiina mai ia i tatou.20

Ina ia mautofi i lenei mamalu, tatou te manaomia atili nai lo o se faitotoa ua matala; e tatau ona tatou ulu atu i lenei faitotoa ma se manao i le loto ina ia sui—o se suiga tele naua lea o loo faamatala e tusitusiga paia o le “toe fanauina; ioe, fananauina i le Atua, ma suia mai lo [tatou] tulaga [faalelalolagi] ma pa’u, i se tulaga o le amiotonu, ua togiolaina e le Atua, ma avea ma ona atalii ma afafine.”21

Lua: E Tatala e le Alofatunoa Pupuni o le Lagi

O le isi elemene o le alofatunoa o le Atua o le tatalaina lea o pupuni o le lagi, lea e liligi mai ai e le Atua faamanuiaga o le mana ma le malosi, tatou te mafaia ai ona ausia mea ia e le mafai ona oo i ai lo tatou lava malosi. O le alofatunoa ofoofogia o le Atua lea e mafai ai e Lana fanau ona faatoilaloina le faaosoosoga matautia ma taufaapōpō a lē taufaasese, lafoai ese agasala, ma “ia faaatoatoaina ia Keriso.”22

E ui e tofu uma i tatou ma agasala, ae mafai ona tatou faatoilaloina. O le mea moni e ala atu i le alofatunoa o le Atua, pe afai tatou te faamaualalo i tatou lava ma maua le faatuatua, e mafai ai ona avea mea vaivai ma mea malolosi.23

I o tatou olaga atoa, ua faaee mai ai e le alofatunoa o le Atua faamanuiaga faaletino ma meaalofa faaleagaga ia e faalauteleina ai o tatou gafatia ma faaoaina ai o tatou olaga. O Lona alofatunoa e faamamaina ai i tatou. E fesoasoani Lona alofatunoa ia i tatou ia avea ai tatou ma ni tagata silisili ona lelei.

O Ai e Mafai Ona Agavaa ai?

I le Tusi Paia tatou te faitau ai i asiasiga a Keriso i le fale o Simona le Faresaio.

I uiga faaalia, sa foliga mai ai Simona o se tagata lelei ma amio sa’o. Na te faia e le aunoa ona tiute faalelotu e pei: sa ia tausia le tulafono, totogi lana sefuluai, tausi le Sapati, tatalo i aso uma, ma alu i le sunako.

Ae a o i ai Iesu ma Simona, sa faalatalata atu se fafine, ma mulumulu aao o le Faaola i ona loifofoga, ma faauuina Ona aao i le suauu manogi.

Sa le fiafia Simona i lea faaaliga o le tapuai, aua na ia iloaina o lenei fafine o se tagata agasala. Sa manatu Simona afai e lei silafiaina e Iesu lenei mea, pe ana o Ia o se perofeta po o pe nei Na te le tuu atu i le fafine e pa’i atu ia te Ia.

I le iloaina o ona manatu, sa faliu atu ai Iesu ia Simona ma fesili atu se fesili. “O tagata e toalua sa la nono mai tupe i le tagata e toatasi: … Sa nono mai le tasi tenari e lima selau, e a le tasi e limagafulu.

“Ua leai [uma] ni a la tupe e toe avatu, ona faamagalo fua lea o ia ia te i laua uma. Ina fai mai ia, po o ai so laua e tele lona alofa ia te ia?”

Sa tali mai Simona o lē sa ia faamagalo atu ana mea e tele.

Ona aoao atu lea e Iesu se lesona loloto: “Ua e iloa ea le fafine nei? … Ua faamagaloina ana agasala e tele; aua ua alofa tele mai o ia: a o le ua faamagaloina i ai se mea itiiti, ua itiiti foi lona alofa.”24

O fea o nei tagata e sili ona pei o i tatou?

O pei ea tatou o Simona? O tatou talitonu ea ma toafimalie i a tatou galuega lelei, faalagolago i lo tatou lava amiotonu? Pe masalo foi o fai sina o tatou le lavā onosai ia i latou e le tutusa o tatou tulaga faatonuina? O tatou ea o se masini faatonutonu, tau na ona faatagā fai o mea, auai i a tatou fonotaga, auai ma le musuā i vasega o le Aoga Sa, ma atonu o fai a tatou telefoni feaveai i taimi o sauniga faamanatuga?

Pe o pei i tatou o lenei fafine, o le sa manatu sa matua leiloa atoa ma leai se faamoemoe ona o le agasala?

O lava ea lo tatou alolofa?

O tatou malamalama ea i lo tatou nofoaitalafu i le Tama Faalelagi ma aioi atu ma o tatou agaga atoa mo le alofatunoa o le Atua?

A tatou tootutuli e tatalo, pe o tautau atu ea na o mea sili o lo tatou lava amiotonu, pe o tautau atu o tatou faaletonu, aioi atu mo le alofa mutimutivale o le Atua, ma le maligi o loimata o le lotofaafetai mo le fuafuaga ofoofogia o le togiolaina?25

O le faaolataga e le mafai ona faatauina i le usiusitai; ae e faatauina i le toto o le Alo o le Atua.26 O le mafaufau ai e mafai ona tatou faafesuiaia a tatou galuega lelei mo le faaolataga e pei o le faatauina o se pepa malaga o le vaalele ona manatu lea tatou te pule i le ofisa vaalele. Pe manatu foi pe a uma ona totogiina le pili o loo mautotogi ai i lo tatou fale, ua tatou pule ai i le paneta o le lalolagi atoa.

Aisea la e Usitai ai?

Afai o le alofatunoa o se meaalofa a le Atua, aisea la ua taua tele ai le usiusitai i poloaiga a le Atua? Aisea e ātu ai i poloaiga a le Atua—po o le salamo, mo lena mea? Aisea e le tau ai na ona tautino atu ua tatou agasala ma tuu i le Atua e laveai i tatou?

Po o le, pe a tuu le fesili i upu a Paulo, “Tatou te nonofo pea ea i le agasala, ina ia faatele ai le alofa tunoa?” E faigofie lava ma manino le tali a Paulo: “[E faasa e le Atua].”27

Uso e ma tuafafine, tatou te usiusitai i poloaiga a le Atua—ona o lo tatou alolofa ia te Ia!

O le taumafai ai ia malamalama i le meaalofa o le alofatunoa o le Atua ma o tatou loto ma mafaufau atoa ua tatou maua ai mafuaaga uma e alolofa atu ai ma usiusitai i lo tatou Tama Faalelagi i le agamalu ma le lotofaafetai. A tatou savalia le ala o le avea ma soo, e faamamaina i tatou, faaleleia i tatou, e fesoasoani ia i tatou ia avea atili e faapei o Ia, ma e taitai atu ai i tatou i Lona afioaga. “O le Agaga o le Alii [lo tatou Atua]” e aumaia ai lea “liuga tele i totonu o i [tatou], … ua le toe i ai so tatou manao e fai mea leaga, ae ia faia mea lelei e le aunoa.”28

O le mea lea, o lo tatou usiusitai i poloaiga a le Atua e sau mai se taunuuga masani o lo tatou alolofa ma le lotofaafetai le mafaamutalia mo le lelei o le Atua. O lenei ituaiga o alofa faamaoni ma le lotofaafetai o le a tuufaatasia faavavega ai a tatou galuega faatasi ma le alofatunoa o le Atua. O le a leoleoina e le amiomama o tatou manatu e le aunoa, ma o le a solo malosi ai lo tatou lototele i luma o le Atua.29

Uso e ma tuafafine pele, o le ola ma le faamaoni i le talalelei e le o se avega mamafa. O se faatinoga fiafia—o se sauniuniga mo le mauaina o le mamalu silisili o le faavavau. Tatou te saili ia usiusitai i lo tatou Tama Faalelagi ona o le a oo ina taliaina atili e o tatou agaga mea faaleagaga. O le a tatou malamalama i mea tatou te lei mafaufauina muamua. O le faamaninoga ma le malamalamaaga e oo mai ia i tatou pe a tatou faia le finagalo o le Tama.30

O le alofatunoa o le meaalofa a le Atua, ma o lo tatou manao ina ia usiusitai i poloaiga taitasi a le Atua, o le auala lea tatou te faailoa atu ai i lo tatou Tama Faalelagi tatou te mananao i lenei meaalofa paia.

Mea Uma e Mafai Ona Tatou Faia

Sa faia e le perofeta o Nifae se sāo taua i lo tatou malamalamaaga e uiga i le alofatunoa o le Atua ina ua ia tautino mai: “Ua matou galulue maelega … e faatauanau atu ai ia matou fanau, ma o matou uso foi, ia talitonu ia Keriso, ma ia faalelei ma le Atua; ona ua matou iloa e faaolaina i tatou i le alofa tunoa, pe a uma mea uma e mafai ona tatou faia.31

Peitai, ou te tomanatu lava pe o tatou faaliliuina sese i nisi taimi le fasifuaitau “pe a uma mea uma e mafai ona tatou faia.” E tatau ona tatou malamalama o le “pe a uma” e le tutusa ma le “ona.”

E le faaolaina i tatou “ona” o mea uma e mafai ona tatou faia. Pe ua faia ea e se tasi o i tatou mea uma e mafai ona tatou faia? Pe o faatali ea le Atua seia maea uma a tatou taumafaiga ona faatoa Ia faasalavei mai lea i o tatou olaga ma Lona alofatunoa laveai?

E toatele tagata e lagona le lotovaivai ona latou te le ausia i le tele o taimi mea ua faamoemoeina. Latou te iloaina mai o latou lava aafiaga “ua manao i ai le loto, a o le tino ua vaivai.”32 Latou te sii ae o latou leo faatasi ma Nifae e folafola atu, “Ua faanoanoa lo’u agaga ona o a’u amioletonu.”33

Ua ou mautinoa na iloaina e Nifae o le alofatunoa o le Faaola e faatagaina ma mafai ai e i tatou ona faatoilaloina le agasala.34 O le mafuaaga lea na matua galue maelega ai Nifae e faatauanau lana fanau ma [ona] uso “ia talitonu ia Keriso, ma ia faalelei ma le Atua.”35

Pe a uma mea uma, o lona uiga o mea uma e mafai ona tatou faia! Ma o lona uiga o a tatou galuega i le olaga nei!

O Le Alofatunoa e Maua e Tagata Uma

A ou mafaufau i le mea na faia e le Faaola mo i tatou lea na sosoo ma lena uluai Aso Sa o le Eseta, ou te fia manao ai e sii ae lo’u leo ma alaga i viiga i le Atua Silisili Ese ma Lona Alo, o Iesu Keriso!

Ua matala faitotoa o le lagi!

Ua matala pupuni o le lagi!

O le asō ma aso uma o loo avanoa ai le alofatunoa o le Atua i tagata uma o o latou loto ua nutimomoia ma o latou agaga ua salamo.36 Ua faaavanoaina e Iesu Keriso le auala mo i tatou e o a’e ai i mea maualuluga ia e le malamalama i ai o tatou mafaufau faaletino.37

Ou te tatalo ina ia tatou vāai i ni mata fou ma se loto faafouina i le taua e faavavau o le taulaga togiola a le Faaola. Ou te tatalo ina ia faaali atu lo tatou alolofa i le Atua ma lo tatou lotofaafetai mo le meaalofa o le alofatunoa le i’u o le Atua e ala i le tausiga o Ana poloaiga ma olioli e “savavali i le ola toefuataiina.”38 I le suafa paia o lo tatou Matai ma le Togiola, o Iesu Keriso, amene.