2010–2019
Na iTabatamata Cecere Duadua ni iTabagone Qase Cake
Epereli 2015


Na iTabatamata Cecere Duadua ni iTabagone Qase Cake

Na ka eda gadreva ena gauna oqo na itabatamata cecere duadua ni itabagone qase cake ena itukutuku ni Lotu. E gadrevi na taucoko ni yalomuni kei na yagomuni.

E dua na ka marautaki cecere vei au niu dau veilakoyaki e veiyasai vuravura meu sotavi ira ka kidavaki ira na noda daukaulotu. O ira na daukaulotu tagane kei na yalewa oqo era seraka mai na Rarama i Karisito, kau dau vakauqeti ena nodra lomana na Turaga o Jisu Karisito kei na nodra dau qaravi Koya ena yalodina. Ena veigauna kece au dau lululu kina kei ira ka vakila na yalodra vakasakiti kei na vakabauta, au dau kaya ga i yaloqu, “O ira na luvei keimami tagane kei na yalewa vakasakiti oqo era vua ni cakacaka mana dina sara!”

Ena soqoni raraba ni matabete ena Okotova ni 2002, au a bolei ira na bisopi, itubutubu, kei na vakarau kaulotu me ra “laveta na ivakatagedegede” ni veiqaravi vakadaukaulotu tudei.

Au qai kaya ni “veika eda gadreva … na itabatamata cecere daukaulotu ena itukutuku ni Lotu. Eda gadreva na daukaulotu kilikili, veiganiti, kaukauwa vakayalo. …

“… E gadrevi taucoko na yalomuni kei na yagomuni. E gadrevi na daukaulotu waribariba, vakasama, bulabula ka kila me vakarorogo ka cakava na vakasolokakana ni Yalo Tabu.”1

Ena vuqa na sala sa veibolei vakalevu cake kina na vuravura nikua mai na 13 na yabaki sa oti. Sa levu cake sara na ka me vagolei ira tani na noda cauravou kei na goneyalewa ena nodra vakavakarau me baleta na kaulotu kei na bula marau ena veisiga ni mataka. Sa rabailevu na tekenolaji, sa voleka ni tamata kecega e rawa ni taura e ligana e dua na iyaya vakalivaliva ka rawa ni vesuka na vakasama ni matavuvale vakatamata ni Kalou me baleta na vinaka cecere kei na ca levu.

Nikua au vosa vei ira era kaulotu tiko, o ira era qai kaulotu ni mataka, o ira sa lesu mai na kaulotu, kei ira na tagane itabagone qase cake ena Lotu. Au masuta mo ni ciqoma ka vakasamataka vakavinaka na veika au na tukuna ena nomuni lakova na itabayabaki taleitaki ka dredre ni nomuni bula.

Ena veisiga taumada ni Lotu, era dau vakatarogi na daukaulotu mai vua e dua na Vakaitutu Raraba ni se bera ni ra laki kaulotu. Ena gauna oqo o ni sa na vakatarogi mo ni laki veiqaravi mai vua na nomuni bisopi kei na peresitedi ni iteki, ka levu vei kemuni ena curuma na nona bula taucoko ka sega ni bau vakatarogi mai vua e dua na Vakaitutu Raraba. Oqori na ka dina me baleta e dua na lotu ni vuravura raraba ka sivia na 15 na milioni na lewena. Au kila niu vosa tiko ena vukudra na taciqu niu tukuna ni keimami diva me rawa ni keimami kilai kemuni yadudua ka me rawa ni keimami tukuna vei kemuni ni keimami lomani kemuni ka tokoni kemuni.

E kalougata ni sa vakarautaka tu na Turaga na sala me keimami yacovi kemuni yani kina. Me vakaoqo, e dua na lewe ni Kuoramu ni iApositolo Le Tinikarua ena lesi ira na daukaulotu yadua ki na nona kaulotu. E dina ni vakayacori oqo sega ni vaka na kena ivakarau ni dabe veiqaravi ena veivakatarogi, rau cokovata na tekenolaji kei na ivakatakila me sotavi e dua na gauna vakasakiti ka mareqeti yadua. Meu tukuna mada vei kemuni se dau yaco vakacava.

Ena basika mai ena dua na sikirini ni kompiuta na kemu itaba, vata kei na itukutuku bibi erau vakarautaka yani na nomu bisopi kei na peresitedi ni iteki. Ni sa basika na kemu itaba, keimami na raica na matamu ka raimuria na nomu sauma na taro ni veivakaturi ki na kaulotu. Ena gauna lekaleka oya e vaka ga ni o ni tiko e kea ka saumi taro tiko mai vei keimami.

Ni keimami raica na kemu itaba, keimami vakabauta ni ko ni sa galala ena veisala kece sara mai na “ivakatagedegede laveti” e gadrevi nikua mo dua kina na daukaulotu yalodina ka qaqa. Oti oya, ena mana ni Yalona na Turaga kei na nona veidusimaki o Peresitedi Thomas S. Monson, keimami na lesi iko ki na dua vei ira na 406 na tabana ni kaulotu e vuravura raraba.

Sega, e sega ni tautauvata kei na veivakatarogi veiraici mata yadudua. Ia e volekata toka.

Na veivosaki ena vidio e dua tale na sala ena vukei keimami me keimami yacovi ira na iliuliu ni Lotu kei na lewenilotu era tu vakayawa sara mai na itikotiko liu ni Lotu.

Ni o vakasamataka tiko oya, au vinakati kemuni o ni vakavakarau tiko mo ni kaulotu, o kemuni na sa lesu mai, kei kemuni kece na itabagone qase cake mo ni duavata mada kei au me vica na miniti me vaka ga ni da veitalanoa tiko ena vidio ena gauna oqo. Yalovinaka raici au mada mai me vica na miniti me vaka ga ni o kedaru taurua e daru tiko ena rumu, se vanua cava ga o tiko kina ena bogi nikua.

Ena noqu itavi, au na vakatayaloyalotaka niu raica tiko yani na matamu ka vakarogoca tiko vakavinaka nomu isaunitaro ena vica na taro au vakabauta ni na tukuna vei au e levu na ka me baleta na titobu ni nomu ivakadinadina kei na nomu yalodina vua na Kalou. Meu veisautaka mada vakalalai na veika au a tukuna vei ira na daukaulotu ena 13 na yabaki sa oti, na ka eda gadreva ena gauna oqo na itabatamata cecere duadua ni itabagone qase cake ena itukutuku ni Lotu. E gadrevi na taucoko ni yalomuni kei na yagomuni. E gadrevi na itabagone qase cake e waribariba, vakasama, bulabula ka kila me vakarorogo ka cakava na vakasolokakana ni Yalo Tabu ni o curuma na veivakatovolei kei na veitemaki ni o dua na Yalododonu gone ni gauna nikua.

Ena dua tale na kena ivosavosataki, sa gauna me laveti cake na ivakatagedegede sega walega vei ira na daukaulotu ia vakatalega kina vei ira sa lesu mai na kaulotu kei ira kece na nomuni itabatamata. Vei kemuni kece, yalovinaka vakananuma vakatitobu e yalomu na nomu isau ni veitaro oqo:

  1. O dau vakasaqaqara e veigauna ena ivolanikalou?

  2. O dau tekiduru beka ena masu mo veivosaki kei na Tamamu Vakalomalagi ena veimataka kei na veibogi?

  3. O dau lolo ka solia nomu isolisoli ni lolo e veivula—kevaka sara mada ga o iko e dua na gonevuli dravudravua ka sotava tiko na dredre mo sega kina ni rawa ni solika vakalevu?

  4. O dau vakasamataka beka vakatitobu na iVakabula kei na Nona isoro ni veivakaduavatataki ena vukumu ena gauna o kerei kina mo vakarautaka, vakalougatataka, veisoliyaka, se vakaivotavota ena sakaramede?

  5. O dau tiko ena nomu veisoqoni ka tovolea mo vakarokorokotaka na Siga ni Vakacecegu?

  6. O dau dina e vale, koronivuli, lotu, kei na cakacaka?

  7. O sa savasava tiko ena nomu vakasama kei na yalomu? O dau levea beka na sara iyaloyalo vakasisila se raica na mataveilawa, mekasini, iyaloyalo, se apps, okati kina na Tinder kei na itaba ena Snapchat, ka na vakamadualaki iko kevaka era raici iko na nomu itubutubu, iliuliu ni Lotu, se na iVakabula sara ga vakataki Koya?

  8. O sa dau qarauna beka na nomu gauna—levea na tekenolaji kei na tabana vakaitukutuku ni veimaliwai raraba, oka kina na qito ena vidio sega ni veiganiti ka na kabukabu kina na nomu kidava na veika vakayalo?

  9. E tiko beka e dua na ka ena nomu bula o gadreva mo veisautaka ka vakavinakataka, tekivu ena bogi nikua?

Vinaka vakalevu na veitalanoa lekaleka yadudua qo. Au nuitaka ni o ni a sauma na veitaro yadua oqo ena dina kei na vakasama titobu. Kevaka o raica ni o se leqa tiko ena veivakavuvuli rawarawa oqo, au vakauqeti kemuni mo ni veivutuni ena yaloqaqa ka vakalesuya mai na nomu bula ki na ivakatagedegede vakosipeli ni buladodonu vakatisaipeli.

Oqo, kemuni na veitacini, meu solia mada na ikuri ni ivakasala ka na vukea na nomu tea vakatitobu ki yalomu kei na yagomu na nomu ivakadinadina ni kosipeli?

Au vakananumi kemuni na lesu mai na kaulotu ni nomuni vakavakarau me baleta na bula kei na matavuvale e dodonu me ia tikoga. Na “RM” e sega ni kena ibalebale “retired Mormon”! Ni o lesu mai na kaulotu, sa dodonu mo ni “gumatua ena cakacaka vinaka … ia me ra vakayacora ga vakaiira na ka era kila ni dodonu, me ra kalougata kina.”2

Yalovinaka vakayagataka na maqosa o vulica mai na nomu kaulotu mo vakalougatataka kina na nodra bula na tamata era wavoliti iko e veisiga. Kakua ni tokia na nomu vakanamata ena veiqaravi vei ira na tani ki na vakanamata vakatabakidua ena vuli, cakacaka, se veimaliwai raraba. Ia, vakatautauvatataka nomu bula ena veika vakayalo ka na vakananuma ka vakarautaki iko ki na veiqaravi e veisiga vei ira na tani.

Ena nomu gauna ni kaulotu o a vulica na bibi ni nodra sikovi na tamata ena nodra veivale. Au nuitaka vei ira kece na noda itabagone qase cake, o ni a daukaulotu tudei se sega, mo ni kila na bibi ni veisiko vei ira era galili, tauvimate, se yalolailai—sega walega baleta ni o lesi kina ia me baleta talega ni o lomana dina na Tamada Vakalomalagi kei ira na Luvena.

O kemuni o ni tu ena veikoronivuli ka vakarau tiko ki na kaulotu, au vakayaloqaqataki kemuni mo ni vakaitavi ka taurivola ena semineri. O kemuni na itabagone qase cake e dodonu mo ni volayaca ena inisititute.3 Kevaka o vuli tiko ena dua na koronivuli ni Lotu, dau taura e dua na kalasi ena veiwasewase ni vuli ena vuli lotu. Ena gauna bibi ni vakavakarau ki na kaulotu, vakamau tawamudu, kei na bula vakauabula, sa dodonu mo na tomana na vaqarai ni sala mo vuli ka tubu ka ciqoma na veivakauqeti kei na veituberi ni Yalo Tabu. Na vulici matua ni kosipeli ena yalomasumasu ena semineri, kei na inisititute, se kalasi ni vuli lotu e rawa ni vukei iko ena inaki oya.

Se o vuli tiko ena dua na koronivuli ni Lotu se sega, se o vuli tiko ena koliji se sega, kakua ni nanuma ni o sa rui osooso mo vulica na kosipeli. Na kalasi ni semineri, inisititue, se vuli lotu ena vakatautauvatataka na nomu bula ka vakuria na nomu vuli vakayago ena madigi mo vakayagataka na gauna mo vulica na ivolanikalou kei na nodra ivakavuvuli na parofita kei na iapositolo. E va na lesoni vovou ni vuli kau na vakayaloqaqataki ira kina na itabagone qase cake me ra raica ka lakova.4

Kakua ni guilecava ni kalasi kei na itaviqaravi e soli tu ena nomuni koronivuli se ena nomuni tabanalevu se iteki ni itabagone qase cake ena vanua talega mo ni tiko kina kei ira eso tale na cauravou kei na goneyalewa ka mo ni veilaveti ka veivakauqeti vakataki kemuni ena nomuni vuli ka tubu vakayalo ka veimaliwai vata. Kemuni na cauravou, kevaka o ni biuta vakatikitiki na nomuni selevoni ka veiraiyaki vakalailai, o na rawa beka ni kunea na nomu itokani tawamudu ena inisitute.

Oqori e kauti au ki na dua tale na tiki ni ivakasala kau vakabauta o ni sa kila tiko ni na lako mai: O kemuni na uabula sega ni vakawati o ni gadreva mo ni veigadivi ka vakawati. Yalovinaka kakua ni lokuyara! Au kila ni so vei kemuni e rerevaka tiko na tauyavutaki matavuvale. Kevaka o vakawatitaka na tamata donu ena gauna donu kei na vanua dodonu, kakua ni lomaleqa. Na ka dina, e vuqa na leqa o na sotava ena levei kevaka o sa “gumatua tiko” ena veigadivi dodonu, veimusumusuki, ka vakawati. Kakua ni tex taki koya! Vakayagataka na domomu sara ga mo vakaveikilaitaki iko vei ira na luvena yalewa buladodonu na Kalou era wavoliti iko tu. Ni rogoca sara ga e dua na domo ni tamata ena vakidacalataki koya—ka rawa ni vakaio.

Ia oqo, kemuni na taciqu au vakadinadinataka vei kemuni na taciqu ena matabete, ni rawa ni vukei keda na Turaga o Jisu Karisito me da vakavinakataka na veika kecega e gadrevi me vakavinakataki ena noda bula mai na Nona isoro ni veivakaduavatataki.

Ena yakavi nikua, ni da vakarau me da marautaka na Sigatabu ni Siganimate ni mataka, yalovinaka tu mada vakadua vata kei au ka vakananuma na isolisoli ni Veisorovaki i Karisito. Nanuma tiko ni o Tamada Vakalomalagi kei na noda iVakabula o Jisu Karisito, erau kilai iko vinaka ka lomani iko vakalevu duadua.

Ena Veisorovaki, sa taura kina vei Koya na Dauveivueti na noda leqa, mosi, kei na ivalavala ca. Sa yaco me kilai keda yadua na iVakabula ni vuravura ena nona sotava na noda dui vakanuinui mate wale, bolebole, kei na leqa lelevu ena Nona vakararawataki mai Kecisemani kei na kauveilatai.5 A mate me iotioti ni ivalavala ni loloma ena vukuda ka bulu ena dua na ibulubulu vou ena bogi rarawataki oya.

Ena mataka ni Sigatabu, sa tucake mai na mate ko Jisu—ka yalataka na bula vou vei keda yadua. Qai lesi ira na Nona tisaipeli na Turaga sa vakaturi cake me ratou vakavulica na tamata kecega me ra vakabauti Karisito, veivutunitaka na ivalavala ca, papitaiso, ciqoma na isolisoli ni Yalo Tabu, ka vosota me yacova na ivakataotioti. Kemuni na taciqu, eda kila ni Kalou na Tamada kei na Luvena Lomani erau a rairai vua na Parofita o Josefa Simici ka vakalesuya mai vua na taucoko ni kosipeli i Jisu Karisito.

Ni qaqa, kemuni na taciqu. Muria na ivakaro ni Kalou. Sa yalataka na Turaga o Jisu Karisito ni veika kecega eda gadreva me da cakava ena buladodonu ena noda. Era nuitaki kemuni na iliuliu ni Lotu. Keimami gadrevi kemuni yadua na itabagone qase cake mo ni vakavakarau mo ni vakawati, veiqaravi, ka veiliutaki ena veisiga ni mataka, oqori au masuta ena yalomalumalumu ena yaca ni noda Turaga o Jisu Karisito, emeni.