Ang Pinakamaayo nga Henerasyon sang Lamharon nga Mga May Edad

Isa sa akon kalipayan samtang ako nagabiyahe sa bilog nga kalibutan amó ang kahigayunan nga makilala kag matamyaw ko ang mga misyonero. Ining maayo nga mga elders kag mga sisters may Kapawa ni Cristo nga nagabanaag sa ila mga nawong, kag ako padayon nga inspirado sa ila paghigugma sa kay Ginuong JesuCristo kag ila katutom sa pag-alagad sa Iya. Sa kada tion nga ako nagakamusta sa ila kag nagabatyag sang ila talagsahon nga espiritu kag pagtuo, nagamuno ako sa akon kaugalingon, ”Ining maayo gid nga mga anak naton isa ka matuodtuod nga milagro!”

Sang Oktubre 2002 sa pangkabilogan nga pagsinapol sang priesthood, gin-agda ko ang mga bishop, mga ginikanan, kag mga manugmisyon nga ”ipataason ang sulundan” para sa lubos-panahon nga pagmisyon.

Dayon ako nagsiling nga ”ang aton kinahanglan ... amó ang isa ka labing maayo nga henerasyon sang mga misyonero sa maragtas sang Simbahan. Nagakinahanglan kita sing takos, makasangkol, espirituhanon kag punô sing enerhiya nga mga misyonero. …

“… Kinahanglan naton ang inyo bug-os nga tagipusuon kag kalag. Nagakinahanglan kita sang mapagsik, maalamon, mabinatyagon nga mga misyonero nga nakahibalo magpamati kag magsabat sa mga ginatudlo sang Balaan nga Espiritu.”¹

Sa kadam-an ang kalibutan subong mas mabudlay sang sa 13 ka anyos nga nagligad. Ang aton lamharon nga mga lalaki kag mga babaye may madamo gid nga mga butang nga nagabangá sa ila mga paghanda sa isa ka misyon kag amó man sa palaabuton nga kalipay sa kabuhi Ang teknolohiya nagadaku, kag halos tanan nagaangkon sang ginauyatan nga mga instrumento katulad sang smart phone, mga tablet nga nagalikop sang igtalupangod sang panimalay sang Diyos sa daku nga kaayuhan kag sa daku nga kalautan man.

Karon nga gab-i ako nagahambal sa mga misyonero nga nagaalagad subong, mga manug-alagad nga mga misyonero, mga nagbalik na nga mga misyonero, kag tanan nga mga lamharon sa Simbahan. Nagapangamuyo ako nga inyo mahangpan kag binagbinagon ang akon igasiling sa inyo samtang kamo nagapanalakayon sa sining makakulunyag kag mabudlay nga mga panahon sang inyo kabuhi.

Sang una nga mga inadlaw sang Simbahan, ang mga misyonero gin-interbyu sang isa ka Pangkabilogan nga Awtoridad sang Simbahan bag-o sila magmisyon. Sining karon nga mga inadlaw kamo gina-interbyu nga magmisyon sang inyo mga bishop kag sang mga presidente sang stake, kag ang kadam-an sa inyo magapadayon sa inyo bug-os nga kabuhi nga indi mainterbyu sang isa ka Pangkabilogan nga Awtoridad. Ina isa lang ka pagpakita sang kamatuoran sa kadakuon sang Simbahan sa kalibutan nga may sobra ka 15 milyones nga mga katapo. Nahiba-an ko nga ako nagahambal para sa akon kauturan nga yara sa Pangkabilogan nga Awtoridad kon ako nagasiling nga kami nagahandum nga kontani puwede nga makilala namon kamo tanan sing personal kag makahambal sa inyo nga amon kamo palangga kag ginasakdag namon kamo.

Masuwerte nga ang Ginuo nagahatag sang mga paagi nga kamo madab-ot. Halimbawa, ang isa ka katapo sang Korum sang Napulogduha nagadestino sang tagsa ka misyonero sa iya misyon. bisan nga ini ginahimo nga indi sa kinaandan nga pag-atubangay nga pag-interbyu, ang teknolohiya kag bugna nagahili-ugyon nga kamo kinatuhay nga makapalapit sa ila kag manginpersonal ang inyo eksperyensiya. Tuguti ninyo nga mahambal ko sa inyo kon ano ini nagakatabo.

Ang inyo larawan nagagwa sa screen sang kompyuter, lakip ang importante nga impormasyon nga ginhatag sang inyo bishop kag presidente sang stake. Samtang ang inyo larawan makita, kami nagatulok sa inyo mga mata kag amon ginaliwat-liwat ang inyo mga sabat sa mga pamangkot sa rekomendasyon sa pagmisyon. Sa sinang malip-ot nga tion, daw kamo yara sa amon atubang kag direkta nga nagasabat sa amon.

Samtang kami nagatulok sa inyo larawan, kami nagasalig nga sa tanan nga paagi inyo gintinguhaan nga ”pataason ang sulundan” nga kinahanglanon nga mangin isa ka matutom,kag madinalag-on nga misyonero. Dayon, paagi sa gahum sang Espiritu sang Ginuo kag sa iadalom sang pagdumala ni Presidente Thomas S. Monson, ginadestino namon kamo sa isa sa 406 ka misyon sa kabilogan sang kalibutan.

Indi, ini indi katumbas sang personal, nagaatubangay nga interbyu. Pero ini malapit dira.

Ang pagsugilanunay sa bideyo isa pa ka paagi nga nagabulig sa paglambot sa mga lider kag miyembro sang Simbahan nga malayo sa pangulohan nga opisina sang Simbahan.

Sa pagbinagbinag sina, gusto ko nga ang mga yadtong nagahanda nga magmisyon, yadtong mga nagbalik na, kag tanan kamo nga mga lamharon mag-ugyon sa akon sa pila ka minutos nga daw balá kita nagahambalanay sang personal sa bideyo subong. Kon mahimo tuluka ninyo ako sang pila ka minutos nga daw balá kamo kag ako amó lang ang sa kuwarto kon diin man kamo sini nga gab-i.

Sa akon bahin, hunahunaon ko nga nagatulok ako sa inyo mga mata kag nagapamati sing maid-id sa inyo mga panabat sa pila ka mga pamangkot nga akon ginapatihan magapakita sa akon sing daku tuhoy sa kadalom sang inyo panaksi kag debosyon sa Diyos. Kon mahimo ko isiling sa iban nga pulong ang akon ginhambal sa mga misyonero sang13 ka anyos nga nagligad, ang aton kinahanglan amó ang labing maayo nga henerasyon sang mga lamharon sa maragtas sang Simbahan. Kinahanglan naton ang inyo bug-os nga tagipusuon kag kalag. Nagakinahanglan kita sang mapagsik, maalamon, mabinatyagon nga mga lamharon nga nakahibalo magpamati kag magsabat sa mga ginatudlo sang Balaan nga Espiritu samtang kamo nagapadayon sa sulod sang pang-adlaw-adlaw nga mga pagtilaw kag mga pagsulay bilang isa ka moderno nga Santos sa Ulihing mga Adlaw.

Kon sa aton lang, ini panahon na nga pataason ang sulundan indi lang para sa mga misyonero pero para man sa mga nagbalalik na nga mga misyonero kag sa bug-os nga henerasyon. Sa sinang katuyuan, kon mahimo binagbinaga ninyo sa inyo tagipusuon ang inyo mga sabat sa sining mga pamangkot:

1. Ginatun-an balá ninyo sing regular ang balaan nga mga kasulatan?

2. Nagaluhod balá kamo nga nagapangamuyo sa Langitnon nga Amay kada aga kag kada gab-i?

3. Nagapuasa balá kamo kag nagaamot sang halad sang pagpuasa kada bulan—bisan pa nga kamo pobre, nagahiwaos nga mga estudyante nga indi makasarang mag-amot sing madamo?

4. Nagahunahuna balá kamo sing tudok nahanungod sa Manluluwas kag sang Iya pagpsag-uli nga sakripisyo para sa inyo samtang kamo nagahanda, nagabendisyon, nagapasa, ukon nagaambit sang Sakramento?

5. Nagatambong balá kamo sang mga miting kag nagatinguha sa pagpakabalaan sang Adlaw sang Pagpahuway?

6. Matadlong balá kamo sa puluy-an, sa eskuwelahan, sa Simbahan, kag sa trabaho?

7. Matinlo balá ang inyo hunahuna kag espiritu? Ginalikawan balá ninyo ang pornograpiya ukon ang pagtan-aw sa mga websayt, mga magasin, mga sine, ukon mga app lakip ang Tinder ukon Snapchat nga mga larawan, nga magpakahuya sa inyo kon ang inyo mga ginikanan, mga lider sang Simbahan, ukon ang Ginuo mismo makakita sa inyo?

8. Ginatipigan balá ninyo ang inyo tion—ginalikawan ang indi nagakabagay nga mga teknolohiya kag mga komunikasyon sosyal, lakip ang mga hampang sa bideyo, nga makapalain sang inyo espirituhanon nga balatyagon?

9. Kag may yara balá sa inyo kabuhi nga dapat ninyo bayluhan kag husayon, halin sini nga gab-i?

Salamat sa sining malip-ot nga personal nga pagbisita sa inyo. Kabay pa nga nasabat ninyo ang isa kag isa sining mga pamangkot sing matadlong kag mapainuinuhon. Kon natukiban ninyo nga kamo nagkulang sa bisan ano man sa sining mga prinsipyo, gani ginalaygayan ko kamo nga may kaisog nga maghinulsol kag ipabalikon ang inyo kabuhi nga magsantu sa mga talaksan sang matarong nga pagkasumulunod.

Karon mga kauturan, kon mahimo gusto ko maghatag sang dugang pa nga laygay nga magbulig sa inyo pagpagamot sang panaksihon sang ebanghelyo sa inyo mga tagipusuon kag mga kalag.

Ginapahanumdom ko sa inyo mga nagbalalik na nga mga misyonero nga ang inyo paghanda sa kabuhi kag sa isa ka panimalay dapat magpadayon. ”RM” indi nagakahulugan nga ”retired Mormon!” nga buot silingon tapos na ang inyo obra. Bilang isa ka nagbalik na nga misyonero, ”dapat indi kamo mapakali sa paghimo sang maayo, kag maghimo sang mga butang suno sa [inyo] kaugalingon nga kabubut-on, kag magdala sang madamo nga kamatarungan.”²

Kon mahimo gamita ninyo ang mga kinaadman nga inyo naangkon sang kamo nagmisyon sa pagpakamaayo sa mga kabuhi sang mga tawo sa inyo palibot tagsa ka adlaw. Indi ninyo pag-isaylo ang inyo tumod sa pag-alagad sa iban sa pagtumod lang sa inyo eskwelahan, trabaho, ukon mga buluhaton sosyal. Sa tigaylo, ibalansi ang inyo kabuhi kaupod ang espirituhanon nga mga hilimuon nga nagapahanumdom kag naga-aman sa inyo para sa padayon, nga pag-alagad sa iban.

Sang inyo pagmisyon nakatuon kamo sang importansya sa pagduaw sa mga tawo sa ila mga puluy-an. Nagalaum ako nga ang tanan sa aton mga lamharon, kon balá kamo nagmisyon sang lubos-panahon ukon indi man, makahangop sang kaayuhan sang pagbisita sa mga nasubuan, nagabalatian, ukon sa mga nadulaan sang paglaum—indi lamang nga isa ini ka katungdanan apang tungod sang tunay nga paghigugma ninyo sa Langitnon nga Amay kag sa Iya kaanakan.

Ang yadtong sa hayskul nga nagahanda sa pagmisyon, nagapaisog ako sa inyo nga mag-ugyon kag magtapos sang inyo seminaryo. Kamo nga mga lamharon dapat magpalista sa institute sang relihiyon.³ Kon kamo naga-atend sa eskuwelahan sang Simbahan, padayuna ninyo ang paglakip sa kada semester sang isa ka klase sa relihiyon. Sa sining importante nga panahon sang paghanda para sa mga misyon ukon pagpakasal sa walay katapusan kag sa inyo kabuhi bilang isa ka lamharon, dapat kamo magpadayon sa pagpangita sing mga paagi nga makatuon kag magtubo kag magbaton sang inspirasyon kag pagtuytoy paagi sa Balaan nga Espiritu. Ang mainandamon, mapinangamuyuon nga pagtuon sang ebanghelyo paagi sa seminaryo, institute, ukon mga klase sa relihiyon makabulig sa inyo sa sinang katuyuan.

Bisan balá kamo naga-atend sang eskuwelahan sang Simbahan ukon indi, kon balá kamo naga-atend sang unibersidad ukon indi, indi kamo mag-isip nga kamo masyado kasako sa pagtuon sang ebanghelyo. Ang Seminaryo, institute, ukon mga klase sa relihiyon nagahatag sang balansi sa inyo kabuhi kag nagadugang sa inyo kalibutanon nga edukasyon paagi sa paghatag sa inyo sang isa pa ka kahigayunan sa pagtuon sang balaan nga mga kasulatan kag mga panudlo sang mga propeta kag mga apostoles. May ara nga apat ka maayo gid nga mga kurso nga ginarekomendar ko nga tan-awon kag tambungan sang mga lamharon.⁴

Kag indi pagkalipatan nga ang mga klase kag mga hilimuon nga ginatanyag sang lokal nga institute ukon paagi sa inyo batan-on nga single adult ward ukon stake mangin isa man ka lugar nga sa diin kamo makahiliugyon sa mga bataon nga mga lalaki kag mga babaye kag magtib-ong kag mag-inspirar sa isa kag isa samtang kamo nagatuon kag nagadaku sing espirituhanon kag nagatililipon. Mga kauturan, kon kamo magbiya sa inyo cell phone kag sa kamatuoran magtuloktulok sa inyo palibot sing bisan diutay lang, basi balá nga makit-an ninyo ang inyo palaabuton nga kaupod sa walay katubtuban sa institute.

Kag ini nagapadayon sa akon masunod nga diutay nga laygay nga naseguro ko inyo na nahibal-an: Kamo nga mga lamharon dapat mag-date kag magpakasal. Kon mahimo indi kamo mag-awat! Nahibal-an ko nga ang iban sa inyo nahadlok sa pagtuga sang panimalay. Sa amo man, kon magpakasal kamo sa husto nga tawo, sa husto nga tion, kag sa husto nga lugar, indi kamo dapat magkahadlok. Sa kamatuoran, ang madamo nga mga problema nga inyo ginaatubang malikawan ko kamo ”indi mapahamtang sa paghimo” sang makatarungan nga pag-date, pagpangaluyag, kag pagpakasal. Indi kamo mag-text sa iya! Gamita ang inyo mga tingog sa pagpakilala sang inyo mga kaugalingon sa makatarungan nga mga babaying anak sang Diyos nga yara tanan sa inyo palibot. Sa pagkabati sang tunay nga tingog sang tawo makalipong sa iya —basi sa pagsiling sang huo.

Karon, mga brethren, nagapamatuod ako sa inyo, nga ang Ginuong JesuCrsito makabulig sa aton sa pagtadlong sang bisan ano man nga nagakinahanglan sang panadlong sa aton mga kabuhi paagi sa Iya pagpasag-uli nga sakripisyo.

Sa sining gab-i, samtang kita nagahanda sa pagsaulog sang Paskwa sang Pagkabanhaw sa buas, kon mahimo mag-untat kamo upód sa akon sa pagdumdom sang dulot sang Pagpasag-uli ni Cristo. Panumduma ninyo nga ang aton Langitnon nga Amay kag ang aton Manluluwas, nga si JesuCrsito, nakahibalo sing pinakamaayo kag labi nga nagapalangga sa aton.

Paagi sa Pagpasag-uli, ang Manunubos nagdala sa Iya kaugalingon sang aton mga kagamuhan, mga kasakitan, kag mga salâ. Ang Manluluwas sang kalibutan nagkari sa paghangop sa tagsa sa aton bilang indibidwal sa pagbatyag sang aton nadula nga mga paglaum, mga pagtilaw, kag mga kadisgrasyahan paagi sa Iya pag-antus sa Gethsemane kag sa ibabaw sang krus.⁵ Siya napatay bilang isa ka katapusan nga hinimuan sang pagpalangga sa aton kag nalubong sa bag-o nga lulubngan sinang natalana nga gab-i.

Sang Domingo sang aga, si Jesus nabanhaw—nga nagpanaad sang bag-o nga kabuhi sa tagsa sa aton. Ang nabanhaw nga Ginuo dayon nagmando sa Iya mga sumulunod nga magtudlo sa tanan nga magtuo kay Cristo, maghinulsol sang salâ, magpabunyag, magbaton sang Balaan nga Espiritu, kag magpadayon sa katapusan. Mga kauturan, nakahibalo kita nga ang aton Amay kag ang Iya Pinalangga nga Anak nagpakita kay Joseph Smith nga Propeta kag nagpanumbalik paagi sa iya sang kabug-usan sang walay katapusan nga ebanghelyo ni JesuCristo.

Magpakabakod kamo, mga kauturan. Tumana ninyo ang mga kasuguan sang Diyos. Ang Ginuong JesuCristo nagapanaad nga ang tanan nga mga butang nga aton ginahangad nga himuon sa makatarungan mangin aton. Ang mga pamuno sang Simbahan nagasalig sa inyo. Kami nagakinahanglan sang tanan sa inyo nga mga lamharon nga maghanda sa pagpakasal, sa pag-alagad, kag magpangulo sa mga inadlaw nga magaabot, para sa mga ini ako nagapangamuyo sa ngalan ni Ginuong JesuCristo, amen.