Tiam Tub Hluas Ntxhais Hluas Zoo Tshaj Plaws

Ib qho uas ua rau kuv zoo siab tshaj plaws thaum kuv mus thoob plaws lub ntiaj teb yog lub cib fim kuv muaj kom ntsib peb cov tub txib. Cov tub txib thiab ntxhais txib zoo kawg no muaj Khetos txoj Kev Kaj, thiab lawv txoj kev hlub tus Tswv Yexus Khetos thiab lawv txoj kev rau siab ua hauj lwm rau Nws yeej tshoov kuv lub siab. Txhua lub sij hawm kuv tuav lawv tes thiab paub txog lawv lub siab thiab txoj kev ntseeg, kuv hais rau kuv tus kheej tias, “Cov tub thiab cov ntxhais no yeej yog ib qho txuj ci tseem ceeb!”

Nyob hauv tuas pov thawj hwj thaum lub Kaum Hli Ntuj xyoo 2002, kuv twv cov npisov, cov niam tsev txiv tsev, thiab cov uas yuav mus ua tub txib kom lawv “tsa tus nqaj kom siab” rau lawv tej hauj lwm ua tub txib.

Thaum ntawd kuv hais tias “peb xav tau … cov tub txib zoo tshaj txhua tiam neeg nyob hauv lub Koom Txoos zaj keeb kwm. Peb xav tau cov tub txib uas tsim nyog thiab muaj zog ntawm sab ntsuj plig. …

“… Peb xav tau tag nrho nej lub siab lub ntsws. Peb xav tau cov tub txib uas muaj dag zog, txawj xav, thiab muaj siab xav ua hauj lwm uas paub mloog thiab ua raws li tus Vaj Ntsuj Plig Dawb Huv tej lus.”¹

Muaj ntau yam hauv lub ntiaj teb no uas nyuaj dua li tau muaj 13 xyoos tas los. Peb cov tub hluas ntxhais hluas muaj ntau yam uas meem txom lawv kom lawv tsis npaj rau kev ua tub txib thiab muaj lub neej zoo siab. Muaj tej txuj ci technology ntxiv, thiab yuav luag txhua tus muaj lub tshuab ntawm tes uas txhua leej txhua tus tsom ntsoov rau kom ua tau zoo los sis ua tau phem.

Hmo no kuv hais lus rau cov tub txib uas ua hauj lwm tam sim no, cov tub txib rau yav tom ntej, cov tub txib uas tau rov qab los, thiab tag nrho cov tub hluas nyob hauv lub Koom Txoos. Kuv thov kom nej yuav to taub thiab xav txog tej uas kuv yuav hais lus rau nej thaum nej ua neej nyob hauv lub sij hawm zoo thiab nyuaj heev.

Thaum lawv txhim tsa lub Koom Txoos, cov Tuam Thawj Coj tau xam phaj cov tub txib ua ntej lawv mus ua tub txib. Niaj hnub no nej cov npisov thiab ceg txheem ntseeg tus thawj tswj hwm xam phaj nej, thiab nej feem coob yuav ua neej tas es tsis xam phaj nrog ib tug Tuam Thawj Coj. Yeej yuav zoo li no thaum yus muaj ib lub koom txoos uas muaj 15 plhom tus mej zeej nyob thoob plaws lub ntiaj teb. Kuv paub hais tias kuv sawv kuv cov kwv tij cev thaum kuv qhia nej tias peb yeej xav muaj sij hawm paub nej txhua tus thiab muaj sij hawm qhia nej tias peb hlub nej thiab txhawb nqa nej.

Tiam sis tus Tswv tau npaj ib txoj kev rau peb kom peb paub tau nej. Piv txwv hais tias, ib tug mej zeej ntawm Pawg Kaum Ob tug Thwj Tim txib txhua tus tub txib mus rau nws qhov chaw tshaj tawm txoj moo zoo. Txawm yog peb tsis ua xam phaj tim ntsej tim muag los, tej txuj ci technology thiab kev tshwm sim koom ua ke kom muaj sij hawm nyob sib ze heev. Cia kuv qhia nej tias qhov no zoo li cas.

Nyob hauv ib lub computer muaj nej daim duab, nrog tej xov xwm uas nej tus npisov thiab ceg txheem ntseeg tus thawj tswj hwm qhia. Thaum peb pom nej daim duab, peb ntsia nej qhov muag thiab nyeem nej tej lus teb rau cov lus nug cov tub txib. Thaum lub sij hawm ntawd, zoo li nej nyob ntawd thiab hais lus rau peb tiag tiag.

Thaum peb saib nej daim duab, peb ntseeg tias nej twb ua zoo dua li “tus nqaj siab” uas txhua tus tub txib rau siab ntseeg thiab zoo yuav tsum ua. Ces, dhau los ntawm tus Tswv tus Ntsuj Plig thiab raws li Thawj Tswj Hwm Thomas S. Monson txoj kev coj, peb txib nej mus rau ib qhov chaw ntawm lub Koom Txoos 406 qhov chaw tshaj tawm txoj moo zoo nyob thoob plaws lub ntiaj teb.

Ua li no mas yeej tsis zoo ib yam li peb nyob ua xam phaj tim ntsej tim muag. Tiam sis yuav luag zoo li ntawd.

Kev sib tham ntawm lub computer kuj yog ib txoj kev uas pab peb sib tham nrog lub Koom Txoos cov thawj coj thiab cov mej zeej uas nyob deb ntawm lub Koom Txoos lub hauv paus.

Yog li ntawd, kuv xav kom nej cov uas npaj ua tub txib, cov uas twb rov qab los tsev, thiab tag nrho nej cov tub hluas siv ob peb feeb nrog kuv zoo ib yam li peb sib tham hauv lub computer tam sim no. Thov ntsia kuv rau ob peb feeb zoo li nej thiab kuv wb ob leeg nyob hauv chav uas nej nyob tam sim no hmo no.

Kuv mas, kuv yuav xav txog qhov uas kuv ntsia nej thiab ua tib zoo mloog nej tej lus teb rau cov lus uas kuv ntseeg tias yuav qhia kuv ntau txog nej zaj lus tim khawv thiab nej txoj kev teev tiam Vajtswv. Kuv xav rov qab hais qhov uas kuv hais rau cov tub txib 13 xyoos tas los hais tias, qhov uas peb xav tau tam sim no yog cov tub hluas ntxhais hluas zoo tshaj txhua tiam neeg nyob hauv lub Koom Txoos zaj keeb kwm. Peb xav tau tag nrho nej lub siab lub ntsws. Peb xav tau cov tub hluas ntxhais hluas uas muaj dag zog, txawj xav, thiab muaj siab xav ua hauj lwm uas paub mloog thiab ua raws li tus Vaj Ntsuj Plig Dawb Huv tej lus thaum nej kov yeej tej kev sim siab thiab kev ntxias uas pheej los rau cov Neeg Ntseeg hauv Hnub Nyoog Kawg niaj hnub no.

Kuj hais ntxiv hais tias, twb txog lub sij hawm tsa tus nqaj siab rau cov tub txib thiab cov tub txib uas tau rov qab los tsev thiab rau nej tiam neeg. Xwv kom muaj li ntawd, thov cia li xav hauv nej lub siab nej yuav teb li cas:

1. Koj puas rau siab kawm cov vaj lug kub?

2. Koj puas txhos caug nrog koj Leej Txiv Saum Ntuj Ceeb Tsheej tham txhua hnub txhua hmo?

3. Koj puas yoo mov thiab them nyiaj yoo mov txhua lub hlis—txawm koj yog ib tug tub kawm ntawv txom nyem uas them tsis tau ntau?

4. Koj puas xav txog tus Cawm Seej thiab Nws txoj Kev Theej Txhoj thaum koj npaj, foom koob hmoov, muab los yog txais lub cim nco txog?

5. Koj puas koom koj tej kev sib ntsib thiab rau siab hwm Hnub Caiv ua kom dawb huv?

6. Koj puas ua ncaj nyob tom tsev, tsev kawm ntawv, lub koom txoos, thiab qhov chaw ua hauj lwm?

7. Koj lub siab thiab sab ntsuj plig puas huv? Koj puas tsis txhob saib duab liab qab los yog saib tej websites, phau xov xwm, movie, los yog tej app, tsis hais tej duab los ntawm Tinder los sis Snapchat, uas yuav ua rau koj txaj muag, tsis hais yog tias koj niam koj txiv, cov thawj coj ntawm lub Koom Txoos los yog tus Cawm Seej tau pom koj?

8. Koj puas siv sij hawm zoo—thiab tsis txhob siv technology thiab social media, tsis hais video game los yog, uas tsis tsim nyog thiab ua rau koj sab ntsuj plig tsis txawj hnov qhov zoo?

9. Puas muaj dab tsi hauv koj lub neej uas koj yuav tsum hloov thiab kho, pib hmo no?

Ua tsaug rau nej lub sij hawm cia peb sib tham li no. Kuv cia siab hais tias nej txhua tus tau teb tej lus no ncaj. Yog tias nej paub tias nej ua tau tej ntsiab cai zoo ntxiv, ces kuv yaum nej hloov siab lees txim thiab coj nej lub neej kom ua raws li txoj moo zoo tej kev cai ntawm kev ncaj ncees.

Cov kwv tij, nej puas kam kuv qhia nej ntxiv txog tej yam uas yuav pab nej zaj lus tim khawv txog txoj moo zoo loj tuaj nyob hauv nej lub siab lub ntsws?

Kuv hais kom nej cov tub txib uas tau rov qab los tsev nco ntsoov tias nej tseem yuav tsum npaj rau nej lub neej thiab nej tsev neeg. “Rov qab los” tsis txhais hais tias nej tsis tas ua neeg Maumoos lawm! Nej cov tub txib uas tau rov qab los tsev yuav tsum rau siab ua tej yam zoo, thiab ua tej yam zoo raws li nej lub siab xav, kom thiaj coj tau kev ncaj ncees los.²

Thov siv tej txuj ci uas nej tau kawm thaum nej ua tub txib kom foom koob hmoov rau cov neeg nyob ib puag ncig nej niaj hnub no. Cia li tsom ntsoov rau kev pab lwm tus tsis txhob tsom ntsoov rau kev kawm ntawv, kev ua hauj lwm, los yog kev sib tham xwb. Tiam sis, coj nej lub neej kom muaj tej yam ntawm sab ntsuj plig uas ua rau nej nco qab thiab npaj nej kom nej pab tau lwm tus.

Thaum nej ua tub txib nej tau kawm tias kev mus xyuas neeg nyob hauv tsev yog ib qho tseem ceeb. Txawm nej ua tub txib los ua tsis tau, kuv cia siab hais tias nej cov tub hluas puav leej to taub tias qhov uas nej mus xyuas tib neeg uas kho siab, mob, los yog poob siab yog ib qho tseem ceeb—tsis yog vim nej raug txib mus ua tiam sis vim nej hlub Leej Txiv Saum Ntuj Ceeb Tsheej thiab Nws cov me nyuam.

Rau nej cov uas kawm high school ua ntej nej mus ua tub txib, kuv yaum kom nej koom thiab kawm seminary tiav. Nej cov tub hluas yuav tsum koom nrog ib lub tsev institute of religion.³ Yog nej koom ib lub tsev kawm ntawv ntawm lub Koom Txoos, cia li kawm ib hoob kawm txog kev teev ntuj txhua zaus. Thaum lub sij hawm uas nej npaj ua tub txib los yog npaj yuav poj niam mus ib txhis thiab nej lub neej yav tom ntej, nej yuav tsum nrhiav kev kom loj hlob thiab txais kev tshoov siab dhau los ntawm tus Vaj Ntsuj Plig Dawb Huv. Qhov uas nej ua tib zoo kawm txog txoj moo zoo nyob hauv seminary, insititute los yog kev kawm txog kev teev ntuj yuav pab nej ua raws li lub hom phiaj ntawd.

Txawm nej mus rau peb lub Koom Txoos ib lub tsev kawm ntawv los yog tsis mus, txawm yog nej kawm ntawv qib siab los yog tsis kawm, tsis txhob xav tias nej tsis muaj sij hawm kawm txog txoj moo zoo. Tej hoob kawm seminary, institute, los yog tej hoob kawm teev ntuj yuav pab nej lub neej thiab pab nej kawm lwm yam vim nej yuav muaj cib fim kawm txog cov vaj lug kub thiab cov yaj saub thiab cov thwj tim tej lus qhia. Muaj plaub hoob kawm tshiab uas kuv xav kom txhua tus tub hluas ntxhais hluas kawm.⁴

Thiab cia li nco ntsoov tias tej hoob kawm thiab tej yam ntxim saib ntxim ua nyob hauv nej lub qhov chaw institute los yog nyob hauv nej pawg ntseeg los sis ceg txheem ntseeg rau cov tub hluas ntxhais hluas kuj yog ib qho chaw uas nej muaj cib fim koom nrog lwm tus tub hluas ntxhais hluas kom ib leeg txhawb nqa ib leeg thaum nej kawm thiab loj hlob ntawm sab ntsuj plig thiab sib tham ua ke. Cov kwv tij, yog nej yuav tso nej tus xov tooj ntawm tes tseg thiab saib rau ub rau no me ntsis, tej zaum nej yuav nrhiav tau nej tus khub.

Hais li ntawd ces ua rau kuv xav hais ib yam dab tsi uas nej yeej paub tias kuv yuav hais: nej cov tub hluas yuav tsum tham hluas nkauj thiab yuav poj niam. Thov tsis txhob ncua sij hawm! Kuv paub tias nej ib txhia ntshai muaj tsev neeg. Tiam sis, yog nej yuav tus poj niam yog thaum lub sij hawm yog nyob hauv qhov chaw yog, ces nej tsis tas ntshai. Muaj tseeb tiag, nej yuav dim ntau yam teeb meem yog tias nej rau siab ua ncaj ncees tham hluas nkauj thiab yuav poj niam. Tsis txhob ntaus ntawv xov tooj rau nws! Cia li siv nej lub suab qhia tias nej yog leej twg rau Vajtswv cov ntxhais ncaj ncees uas nyob ib puag ncig nej. Qhov uas lawv hnov nej lub suab yuav ua rau lawv xav tsis thoob es lawv yuav kam tham nej.

Kuv cov kwv tij, kuv ua tim khawv rau nej hais tias tus Tswv Yexus Khetos pab tau peb kho txhua yam uas yuav tsum kho hauv peb lub neej dhau los ntawm Nws txoj kev theej txhoj.

Hmo no, thaum peb npaj siab ua koob tsheej rau Hnub Caiv Easter tag kis, thov kom nej nco ntsoov txog tus Tswv Yexus Khetos txoj Kev Theej Txhoj. Nco ntsoov tias peb Leej Txiv Saum Ntuj Ceeb Tsheej thiab peb tus Cawm Seej, Yexus Khetos, paub nej zoo tshaj thiab hlub nej tshaj.

Dhau los ntawm txoj Kev Theej Txhoj, tus Txhiv Dim ris peb tej kev nyuaj siab, peb txoj kev mob, thiab kev txhaum. Tus Cawm Seej ntawm neeg ntiaj teb twb to taub peb txhua tus vim nws raug peb tej kev nyuaj siab, tej teeb meem, thiab kev txom nyem thaum nws raug tsim txom nyob hauv Khexemanes thiab saum tus ntoo khaub lig.⁵ Nws tuag vim Nws hlub peb thiab hmo ntawd lawv muab nws faus rau hauv ib lub ntxa tshiab.

Thaum Hnub Caiv sawv ntxov, Yexus sawv hauv qhov tuag rov qab los—cog lus tias peb txhua tus yuav muaj lub neej tshiab. Tus Tswv uas sawv rov los txib Nws cov thwj tim mus qhia txhua tus kom lawv ntseeg Yexus Khetos, hloov siab lees txim, ua kev cai raus dej, txais lub txiaj ntsim Vaj Ntsuj Plig Dawb Huv, thiab nyiaj mus kom txog thaum kawg. Cov kwv tij, peb paub tias Vajtswv peb Leej Txiv, thiab Nws Leej Tub uas Nws hlub, tau tshwm sim rau tus Yaj Saub Yauxej Xamiv thiab muab Yexus Khetos txoj moo zoo txum tim rov qab los tag nrho.

Cov kwv tij, cia li muaj zog. Cia li ua raws li Vajtswv tej lus txib. Tus Tswv Yexus Khetos cog lus tias peb yuav tau txhua yam uas peb xav tau yog peb xav siv tej ntawd ua ncaj ncees. Cov thawj coj ntawm lub Koom Txoos tso siab rau nej. Peb xav kom nej txhua tus tub hluas npaj sib yuav, ua hauj lwm pab lwm tus, thiab coj kev thaum yav tom ntej, kuv thov li no los ntawm tus Tswv Yexus Khetos lub npe, amees.