Li tasal tenamit jwal nim ru reheb’ laj saaj

Jun reheb’ li jwal nasaho’ wi’ inch’ool a’an li k’a’ru nink’ul naq yookin chi b’eek chiru chixjunil li ruchich’och’ ut xnawb’aleb’ ru ut raatinakileb’ li qamisioneer. Eb’ li chaab’il aj Elder ut Hermana li neke’xlemtz’u lix saqen li Kristo, ut musiq’anb’ilin xb’aan li rahok li wan rik’ineb’ choq’ re li Qaawa’ Jesukristo ut lix chaab’il k’anjel neke’xb’aanu choq’ re. Naq nink’e li wuq’ reheb’ ut naweek’a lix q’axal musiq’ej ut paab’aal wan rik’ineb’, ninye we: “Eb’ li q’axal chaab’il qalal ut qarab’in, a’aneb’ chi tz’aqal yaal jun sachb’a-ch’oolej!”.

Chiru li jolomil ch’utub’aj-ib’ re li tijonelil sa’ li octubre 2002 kinpatz’ reheb’ li obiisp, li yuwa’b’ej ut eb’ li yookeb’ chixkawresinkil rib’ re naq teeb’oqe’ jo’ misioneer, “chixtaqsinkil li chaab’ilal ” sa’ li k’anjel re li misioneer re tz’aqal hoonal.

Toja’ naq kinye naq “li k’a’ru naqaj ru … a’an li tusulal tenamit q’axal nim ru re misioneer wanjenaq chalen chaq xtiklajik li Iglees. Naqaj ruheb’ li k’ulub’ej chi misioneer, tzolb’ileb’ chi us ut kaweb’ rib’ sa’ musiq’ejil.  …

“… Li k’a’ru naqaj ru chixjunil lee ch’ool ut chixjunil lee raam. Naqaj ruheb’ li eek’asinb’il misioneer, seeb’ xch’ooleb’, ut yalyookeb’ xq’e li neke’xnaw chanru rab’inkil ut xb’aanunkil li naxye lix hasb’ li Santil Musiq’ej”.¹

Naab’al paay chanru naq li ruchich’och’ anajwan numtajenaq li ch’a’ajkilal chiru oxlaju chihab’ chaq anajwan. Eb’ li qasaaj winq ut saaj ixq numtajenaq b’ar wi’ naru naxik xch’ooleb’ chixjalb’ehinkil rib’ chiru xkawresinkil rib’ chi xik sa’ li mision jo’ ajwi’ chi wanq sahil yu’am chirix. Lix yiib’ahom li winq yoo chi xik sa’ xb’een li ruchich’och’, ut haye’ chixjunileb’ neke’okenk rik’in junaq kaxlan ch’iich’ b’ar wi’ chapcho xk’a’uxleb’ lix komon lix junkab’al li Dios. Wan naq nachal li k’a’ru jwal us ut wan naq nachal li jwal ink’a’ us.

Sa’ li q’ojyin a’in ninwaatinaheb’ li misioneer li yookeb’ chi k’anjelak, li yookeb’ chixkawresinkil rib’ chi xik sa’ li mision, ut li ak xe’sutq’i chaq, ut chixjunileb’ li saaj winq re li Iglees. Nintz’aama naq teetaw ru ut teetz’il rix timil timil li k’a’ru tinye eere naq toj yookex chi b’eek sa’ lee saajilal, jun xq’ehil eeyu’am q’axal chaab’il ut elajinb’il.

Sa’ xtiqlajik li Iglees, jun aj jolomil aj b’eresinel ki’xtz’il rix jun misioneer naq toj maji’ naxik sa’ xmision. Sa’ li kutan a’in, li obiisp ut li awa’b’ej re oqech neke’xtz’il rix li saaj winq ut ixq re naq te’k’anjelaq sa’ jun mision, ut eb’ li xk’ihal eere maare maajun wa teeraatina jun aj jolomil aj b’eresinel. A’in yal naxk’ut lix yaalalil naq wanko numenaq 15 millon xkomon li Iglees sa’ chixjunil li ruchich’och’. Ninnaw naq yookin chi aatinak sa’ xk’ab’a’eb’ li wech apostolil, naq ninye naq naqaj raj naq tooruuq chixnawb’aleb’ ru chejunilex ut chixyeeb’al eere naq nekexqara ut nekexqaxaqab’ sa’ lee k’anjel.

A’ut li Qaawa’ naxk’e qe qak’anjeleb’aal chanru tooruuq chi wulak toj eerik’in. Jo’ jun eetalil, jun xkomon lix Molameb’ li Kab’laju chi Apostol naxtaqla b’ar wi’ taaxik sa’ xmision li junjunq chi misioneer. Us ta a’in ink’a’ nab’aanuman rik’in naq naqil qilobʼaal chiqibʼil qibʼ, li k’anjeleb’aal ch’iich’ ut li musiq’anb’il na’leb’ neke’xjunaji rib’ re naq taqanumsi jun hoonal chanchan naq wanko eerik’in sa’ junjunqal. Nawaj raj xyeeb’al eere chanru nak’ulman a’in.

Lee jalam-uuch nak’utun chiru li rilob’aal jun ulul ch’iich’, rik’in ajwi’ li esil tz’iib’anb’il xb’aan li obiisp ut li awa’b’ej re oqech ut ke’xtaqla chaq qe. Naq nak’utun lee jalam-uuch, naqil sa’ lee ru ut naqil chanru xesume chaq li k’a’ru patz’b’il eere sa’ xhuhil li k’ulub’aak jo’ misioneer. Chiru li ch’ina hoonal a’an, chanchan naq wankex chiwu ut yookex chiqasumenkil.

Naq naqil lee jalam-uuch, naqoyb’eni naq xetz’aqob’resi ru “xtaqsinkil li chaab’ilal” li na’ajman sa’ li kutan a’in re naq taaruuq junaq chi wank jo’ jun misioneer tiik xch’ool ut chaab’il xb’aanuhom. Toja’ naq, rik’in lix wankil lix Musiq’ li Qaawa’ ut chirub’el lix b’eresihom li Awa’b’ej Thomas S. Monson, nekexqataqla sa’ jun reheb’ li 406 chi mision re li Iglees chiru chixjunil li ruchich’och’.

Ink’a’, moko juntaq’eet ta naq noko’aatinak ut naqil qilobʼaal chiqibʼil qibʼ, a’b’an chanchan a’an.

Jun chik xb’ehil chanru nokoru chi wulak rik’ineb’ aj jolominel ut li komon najt wankeb’ rik’in xjolomil li Iglees, a’an li li ch’utub’aj-ib’ sa’ video.

Rik’in a’in sa’ lee k’a’uxl, nawaj raj naq li yookeb’ chixkawresinkil rib’ chi k’anjelak sa’ jun mision, li ak xe’sutq’i chaq, ut chixjunileb’ li saaj winq te’kanaaq wik’in chiru jun k’amok jo’ chanchan naq yooko raj chiraatinankil qib’ anajwan. Ilomaqin chiru wiib’ oxib’ k’asal jo’ chanchan naq laa’ex ut laa’in wanko sa’ junesil sa’ li na’ajej b’ar wi’ wankex sa’ li q’ojyin a’in.

Sa’ lin k’a’uxl, tink’oxla naq yookin chawilb’al sa’ laa wu ut chirab’inkil laa sumehom chirix li junjunq inpatz’om li tixye we chirix lix chamal xnawom aach’ool ut xk’eek’okil aach’ool chiru li Dios. Tinwaj raj xyeeb’al li k’a’ru xinye reheb’ li misioneer oxlaju chihab’ chaq anajwan, li k’a’ru naqaj ru sa’ li kutan a’in a’an li tasal tenamit jwal nim ru re saaj sa’ li resilal li Iglees. Li k’a’ru naqaj ru a’an chuxjunil lee ch’ool ut chixjunil lee raam. Naqaj ruheb’ li eek’asinb’il saaj winq ut ixq, seeb’ xch’ooleb’, ut yalyookeb’ xq’e li neke’xnaw chanru rab’inkil ut xb’aanunkil li naxye lix hasb’ li Santil Musiq’ej naq yookeb’ chixnumsinkileb’ li yalok ix ut eb’ li aaleek rajlal kutan k’ub’ileb’ xb’aan jun aj saaj Santil Paab’anel sa’ li kutan a’in.

Sa’ jalan chik aatin, ak xwulak hoonal re xtaqsinkil li chaab’ilal moko junes ta reheb’ li misioneer, re ajb’an wi’ li misioneer ak ke’sutq’i ut re chixjunil lee tasal tenamit. Re naq chik’ulmanq a’in, nintz’aama eere naq teek’oxla sa’ lee ch’ool li k’a’ru eesumehom chirixeb’ li patz’om a’in:

1. Ma nakatz’il rix li loq’laj hu rajlal kutan?

2. Ma nakatwiq’la chi tijok chi aatinak rik’in laa Choxahil Yuwa’ rajlal eq’la ut rajlal q’ojyin?

3. Ma nakakuy aasa’ ut nakak’e jun mayej re kuyuk sa’ rajlal po—us ta laa’at tana’ jun tzolom neb’a’ chaq li naxyal xq’e ut moko naab’al xtumin re xmayejankil?

4. Ma nakak’oxla chi anchal laa ch’ool chirix li Kolonel ut lix mayej re xtojb’al rix laa maak naq napatz’man aawe chixkawresinkil, rosob’tesinkil, ut xjek’inkil, malaj xk’ulb’al li loq’laj wa’ak?

5. Ma yookat chi wulak sa’eb’ laa ch’utam ut ma nakayal aaq’e chixxloq’oninkil ru li hilob’aal kutan?

6. Ma maak’a aab’alaq’il sa’ laa wochoch, sa’ laa tzoleb’aal, sa’ li iglees, ut sa’ laa k’anjel?

7. Ma saq ru laa k’a’uxl ut ma saq aawu sa’ musiq’ejil? Ma nakatz’eqtanaa chirilb’al li pornografía malaj chirilb’al li na’ajej sa’ li ulul ch’iich’, sa’ li hu, sa’eb’ li jalam-uuch película, malaj yalaq k’a’ re ru li tatxk’e chi xutaanak wi nawb’il xb’aaneb’ aana’ aayuwa’, eb’ li neke’jolomin sa’ li Iglees, malaj li Kolonel?

8. Ma nakaloq’oni ru laa hoonal ut ink’a’ nakat-okenk sa’ yalaq k’a’ru li yib’ ru sa’ li ulul ch’iich’ malaj celular, jo’kan ajwi’ eb’ li b’atz’unk, li neke’ru xwartesinkil li musiq’ejil eek’ank?

9. Ma wan k’a’ruhaq sa’ laa yu’am li na’ajman xjalb’al ut xtuqub’ankil anajwan?

Ninb’antioxi eere xb’aan li ka’ch’ina ula’anink. Nawoyb’eni naq xesume li junjunq chi patz’om chi anchal ch’oolejil ut naq xek’oxlaheb’ chi us. Wi nekereek’a naq wan eepaaltil sa’ jun reheb’ li na’leb’ a’in, nintz’aama eere naq tejal eek’a’uxl rik’in xkawil eech’ool ut nekexsutq’il wi’chik chi tusb’il lee yu’am rik’ineb’ li k’utb’il na’leb’ re li evangelio chirix li tiikil wank jo’ tzolom.

Anajwan, ex was wiitz’in, ma teek’e raj inhoonal re xyeeb’al eere xkomon chik li na’leb’ li taatenq’anq eere roksinkil xnawom eech’ool chirix li evangelio sa’ xchamal lee ch’ool ut lee raam?

Ninjultika eere, ex misioneer ak xesutq’i chaw, naq xkawresinkil eerib’ choq’ re lee yu’am ut lee junkab’al tento naq taab’aanumanq rajlal. “M. M.” moko naraj ta xyeeb’al naq “Moko Mormonat ta chik”! Jo’ misioneer ak sutq’ijenaq chaq, “tento naq kʼeebʼilaqebʼ [eeribʼ] chi anchalebʼ [eechʼool] saʼ jun chaabʼil kʼanjel, ut [teebʼaanu] kʼiila kʼaʼaq re ru chi yal ajbʼil xbʼaanebʼ, ut [teekʼe] chi uxliik naabʼal li tiikilal”².

Cheroksihaq lee seeb’al xetaw chaq sa’ li mision re rosob’tesinkil yu’am li wankeb’ eerik’in rajlal kutan. Meejal lee rilob’al re tenq’ank lee ras eeriitz’in rik’in xk’eeb’al lee ch’ool yal junes sa’ li tz’olok, li trab’aaj, ut eb’ li ch’utam sa’ komonil re xsahob’resinkil lee ch’ool. Ruuchil a’an, sik’omaq sa’ lee yu’am xnumsinkil hoonal b’ar wi’ teerek’a lix Musiq’ li Qaawa’ li taajultiko’q eere ut taakawresinq eere chixtenq’ankileb’ lee komon rajlal kutan.

Sa’ lee mision xetaw ru li xnimal ru rula’aninkileb’ li komon sa’ li rochocheb’. Nawoyb’eni naq chejunilex aj saaj—maak’a’ naxye ma xexk’anjelak sa’ li mision re tz’aqal hoonal malaj ink’a’—teetaw ru li xnimal rula’aninkileb’ li komon li wankeb’ junes, yajeb’. malaj neke’lukta xch’ooleb’—moko ka’aj ta wi’ xb’aan naq xexb’oqe’ chixb’aanunkil, ajb’an wi’ xb’aan li tz’aqal rahok li wan eere choq’ re lee Choxahil Yuwa’ ut li ralal xk’ajol.

Ex li wankex sa’ preparatoria ut yookex chixkawresinkil eerib’ chi xik sa’ li mision, nink’e xkawil eech’ool chi wulaq sa’ seminario toj reetal teechoy li kaahib’ chihab’. Ex saaj, tento naq teetz’iib’a eerib’ sa’ Instituto de Religión.³ Wi wankex sa’ li universidad re li Iglees, k’ehomaq lee ch’ool chi wank sa’ jun ch’utam re paab’aal. Chiru li xq’ehil a’in jwal nim ru re xkawresinkil eerib’ choq’ re li mision malaj choq’ re li junelik sumlaak ut naq tatwulaq sa’ laa winqilal, tento naq yookex chixsik’b’aal chanru textzolok ut taanimanq eea’leb’ ut teek’ul li musiqʼanbʼil na’leb’ ut li b’eresink rik’in li Santil Musiq’ej. Lix tzolb’al li evangelio chi anchal lee ch’ool ut rik’in li tijok sa’ seminario, instituto. malaj sa’ eb’ li jar ch’utam re paab’aal naru taatenq’anq eere chixtawb’al xjayalil neke’raj wi’ wulak.

Wi yookex chi xik malaj ink’a’ sa’ jun tzoleb’aal re li Iglees, wi yookex chi xik malaj ink’a’ sa’ jun universidad, meek’oxla naq maak’a’ lee hoonal xtzolb’aal li evangelio. Li seminario, instituto, malaj eb’ li ch’utam re paab’aal texxtenq’a chixb’eresinkil chi chaab’il lee yu’am ut texxtenq’a rik’in li k’a’ru yookex chixtzolb’aal xb’aan naq tixk’e lee ch’ool chixtzolb’aleb’ li loq’laj hu ut lix k’utumeb’ li profeet ut eb’ li apostol. Wan kaahib’ paay chi ak’ ut jwal chaab’il k’utum, ut nawaj raj xwaklesinkil lix ch’ooleb’ chixjunileb’ li saaj chixtz’ilb’al rix ut chi okenq xtzolb’aleb’,⁴

Ut misach sa’ lee ch’ool naq eb’ li tzol’leb’ ut li k’anjel li nak’eeman sa’ laa instituto ut sa’ laa teep malaj oqech reheb’ li JAS (saaj aj winq ut ixq li maji’ neke’sumla) a’anaq ajwi’ jun na’ajej b’ar wi’ texruuq chi wank rik’ineb’ jalaneb’ chi saaj winq ut saaj ixq. Aran teewaklesi eerib’ ut teewaklesi lee musiq’ li jun rik’in li jun chik naq yookex chi tzolok, xnimankil eerib’ sa’ musiq’ej, ut xnawb’al eerib’. Ex was wiitz’in, wi nekekanab’ sa’ jalan chik na’aj lee celular ut chi tz’aqal yaal nekeril sa’ lee sutam, maare teetaw junaq li taawulaq chi wank jo’ lee junelikil ochb’een.

A’in nikinixk’am chixk’eeb’al jun chik na’leb’ li ninnaw chi tz’aqal ak yookex chirilb’al naq yoo chaq chi chalk: Ex aj saaj li maji’ nekexsumla, aajel ru naq tex’elq rik’ineb’ li saaj ixq re naq texsumlaaq. Kanab’omaq chixkanab’ankil sa’ junaq chik kutan! Ninnaw naq wan eere nekexuwa xk’ub’ankil jun li junkab’al. A’b’anan, wi nekexsumla rik’in li tz’aqal komon sa’ li tz’aqal hoonal ut sa’ li tz’aqal na’ajej, maak’a’ teexuwa ru. Ut ninye eere, naab’al li ch’a’ajkilal taaruuq te’nume’q wi wankex chi“kʼeebʼilaqex eeribʼ chi anchal lee chʼool” chi elk chi tiik eech’ool, sa’ li tz’aamank ut li sumlaak. Meetaqla li kok’ tz’iib’anb’il esil! Oksihomaq xyaab’ eekux re teenaweb’ ru eb’ li saqeb’ ru xrab’in li Dios li wankeb’ sa’ lee sutam. Naq jun li saaj ixq taarab’i lix yaab’ xkux jun komon taasachq xch’ool ut a’an tixb’aanu naq tixye naq us.

Anajwan, ex was wiitz’in, ninch’olob’ xyaalal eere naq li Qaawa’ Jesukristo naru qatenq’ankil chixyiib’ankil li k’a’aq re ru sa’ li qayu’am rik’in lix mayej re xtojb’al rix li maak.

Sa’ li ewu a’in, naq yooko chixkawresinkil qib’ chixninq’ehinkil li Paswa wulaj, xaqlinqex b’ayaq wik’in re xk’oxlankil li maatan re xtojb’al rix li maak kixb’aanu li Kristo. Chinaq sa’ eech’ool naq li qaChoxahil Yuwa’ ut aj Kolol qe Jesukristo neke’xnaw eeru ut q’axal raab’ilex xb’aaneb’.

Rik’in xtojb’al rix li maak, aj Tojol-ix kixchap sa’ xb’een li qach’a’ajkilal, li qarahilal ut li qamaak. Aj Kolol re li ruchich’och’ kik’ulun re xtawb’al qu sa’ junjunqal naq kireek’a li qayo’onihom sachb’il ru, li qacha’ajkilal ut li qanimla rahilal rik’in li rahilal kixnumsi sa’ li Awimq Getsemani ut sa’ li krus.⁵ Lix kamik a’an roso’jik xk’anjel re rahok choq’ qe, ut sa’ li xuwajel q’ojyin a’an ke’xmuq sa’ jun li ak’ muqleb’aal.

Sa’ li domingo eq’la, li Jesus kiwakli saʼ xyanqebʼ li kamenaq—xyeechi’inkil qe jun ak’ yu’am re li qajunjunqal. Toja’ naq, li Qaawa’ wakliljenaq kixk’ojob’eb’ lix moos naq te’xk’ut re chixjunileb’ naq te’wanq xpaab’aal chirix li Kristo, te’xjal xk’a’uxl chirix li maak, naq te’kub’eeq xha’, te’xk’ul li maatan re li Santil Musiqej ut te’kuyuq toj sa’ roso’jik. Ex was wiitz’in, naqanaw naq li Dios, li qaYuwa’, ut Li Ralal Raarookil xb’aan ke’rula’ani li profeet aj Jose Smith ut rik’in a’an ke’xk’ojob’ wi’chik lix tz’aqalil lix junlikil evangelio li Jesukristo.

Kawaq eech’ool, ex was wiitz’in. Paab’ahomaq lix taqlahom li Dios. Li Qaawa’ Jesukristo naxyeechi’i qe naq chixjunil li k’a’ru naqaj xb’aanunkil chi tiikil ch’oolej a’anaq qe. Eb’ li neke’xjolomi li Iglees neke’xk’e xch’ool sa’ eeb’en. Naqaj ru naq li junjunq laa’ex, ex saaj aj winq, teekawresi eerib’ choq’ re li sumlaak, re k’anjelak, ut re naq texwanq sa’ jun kutan chalel jo’ aj jolominel sa’ li Iglees. A’an a’in li k’a’ru nintz’aama sa’ xk’ab’a’ li qaQaawa’ Jesukristo. Amen.