ຜູ້ໃຫຍ່ໂສດລຸ້ນທີ່ຍິ່ງໃຫຍ່

ໂດຍ ແອວເດີ ເອັມ ຣະໂຊ ບາເລີດ

ແຫ່ງກຸ່ມອັກຄະສາວົກສິບສອງ

ຮູບພາບ

ສິ່ງທີ່ພວກເຮົາຕ້ອງການໃນເວລານີ້ ແມ່ນຜູ້ໃຫຍ່ໂສດລຸ້ນທີ່ຍິ່ງໃຫຍ່ ໃນປະຫວັດສາດຂອງສາດສະໜາຈັກ. ພວກເຮົາຕ້ອງການທ່ານຜູ້ທີ່ຕັ້ງໃຈແທ້ໆ.

ສິ່ງໜຶ່ງທີ່ຂ້າພະເຈົ້າມັກຫລາຍ ຕອນຂ້າພະເຈົ້າເດີນທາງໄປຕະຫລອດທົ່ວໂລກ ແມ່ນໂອກາດທີ່ຈະໄດ້ພົບເຫັນ ແລະ ທັກທາຍຜູ້ສອນສາດສະໜາ. ພວກແອວເດີ ແລະ ຊິດສະເຕີ ທີ່ດີເດັ່ນເຫລົ່ານັ້ນ ສ່ອງຄວາມສະຫວ່າງຂອງພຣະຄຣິດ, ແລະ ຂ້າພະເຈົ້າຈະໄດ້ຮັບການດົນໃຈສະເໝີ ໂດຍຄວາມຮັກທີ່ເຂົາເຈົ້າມີຕໍ່ອົງພຣະເຢຊູຄຣິດເຈົ້າ ແລະ ຕໍ່ການຮັບໃຊ້ທີ່ອຸທິດຕົນຕໍ່ພຣະອົງ. ທຸກເທື່ອທີ່ຂ້າພະເຈົ້າໄດ້ຈັບມືເຂົາເຈົ້າ ແລະ ຮູ້ສຶກເຖິງວິນຍານ ແລະ ສັດທາ ທີ່ໜ້າອັດສະຈັນໃຈຂອງເຂົາເຈົ້າ, ຂ້າພະເຈົ້າຈະຄິດຢູ່ໃນໃຈວ່າ, “ລູກຊາຍ ແລະ ລູກສາວທີ່ດີເຫລົ່ານີ້ຂອງພວກເຮົາ ມະຫັດສະຈັນແທ້ໆ!”

ໃນລະຫວ່າງກອງປະຊຸມຖານະປະໂລຫິດສາມັນ ໃນເດືອນຕຸລາ ປີ 2002, ຂ້າພະເຈົ້າໄດ້ທ້າທາຍອະທິການ, ພໍ່ແມ່ ແລະ ຜູ້ຕຽມໄປສອນສາດສະໜາ ໃຫ້ “ເພີ່ມມາດຕະຖານ” ສຳລັບການຮັບໃຊ້ເຜີຍແຜ່ເຕັມເວລາ.

ແລ້ວຂ້າພະເຈົ້າໄດ້ກ່າວວ່າ “ສິ່ງທີ່ພວກເຮົາຕ້ອງການ … ແມ່ນຜູ້ສອນສາດສະໜາລຸ້ນທີ່ຍິ່ງໃຫຍ່ ໃນປະຫວັດສາດຂອງສາດສະໜາຈັກ. ພວກເຮົາຕ້ອງການຜູ້ສອນສາດສະໜາທີ່ມີຄ່າຄວນ, ເໝາະສົມ, ແລະ ກະຕືລືລົ້ນທາງວິນຍານ. …

“… ພວກເຮົາຕ້ອງການທ່ານຜູ້ທີ່ຕັ້ງໃຈແທ້ໆ. ພວກເຮົາຕ້ອງການຜູ້ສອນສາດສະໜາທີ່ແຈ່ມໃສ, ຮູ້ຈັກຄິດ, ແລະ ກະຕືລືລົ້ນ ຜູ້ຮູ້ຈັກຟັງ ແລະ ຕອບຮັບຕອນພຣະວິນຍານສັກສິດຊື່ມໃສ່ຫູ.”¹

ໃນໂລກທຸກວັນນີ້ ມີການທ້າທາຍ ໃນຫລາຍວິທີທາງ ຫລາຍກວ່າ ເມື່ອ 13 ປີ ທີ່ຜ່ານມາ. ຊາຍໜຸ່ມ ແລະ ຍິງໜຸ່ມຂອງເຮົາ ຖືກລົບກວນຫລາຍກວ່າທີ່ຜ່ານມາ ໃນການຕຽມໄປເຜີຍແຜ່ ແລະ ຕຽມສຳລັບຊີວິດທີ່ມີຄວາມສຸກໃນອານາຄົດ. ເທັກໂນໂລຈີໄດ້ຂະຫຍາຍອອກຢ່າງກວ້າງໄກ, ແລະ ເກືອບທຸກຄົນກໍມີເຄື່ອງມືຖື ທີ່ສາມາດດຶງດູດຄວາມສົນໃຈ ຂອງຄອບຄົວມະນຸດຂອງພຣະອົງ ທັງໃນທາງທີ່ດີ ແລະ ໃນທາງທີ່ຊົ່ວຮ້າຍ.

ຄ່ຳຄືນນີ້, ຂ້າພະເຈົ້າຂໍກ່າວກັບຜູ້ກຳລັງສອນສາດສະໜາ, ຜູ້ຈະໄປສອນສາດສະໜາ, ແລະ ຜູ້ເຄີຍໄດ້ໄປສອນສາດສະໜາ, ຕະຫລອດທັງຜູ້ໃຫຍ່ໂສດທັງໝົດຂອງສາດສະໜາຈັກ. ຂ້າພະເຈົ້າຫວັງວ່າ ທ່ານຈະເຂົ້າໃຈ ແລະ ພິຈາລະນາຢ່າງຖ້ວນຖີ່ ກ່ຽວກັບສິ່ງທີ່ຂ້າພະເຈົ້າຈະກ່າວກັບທ່ານ ໃນຂະນະທີ່ທ່ານເດີນທາງໄປໃນຊີວິດ ໃນໄລຍະທີ່ໜ້າຕື່ນເຕັ້ນ ແລະ ຍາກລຳບາກ ໃນຊີວິດຂອງທ່ານ.

ໃນຕອນສາດສະໜາຈັກເລີ່ມຕົ້ນໃໝ່, ຜູ້ສອນສາດສະໜາໄດ້ຮັບການສຳພາດໂດຍເຈົ້າໜ້າທີ່ຊັ້ນຜູ້ໃຫຍ່ ກ່ອນເຂົາເຈົ້າໄດ້ອອກໄປເຜີຍແຜ່. ທຸກວັນນີ້ ທ່ານໄດ້ຮັບການສຳພາດໄປສອນສາດສະໜາ ໂດຍອະທິການ ແລະ ປະທານສະເຕກຂອງທ່ານ, ແລະ ໃນຊີວິດນີ້ ບໍ່ມີຫລາຍຄົນໃນພວກທ່ານ ທີ່ຈະຜ່ານການສຳພາດຈາກເຈົ້າໜ້າທີ່ຊັ້ນຜູ້ໃຫຍ່. ເປັນເພາະວ່າ ນີ້ຄືສາດສະໜາຈັກທີ່ຂະຫຍາຍອອກໄປທົ່ວໂລກ ຊຶ່ງມີສະມາຊິກຫລາຍກວ່າ 15 ລ້ານຄົນ. ຂ້າພະເຈົ້າຂໍເວົ້າແທນບັນດາເຈົ້າໜ້າທີ່ຊັ້ນຜູ້ໃຫຍ່ທັງໝົດວ່າ ພວກເຮົາກໍຢາກຮູ້ຈັກທ່ານດ້ວຍຕົວເອງຖ້າເປັນໄປໄດ້ ແລະ ສາມາດບອກທ່ານວ່າ ພວກເຮົາຮັກທ່ານ ແລະ ສະໜັບສະໜູນທ່ານ.

ໂຊກດີຫລາຍ ທີ່ພຣະຜູ້ເປັນເຈົ້າໄດ້ຈັດວິທີໃຫ້ພວກເຮົາເອື້ອມອອກໄປຫາທ່ານ. ຍົກຕົວຢ່າງ, ສະມາຊິກຄົນໜຶ່ງໃນກຸ່ມອັກຄະສາວົກສິບສອງ ໄດ້ເປັນຜູ້ມອບໝາຍຜູ້ສອນສາດສະໜາ ໃຫ້ໄປສອນຢູ່ບ່ອນໃດບ່ອນໜຶ່ງ. ເຖິງແມ່ນວ່າ ບໍ່ໄດ້ທຳການສຳພາດໜ້າຕໍ່ໜ້າ ເໝືອນດັ່ງແຕ່ກ່ອນ, ແຕ່ເທັກໂນໂລຈີ ແລະ ການເປີດເຜີຍ ທັງສອງ ໄດ້ຈັດຕຽມປະສົບການທີ່ໃກ້ຊິດ ແລະ ເປັນສ່ວນຕົວ ຢ່າງໜ້າອັດສະຈັນໃຈ. ຂ້າພະເຈົ້າຈະບອກໃຫ້ທ່ານຮູ້ເຖິງຂັ້ນຕອນກ່ຽວກັບເລື່ອງນີ້.

ຮູບພາບຂອງທ່ານປະກົດຂຶ້ນຢູ່ໃນຄອມພິວເຕີ ພ້ອມດ້ວຍຂໍ້ມູນທີ່ສຳຄັນ ຊຶ່ງໄດ້ຮັບຈາກອະທິການ ແລະ ປະທານສະເຕກຂອງທ່ານ. ເມື່ອຮູບຂອງທ່ານປະກົດຂຶ້ນ, ພວກເຮົາຈະຫລຽວເບິ່ງດວງຕາຂອງທ່ານ ແລະ ກວດກາເບິ່ງຄຳຕອບຂອງທ່ານ ຢູ່ໃນໃບສະໝັກໄປສອນສາດສະໜາ. ໃນເວລາສັ້ນໆນັ້ນ, ເບິ່ງຄືວ່າ ທ່ານຢູ່ຕໍ່ໜ້າ ແລະ ຕອບຄຳຖາມຂອງພວກເຮົາໜ້າຕໍ່ໜ້າ.

ເມື່ອພວກເຮົາເບິ່ງຮູບພາບຂອງທ່ານ, ພວກເຮົາເຊື່ອວ່າ ທ່ານໄດ້ປະຕິບັດຕາມ “ມາດຕະຖານສູງ” ຊຶ່ງເປັນເງື່ອນໄຂໃນປະຈຸບັນ ຂອງຜູ້ຈະເປັນຜູ້ສອນສາດສະໜາທີ່ຊື່ສັດ, ແລະ ມີປະສິດທິພາບ. ແລ້ວ, ໂດຍອຳນາດຂອງພຣະວິນຍານຂອງພຣະຜູ້ເປັນເຈົ້າ, ແລະ ພາຍໃຕ້ການຊີ້ນຳຂອງປະທານທອມມັສ ແອັສ ມອນສັນ, ພວກເຮົາຈຶ່ງໄດ້ມອບໝາຍທ່ານໃຫ້ເຂດເຜີຍແຜ່ແຫ່ງໜຶ່ງ ໃນ 406 ແຫ່ງ ທີ່ຕັ້ງຢູ່ຕະຫລອດທົ່ວໂລກ.

ແມ່ນແລ້ວ, ມັນບໍ່ຄືກັນກັບການສຳພາດສ່ວນຕົວ, ໜ້າຕໍ່ໜ້າ. ແຕ່ກໍຄ້າຍຄືກັນ.

ການປະຊຸມທາງວິດີໂອ ກໍເປັນວິທີທາງໜຶ່ງ ທີ່ຊ່ອຍພວກເຮົາໃຫ້ເອື້ອມອອກໄປຫາຜູ້ນຳ ໃນສາດສະໜາຈັກ ແລະ ສະມາຊິກ ຜູ້ອາໄສຢູ່ຫ່າງໄກຈາກສູນກາງໃຫຍ່ຂອງສາດສະໜາຈັກ.

ໃນການພິຈາລະນາກ່ຽວກັບເລື່ອງນີ້, ຂ້າພະເຈົ້າຢາກໃຫ້ຜູ້ທີ່ກຳລັງຕຽມໄປຮັບໃຊ້ເຜີຍແຜ່, ຜູ້ທີ່ໄດ້ກັບມາແລ້ວ, ແລະ ຜູ້ເປັນຜູ້ໃຫຍ່ໂສດ ໃຫ້ໃຊ້ເວລາຈັກສອງສາມນາທີ ກັບຂ້າພະເຈົ້າ ຄືກັບວ່າ ພວກເຮົາເວົ້າລົມກັນທາງວິດີໂອ ໃນຕອນນີ້. ຂໍໃຫ້ທ່ານຈົ່ງຫລຽວເບິ່ງຂ້າພະເຈົ້າ ຄືກັບວ່າ ທ່ານ ແລະ ຂ້າພະເຈົ້າ ນັ່ງຢູ່ນຳກັນໃນຫ້ອງ ບໍ່ວ່າທ່ານຈະຢູ່ໃສກໍຕາມ.

ສ່ວນຂ້າພະເຈົ້າ, ຂ້າພະເຈົ້າຈະວາດພາບວ່າ ຂ້າພະເຈົ້າກຳລັງແນມເບິ່ງດວງຕາຂອງທ່ານ ແລະ ຟັງຄຳຕອບຂອງທ່ານຕໍ່ຄຳຖາມສອງສາມຂໍ້ຢ່າງຕັ້ງໃຈ ຊຶ່ງຂ້າພະເຈົ້າເຊື່ອວ່າ ຈະບອກຂ້າພະເຈົ້າໄດ້ຫລາຍສົມຄວນ ກ່ຽວກັບປະຈັກພະຍານ ແລະ ການອຸທິດຕົນຂອງທ່ານຕໍ່ພຣະເຈົ້າ ວ່າມີໜ້ອຍຫລາຍຊ່ຳໃດ. ຂ້າພະເຈົ້າຂໍໃຊ້ຄຳໃໝ່ ໃນຖ້ອຍຄຳທີ່ຂ້າພະເຈົ້າໄດ້ກ່າວກັບຜູ້ສອນສາດສະໜາ ເມື່ອ 13 ປີກ່ອນວ່າ ສິ່ງທີ່ພວກເຮົາຕ້ອງການໃນເວລານີ້ ແມ່ນຜູ້ໃຫຍ່ໂສດລຸ້ນທີ່ຍິ່ງໃຫຍ່ ໃນປະຫວັດສາດຂອງສາດສະໜາຈັກ. ພວກເຮົາຕ້ອງການທ່ານຜູ້ທີ່ຕັ້ງໃຈແທ້ໆ. ພວກເຮົາຕ້ອງການຜູ້ໃຫຍ່ໂສດທີ່ມີຄ່າຄວນ, ເໝາະສົມ, ແລະ ກະຕືລືລົ້ນທາງວິນຍານ ໃນຂະນະທີ່ທ່ານຜ່ານຜ່າການທົດລອງ ແລະ ການລໍ້ລວງປະຈຳວັນຂອງທ່ານ ໃນການເປັນໄພ່ພົນຍຸກສຸດທ້າຍໜຸ່ມລຸ້ນໃໝ່.

ອີກປະການໜຶ່ງ, ມັນເຖິງເວລາແລ້ວ ທີ່ຈະຍົກມາດຕະຖານຂຶ້ນ ບໍ່ພຽງແຕ່ສຳລັບຜູ້ສອນສາດສະໜາເທົ່ານັ້ນ ແຕ່ສຳລັບຜູ້ເຄີຍໄປສອນສາດສະໜານຳອີກ ແລະ ສຳລັບຄົນລຸ້ນດຽວກັບທ່ານ. ເພາະດ້ວຍເຫດນີ້, ຂໍໃຫ້ທ່ານຈົ່ງໄຕ່ຕອງໃນໃຈ ກ່ຽວກັບຄຳຖາມດັ່ງຕໍ່ໄປນີ້:

ທ່ານຄົ້ນຄວ້າພຣະຄຳພີເປັນປະຈຳບໍ?
ທ່ານຄຸເຂົ່າອະທິຖານ ເພື່ອເວົ້າລົມນຳພຣະບິດາເທິງສະຫວັນຂອງທ່ານ ທຸກເຊົ້າ ແລະ ແລງບໍ?
ທ່ານຖືສິນອົດເຂົ້າ ແລະ ບໍລິຈາກເງິນ ຈາກການຖືສິນອົດເຂົ້າແຕ່ລະເດືອນບໍ—ເຖິງແມ່ນວ່າ ທ່ານເປັນນັກຮຽນທີ່ຍາກຈົນ ແລະ ດີ້ນລົນຕໍ່ສູ້ ຜູ້ບໍ່ສາມາດບໍລິຈາກຫລາຍກໍຕາມ?
ທ່ານຄຳນຶງເຖິງພຣະຜູ້ຊ່ອຍໃຫ້ລອດ ແລະ ການຊົດໃຊ້ຂອງພຣະອົງຢ່າງເລິກຊຶ້ງບໍ ສຳລັບທ່ານ ຕອນທ່ານຖືກຂໍໃຫ້ຈັດຕຽມ, ຢາຍ, ຫລື ຮັບສ່ວນສິນລະລຶກ?
ທ່ານໄປຮ່ວມປະຊຸມຕ່າງໆຂອງທ່ານບໍ ແລະ ພະຍາຍາມຮັກສາວັນຊະບາໂຕໃຫ້ສັກສິດ?
ທ່ານຊື່ສັດຢູ່ໃນບ້ານ, ໃນໂຮງຮຽນ, ໃນໂບດ, ແລະ ໃນບ່ອນທຳງານບໍ?
ທ່ານສະອາດທາງຈິດໃຈ ແລະ ທາງວິນຍານບໍ? ທ່ານຫລີກເວັ້ນຈາກຮູບພາບລາມົກບໍ ຫລື ຫລີກເວັ້ນຈາກການເບິ່ງ ເວບໄຊ້, ວາລະສານ, ໜັງ, ຫລື apps, ຮ່ວມທັງ Tinder ແລະ ຮູບພາບ Snapchat, ທີ່ເຮັດໃຫ້ທ່ານອັບອາຍ ຖ້າພໍ່ແມ່, ຜູ້ນຳຂອງສາດສະໜາຈັກ, ຫລື ພຣະຜູ້ຊ່ອຍໃຫ້ລອດ ເຫັນທ່ານ?
ທ່ານໃຊ້ເວລາໃຫ້ເປັນປະໂຫຍດບໍ—ຫລີກເວັ້ນຈາກ ເທັກໂນໂລຈີ ແລະ ສື່ສານມວນຊົນ ທີ່ບໍ່ເໝາະສົມ, ຮ່ວມທັງ ວິດີໂອ ເກມ, ຊຶ່ງສາມາດເຮັດໃຫ້ຄວາມຮູ້ສຶກທາງວິນຍານຂອງທ່ານລຸດລົງບໍ?
ມີສິ່ງໃດບໍໃນຊີວິດຂອງທ່ານ ທີ່ທ່ານຕ້ອງປ່ຽນ ແລະ ດັດແປງ, ເລີ່ມຕົ້ນໃນຄ່ຳຄືນນີ້?

ຂອບໃຈຫລາຍໆສຳລັບການຢ້ຽມຢາມທີ່ສັ້ນໆນີ້. ຂ້າພະເຈົ້າຫວັງວ່າ ຄຳຕອບຂອງທ່ານຕໍ່ຄຳຖາມແຕ່ລະຂໍ້ ຈະຊື່ສັດ ແລະ ດ້ວຍຄວາມພິຈາລະນາ. ຖ້າທ່ານພົບເຫັນຕົນເອງບົກພ່ອງໃນຫລັກທຳຂໍ້ໃດທີ່ງ່າຍໆເຫລົ່ານີ້, ແລ້ວຂ້າພະເຈົ້າຂໍໃຫ້ທ່ານຈົ່ງມີຄວາມກ້າຫານທີ່ຈະກັບໃຈ ແລະ ດັດແປງຊີວິດໃຫ້ເໝາະສົມກັບມາດຕະຖານຂອງພຣະກິດຕິຄຸນແຫ່ງການເປັນສານຸສິດທີ່ຊອບທຳ.

ບັດນີ້ ອ້າຍນ້ອງທັງຫລາຍ, ຂ້າພະເຈົ້າແນະນຳຕື່ມອີກ ຊຶ່ງອາດຈະຊ່ອຍທ່ານໃຫ້ມີປະຈັກພະຍານເຖິງພຣະກິດຕິຄຸນຢ່າງເລິກຊຶ້ງໃນໃຈ ແລະ ໃນຈິດວິນຍານຂອງທ່ານ.

ຂ້າພະເຈົ້າຂໍເຕືອນທ່ານຜູ້ທີ່ໄດ້ກັບມາຈາກການເຜີຍແຜ່ວ່າ ທ່ານຄວນຕຽມສະເໝີສຳລັບຊີວິດ ແລະ ຄອບຄົວ. ຄຳວ່າ “RM” ແປວ່າ ອາດີດຜູ້ສອນສາດສະໜາ ບໍ່ໄດ້ໝາຍຄວາມວ່າ “Retired Mormon! ຫລື “ອາດີດຊາວມໍມອນ” ໃນຖານະເປັນອາດີດຜູ້ສອນສາດສະໜາ, ທ່ານຄວນກະຕືລືລົ້ນໃນອຸດົມການດີ, ແລະ ເຮັດຫລາຍສິ່ງຫລາຍຢ່າງດ້ວຍຄວາມສະໝັກໃຈຂອງຕົນເອງ, ແລະ ເຮັດໃຫ້ເກີດຄວາມຊອບທຳຢ່າງຫລວງຫລາຍ.²

ຂໍໃຫ້ໃຊ້ຄວາມຊຳນານທີ່ທ່ານໄດ້ຮຽນມາຈາກການໄປສອນສາດສະໜາ ເປັນພອນແກ່ຊີວິດຂອງຄົນທີ່ຢູ່ອ້ອມຮອບທ່ານ ໃນທຸກວັນ. ຢ່າລະເລີຍຈາກການຮັບໃຊ້ຄົນອື່ນ ເພື່ອຈະໄດ້ເອົາໃຈໃສ່ກັບໂຮງຮຽນ, ວຽກງານ, ຫລື ເຂົ້າສັງຄົມເທົ່ານັ້ນ. ແຕ່ໃຫ້ຊີວິດຂອງທ່ານມີປະສົບການທາງວິນຍານ ທີ່ເຕືອນ ແລະ ຕຽມທ່ານສຳລັບການຊ່ອຍເຫລືອຄົນອື່ນໄປເລື້ອຍໆ.

ໃນລະຫວ່າງການເຜີຍແຜ່ຂອງທ່ານ, ທ່ານໄດ້ຮຽນຮູ້ເຖິງຄວາມສຳຄັນຂອງການຢ້ຽມຢາມຜູ້ຄົນ ໃນບ້ານຂອງເຂົາເຈົ້າ. ຂ້າພະເຈົ້າຫວັງວ່າ ຜູ້ໃຫຍ່ໂສດທຸກຄົນ, ບໍ່ວ່າທ່ານໄດ້ໄປເຜີຍແຜ່ ຫລື ບໍ່ໄດ້ໄປກໍຕາມ, ຈະເຂົ້າໃຈເຖິງຄວາມສຳຄັນຂອງການໄປຢ້ຽມຢາມຜູ້ຄົນ ທີ່ໂດດດ່ຽວ, ເຈັບປ່ວຍ, ຫລື ທໍ້ຖອຍໃຈ—ບໍ່ພຽງແຕ່ເປັນການມອບໝາຍເທົ່ານັ້ນ ແຕ່ເພາະຄວາມຮັກທີ່ຈິງໃຈ ຊຶ່ງທ່ານມີຕໍ່ພຣະບິດາເທິງສະຫວັນ ແລະ ລູກໆຂອງພຣະອົງນຳອີກ.

ສ່ວນພວກເຈົ້າຜູ້ທີ່ຮຽນຢູ່ຊັ້ນມັດທະຍົມ ຊຶ່ງກຳລັງຕຽມໄປເຜີຍແຜ່, ຂ້າພະເຈົ້າຂໍຊຸກຍູ້ພວກເຈົ້າໃຫ້ຮຽນຈົບຫ້ອງຮຽນສາດສະໜາ. ພວກທ່ານຜູ້ເປັນຜູ້ໃຫຍ່ໂສດ ຄວນເອົາຫ້ອງຮຽນທີ່ສະຖາບັນສາດສະໜາຄືກັນ.³ ຖ້າຫາກທ່ານໄປໂຮຽນຮຽນຂອງສາດສະໜາຈັກ, ໃຫ້ທ່ານເອົາຫ້ອງສຳມະນາສຶກສາເລື່ອງສາດສະໜາດ້ວຍ. ໃນໄລຍະແຫ່ງການຕຽມທີ່ສຳຄັນສຳລັບການເຜີຍແຜ່ ຫລື ການແຕ່ງງານນິລັນດອນ, ແລະ ຊີວິດຂອງຜູ້ໃຫຍ່ນີ້, ທ່ານຕ້ອງຊອກຫາວິທີທາງທີ່ຈະຮ່ຳຮຽນ ແລະ ເຕີບໂຕຂຶ້ນເລື້ອຍໆ ແລະ ຮັບເອົາການດົນໃຈ ແລະ ການຊົງນຳຜ່ານທາງພຣະວິນຍານບໍລິສຸດ. ການສຶກສາພຣະກິດຕິຄຸນດ້ວຍການອະທິຖານ ແລະ ຢ່າງລະມັດລະວັງ ຜ່ານສູນສຳມະນາ, ສະຖາບັນ, ຫລື ຫ້ອງຮຽນສຶກສາເລື່ອງສາດສະໜາ ຈະສາມາດຊ່ອຍທ່ານໃນເປົ້າໝາຍນັ້ນໄດ້.

ບໍ່ວ່າທ່ານເຂົ້າໂຮງຮຽນຂອງສາດສະໜາຈັກ ຫລືບໍ່ ກໍຕາມ, ບໍ່ວ່າທ່ານເຂົ້າວິທະຍາໄລ ຫລືບໍ່ ກໍຕາມ, ຢ່າຄິດວ່າ ທ່ານບໍ່ມີເວລາທີ່ຈະສຶກສາພຣະກິດຕິຄຸນ. ສູນສຳມະນາ, ສະຖາບັນ, ຫລື ຫ້ອງຮຽນເລື່ອງສາດສະໜາ ຈະຊ່ອຍທ່ານໃຫ້ຮຽນຮູ້ທາງວິນຍານ ແລະ ເພີ່ມຄວາມຮູ້ທາງໂລກໃຫ້ແກ່ທ່ານດ້ວຍ ໂດຍການໃຫ້ໂອກາດທ່ານໄດ້ໃຊ້ເວລານຳການສຶກສາພຣະຄຳພີ ແລະ ຄຳສອນຂອງສາດສະດາ ແລະ ອັກຄະສາວົກ. ມີຫລັກສູດໃໝ່ທີ່ດີເດັ່ນຢູ່ສີ່ຫ້ອງ ຊຶ່ງຂ້າພະເຈົ້າຢາກຊຸກຍູ້ທ່ານທີ່ເປັນຜູ້ໃຫຍ່ໂສດ ໃຫ້ພິຈາລະນາ ແລະ ໄປຮ່ວມ.⁴

ແລະ ຍັງມີຫ້ອງຮຽນ ແລະ ກິດຈະກຳອື່ນໆອີກ ທີ່ສະຖາບັນໃນທ້ອງຖິ່ນຂອງທ່ານມີບໍລິການ ຫລື ຜ່ານທາງຫວອດ ຫລື ສະເຕກ ຂອງຜູ້ໃຫຍ່ໂສດ ຊຶ່ງເປັນບ່ອນທີ່ທ່ານຈະໄດ້ຢູ່ນຳຊາຍໜຸ່ມ ແລະ ຍິງໜຸ່ມຄົນອື່ນໆ ແລະ ເປັນແຮງດົນໃຈໃຫ້ກັນແລະກັນ ໃນຂະນະທີ່ທ່ານຮຽນຮູ້ ແລະ ເຕີບໂຕທາງວິນຍານ ແລະ ພົບປະສັງສັນ. ອ້າຍນ້ອງທັງຫລາຍ, ຖ້າຫາກທ່ານວາງມືຖືລົງ ແລະ ເບິ່ງຮອບໆຈັກບຶດໜຶ່ງ ບາງທີທ່ານອາດຈະພົບເຫັນຄູ່ນິລັນດອນຂອງທ່ານ ຢູ່ໃນສະຖາບັນນັ້ນ ກໍເປັນໄດ້.

ເພາະເລື່ອງນີ້ ຂ້າພະເຈົ້າຈຶ່ງຂໍແນະນຳຢ່າງໜຶ່ງອີກ ຊຶ່ງທ່ານຄົງຮູ້ແລ້ວວ່າ ແມ່ນກ່ຽວກັບຫຍັງ: ທ່ານທີ່ເປັນຜູ້ໃຫຍ່ໂສດ ຕ້ອງຫາຄູ່ຊີວິດ ແລະ ແຕ່ງງານ. ຢ່າເລື່ອນເວລາ! ຂ້າພະເຈົ້າຮູ້ວ່າ ທ່ານບາງຄົນມີຄວາມຢ້ານກົວທີ່ຈະສ້າງຄອບຄົວ. ເຖິງຢ່າງໃດກໍຕາມ, ຖ້າຫາກທ່ານແຕ່ງງານກັບຄົນທີ່ເໝາະສົມ, ໃນເວລາທີ່ເໝາະສົມ, ແລະ ໃນສະຖານທີ່ ທີ່ເໝາະສົມ, ແລ້ວທ່ານບໍ່ຕ້ອງຢ້ານ. ຕາມຈິງແລ້ວ, ທ່ານຈະສາມາດຫລີກລ້ຽງຈາກບັນຫາຫລາຍຢ່າງ ທີ່ທ່ານປະເຊີນຢູ່ໃນເວລານີ້ ຖ້າຫາກທ່ານມີຄວາມ “ກະຕືລືລົ້ນໃນອຸດົມການດີ” ໃນການຫາຄູ່ຊີວິດ, ຈີບສາວ, ແລະ ແຕ່ງງານໃນທາງທີ່ຊອບທຳ. ຢ່າສົ່ງຂໍ້ຄວາມທາງມືຖືຫາຜູ້ສາວ! ໃຫ້ໃຊ້ສຽງຂອງທ່ານເອງ ເພື່ອແນະນຳຕົວທ່ານກັບທິດາທີ່ຊອບທຳຂອງພຣະເຈົ້າ ທີ່ຢູ່ອ້ອມຮອບທ່ານ. ການໄດ້ຍິນສຽງຄົນ ຈະເຮັດໃຫ້ນາງຕົກຕະລຶງ ແລະ ບາງທີຕອບວ່າ “ໄດ້”.

ບັດນີ້, ອ້າຍນ້ອງທັງຫລາຍ, ຂ້າພະເຈົ້າເປັນພະຍານຕໍ່ທ່ານວ່າ ອົງພຣະເຢຊູຄຣິດເຈົ້າ ສາມາດຊ່ອຍເຫລືອເຮົາ ດັດແປງທຸກສິ່ງ ທີ່ຈຳເປັນຕ້ອງດັດແປງໃນຊີວິດຂອງເຮົາໄດ້ ຜ່ານການເສຍສະລະຊົດໃຊ້ຂອງພຣະອົງ.

ຄ່ຳຄືນນີ້ ເຮົາຕຽມທີ່ຈະສະເຫລີມສະຫລອງວັນອິດສະເຕີ ທີ່ຈະມາເຖິງໃນມື້ອື່ນເຊົ້າ, ຂໍໃຫ້ທ່ານຈົ່ງມິດງຽບນຳຂ້າພະເຈົ້າຈັກບຶດໜຶ່ງ ເພື່ອລະນຶກເຖິງຂອງປະທານແຫ່ງການຊົດໃຊ້ຂອງພຣະຄຣິດ. ຈົ່ງຈື່ຈຳວ່າ ພຣະບິດາເທິງສະຫວັນ ແລະ ພຣະຜູ້ຊ່ອຍໃຫ້ລອດຂອງເຮົາ, ພຣະເຢຊູຄຣິດ, ຮູ້ທ່ານເປັນຢ່າງດີ ແລະ ຮັກທ່ານຫລາຍທີ່ສຸດ.

ຜ່ານການຊົດໃຊ້, ພຣະຜູ້ໄຖ່ໄດ້ຮັບເອົາບັນຫາ, ຄວາມເຈັບປວດ, ແລະ ບາບ ໄວ້ນຳພຣະອົງເອງ. ພຣະຜູ້ຊ່ອຍໃຫ້ລອດຂອງໂລກ ໄດ້ສະເດັດມາ ເພື່ອຈະໄດ້ເຂົ້າໃຈເຮົາແຕ່ລະຄົນ ໂດຍການປະເຊີນກັບຄວາມສິ້ນຫວັງ, ການທ້າທາຍ, ຄວາມເສົ້າສະຫລົດໃຈ ຜ່ານການຮັບທຸກທໍລະມານຢູ່ໃນສວນເຄັດເຊມາເນ ແລະ ຢູ່ເທິງໄມ້ກາງແຂນ.⁵ ພຣະອົງໄດ້ສິ້ນພຣະຊົນ ຊຶ່ງເປັນການກະທຳເທື່ອສຸດທ້າຍດ້ວຍຄວາມຮັກສຳລັບເຮົາ ແລະ ໄດ້ຖືກຝັງໄວ້ໃນອຸບໂມງໃໝ່ ໃນຄ່ຳຄືນທີ່ໜ້າຢ້ານກົວນັ້ນ.

ໃນຕອນເຊົ້າຂອງວັນອາທິດ, ພຣະເຢຊູໄດ້ຟື້ນຄືນພຣະຊົນຈາກຄວາມຕາຍ—ສັນຍາທີ່ຈະໃຫ້ຊີວິດໃໝ່ແກ່ເຮົາແຕ່ລະຄົນ. ພຣະຜູ້ເປັນເຈົ້າທີ່ຟື້ນຄືນພຣະຊົນແລ້ວ ໄດ້ມອບໝາຍສານຸສິດຂອງພຣະອົງ ໃຫ້ສິດສອນທຸກຄົນ ໃຫ້ມີສັດທາໃນພຣະຄຣິດ, ກັບໃຈ, ຮັບບັບຕິສະມາ, ຮັບເອົາຂອງປະທານແຫ່ງພຣະວິນຍານບໍລິສຸດ, ແລະ ອົດທົນຈົນເຖິງທີ່ສຸດ. ອ້າຍນ້ອງທັງຫລາຍ, ເຮົາຮູ້ວ່າ ພຣະເຈົ້າ ພຣະບິດາຂອງເຮົາ ແລະ ພຣະບຸດຂອງພຣະອົງ ໄດ້ມາປະກົດຕໍ່ສາດສະດາໂຈເຊັບ ສະມິດ ແລະ ໄດ້ຟື້ນຟູຄວາມສົມບູນແຫ່ງພຣະກິດຕິຄຸນອັນເປັນນິດ ຂອງພຣະເຢຊູຄຣິດ ຄືນມາໃໝ່.

ຈົ່ງເຂັ້ມແຂງ, ອ້າຍນ້ອງທັງຫລາຍ. ຈົ່ງຮັກສາພຣະບັນຍັດຂອງພຣະເຈົ້າ. ອົງພຣະເຢຊູຄຣິດເຈົ້າ ສັນຍາວ່າ ເຮົາຈະໄດ້ຮັບທຸກສິ່ງທີ່ເຮົາປາດຖະໜາທີ່ຈະເຮັດໃນທາງທີ່ຊອບທຳ. ຜູ້ນຳຂອງສາດສະໜາຈັກມີຄວາມເຊື່ອໝັ້ນໃນຕົວທ່ານ. ພວກເຮົາຕ້ອງການໃຫ້ຜູ້ໃຫຍ່ໂສດທຸກຄົນຕຽມຕົວສຳລັບການແຕ່ງງານ, ຮັບໃຊ້, ແລະ ນຳພາໃນວັນຂ້າງໜ້າ. ຂ້າພະເຈົ້າກ່າວສິ່ງເຫລົ່ານີ້ດ້ວຍຄວາມຖ່ອມຕົນ ໃນພຣະນາມຂອງອົງພຣະເຢຊູຄຣິດເຈົ້າ, ອາແມນ.