O Le Tupulaga Silisili o Talavou Matutua

O se tasi o mea e sili ona ou fiafia i ai a o ou femalagaai i le salafa o le lalolagi, o le avanoa e feiloai ai ma ofoalofa atu i o tatou faifeautalai. O nei alii ma tuafafine faifeautalai e susulu mai ai le Malamalama o Keriso, ma e musuia ai lava au e le aunoa i lo latou alolofa i le Alii o Iesu Keriso ma la latou tautua tuuto atu ia te Ia. O taimi uma lava ou te faatalofa atu ai ia i latou ma lagonaina lo latou agaga ofoofogia ma le faatuatua. Ou te faapea ifo ia te au lava, “O o tatou nei atalii ma afafine ofoofogia, o se vavega moni lava!”

I le sauniga perisitua i le konafesi aoao ia Oketopa 2002, sa ou tuu atu ai se lu’i i epikopo, matua, ma i latou ua tatau ona faamisiona e “sii le fua” mo le auaunaga faafaifeautalai faamisiona.

Ona ou fai atu lea faapea “o le mea ua tatou manaomia … o le tupulaga aupito sili o faifeautalai i le talafaasolopito o le Ekalesia. Ua tatou manaomia faifeautalai agavaa, atamamai, ma malolosi faaleagaga. …

“… Matou te manaomia lou loto atoa ma lou agaga atoa. Matou te manaomia ni faifeautalai malolosi, talitonu, ma naunautai o i latou e iloa ona faalogo ma usitai i musumusuga a le Agaga Paia.”¹

I le tele o ala, ua sili atu ona faigata le lalolagi i ona po nei nai lo le 13 tausaga talu ai. Ua tele atu mea faalavefau ua faasalaveia ai o tatou alii talavou ma tamaitai talavou mai a latou sauniuniga mo se misiona ma se olaga fiafia i le lumanai. Ua matua faateleina le tekinolosi, ma e toetoe e tofu tagata uma ma masini feaveai, ia e mafai ai ona ‘apo maia le gauai a le aiga o le Atua mo mealelei sili faapea foi mealeaga tele.

O le po nei ou te tautala atu i faifeautalai o loo galulue i le taimi nei, o faifeautalai i le lumanai, o faifeautalai ua foi mai, ma alii talavou matutua uma o le Ekalesia. Ou te tatalo ia outou malamalama ma mafaufau ma loto atoa i mea o le a ou tautala atu ai ia te outou, a o outou faimalaga ai i nei tausaga sagisagi ma tausaga faigata foi o o outou olaga.

I le popofou o le Ekalesia, sa faatalanoaina e se Pulega Aoao ia faifeautalai a o lei malaga atu ia latou misiona. O aso nei ua faatalanoaina outou e galulue o ni faifeautalai, e o outou epikopo ma peresitene o siteki, ma o le toatele lava o outou o le a gasolo o outou olaga atoa e aunoa ma le faatalanoaina e se Pulega Aoao. Ua na o se ata lena o le tulaga moni o se ekalesia i le lalolagi atoa e silia ma le 15 miliona tagata. Ua ou iloa ou te tautala mo o’u uso, pe a ou fai atu ia te outou ua matou moomoo pe ana mafai e i matou, ona iloa patino outou uma ma mafai ona ta’u atu ia te outou matou te alolofa ia te outou ma e matou te lagolagoina outou.

O le mea e lelei ai, ua saunia e le Alii ia auala matou te aapa atu ai ia te outou. Mo se faataitaiga, o se uso o le Korama a le Toasefululua e tofia faifeautalai uma i lana misiona. E ui ina faia lenei mea e aunoa ma se faatalanoaga faafesagai, ae e soofaatasi le tekinolosi ma faaaliga e maua ai se poto masani lea e matua ofoofogia le maioio ma patino. Sei ou faamatala atu le ala e tupu ai lenei mea.

E oso mai i luga o le lau o le komepiuta lou ata, faatasi ai ma faamatalaga autu e aumai i lou epikopo ma le peresitene o le siteki. A oo mai la lou ata, matou te tilotilo i ou mata ma iloilo au tali i fesili o le talosaga a le faifeautalai. O lena taimi puupuu, e foliga mai o loo e nofo mai ma tali sa’o mai ia i matou.

A o matou tilotilo atu i lou ata, matou te talitonu ua e ausia i ona itu uma le “fua ua sii” o loo manaomia i le taimi nei e avea ai o se faifeautalai faamaoni, faamanuiaina. Ona matou tofia lea o oe e ala i le mana o le Agaga o le Alii ma i lalo o le taitaiga a Peresitene Thomas S. Monson, i se tasi o misiona e 406 a le Ekalesia i le salafa o le lalolagi.

Leai, e le tutusa ma se faatalanoaga patino, e faafesagai. Ae e lalata lava i ai.

O konafesi faavitio o se tasi lea o auala e fesoasoani ia i matou e fesootai atu i taitai o le Ekalesia ma tagata o le au paia o e paau mamao mai le laumua o le Ekalesia.

O le mafaufau i lena mea, ou te manao ai ia te outou na o loo sauniuni e faamisiona, i latou ua foi mai, ma outou uma talavou matutua, e faaalu ni nai minute faatasi ma au, faapea o lea e fai le tatou talatalanoaga patino faavitio i le taimi nei. Faamolemole tilotilo mai ia te au mo ni nai minute faapea e na o oe lava ma au i le potu, i soo se mea lava na e te i ai i le po nei.

O a’u, o le a ou manatu faapea o loo ou tilotilo atu i ou mata ma faalogologo ma le toto’a i au tali i nai fesili, ia ou te talitonu o le a ta’u mai ai ia te au ni mea se tele e uiga i le loloto o lau molimau, ma lou tuuto atu i le Atua. Afai e mafai ona ou toe faaupuina mea sa ou tautala atu ai i faifeautalai i le 13 tausaga talu ai, o le mea ua tatou manaomia nei o le tupulaga silisili o talavou matutua i le talafaasolopito o le Ekalesia. Ua matou manaomia lou loto atoa ma lou agaga atoa. Ua matou manaomia ni talavou matutua malolosi, talitonu, ma naunautai o e iloa pe faapefea ona faalogo ma tali atu i musumusuga a le Agaga Paia a o outou asa atu i tofotofoga ma faaosoosoga o le avea ai ma se talavou, o le Au Paia o Aso e Gata Ai i le taimi nei.

I se isi faaupuga, ua oo i le taimi e sii ai le fua e le gata i faifeautalai ae faapea foi i faifeautalai ua foi mai, ma la outou tupulaga atoa. O le mea lea, faamolemole ia manatunatu loloto i lou loto ma tali mai i fesili nei:

1. Pe o e sailiili e le aunoa i tusitusiga paia?

2. Pe o e tootuli ma tatalo e talanoa atu ai i lou Tama Faalelagi i taeao ma po taitasi?

3. Pe o e anapogi ma foai atu i le taulaga anapogi i masina taitasi—tusa lava pe o oe o se tagata aoao o loo tauivi, e mativa, e le gafatia ona foai atu se tupe tele?

4. Pe o e mafaufau loloto e uiga i le Faaola ma Lana taulaga togiola mo oe ina ua talosagaina oe e saunia, faamanuia, tufa, pe ai ma inu i le faamanatuga?

5. Pe o e auai i au fonotaga ma taumafai e tausia le paia o le aso Sapati?

6. Pe o e faamaoni i le fale, aoga, lotu, ma le galuega?

7. Pe o e mama faalemafaufau ma faaleagaga? Pe o e aloese mai le matamata i ponokalafi po o le tilotilo i uepisaite, mekasini, atatifaga, po o polokalama e aofia ai le Tinder ma le atapue o le Snapchat, ia e te maasiasi ai pe a vaai i ai ou matua, taitai o le Ekalesia, po o le Faaola lava Ia?

8. Pe o e faaeteete ea i ou taimi—aloese i tekinolosi ma faasalalauga faaagafesootai e le talafeagai, e aofia ai taaloga vitio, ia e mafai ona faapogisa ai lou nofouta faaleagaga?

9. E i ai ea se mea i lou olaga e manaomia ona e suia ma faaleleia, e amata atu i le po nei?

Faafetai atu mo lenei talanoaga patino puupuu. Ou te faamoemoe sa taliina nei fesili taitasi ma le faamaoni ma le mafaufau lelei i ai. Afai ua e iloa e i ai se tasi o nei mataupu faavae faigofie e te le o faia, ona ou uunaia lea o oe ia salamo ma le lototoa, ae ia e ola e tusa ai ma tulaga faatonuina o le talalelei o le avea ai ma soo amiotonu.

O lenei uso e, pe mafai ona ou tuuina atu ni nai fautuaga faaopoopo o le a fesoasoani tou te maua ai a outou molimau i le talalelei, ia oo ifo i o outou loto ma agaga?

Ou te faamanatu atu ia te outou faifeautalai ua foi mai, e ao lava ina faaauau pea la outou tapenapenaga mo le olaga ma mo se aiga. O le “RM” e le o se “Ritaea Mamona”! O le avea ai o se faifeautalai ua foi mai, ia outou “auai ma le naunautai i se faamoemoega lelei, ma fai mea e tele i lo [outou] lava loto malie, ma aumai le amiotonu tele.”²

Faamolemole ia faaaoga tomai sa outou aoaoina mai a outou misiona e faamanuia ai olaga o tagata o siomia ai outou i aso uma. Aua nei fetuuna’ia lau taulaiga mai le auauna atu i isi i le taulai atu na o le aoga, galuega, po o gaoioiga faaagafesootai. Ae, ia faapaleni lou olaga ma aafiaga faaleagaga ia e faamanatu ma saunia ai oe mo le auaunaga i aso taitasi mo isi.

I le taimi o a outou misiona sa outou aoaoina ai le taua o le asiasi atu i tagata i o latou fale. Ou te faamoemoe i o tatou talavou matutua uma, pe na faamisiona talai pe leai, ua malamalama i le taua o le asiasi atu i tagata ua tuuatoatasi, mama’i, pe ua lotovaivai—e le gata o se tiute ua tofia i ai ae ona o le alofa moni foi ua ia te oe mo le Tama Faalelagi ma Ana fanau.

O outou o i aoga maualuga o loo sauniuni mo misiona, ou te fautuaina outou ia auai i le seminare ma ia faauu mai ai. O outou talavou matutua ua tatau ona lesitala i se inisitituti o mataupu faalelotu.³ Afai o e a’oga i se aoga a le Ekalesia, ia e auai e le aunoa i se vasega o aoaoga faalelotu i semesa taitasi. I le taimi o lenei vaitau taua o sauniuniga mo se misiona, faaipoipoga e faavavau, ma le olaga o se tagata matua, e tatau ona e sailia pea lava pea auala e aoao ai ma tuputupu ae ai ma mauaina musumusuga ma le taiala e ala i le Agaga Paia. E mafai ona fesoasoani ia te oe mo lena sini se suesue toto’a ma le agaga tatalo i le talalelei e ala i le seminare, inisitituti, po o vasega faalelotu i aoga.

Pe o e aoga i aoga a le Ekalesia pe leai, pe o e alu i le iunivesite pe leai, aua lava nei e manatu ua e pisi tele e le mafai ai ona suesue i le talalelei. O le seminare, inisitituti, po o vasega faalelotu, o le a maua ai le paleni o lou olaga ma faaopoopo atu ai i le aotauina o oe i le poto salalau, e ala i le tuuina atu ia te oe o se isi avanoa e faaalu ai se taimi e suesue ai tusitusiga paia ma aoaoga a perofeta ma aposetolo. E fa ia kosi fou lelei tele ou te fautuaina talavou matutua uma e maimoa i ai ma ia auai.⁴

Ma aua nei galo o vasega ma gaoioiga o loo ofo atu i la outou inisitituti i le lotoifale, pe auala atu foi i le uarota a le autalavou matutua nofofua po o le siteki, o se nofoaga foi lena e mafai ai ona outou mafuta ai ma isi alii ma tamaitai talavou ma siitia ai ma musuia e le tasi le isi a o outou aoao ma tuputupu ae faaleagaga ma mafuta faaagafesootai ai. Uso e, afai e te tuu ese lau telefoni feaveai ae tilotilo solo teisi, atonu o le a e maua ai foi lau soa faavavau o le lumanai i le inisitituti.

Ua tata’i atu ai foi au i se isi fautuaga itiiti lea ou te talitonu ua outou iloa o le a ou talanoaina: Outou na talavou matutua nofofua ua manaomia ona tafafao faamasani ma faaipoipo. Faamolemole soia le faatuatuai! Ua ou iloa o nisi o outou e fefefe e amata se aiga. Peitai, afai e te faaipoipo i le tagata sa’o i le taimi sa’o ma i le nofoaga sa’o, e le tatau ona e fefe. O le mea moni, e tele faafitauli tou te feagai o le a aloese mai ai pe afai tou te “auai ma le naunautai” i tafaoga faamasani amiotonu, faamau, ma le faaipoipoga. Aua e te tesi i ai! Faaaoga lou lava leo e faailoa atu ai oe lava i afafine amiotonu o le Atua o loo siomia ai outou. O le faalogoina moni o se leo o se tagata soifua, o le a te’i ai o ia—masalo ma fai mai ai ioe.

Ia, uso e, ou te molimau atu ia te outou e mafai e le Alii o Iesu Keriso ona fesoasoani ia i tatou e faaleleia soo se mea e manaomia ona faaleleia i o tatou olaga e ala i Lana taulaga togiola.

O le afiafi nei, a o tatou sauniuni atu e faamanatu le Aso Sa o le Eseta a taeao, faamolemole mapu ane faatasi ma au, ia manatua le meaalofa o le togiola a Keriso. Manatua e sili le silafia o oe e lo tatou Tama Faalelagi ma lo tatou Faaola, o Iesu Keriso, ma e sili foi ona alolofa ia te oe.

E ala i le Togiola, na tauaveina ai e le Faaola lava Ia o tatou faaletonu, o tiga, ma agasala. Na afio mai le Faaola o le lalolagi ia malamalama ia i tatou taitoatasi e ala i le aafia i o tatou faamoemoega ua faataumaoia, o luitau, ma mala e ala i Ona mafatiaga i Ketesemane ma luga o le satauro.⁵ Sa maliu o Ia e avea o se faatinoga faaiu e tasi o le alofa mo i tatou ma sa tanumia i se tuugamau fou i lena po matautia.

I le taeao o le Aso Sa, sa toetu mai Iesu mai le oti—ma se folafolaga o le ola fou mo i tatou taitoatasi. Ona poloaiina lea e le Alii toetu Ona soo e aoao tagata uma ia faatuatua ia Keriso, ia salamo mai agasala, ia papatiso, ia maua le meaalofa o le Agaga Paia, ma ia tumau e oo i le iuga. Uso e, ua tatou iloa na faaali atu le Atua lo tatou Tama ma Lona Alo Pele i le Perofeta o Iosefa Samita ma toefuatai ai e ala atu ia te ia le atoaga o le talalelei e faavavau a Iesu Keriso.

Ia lototetele, uso e. Tausi i poloaiga a le Atua. Ua folafola mai e le Alii o Iesu Keriso o mea uma tatou te mananao e fai i le amiotonu, o le a fai ia mo i tatou. O loo faalagolago atu taitai o le Ekalesia ia te outou. Matou te manaomia outou uma taitoatasi o talavou matutua e sauniuni e faaipoipo, e auauna atu, ma taitai i aso o i luma, ou te tatalo ai ma le faamaulalo i le suafa o lo tatou Alii o Iesu Keriso, amene.