2010–2019
Tus Tswv Yog Qhov Kaj
April 2015


Tus Tswv Yog Qhov Kaj

Peb txoj kev muaj peev xwm sawv ruaj khov kho thiab ua raws li tus Cawm Seej txawm txhua yam hloov hauv peb lub neej los yuav txais dag zog los ntawm tsev neeg ncaj ncees thiab kev koom siab nrog Yexus Khetos nyob hauv peb pawg ntseeg thiab ceg ntseeg.

Thaum lub caij Easter no peb xav txog thiab zoo siab txog tus Cawm Seej, Yexus Khetos, txoj kev txhiv dim.1

Tej kev ntxhov hnyo uas nyob thoob plaws lub ntiaj teb vim tib neeg ntiaj teb ua kev phem yeej ua rau peb ntshai. Vim muaj tej kev sib tham niaj hnub no, qhov uas muaj kev phem thiab kev tsis sib txig ua rau ntau tus neeg xav tias peb lub neej yeej tsis ncaj. Txawm tej kev sim siab no yeej nyuaj heev los, tej no yuav tsum tsis txhob pauv peb txoj kev xyiv fab vim Yexus Khetos theej peb lub txhoj. Tus Cawm Seej tau “kov yeej txoj kev tuag” tiag tiag. Nrog kev muaj siab hlub thiab kev khuv leej Nws ris peb sawv daws lub txim thiab tej kev txhaum, yog li ntawd nws txhiv peb dim thiab ua raws li kev ncaj ncees rau tag nrho cov uas hloov siab lees txim thiab ntseeg Nws lub npe.2

Nws txoj kev theej txhoj tseem ceeb tshaj qhov tib neeg to taub. Qhov kev tshav ntuj no ua rau peb txais tau kev kaj siab lug ntau tshaj qhov peb to taub.3

Yog li ntawd, peb thiaj yuav ua li cas rau tej kev ntxhov hnyo nyob ib puag ncig peb?

Daim Duab
Some yellow flowers on a mound of dirt.

Kuv tus poj niam, Mary, yeej ib txwm nyiam paj noob hli. Nws zoo siab thaum twg nws pom paj noob hli loj tuaj hauv ib qho chaw uas tsis zoo rau cov paj no loj tuaj. Muaj ib txoj kev av uas mus rau lub tsev uas kuv yawg thiab pog nyob. Thaum wb taug txoj kev ntawd, Mary tau tshaj tawm hais tias, “Koj puas xav tias wb yuav pom cov paj noob hli hnub no?” Wb xav tsis thoob uas cov paj noob hli yuav loj hlob hauv cov av uas raug tej lub tshuab tshem snow thiab lub tshuab ua liaj ua teb thiab tau tso tej yam rau uas tsis zoo rau cov paj loj hlob tuaj.

Daim Duab
Yellow flowers by some water

Ib qhov zoo txog cov paj noob hli thaum hluas, ntxiv rau qhov uas cov paj no txawj loj hlob hauv cov av uas tsis zoo, yog qhov uas cov kaus raws lub hnub. Vim li ntawd, cov kaus txais dag zog ua ntej tawg paj xim daj.

Ib yam li cov paj noob hli hluas, thaum peb raws tus Cawm Seej ntawm lub ntiaj teb, Vajtswv Leej Tub, peb vam meej thiab txais lub yeeb koob txawm muaj xwm txheej uas nyob ib puag ncig peb. Nws yog peb txoj kev kaj thiab txoj sia tiag tiag.

Nyob hauv zaj lus piv txwv txog cov nplej thiab cov txhauv, tus Cawm Seej hais rau Nws cov thwj tim hais tias cov uas tu siab thiab ua phem yuav raug tshem tawm ntawm Nws lub nceeg vaj.4 Tiam sis hais txog cov rau siab ntseeg, Nws hais tias, “Thaum ntawd cov neeg ncaj ncees yuav ci tuaj nyob rau hauv Vajtswv lub nceeg vaj.”5 Vim peb yog Yexus Khetos cov thwj tim uas ua neej hauv ib lub ntiaj teb uas ntxhov hnyo, peb yuav loj hlob thiab tawg paj txi txiv yog peb cov cag nyob tob tob rau hauv tus Cawm Seej txoj kev hlub thiab peb txo hwj chim ua raws li Nws tej lus qhia.

Peb txoj kev muaj peev xwm sawv ruaj khov kho thiab ua raws li tus Cawm Seej txawm txhua yam hloov hauv peb lub neej los yuav txais dag zog los ntawm tsev neeg ncaj ncees thiab kev koom siab nrog Yexus Khetos nyob hauv peb pawg ntseeg thiab ceg ntseeg.6

Lub Sij Hawm Yog tom Tsev

Ib tsev neeg lub luag hauj lwm hauv Vajtswv txoj hau kev yog “kom peb muaj kev zoo siab, pab peb kawm tej ntsiab cai yog nrog kev hlub, thiab npaj peb txais tau txoj sia nyob mus ib txhis.”7 Cov kab ke ntawm kev teev ntuj hauv tsev yuav tsum nyob hauv peb cov me nyuam lub siab.

Kuv tus dab laug Vaughn Roberts Kimball yog ib tug tub kawm ntawv zoo, ib tus kws sau ntawv, thiab ib tug quarterback uas ncaws pob ntawm BYU. Thaum lub Kaum Ob Hlis Ntuj hnub tim 8, 1941, ib hnub tom qab Pearl Harbor raug tawm tsam, nws sau npe mus rau hauv lub Teb Chaws Amelikas Pawg Tub Rog Caij Nkoj. Thaum lawv txib nws mus nrhiav neeg koom tes nyob hauv Albany, New York, nws xa ib zaj rau Reader’s Digest. Phau xov xwm ntawv them $200 rau nws thiab muab nws zaj luam tawm hu ua “Lub Sij Hawm Yog tom Tsev”nyob rau hauv phau lub Tsib Hlis Ntuj xyoo 1944.

Zaj uas nws sau rau Reader’s Digest, nws sau zoo li nws yog ib tug kws tsav nkoj, hais li no:

“Lub Sij Hawm Yog tom Tsev:

“Muaj ib hmo nyob hauv Albany, New York, kuv nug ib tug kws tsav nkoj seb yog pes tsawg moos. Nws rho ib lub moos loj tawm ntawm nws hnab ris thiab teb hais tias, ‘Yog 7:20.’ Kuv paub tsis yog lub sij hawm ntawd. Kuv nug hais tias, ‘Koj lub moos nres lawm, puas yog?’

“Nws hais tias, ‘Tsis tau nres. Kuv tseem siv Mountain Standard Time. Kuv tuaj Utah sab qab teb tuaj. Thaum kuv koom pawg tub rog caij nkoj, Txiv muab lub moos no rau kuv. Nws hais tias lub moos no yuav pab kuv nco txog kuv tsev neeg.

“‘Thaum kuv lub moos hais tias yog 5 moos sawv ntxov, kuv paub kuv Txiv tab tom mus tso mis nyuj. Thiab txhua hmo thaum lub moos hais tias yog 7:30 kuv paub tias kuv tsev neeg zaum ntawm peb lub rooj, thiab Txiv ua Vajtswv tsaug rau cov zaub mov thiab thov kom Nws saib xyuas kuv …, Yooj yim rau kuv paub tias yog pes tsawg moos hauv txhua qhov chaw kuv nyob. Qhov kuv xav paub yog pes tsawg moos nyob hauv Utah.’”8

Tsis ntev tom qab nws sau zaj no, Vaughn raug txib mus ua hauj lwm nyob hauv Dej Hiav Txwv Pacific. Thaum lub Tsib Hlis Ntuj hnub tim 11, 1945, thaum nws ua hauj lwm hauv lub nkoj USS Bunker Hill nyob ze Okinawa, nws lub nkoj raug puas tsuaj thaum ob tug tsav nyab hoom txhob txwm tua nkawd tus kheej.9 Yuav luag 400 tus neeg tuag, tsis hais kuv tus dab laug Vaughn los yog.

Txwj Laug Spencer W. Kimball hais tias nws pab Vaughn txiv tu siab, qhia hais tias Vaughn tsim nyog thiab tus Tswv hais tias cov uas tuag rau ntawm tus Tswv yuav tsis saj txoj kev tuag, vim txoj kev tuag yuav qab zib rau lawv.10 Vaughn txiv hais tias txawm Vaughn raug tuag hauv dej hiav txwv lawm los, Vajtswv yuav coj Vaughn mus rau nws lub tsev saum ntuj ceeb tsheej.11

Nees nkaum yim xyoo tom qab ntawd, Thawj Tswj Hwm Spencer W. Kimball hais txog Vaughn nyob hauv lub tuam rooj sab laj. Nws hais tias: “Kuv tau paub tsev neeg no zoo. … Kuv tau thov Vajtswv nrog [lawv]. … Kev qhuab qhia tom tsev twb pab kom tsev neeg loj no tau koob hmoov nyob mus ib txhis.” Thawj Tswj Hwm Kimball hais kom txhua tsev neeg “txhos caug … thiab thov Vajtswv rau lawv cov tub thiab ntxhais ob zaug txhua hnub.”12

Cov kwv tij thiab cov muam, yog peb rau siab muaj tsev neeg kev thov Vajtswv, kawm vaj lug kub, tsev neeg hmo ua ke, cov koob hmoov pov thawj hwj, thiab kev hwm Hnub Caiv, peb cov me nyuam yuav paub tias yog pes tsawg moos nyob hauv tsev. Lawv yuav npaj muaj ib lub tsev saum ntuj ceeb tsheej, tsis hais lawv raug xwm txheej nyob hauv ib lub ntiaj teb nyuaj no. Yeej yog ib qho tseem ceeb uas peb cov me nyuam paub tias peb hlub lawv thiab lawv yeej nyab xeeb nyob hauv tsev.

Cov txiv tsev thiab niam tsev nyob sib txig.13 Lawv muaj tej hauj lwm sib txawv tiam sis lawv ib leeg pab ib leeg. Tus poj niam yug me nyuam, uas foom koob hmoov rau tag nrho nws tsev neeg. Tus txiv txais lub pov thawj hwj, uas foom koob hmoov rau tag nrho nws tsev neeg. Tiam sis nyob hauv tsev neeg kev sib sab laj, cov niam tsev thiab txiv tsev, vim lawv sib txig, txiav txim siab txog tej yam tseem ceeb. Lawv txiav txim siab tias yuav qhuab qhia cov me nyuam li cas, yuav siv nyiaj li cas, lawv yuav nyob qhov twg, thiab lwm yam kev txiav txim siab hauv lawv tsev neeg. Lawv txiav txim siab ua ke tom qab lawv thov tus Tswv. Lub hom phiaj yog ib tsev neeg nyob mus ib txhis.

Yexus Khetos txoj Kev Kaj ua rau tag nrho Nws cov me nyuam to taub hais tias yus tsev neeg nyob tau mus ib txhis li. Ib tug kws sau ntawv uas kuv nyiam, nws tsis ntseeg li peb, hais tias: “Muaj ntau yam hauv lub neej no uas yeej ploj tau, [tiam sis] … tsev neeg yog qhov uas muaj tiag tiag, qhov tseem ceeb, qhov uas yuav nyob mus ib txhis; yog qhov uas nej yuav tsum saib xyuas thiab tu thiab ua ncaj ncees rau.”14

Lub Koom Txoos Pab Peb Koom Siab Tsom Ntsoov rau tus Cawm Seej

Nrog rau tsev neeg, lub Koom Txoos lub luag hauj lwm kuj tseem ceeb thiab. Lub Koom Txoos yog lub koom haum thiab yog txoj kev qhia Yexus Khetos txoj moo zoo rau Vajtswv cov me nyuam tag nrho. Lub Koom Txoos muab txoj cai pov thawj hwj kom qhia kab ke cawm seej thiab kev tsa nto rau tag nrho cov uas tsim nyog thiab txaus siab txais cov kab ke ntawd.15

Nyob hauv lub ntiaj teb muaj kev sib cav sib ceg thiab kev ua phem thiab kev tsom ntsoov rau tej kab lig kev cai txawv thiab kev tsis sib txig. Nyob hauv lub Koom Txoos, tshuav tej pawg uas hais yam lus txawv, peb pawg ntseeg thiab ceg ntseeg sib cais raws li tej cheeb tsam xwb. Peb tsis muab neeg cais rau tej theem.16 Peb zoo siab uas txhua haiv neeg thiab kab lig kev cai los sib xyaw ua ib pawg ntseeg ncaj ncees loj heev. Peb pawg ntseeg yeej tseem ceeb rau peb txoj kev vam meej, kev zoo siab, thiab kev siv zog rais los ua neeg zoo li Yexus Khetos.

Ntshe tej lub sij hawm tej haiv neeg txoj kab lig kev cai ua rau tib neeg sib ntxub thiab ua lim hiam.17 Nyob hauv Phau Ntawv Maumoos muaj tej lus nyuaj siab uas piav txog cov yawg koob tej kab lig kev cai uas ua rau cov neeg ua lim hiam, ua tsov ua rog, ua phem, thiab ua rau cov neeg thiab tej lub teb chaws raug puas tsuaj.18

Tsis muaj ib qho zoo dua li 4 Nifais uas piav txog lub Koom Txoos kab lig kev cai uas tseem ceeb rau peb txhua tus. Nqe 2 hais tias, “Cov neeg tag nrho tau hloov siab tshiab los rau tus Tswv, thoob plaws rau saum thaj av, cov Neeg Nifais thiab cov Neeg Lamas, thiab tsis muaj tej kev sib cav thiab tej kev sib ceg nyob hauv lawv, thiab txhua tus neeg tau ua ncaj ib tug nrog rau lwm tus.” Nyob hauv nqe 16 peb nyeem hais tias, “Thiab tseeb tiag tsis tau muaj ib co neeg ua zoo siab tshaj nyob hauv tag nrho cov neeg uas … Vajtswv txhais tes [tau tsim].” Tsis muaj kev sib cav sib ceg nyob rau hauv thaj av vim yog “Vajtswv txoj kev hlub uas tau nyob hauv cov neeg tej siab.”19 Peb xav muaj kab lig kev cai zoo li no.

Peb tej kab lig kev cai yeej yog lub ntsiab ntawm peb haiv neeg. Yuav tsum saib xyuas tej kab lig kev cai ntawm kev txi, kev ris txiaj, kev ntseeg, thiab kev ncaj ncees. Peb tej tsev neeg yuav tsum txhawb nqa tej kab lig kev cai uas txhawb nqa peb txoj kev ntseeg.20

Ib qho tseem ceeb ntawm ib haiv neeg yog lawv yam lus. Thaum kuv nyob hauv cheeb tsam San Francisco, California, muaj xya pawg uas hais tej yam lus txawv. Peb cov lus qhuab qhia txog tib neeg tej yam lus los muaj nyob hauv tshooj 90, nqe 11 ntawm phau Lus Qhuab Qhia thiab Kev Khi Lus uas hais tias thaum hnub ntawd, txhua tus neeg yuav hnov txoj moo zoo txhij txhua los ntawm nws yam lus hais, thiab los ntawm nws yam lus.

Thaum Vajtswv cov me nyuam siv lawv yam lus thov Nws, nov yog yam lus ntawm lawv lub siab. Peb paub meej heev hais tias txhua tus neeg saib lawv yam lus ntawm lawv lub siab rau nqi.

Kuv tus tij laug, Joseph, yog ib tug kws kho mob thiab nws nyob hauv qhov chaw San Francisco Bay. Ib tug mej zeej laus uas yog Neeg Samoan, yog ib tug neeg mob uas tuaj rau nws lub hoob kas. Nws raug mob sab heev. Twb kawm hais tias nws muaj mob txeeb zis thiab lawv twb pab kho nws tus mob zoo. Tus mej zeej qhia hais tias nws xav to taub tias muaj mob li cas nws thiaj thov tau lus Samoan rau nws Leej Txiv Saum Ntuj Ceeb Tsheej txog nws qhov teeb meem.

Yeej yog ib qho tseem ceeb rau cov mej zeej to taub txoj moo zoo raws li yam lus ntawm lawv lub siab lawv thiaj yuav thov Vajtswv thiab ua raws li txoj moo zoo cov ntsiab cai.21

Txawm yog muaj ntau yam lus thiab cov kab lig kev cai zoo heev los, peb kuj yuav tsum koom siab koom ntsws thiab muaj kev hlub.22 Tus Tswv tau hais kom txhua tus neeg suav nws tus kwv tij yam li yog nws tus kheej. Thiab nws hais kom peb ua ib lub siab; thiab yog peb tsis ua ib lub siab ces peb tsis yog Nws li.23 Peb saib tej neeg tej kab lig kev cai tsim nyog rau nqi, tiam sis peb lub hom phiaj yog kev koom siab muaj kab lig kev cai thiab kab ke los ntawm Yexus Khetos txoj moo zoo.

Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg Yeej Ib Txwm Tsis Tau Muaj Zog Npaum Li Muaj Tam Sim No

Peb paub tias tej tug mej zeej muaj lus nug thiab tej kev txhawj thaum lawv xav ntxiv dag zog rau lawv txoj kev ntseeg thiab zaj lus tim khawv. Peb yuav tsum ua tib zoo tsis txhob cem los yog txiav txim rau cov uas txhawj—tsis hais qhov loj los yog qhov me los yog. Tiam sis, cov uas muaj lus nug yuav tsum ua txhua yam lawv ua tau kom ntxiv dag zog rau lawv txoj kev ntseeg thiab zaj lus tim khawv. Kev ua siab ntev thiab txo hwj chim kawm, xav, thov Vajtswv, ua raws li txoj moo zoo tej ntsiab cai, thiab sib tham nrog cov thawj coj yog tej kev zoo tshaj plaws kom kho tej teeb meem los sis tej lus nug.

Ib txhia hais tias niaj hnub no cov mej zeej tso lub Koom Txoos tseg ntau tshaj yav tas los thiab muaj kev ua xyem xyav thiab kev tsis ntseeg tshaj yav tas los. Qhov no tsis muaj tseeb hlo li. Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yeej ib txwm tsis tau muaj zog npaum li muaj tam sim no. Cov mej zeej uas tshem lawv tej npe tawm ntawm lub Koom Txoos cov ceev xwm txheej yeej ib txwm muaj tsawg tsawg thiab ob peb xyoos tas los twb tsawg dua li yav tas los.24 Tej yam uas ntsuas tau xws li cov mej zeej uas muaj daim ntawv nkag tuam tsev, cov neeg laus uas them ib feem kaum tag nrho, thiab cov uas ua tub txib, mas muaj ntau heev dua li yav tas los. Cia kuv rov hais dua, lub Koom Txoos yeej ib txwm tsis tau muaj zog npaum li muaj tam sim no. Tiam sis nco ntsoov tias neeg tej ntsuj plig muaj nqis heev rau Vajtswv.25 Peb ncav tes xav pab txhua tus.

Yog tias tej teeb meem uas nej raug tam sim no zoo li tsaus ntuj thiab yog tej nra hnyav thiab ua rau nej nyiaj tsis tau, cia li nco ntsoov tias tus Cawm Seej theej peb lub txhoj thaum nws raug txom nyem hauv lub vaj Khexemanes thiab raug tsim txom thiab raug mob saum lub Roob Khauj Khaum Taub Hau, es Nws thiaj ris tau nej tej nra hnyav tshaj plaws nyob hauv nej lub neej. Nws tau ua li no rau nej, thiab Nws tau ua li no rau kuv. Nws ua li no vim Nws hlub peb thiab vim Nws ua raws li thiab hlub Nws Leej Txiv. Nws yuav cawm peb dim kev tuag—txawm peb nyob tob rau hauv dej hiav txwv.

Tej yam uas pov hwm peb hauv lub neej no thiab nyob mus ib txhis yog peb tsev neeg txoj kev ncaj ncees, lub Koom Txoos cov kab ke, thiab kev ua raws li tus Cawm Seej. Tej no tiv thaiv peb thaum muaj cua daj cua dub. Rau nej cov uas xav tias nej nyob ib leeg, nej yuav sawv ruaj khov kho nrog kev ncaj ncees thiab paub tias txoj Kev Theej Txhoj yuav pov hwm thiab foom koob hmoov rau nej tshaj qhov nej to taub.

Peb yuav tsum nco ntsoov tus Cawm Seej, ua raws li peb tej kev khi lus, thiab coj raws li Vajtswv Leej Tub ib yam li lub paj noob hli raws lub hnub. Yog peb ua raws li Nws txoj kev kaj thiab tus yam ntxwv ces qhov no yuav pab peb muaj kev xyiv fab, kev zoo siab, thiab kev kaj siab lug. Ib yam li Phau Ntawv Nkauj tshooj 27 thiab ib zaj nkauj qhuas Vajtswv hais, “Tus Tswv yog lub teeb rau kuv pom kev thiab yog kuv tus cawm seej.”26

Thaum lub caij Easter no, vim kuv yog tus Cawm Seej ib tug Thwj Tim, kuv ua tim khawv txog Yexus Khetos txoj Kev Sawv Rov Los. Kuv paub tias Nws muaj txoj sia nyob. Kuv paub Nws lub suab. Kuv ua tim khawv txog Nws los saum ntuj los thiab txoj Kev Theej Txhoj, los ntawm Yexus Khetos lub npe, amees.

Lus Cim

  1. Saib 2 Nifais 9:20–22.

  2. Saib Mauxiyas 15:8–9.

  3. Saib Filipis 4:7.

  4. Saib Mathais 13:41.

  5. Mathais 13:43.

  6. Saib Lus Qhuab Qhia thiab Kev Khi Lus 115:5–6.

  7. Handbook 2: Administering the Church (2010), 1.1.4.

  8. Vaughn R. Kimball, “The Right Time at Home,” Reader’s Digest, Tsib Hlis Ntuj 1944, 43.

  9. Letter from Captain G. A. Seitz, Captain, U.S. Navy, USS Bunker Hill, tau sau Tsib Hlis Ntuj 25, 1945, rau Vaughn Kimball txiv, Crozier Kimball, Draper, Utah.

  10. Saib tsab ntawv los ntawm Spencer W. Kimball, sau Rau Hli Ntuj 2, 1945, rau Crozier Kimball; Lus Qhuab Qhia thiab Kev Khi Lus 42:46.

  11. Saib Crozier Kimball, nyob hauv Marva Jeanne Kimball Pedersen, Vaughn Roberts Kimball: A Memorial (1995), 53.

  12. Spencer W. Kimball, “The Family Influence,” Ensign, Xya Hli Ntuj 1973, 17. Thaum ntawd Spencer W. Kimball yog tus Thawj Tswj Hwm ntawm Pawg Kaum Ob tug Thwj Tim.

  13. Saib “Tsev Neeg: Ib Zaj Lus Tshaj Tawm rau lub Ntiaj Teb,” Ensign los sis Liahona, Kaum Ib Hlis Ntuj 2010, 129.

  14. Carla Carlisle, “Pray, Love, Remember,” Country Life, Cuaj Hlis Ntuj 29, 2010, 120.

  15. Handbook 2, 1.1.5.

  16. Saib 4 Nifais 1:26.

  17. Niaj hnub no tib neeg hais txog kab lig kev cai ntau heev. Rau xyoo 2014 lo lus kab lig kev cai yog lo lus ntawm xyoo 2014 raws li Merrian-Webster.com hais.

  18. Saib Amas 9; Hilamas 5.

  19. 4 Nifais 1:15.

  20. Tus Yelemes Goethe sau ntawv hais tias, “Nej tau dab tsi los ntawm nej leej txiv cuab yeej cuab tam, ua neej tsim nyog kom txais tau, thiaj muaj tiag tiag!” (Johann Wolfgang von Goethe, Faust, tus txhais yog Bayard Taylor [1912], 1:28).

  21. Yog vim li no lub Koom Txoos thiaj tshaj tawm txoj moo zoo ua 50 yam lus thiab txhais Phau Ntawv Maumoos ua 110 yam lus. Tiam sis, ib qho teeb meem uas muaj nyob thoob plaws lub ntiaj teb yog kev kawm yam lus ntawm lub teb chaws ua yus nyob. Peb cov niam tsev txiv tsev yuav tsum pab kom tiam neeg uas loj hlob tuaj kawm yam lus ntawm lub teb chaws uas lawv nyob tam sim no. Pab lawv kom lawv paub hais yam lus ntawd.

  22. Saib Mauxiyas 18:21.

  23. Lus Qhuab Qhia thiab Kev Khi Lus 38:25, 27.

  24. Nyob rau 25 xyoos tas los, cov mej zeej uas tso lub Koom Txoos tseg tau txo kom tsawg thiab lub Koom Txoos muaj mej zeej yuav luag ob npaug. Cov uas tso tseg mas tsis muaj npaum li qub.

  25. Lus Qhuab Qhia thiab Kev Khi Lus 18:10.

  26. Phau Ntawv Nkauj 27:1; kuj saib “The Lord Is My Light,” Hymns, naj npawb 89.