2010–2019
Kauno Me Kamarainpei
April 2015


Kauno Me Kamarainpei

Atail kak en kesihnenda kehlail oh mehlel oh idawehn Sounkomouro mendahte liselipingkan en mour kin kehlaila pwehki peneinei pwungkan oh minimin pene pwehki Krais nan atail ward oh branch kan.

Nan irair en Easter wet kitail kin kataman oh popohlki komour me Sounkomour, Sises Krais ketkihdo.1

Liseliping me kapeldier sampa pwehki mour suwed kan en sampa kahrehda lamalam luwet. Keirdahn mehn kair kan kahrehda aramas tohto medemedewe me mour wet sapairair pwehki sang ni wiewia sapwung, sapairair oh tenek sapahrek me sansalehr. Ieremen kitail mweideng sapwung laud pwukat en kahrehda atail sohte perenda oh kawauwih sapwellimen Krais meirongo pwehki kitail. Sounkomouro ketin powehdier mehla. Pwehki kalahngan oh limpoak E ketkihda pohn Kahlepe dipatail oh atail sapwung kan, eri dorei kitailla oh kapwungala dipen aramas koaros me pahn keluhla oh kamehlele Mware.2

Sapwellime meirong en toamw kouwahlapo sipelehla dahme aramas momour kak wehwehki. Wiewia kalahngan wet wahdo meleilei me kitail sohte kak wehwehki.3

Eri ia mwoamwen atail kin apwalih dahme wiewiawih limwahtail?

Kilel
Some yellow flowers on a mound of dirt.

Ahi pwoud Mary kin perneki wahnrohs sunflowers. E kin pereniki tuhke pwoatet ah kin kak osada wasa sohte kasikpe oh pohn keilen ahlakan. Mie ahl pwoat me kohlahng ni ihmw me ahi pahpa/nohno kahlap kin wie koukouson ie. Ni aht kin tang nan ahlo, Mary pahn kin nda, ke leme kita pahn kak kilang wahnrohs kaselelo rahnwet? Se pwuriammweikihla pwe tuhke pwoatet kin kak pweida nan pwehl me oahkihlar mesihn en mwetuwel toutoukan oh audaudki dihpw me sohte kin wiahda pwehl me dihpw oh tuhke teikan kak pweida ie.

Kilel
Yellow flowers by some water

Ehu wiepe kesemwpwal en tuhke pwulepwul pwoatet, me patehng eh kin kak pweida nan pwehl me sohte mwahu, iei duwen en tuhke pwulepwulo eh kin idawehn marain en ketipino. Ni eh wia mwo, e kin alehdi marain en komour mwohn eh kin masalpeseng wiahla wahnrohs oangoahng lingan ehu.

Duwehte sunflower pwulepwulo, ni atail kin idawehn Sounkomour en sampa, Ieros en Koht, kitail kin keirda kehlail oh rosonla mendahte diren wiewia suwed me kapel kitail pene. Iei Ih me serepatail oh atail mour.

Nan karasaras en tuhke mwahuo oh dihpw suwedo, Sounkomouro mahseniong sapwellime tohpadahngko me irail koaros me kin kahrehiong aramas dihppahnkohsang nan Sapwellime wehio.4Ahpw ong me pwosonkan E mahseni, “A me lelepek kan pahn lingalingla nan Wehin Samarailo duwehte ketipin.”5Ni atail wia tohnpadahk en Krais, koukouson nan sampa liseliping ehu, kitail kak keirda oh wah mwahu ma kitail tengedi nan atail pokepoke Sounkomouro oh idawehn Sapwellime padahkkan.

Atail kak en kesihnenda kehlail oh mehlel oh idawehn Sounkomouro mendahte liselipingkan en mour kin kehlaila pwehki peneinei pwungkan oh minimin pene pwehki Krais nan atail ward oh branch kan.6

Kuloak en Ni Ihmwo

Pwukoa en peneinei nan sapwellimen Koht pilahn iei en wahdohng kitail peren, pwehn sewesi kitail esehla wiewia pwungkan ni limpoak, oh kaunop kitail da ong mour soutuk.7 Koasondi sarawi en mwomwohdiso nan wasahn kouson anahne en katengetengdi nan mohngiong en neitail serihkan.

Ulepei oahl Vaughn Roberts Kimball wia tohn sukuhl mwahumen, pahn wiahla soun ntingiada pwuhk oh iang mwadong en football nan BYU. Ni Tihsempe 8, 1941 rahn me mahwen wiawiheng Pearl Harbor, eh iangala U.S. Navy. Ni eh wie doadoahk Albany, New York, e kapidelong ehu soai mwoatoamwoat nanReader’s Digest. Makasihno pwainehng $200 oh kapidolong ah soaio me kahdaniki “Kuloak en Ni Ihmwo” nan doaropweo en Mei 1944.

Kisehn ah soaio me e kapidolong nanReader’s Digest,nda me ih emen sehla, kosoia:

“Kuloak en Ni Ihmwo:

Ehu soutiko nan Albany, New York, I idek kuloak depe rehn emen sehla. E kihiei ehu lapalahn watch oh sapeng, minit 20 daulih kuloak 7. I ese me e pwand. I idek noumw kuloaken uhdiehr, kaidehn?

“’E sapeng me soh,’I kolokol kuloak en wasa me Utah kin pato ie. I kohsang palieir en Utah. Ni ahi iangala Navy, ahi pahpaho kiong ie kulaok et. Eh nda me e pahn sewese katamanehng ie ni ihmwo.

“’Ansou me nei kuloako nda 5 ni menseng, I ese me pahpa pirdahr oh alahle melik sang kouko. Oh nihpwong ansou me e nda 7:30 I ese me peneinei pwon mwoahdehr ni tehpel diren mwenge oh pahpa kapkaping kalahngan ong Koht ki kisin mwengeho oh pekipeki rehn Koht en sinsile ie. E mengei ien diar kuloak depe wasa I mihmihie. Dahme I men ese iei kuloak en Utah.’”8

Mwurinte eh kapidolong soaio, Vaughn pekederla en wia ah pwukoahn sounpei nan lepin sed en Pacipik. Ni Mei 11, 1945, ni eh ieiang oapwoat sohp USS Bunker Hilllimwahn Okinawa, sompihr riapwoat kawehla sohpo.9Kerenieng aramas 400 [pahpwiki] mehla iangahki Ulepei Vaughn

Elder Spencer W. Kimball kasalehiong en Vaughn eh pahpao uwen eh pokepokehla Vaughn oh koasoia en Vaughn ah war oh sapwellimen Kauno kehkehlik dene “irail me mehla rehi sohte pahn kehn mehla, pwe e pahn wia mehkoat kansenamwahu ong irail.”10 En Vaughn ah pahpao nda ni ngil kempoake me mendahte paliweren Vaughn eh seridier nansed, Koht pahn ketkihla Vaughn nan deweo nanleng.11

Sounpar rieisek waluh mwuri, President Spencer W. Kimball pil kosoia Vaughn nan kapokon lap. Kisehn me e ndahko: “I ese peneinei wet. … I iang irailehr kelepwidi ni kapakap. … Kasukuhl nan arail wasahn kouson kahrehdahr kapai poatoapoat ong peneinei laud wet. President Kimball kakehlaka peneinei koaros en kelepwikidi … kapakapki neiral pwutak oh serepein kan pak riau rahn ehu.”12

Riei oahl oh lih akan, ma kitail kin pwoson oh wia kapakap en peneinei, wadek pwuhk sarawi, soutik en peneinei, kapai en priesthood kan, oh iang sarawi ni Rahn Sarawi kan neitail serihkan pahn esehla kuloak en ni imwarail. Re pahn kaunopada en pedelong nan dewerail poatoapoat nanleng mendahte dahme re kin loieng nan sampa apwal wet. E inenen kesemwpwal neitail serihkan en ese me re kak diar limpoak oh onepek mwahu nan imwarail.

Ohl oh lih pwopwoud wia soun doadoahk pahrek kei.13 Ara pwukoah kan wekpeseng ahpw re doak pene. Liho kin neitikiedi seri, me kin kapaiahda peneineio pwon. Pahpaho kin ale priesthood, me kin pil kapaiahda peneineio pwon. Ahpw nan mwomwohd en peneinei lih oh ohl, ni ara wia soundoadoahk pahrek kei, kin wiahda koasondi kesemwpwal kan. Ira kin koasonehdi mwoamwen kasikuhlih oh panawih serihkan, mwoamwen doadoahklahn mwohni, ia wasa irail pahn kouson ie, oh pil soangen koasondi teikan. Ire pwukat kin koasondi mwurin ara peki kaweid sang Kauno. Ihme kesemwpwal peneineio en ahneki popohl poatoapoat.

Marain en Krais me padokada mour kesemwpwal en peneinei nan mwohngiong en Sapwellime seri koaros. Emen soun nting me I kin pereniki, kaidehn tohn mwomwohdiso, kosoia met: Diren mehkoat me sohte kesemwpwal nan mour wet [ahpw] … peneinei me wia inondeho, mehkot tengeteng; me kitail anahne mwasamwasahn oh kanaiehng oh papah.14

Mwomwohdiso kin Sewese Kitail en Wiahki ehu Peneinei Sohpeilahng Sounkomouro

Patehng peneinei, pwukoahn Mwomwohdiso pil kin inenen kesemwpwal. “Mwomwohdiso me kin kaweid oh kalohki rongamwahu en Sises Krais ong sapwellimen Koht seri koaros. E kin patohwenda manaman en priesthood pwehn wia tiahk sarawi en komour oh kakehlail ong me warehng oh me inengieng ale.”15

Sampa direkilahr uhpene, akamai, dihp, oh akpwung laud me pid tiahk oh wiewia kapw kan oh koasondi sapahrek. Nan Mwomwohdiso, ihte wekpeseng en lokaia, atail ward oh branch kan kin idawehnte wasa re mihe. Kitail sohte kin katohrohr peseng pwehki pai de mwoamwen aramas.16 Kitail kin pereniki aramas koaros oh soangen tiahk koaros kin patpene ni meleilei. Atail ehupene nan ward kesemwpwalehng atail keirda, popohl oh atail wiewia en duwehte Krais.

Tiahk kin katorepeseng aramas oh ekei ansou kin kahrehda moaroamoar oh peirinpene.17 Nan Pwuken Mormon ekei koasoi kehlail kin doadoahk pwehn kawehwe tiahk en pahpa suwed kan me kin kahrehda pingiping, mahwen, wiewia suwed kan, dihp, oh kamwoamwalahn aramas oh wehi kan.18

Sohte wasa mwahusang Kapahieu en 4 Nephi kitail en wadek duwen kawehwehpen tiahk en Mwomwohdisou me kesemwpwal ong kitail koaros. Iretikitik 2patohwen, “Aramas koaros wekiongehr Kauno, koaros mehn Nephi kan oh mehn Laman akan pohn sahpwo pwon, oh sohte akpwung oh akamai kan kin wiawi nan pwungarail oh koaros kin wiahda mwahu nan pwungarail.” Naniretikitik 16 kitail wadek,”Oh mehlel saikinte pwihn en aramas ehu nan pwungen aramas akan me pein limen Koht ketin kapikadahr me kin peren duwehte irail.” Pwehki limpoak en Koht eh padokala nan arail mwohngiong kan irail sohte uhpene.19 Ih soangen tiahk wet me kitail kin alasang.

Atail tiahk kan oh dahme kitail kin kamehlele me kin kasalehda ihs kitail. Kitail anahne pereniki oh apwalih tiahk en meirong, kaping kalahngan, pwoson oh pwung. Peneinei kan aanahne apwalih oh kolokol tiahk kan me kin kakehlaili pwoson.20

Lokaia wia ehu kisehn tiahk me inenen kesemwpwal. Nan kahnihmw en San Francisco, California, wasa I kin kouson ie mahs, pwihn en nonnative language unit de lokaia isuh kokouda ie. Atail kosondi me pid lokaia sansal nanirelaud 90, iretikitik 11en Doctrine and Covenants. Pwe e pahn pweida ni rahno, me aramas koaros pahn rong duwen rongamwahuo nan pein arail wasa oh nan arail lokaia.

Ni en sapwellimen Koht serihkan kin kapakapiong Ih re kin doadoahngki pein arail lokaia, lokaia sang arail mohngiong. E sansal me aramas koaros kin kesemwpwaliki lokaiahn mohngiong.

Riei pwutak laud, Joseph, wia toahkte men oh wie doadoahk sounpar tohto nan kahnihmw en San Francisco. Ohlen Samoa mah men me wia tohn Mwomwohdiso, wia soumwahu kapw men, ahpw pwaredo reh. E ahneki weirek laud oh uk mehlel. E dierekda me mie takai nan ah kidnio oh wiepen kamwahula ahpw wiawiheng. Towe pwoson menet kosoia me ihme e koasonehdi en diarada dahme sapwung pwe en kak kapakap ni lokaiahn Samoa ong Seme Nanleng ki ah tungoal kapelsalehdo.

E kesemwpwal ong towehkan en wehwehki rongamwahuo ni lokaiahn arail mohngiong pwe ren kak kapakap oh doadoahk nin duwen padahk en rongamwahuo.21

Mendahte atail lokaiah kan oh wiewia kaselel en atail tiahk kan wekpeseng, kitail anahne atail mohngiong kan en ehupene oh limpoakpene.22 Kauno mahseniher ni sansal: En wiahiong mehn mpemw dahme ke mwahuki ren wiahiong uhk. … Kumwail en ehupene; ma soah kumwail sohte wia sapwellime.23 Ni atail wauneki wekpeseng en atail tiahk, ihme kesemwpwal kitail en miniminpene nan tiahk, wiewia oh koasondi kan en rongamwahu en Sises Krais ni mwoahmw koaros.

Mwomwohdiso en Sises Krais en Souleng en Imwin Rahn-akan Kehlail sang Mahs.

Kitail ese me mie en ekei towehkan arail peidek oh irehn kapwunod ni arail kin soangosoang ren kakehlaili arail pwoson oh kadehde kan. Kitail anahne kanaiehng oh dehr ukehng de kasawih irail kan me ahneki pwunod—laud de tikitik. Ni ansou ohte irail me ahneki pwunod anahne wia uwen arail kak en kakehlailih arail pwoson oh kadehde. Pwehn kapwungala atail pwunod oh peidek kan, kitail anahne onopki, medemedewe, oh kapakapki ni kanengama oh karakarahk audepen rongamwahuo oh tuhong irail soun kaweid kan pwehn kamarainih kitail.

Ekei ndaier me e wie tohtohla towehkan ahr mwesemwesel sang Mwomwohdiso rahn wet, oh dene pwoson oh kamehlele wie tikitikla. Met sohte mehlel. Mwomwohdiso en Sises Krais en Souleng en Imwin Rahn-akan kehlail sang mahs. Tohtohn towehkan me kin kapidohi ederail kan sang nan pwuken Mwomwohdiso kin ansou koaros malaulau oh ni mehlel malaulau met sang mahs.24 Keirda me inenen sansal mehlel iei, uwen irail towehkan me alehier endowment oh kolokol kisin likou en mweimwei en pidelong nan tehnpas sarawi, me kin pwapwain tithe, oh me wiewia arail misin. I pahn kapwurehiong me Mwomwohdiso wet kehlail sang mahs. Ahpw, tamataman nan sihlangin Koht, aramas me kesemwpwal.25 Kitail kin pengla rehn aramas koaros.

Ma kahpwal kan me kumwail sohsohpai ansou wet mwomwen rotorot, toutou oh apwal en wisikda, tamataman uwen loal en weikek me wiawi Kedsemeni oh uwen kalokolok oh medek pohn Kalpweri me Sounkomour kalwehkihdi Tomwo, me kapwungalahr kahpwal oh katoutou me keieu laud nan mour wet. E ketin wia met pwehki kumwail oh ngehi. E ketin wia met pwehki E pokepoke kitail oh pwehki E peikiong oh pokepoke Semeho. Kitail pahn pitsang mehla—de pil sang nan madau loalkan.

Perepatail nan mour wet oh mour soutuk pahn kohsang ni poahson en emen emen oh peneinei pwungkan, tiahk sarawi oh padahk kan en Mwomwohdiso oh idawehn Sounkomouro. Iei atail wasahn ruk sang melimelo. Irail kan me medemedewe me irail kelekelehpw, kumwail kak kesihnenda kelail oh ese me Tomwo pahn nekid oh kapai kumwailda ni mwohmw me kumwail sohte kak wehwehki.

Kitail anahne tamataman Sounkomouro, kolokol atail inoukan, oh idawehn Ieros en Koht duwete en tuhke sunflower kin idawehn marain en ketipino. Ideidawehn Sapwellime marain oh karasaras pahn wahdo peren, popohl oh meleilei. Duwehte Melkahka Kan 27oh oapoat koul me I kin linganiki patohwen, “Kauno me kamarainpei oh komourpei.”26

Ni imwilahn wihk en Easter wet, ni ei wia emen sapwellimen Sounkomouro Wahnparon, I kadehde ni mehlel me pid Iasadahn Sises Krais. I ese me Eh ieias. I ese Kepitie. I kadehde ki Sapwellime mour unseko oh mehlel en Tomwo ni mwaren Sises Krais, amen.

Ireh kan

  1. Tehk 2 Nephi 9:20–22.

  2. Tehk Mosiah 15:8–9.

  3. TehkPilipai 4:7.

  4. TehkMadiu 13:41.

  5. Madiu 13:43.

  6. TehkDoctrine and Covenants 115:5–6.

  7. Handbook 2, Administering the Church (2010), 1.1.4.

  8. Vaughn Roberts Kimball,“Kuloak en Ni Ihmwo,”Reader’s Digest, Mei 1944, 43.

  9. Kisinlikou sang Captain G. A Seitz, U.S. Navy, USS Bunker Hill, wiawihda Mei 25, 1945, ong en Vaughn Kimball ah pahpa, Crozier Kimball, Draper,Utah.

  10. Tehk kisinlikou sang Spencer W. Kimball, wiawihda ni Suhn 2, 1945, ong Crozier Kimball;Doctrine and Covenants 42:46.

  11. Tehk Crozier Kimball, nan Marva Jeanne Kimball Pedersen,Vaughn Roberts Kimball: A Memorial1995, 53.

  12. Spencer W. Kimball, “The Family Influence,” Ensign, Sulai 1973, 17. Ansouo Spencer W Kimball me wia President en Pwihn en Wahnparon Ehk-Riemeno.

  13. Tehk “Peneinei: Kalohk Ehu ong Sampa,” Ensign de Liahona,Nohpempe 2010, 129.

  14. Carla Carlisle, “Pray, Love, Remember,”Country Life, Septempe 29, 2010, 120.

  15. Handbook 2,1.1.5.

  16. Tehk4  Nephi 1:26.

  17. Kosoi pen Tiahk kalap wiawi nan sampa rahn wet. Nan pahr 2014 lepin lokaia tiahkpilipilda en wia lepin lokaia en sounparo sang Merriam-Webster.com.

  18. Tehk Alma 9;Helaman 5.

  19. 4  Nephi 1:15.

  20. Oalen Sehmen loalokong Goethe kosoia, Dahme pwarada sang ndand en ahmw pahpao sohrala ihte ma ke doadoahk laud pwe ken kak ahnekihla. (Johann Wolfgang von Goethe,Faust, trnas. Bayard Taylor [1912], 1:28).

  21. Met iei ehu kahrepe me Mwomwohdisou kin kalohki rongamwahuo ni lokaia 50 oh kawehwehdi Pwuken Mormon ong lokaia 110. Ahpw ehu kahpwal me mie nan sampa iei en esehla lokaiahn wasa me kumwail kouson ie.Pahpa/nohno kan anahne tohnmetei oh sewese di me kohkohda en esehla lokaiahn wehi me re koukouson ie met. Sewese irail en wiahkihla lokaiao lokaiahn arail mohngiong.

  22. TehkMosiah 18:21.

  23. Doctrine and Covenants 38:25, 27.

  24. Nan irair en sounpar 25 samwalahro, uwen tohtohn towehkan me mweselsang Mwomwohdiso malaulaulahr oh tohn Mwomwohdiso tohtokilahr kereniong pak riau. Persent en me mweselkan wie tikitiklahr.

  25. Doctrine and Covenants 18:10.

  26. Melkahka Kan 27:1; pil tehk “The Lord is My Light, Hymns, no. 89.