Ang Musika sang Ebanghelyo

Sang tinuig nga nagligad nagpamati ako sa isa ka interbyu sa radyo sang isa ka batan-on nga doktor nga nagtrabaho sa isa ka ospital sa Nasyon sang Navajo Indian. Ginpaambit niya ang isa ka inagihan nga sang isa ka gab-i may gindala nga isa ka tigulang nga Tumandok nga Amerikanong lalaki nga may malaba sing buhok nga nasalapid nga nagsulod sa emergency room. Ang batan-on nga doktor nagkuha sang iya clipboard, nagpalapit sa lalaki, kag nagsiling, “Paano ko ikaw mabuligan?” Ang tigulang nagtulok sang diretso kag wala magsabat. Ang doktor, may diutay nga pagka-iritar, nagsulit. “Indi kita mabuligan kon indi ka maghambal sa akon,” siling niya. “Sugiri ako kon ngaa nagkari ka sa ospital.”

Ang tigulang dayon nagtulok sa iya kag nagsiling, ”Nagasaut ka balá?” Samtang ang batan-on nga doktor nagpainoino sa makatilingala nga pamangkot, nag-abot sa iya isip nga basi ang iya pasyente isa ka manugbulong sang tribu nga, suno sa dumaan nga mga pangginawi, nagtinguha nga mag-ayo sang balatianon paagi sa pagkanta kag pagsaut sa luyo sang ginareseta nga bulong.

“Indi,” ang siling sang doktor, “Indi ako nagasaut. Ikaw balá nagasaut?” Ang tigulang naghangdo. Dayon ang doktor nagpamangkot, “Sarang mo balá ako tudloan nga magsaut?”

Ang sabat sang tigulang sa madamo na nga tuig nagtuga sa akon sang madamo nga pagbinagbinag. “Sarang ko ikaw nga tudloan magsaut,” siling niya, “apang dapat mo mabatian ang musika.”

Kon kaisa sa aton mga puluy-an, madinalag-on naton nga ginatudlo ang mga tikang sa pagsaot apang di-kasubong nga madinalag-on sa pagbulig sa aton mga miembro sang panimalay nga makabati sa musika. Kag subong sa maayo nga nabal-an sang tigulang nga manugbulong, mabudlay ang magsaut nga wala sang musika. Ang magsaut nga wala sang musika masaw-a kag di-masadya—kon kaisa makahuluya. Natilawan balá ninyo ini?

Sa seksyon 8 sang Doktrina kag Mga Kasugtanan, ang Ginuo nagtudlo kanday Joseph Smith kag Oliver Cowdery, “Huo, lantawa, magahambal ako sa inyo hunahuna kag sa inyo tagipusuon, paagi sa Balaan nga Espiritu, nga magaabot sa inyo kag magapuyô sa inyo tagipusuon” (bersikulo 2). Matun-an naton ang mga tikang sa pagsaut sa aton mga hunahuna, apang mabatian naton ang musika sa aton mga tagipusuon. Ang mga tikang sang pagsaut sa ebanghelyo amó ang mga butang nga aton ginahimo; ang musika sang ebanghelyo amo ang malipayon nga balatyagon sa espiritu nga nagaabot halin sa Balaan nga Espiritu. Ini nagadala sang pagbag-o sa tagipusuon kag amo ang ginahalinan sang tanan nga matarong nga mga handom. Ang mga tikang sa pagsaut nagakinahanglan sang disiplina, apang ang kasadya sang pagsaut mabatyagan lamang kon mabatian naton ang musika.

Yara yadtong nagayaguta sa mga miembro sang Simbahan bangud sang mga butang nga aton ginahimo. Ina sarang mahangpan. Yadtong mga nagasaut masami makit-an nga makatilingala ukon masaw-a ukon, sa paggamit sang tinaga sa kasulatan, “pinasahi” (1 Peter 2:9) sa yadtong mga di-makabati sa musika. Nakapundo balá kamo sang inyo kotse sa suga trapiko sa luyo sang sa isa ka kotse nga sa diin ang driver nagasaut kag nagakanta sing mutunog—apang indi ninyo mabatian ang musika bangud ang inyo bintana serado? Indi balá nga siya daw diutay nga may pagkapinasahi? Kon ang kabataan naton nakahibalo sang mga tikang sang pagsaut nga wala makahibalo sa pagpamati kag pagbatyag sang matahom nga musika sang ebanghelyo, sa maabot nga panahon sila mangin di-masulhay sa pagsaut kag sila magauntat sa pagsaut ukon, kasubong nga di-maayo, magpadayon sa pagsaut bangud sa pagpamilit nga ila nabatyagan halin sa iban nga nagasaut sa ila palibot.

Ang panghangkat sa aton tanan nga nagatinguha sa pagtudlo sang ebanghelyo amó ang magpalapad sang tulun-an labaw sa mga tikang sang pagsaut. Ang kalipayan sang aton mga kabataan nagapasad sa ila abilidad nga magpamati kag magpalangga sa matahom nga musika sang ebanghelyo. Paano naton himuon ini?

Una, dapat naton himuon ang aton mga kabuhi nga nabagay sa hustong espirituhanon nga estasyon. Balik sa nagligad nga mga adlaw, antes sa panahon digital, masapwan namon ang amon paboritong estasyon sa radyo paagi sa mainandamon nga pagpatiyog sang buton sang radyo tubtob ini makalinya sing tama sa estasyon. Samtang kami nagapalapit sa numero, mabatian lamang namon ang gahud. Apang sang ulihi nga nahimo namon ang eksakto nga pagpalinya, ang amon paboritong musika maathag nga mabatian. Sa aton mga kabuhi, dapat nga kita malinya sa husto nga estasyon agud makabati sang musika sang Espiritu.

Sang nabaton naton ang dulot sang Balaan nga Espiritu pagkatapos sang bunyag, napunô kita sang langitnon nga musika nga naga-upód sa pagkahaylo. Nagbag-o ang aton mga tagipusuon, kag kita ”walâ na sang huyog nga maghimo sang malain, kundi dalayon nga maghimo sing maayo” (Mosiah 5:2). Apang ang Espiritu indi magpabilin sa di-pagkamaluloy-on ukon sa bugal ukon sa pagkamahisa. Kon madula naton inang alamligan nga impluhensya sa aton mga kabuhi, ang madamo nga mga kanta sang ebanghelyo maabtik nga mangin libagon kag sa ulihi madula. Si Alma nagpamangkot sang makahulogan nga pamangkot: “Kon kamo nakabatyag sa pag-amba sang ambahanon sang nagatubos nga pagpalangga, mamangkot ako, mabatyagan bala ninyo ang subong karon?” (Alma 5:26)

Mga ginikanan, kon ang aton mga kabuhi walâ nabagay sa tuno sang musika sang ebanghelyo, kinahanglan naton nga bagayon ang mga ini. Subong sa gintudlo ni Presidente Thomas S. Monson sa aton sang nagligad nga Oktubre, dapat banabanaon naton ang banas sang aton mga tiil (tan-awa sa “Ponder the Path of Thy Feet,” Ensign ukon Liahona, Nov. 2014, 86–88). Nahibal-an naton kon paano himuon ini. Dapat naton lakton ang amó man nga banas nga aton gin-asoy sang una nga aton nabatian ang langitnon nga mga tunog sang musika sang ebanghelyo. Maggamit kita sang pagtuo kay Cristo, maghinulsol, kag mag-ambit sang sakramento; mabatyagan naton sang mas mabaskog ang impluhensya sang Balaan nga Espiritu; kag ang musika sang ebanghelyo nagasugod sa pagtokar liwat sa aton mga kabuhi.

Ikaduha, kon mabatian naton ang musika sa aton mga kaugalingon, dapat tinguhaon naton sing labing maayo nga buhaton ini sa aton mga puluy-an. Ini isa ka butang nga indi sarang ipwersa ukon ipamilit. “Wala sang gahum ukon impluhensya ang sarang ukon dapat igapabilin paagi sa birtud sang priesthood”—ukon paagi sa birtud sang pagkaamay ukon pagkailoy ukon pinakadako ukon pinakamagahud—“lamang paagi sa pag-ulo-ulo, paagi sa malaba nga pag-antus, paagi sa pagkamalolô kag pagpakubos, . . . paagi sa gugma nga matuod; [kag] paagi sa pagkamaluloy-on” (D&C 121:41–42).

Ngaa ining mga kinaiya magapadulong sa pagdugang sang gahum kag impluhensya sa puluy-an? Bangud ang mga ini mga kinaiya nga nagadapit sa Balaan nga Espiritu. Ang mga ini kinaiya nga nagabagay sa aton mga tagipusuon sa musika sang ebanghelyo. Kon ang mga ini yara, ang mga tikang sang pagsaut pagahimuon nga mas kinaandan kag masadya sang tanan nga mga manugsaut sa panimalay, nga wala nagakinahanglan sang mga pagpamahug ukon pagpahadlok ukon pagpamilit.

Sang diutay pa ang aton mga kabataan, sarang naton sila kantahan sang ambahanon sang matuod nga pagpalangga, kag kon sila matig-a sing ulo kag indi magtulog sa kagab-ihon, basi kinahanglan naton ang magkanta sang ambahanon sang malaba nga pag-antus. Kon sila mga tin-edyer, sarang naton dulaon ang gahud sang pag-argumento kag mga pagpamahug kag, sa luyo, magkanta sang matahom nga musika sang pag-ulo-ulo—kag basi magkanta sang ikaduhang bersikulo sang ambahanon sang malaba nga pag-antus. Ang mga ginikanan sarang magtokar sa himpit nga tuno sang nagasunod nga mga kinaiya sang pagkamalolo kag pagpakubos. Sarang naton dapiton ang aton kabataan nga magbuylog sa aton sa pag-amba nga ululupod samtang nagahanas sang pagkamaluloy-on sa isa ka kasilingan nga nagakinahanglan.

Indi ini tanan matabo sang hinali. Subong sang nabal-an sang tanan nga batid nga musikero, ini nagakinahanglan sang maukod nga paghanas agud makatokar sang matahom nga musika. Kon ang unang mga pagtinguha sa paghimo sang musika wala nagasilinanto kag libagon, dumdoma nga ang di-pagsilinanto indi mahusto paagi sa pagsaway. Ang di-pagsilinanto sa puluy-an subong sa kadulom sa isa ka kwarto. Wala sing dako nga kaayohan ang magpangakig sa kadulom. Dapat naton dulaon ang kadulom paagi sa pagdala sang kasanag.

Gani kon ang manubo nga mga tuno sa inyo puluy-an tuman ka magahud kag makasulobra, ukon ang kwerdas nga seksyon diutay ka matagsing ukon diutay nga mataas, ukon yadtong masilabo nga mga piccolo walâ sa tuno ukon di-madumalahan, magpaumod kamo. Kon walâ ninyo mabatian ang musika sang ebanghelyo sa inyo puluy-an, palihog dumdoma ining duha ka mga tinaga: padayon nga magpraktis. Sa bulig sang Diyos, ang adlaw maabot nga ang musika sang ebanghelyo magapunô sang inyo puluy-an sa di-mahambal nga kasadya.

Bisan maayo ang pagtokar, ang musika indi magasolbar sang tanan naton nga mga problema. May yara nga mga nagapatunog kag nagapanubo sa aton mga kabuhi, mga di-nagaangot kag mga tayuyon nga mga nota. Ang amó kinaiya sang kabuhi sa sining dutang planeta.

Apang kon idugang naton ang musika sa mga tikang sang pagsaut, ang kon kaisa komplikado nga mga hulag sang pag-asawahay kag panimalay nga pangabuhi nagahagyo sa pagpadulong sa isa ka mahidaeton nga pagkatimbang. Bisan ang aton mga kabudlay magadugang sang matahom nga tuno sa kamingaw kag nagabalikbalik nga mga tema. Ang mga doktrina sang priesthood magasugod nga magtuhaw sa aton mga kalag subong sa hamog halin sa langit. Ang Balaan nga Espiritu mangin dalayon naton nga kaupod, kag ang aton harianon nga baston—isa ka maathag nga pagtumod sa gahum kag impluhensya—mangin isa ka indi nagabag-o nga baston sang pagkamatarong kag kamatuoran. Kag ang aton pagdumalahan mangin walay katapusan nga pagdumalahan. Kag sa walâ sang pagpamilit nga paagi ini magailig para sa aton sa walay katubtuban (tan-awa ang D&C 121:45–46).

Kabay nga ini mangin aton sa tagsa naton nga mga kabuhi kag sa tagsa naton ka mga puluy-an amó ang akon pangamuyo sa ngalan ni JesuCristo, amen.