Cov Nkauj ntawm Txoj Moo Zoo

Ntau xyoo tas los kuv twb mloog ib tug kws kho mob uas hluas hais lus hauv xov tooj cua uas ua hauj lwm nyob hauv Navajo Nation. Nws hais txog ib hmo thaum ib tug txiv neej Khab laus uas muaj plaub hau ntev ntxias los rau hauv chav pab kam ceev. Tus kws kho mob uas hluas nqa nws daim ntawv, mus rau tus txiv neej, thiab hais tias, “Kuv pab koj puas tau?” Tus txiv neej ntsia ntsoov thiab tsis hais dab tsi. Tus kws kho mob, vim nws ua siab luv me ntsis, rov qab hais dua. Nws hais tias, “Yog koj tsis hais lus rau kuv, kuv pab tsis tau koj. Qhia kuv vim li cas koj tuaj rau lub tsev kho mob mas.”

Ces tus txiv neej ntsia nws thiab hais tias, “Koj puas seev cev?” Thaum tus kws kho mob hluas xav txog lo lus nug txawv heev no, ua rau nws xav tias tej zaum tus no yog ib tug txiv neeb, thiab raws li lawv txoj kab lig kev cai, nws kho cov neeg mob dhau los ntawm cov nkauj thiab kev seev cev thiab tsis siv cov tshuaj.

Tus kws kho mob hais tias, “Kuv tsis seev cev. Koj puas seev cev?” Tus txiv neej nyo hau. Ces tus kws kho mob nug hais tias, “Koj puas kam qhia kuv paub seev cev?”

Kuv twb xav txog tus txiv neej laus cov lus teb los tau ntau xyoo. Nws hais tias, “Kuv qhia tau kom koj paub seev cev, tiam sis koj yuav tsum mloog cov nkauj.”

Tej lub sij hawm nyob hauv peb lub tsev, peb tsom ntsoov rau qhia kev seev cev tiam sis peb tsis tshua paub pab peb tsev neeg kom lawv hnov tau cov nkauj. Raws li tus txiv neeb laus paub zoo, yeej nyuaj seev cev yog tsis muaj nkauj mloog. Kev seev cev thaum tsis muaj nkauj mloog yeej txawv heev—ntshe ua rau yus txaj muag. Nej puas tau sim ua li ntawd?

Nyob hauv tshooj 8 ntawm phau Lus Qhuab Qhia thiab Kev Khi Lus, tus Tswv qhia Yauxej Xamiv thiab Oliver Cowdery hais tias nws yuav qhia peb nyob hauv peb lub siab lub ntsws, los ntawm tus Vaj Ntsuj Plig Dawb Huv, uas yuav los rau peb thiab yuav nyob hauv peb lub siab (saib nqe 2). Peb kawm seev cev los ntawm peb lub cev, tiam sis peb mloog nkauj los ntawm peb lub siab. Kev seev cev ntawm txoj moo zoo yog tej yam uas peb ua; cov nkauj ntawm txoj moo zoo yog kev xyiv fab uas los ntawm tus Vaj Ntsuj Plig Dawb Huv. Cov nkauj ua rau peb hloov siab thiab yog lub hauv paus ntawm tag nrho peb tej kev xav ncaj ncees. Peb yuav tsum tswj peb tus kheej yog peb xav seev cev, tiam sis peb yuav muaj kev xyiv fab los ntawm kev seev cev tsuas yog peb hnov tau cov nkauj xwb.

Muaj tej tug uas thuam cov mej zeej ntawm lub Koom Txoos vim peb ua tej yam txawv. Peb yeej to taub vim li cas. Peb yeej saib cov neeg uas seev cev txawv yog peb hnov tsis tau cov nkauj (saib 1 Petus 2:9). Nej puas tau nres tsheb thaum muaj teeb liab nyob ntawm lwm lub tsheb ib sab es tus tsav tsheb ntawd seev cev thiab hu nkauj nrov nrov—tiam sis koj hnov tsis tau lub suab vim nej kaw qhov rais? Nej yeej saib nws txawv txav me ntsis puas yog? Yog peb cov me nyuam kawm seev cev tiam sis tsis kawm mloog cov nkauj ntawm txoj moo zoo, sij hawm dhau mus ces lawv yuav tsis nyiam seev cev thiab yuav tsis xav seev cev ntxiv, los yog, yuav seev cev mus ntxiv tsuas yog vim txhua tus nyob ib puag ncig seev cev xwb.

Qhov teeb meem rau peb txhua tus uas xav qhia txoj moo zoo yog qhov uas peb yuav tsum tsis txhob qhia kev seev cev xwb. Peb cov me nyuam txoj kev zoo siab nyob ntawm seb lawv puas hnov thiab nyiam cov nkauj zoo mloog ntawm txoj moo zoo. Peb yuav ua li cas kom ua tau li no?

Qhov ib, peb yuav tsum coj peb lub neej raws li qhov yog. Thaum yav tas los, ua ntej muaj tej khoom digital, peb tau nrhiav qhov peb nyiam mloog hauv xov tooj cua thaum peb muab lub nias kiv mus txog thaum txais tau tshooj yog. Thaum peb muab kiv yuav luag txog tshooj ntawd, peb twb hnov lub suab nrov rig reg xwb. Tiam sis thaum twg peb muab kiv mus txog kiag ntawm tshooj yog, ces peb mloog nkauj meej heev. Nyob hauv peb lub neej, peb yuav tsum ua raws nraim li qhov yog kom mloog cov nkauj ntawm tus Ntsuj Plig.

Thaum peb txais lub txiaj ntsim Vaj Ntsuj Plig Dawb Huv tom qab peb ua kev cai raus dej, ces muaj cov nkauj los saum ntuj los uas koom nrog kev hloov siab los ntseeg. Peb hloov siab lawm, ces peb thiaj tsis muaj tej kev xav ua phem tiam sis peb xav ua zoo tsis tu ncua (Mauxiyas 5:2). Tiam sis tus Ntsuj Plig yeej yuav tsis nyob thaum yus tsis ua siab zoo, yus muab hlob, los yog yus ntshaw khoom. Yog tias peb tsis muaj tus Ntsuj Plig no hauv peb lub neej, cov suab nkauj ntawm txoj moo zoo yuav nyuaj rau peb mloog thiab thaum kawg peb yuav tsis hnov hlo li. Amas nug li no hais tias: “Yog nej tau xav hu zaj nkauj txoj kev hlub uas txhiv dim, kuv yuav nug tias, nej puas xav li ntawd nim no?” (Amas 5:26)

Cov niam tsev txiv tsev, yog peb ua peb lub neej tsis raws li cov nkauj ntawm txoj moo zoo, peb yuav tsum kho peb lub neej. Raws li Thawj Tswj Hwm Thomas S. Monson qhia peb lub Kaum Hli Ntuj tas los, peb yuav tsum sim xav seb peb taug txoj kev twg (saib “Sim Xav Seb Nej Taug Txoj Kev Twg,” Ensign los sis Liahona, Kaum Ib Hlis Ntuj 2014, 86–88). Peb yuav tsum paub ua li ntawd. Peb yuav tsum taug tib txoj kev uas peb taug thaum peb xub hnov cov nkauj zoo mloog ntawm txoj moo zoo. Peb siv kev ntseeg Khetos, hloov siab lees txim, thiab txais lub cim nco txog; peb hnov tau tus Vaj Ntsuj Plig Dawb Huv zoo dua; thiab peb rov qab mloog cov nkauj ntawm txoj moo zoo hauv peb lub neej.

Qhov thib ob, thaum peb hnov tau cov nkauj peb tus kheej, peb yuav tsum sib zog xyaum hauv peb lub tsev. Tsis yog ib qho uas yus yuam tau. Tsis muaj hwj chim los yog hwj huam uas siv tau los ntawm lub pov thawj hwj—los yog los ntawm qhov uas yus yog tus txiv tsev los sis tus niam tsev los sis tus loj tshaj los sis tus nrov tshaj—tsuas yog yus ua siab ntev, muaj siab mos siab muag, … thiab muaj kev hlub tiag tiag, thiab kev ua siab zoo (saib Q&K 121:41–42).

Vim li cas tej no yuav ua rau peb muaj hwj chim thiab hwj huam nyob hauv tsev? Yog vim tej cwj pwm no caw tus Vaj Ntsuj Plig Dawb Huv. Tej no yog tej cwj pwm uas ua rau peb lub siab txawj hnov cov nkauj ntawm txoj moo zoo. Thaum muaj tej no, ces txhua tus hauv peb tsev neeg yuav seev cev yam li xyiv fab, tsis tas muaj kev yuam los yog kev liam.

Thaum peb cov me nyuam tseem me me, peb hu zaj nkauj txog kev hlub rau lawv, thiab thaum lawv tawv ncauj thiab tsis kam pw tsaug zog, tej zaum peb yuav tsum hu zaj nkauj txog kev ua siab ntev. Thaum lawv yog tub hluas ntxhais hluas, peb yuav tsum tsis txhob sib cav sib ceg thiab cia li hu zaj nkauj ntawm kev hais lus zoo yaum lawv— thiab tej zaum hu nqe ob ntawm zaj nkauj txog kev ua siab ntev rau lawv. Cov niam tsev txiv tsev yuav tsum koom siab tsa suab hu nkauj ntawm kev ua siab mos siab muag thiab kev ua siab zoo. Peb caw tau peb cov me nyuam koom nrog peb hu nkauj thaum peb ua siab zoo rau ib tug neeg zej zog uas xav tau kev pab.

Tej no yuav tsis los thaum tib lub sij hawm. Ib yam li txhua tus kws ntaus nkauj paub, yuav tsum rau siab xyaum yog xav ntaus nkauj zoo mloog. Yog tias nej xyaum hu nkauj es tsis zoo mloog thaum xub thawj, cia li nco ntsoov tias kho tsis tau tej teeb meem no yog nej cem lawv. Kev sib cav sib ceg nyob hauv tsev yeej zoo li qhov tsaus ntuj nyob hauv ib hoob. Yog yus cem qhov tsaus ntuj ces yeej tsis pab dab tsi. Peb yuav tsum muab qhov kaj pauv qhov tsaus ntuj.

Yog li ntawd yog nyob hauv nej tsev neeg pawg hu nkauj muaj cov suab laus nrov dhau, los yog cov xem xauv nrov siab dhau me ntsis, los sis cov raj lub suab tsis yog thiab tswj tsis tau, cia li ua siab ntev. Yog nej mloog tsis tau cov nkauj ntawm txoj moo zoo hauv nej lub tsev, thov nco ntsoov peb lo lus no: xyaum ua ntxiv. Nrog Vajtswv txoj kev pab, yuav muaj ib hnub thaum cov nkauj ntawm txoj moo zoo yuav pab nej tsev neeg muaj kev xyiv fab.

Txawm nej ntaus nkauj zoo los, cov nkauj yuav tsis pab kov yeej txhua qhov teeb meem. Cov suab nkauj tseem yuav nrov loj zuj zus thiab txo yaus yaus, hauv nej lub neej. Yeej zoo li no thaum peb ua neej hauv lub ntiaj teb no.

Tiam sis thaum peb tso nkauj nrog rau kev seev cev, cov suab ntawm kev sib yuav thiab peb tsev neeg lub neej yuav pib koom ua ke kom ua suab nkauj zoo mloog. Txawm peb muaj teeb meem los tej ntawd yuav pab kom peb txais kev txhawb nqa. Cov lus qhuab qhia ntawm lub pov thawj hwj yuav pib teev los rau peb tej ntsuj plig ib yam li tej lwg los saum ntuj los. Tus Vaj Ntsuj Plig Dawb Huv yuav nrog nraim peb nyob, thiab peb tus cwj vaj—uas piv txog peb lub hwj chim thiab hwj huam—yog tus cwj vaj ntawm kev ncaj ncees thiab kev tseeb uas tsis hloov. Thiab peb txoj kev kav yuav yog txoj kev kav uas kav ib txhis. Thiab peb txoj kev kav yuav ntws los rau peb mus ib txhiab thiab ib txhis tsis muaj kev quab yuam (saib Q&K 121:45–46).

Thov kom yuav muaj li no hauv peb lub neej thiab hauv peb tsev neeg, kuv thov los ntawm Yexus Khetos lub npe, amees.