Txoj Hau Kev Zoo Siab

Ntau xyoo tas los, tom qab muaj Kev Tsov Rog Thoob Ntiaj Teb thib Ob, kuv tau kawm ntawv qib siab. Thaum ntawd kuv tau ntsib Donna Smith. Thaum ntawd kuv nyeem hais tias ob qho uas yuav tsum muaj kom yus txoj kev sib yuav thiaj zoo yog ib daim cookie thiab kev sib hnia. Kuv xav tias ob qho ntawd yeej zoo.

Kuv tau kawm ntawv thaum sawv ntxov ces kuv rov qab mus rau Brigham City ua hauj lwm hauv kuv txiv qhov chaw kho tsheb thaum tav su. Donna hoob kawm kawg thaum sawv ntxov yog kev kawm txog tsev. Kuv pheej mus xyuas nws hoob kawm ua ntej kuv mus ua hauj lwm. Lub qhov rooj fws tsis pom dab tsi, tiam sis yog kuv sawv ze rau lub qhov rooj, ces nws pom tau kuv tus duab. Ces nws tawm nws hoob kawm muab ib lub daim cookie rau kuv thiab hnia kuv. Tom qab ntawd nej yeej paub tias muaj li cas. Wb sib yuav nyob hauv lub Tuam Tsev Salt Lake, thiab li ntawd wb tau pib wb lub neej.

Tau ntau xyoo kuv pheej tau qhia ib lub ntsiab cai tseem ceeb: lub ntsiab ntawm tag nrho tej hauj lwm hauv lub Koom Txoos yog qhov uas ib tug txiv neej thiab ib tug poj niam yuav zoo siab nrog nkawd cov me nyuam nyob hauv tsev thiab ua kev sib khi rau lub neej no thiab nyob mus ib txhis.

Thaum chiv keeb:

Cov Vajtswv tau mus tsim neeg, kom lawv muaj yam ntxwv zoo li Vajtswv ntag. Nws tsim muaj tus txiv neej thiab tus poj niam.

Thiab cov Vajtswv hais tias: Peb yuav foom koob hmoov rau nkawd. Thiab cov Vajtswv hais tias: Peb yuav kom nkawd muaj tub muaj ki kom coob, nkawd tej xeeb ntxwv yuav huaj vam mus nyob thoob plaws txhua qhov chaw kom puv ntiaj teb thiab lawv yuav kav tag nrho lub ntiaj teb. (Anplaham 4:27–28).

Yog li ntawd twb pib muaj tib neeg nyob hauv lub ntiaj teb thaum Adas nrog nws tus poj niam, thiab nws yug cov tub thiab cov ntxhais, thiab lawv pib muaj tub muaj ki coob thiab huaj vam mus nyob thoob plaws lub ntiaj teb.

Thiab Adas tej tub thiab tej ntxhais pib sib faib ob tug thiab ob tug mus nyob hauv thaj av, thiab lawv kuj pib muaj tub thiab muaj ntxhais (Mauxes 5:2–3).

Vajtswv tseem tsis tau thim lo lus txib kom muaj tub muaj ki thiab huaj vam mus puv tas lub ntiaj teb. Nov yog ib qho tseem ceeb rau txoj kev txhiv dim thiab lub hauv paus ntawm tib neeg zoo siab. Yog tias ua ncaj ua ncees siv lub hwj chim no, peb thiaj muaj cuab kav txav los ze peb Leej Txiv Saum Ntuj Ceeb Tsheej thiab txais kev zoo siab tag nrho. Txoj kev cawm seej tsis yog lam tau lam muaj lub hwj chim tsim tau neeg no; yog txoj hau kev zoo siab; yog qhov uas qhib kev rau kev zoo siab.

Tib neeg txoj kev xav muaj tus khub los yeej muaj zog heev. Peb txoj kev zoo siab hauv lub neej no, peb txoj kev xyiv fab thiab kev tsa nto nyob ntawm seb peb yuav ua li cas nrog tej kev xav ntawm peb lub cev nqaij daim tawv no. Thaum lub hwj chim tsim taus neeg loj tuaj nyob hauv cov tub hluas ntxhais hluas, ua rau lawv muaj tej kev xav hauv lawv lub siab, zoo li ib txwm muaj, tiam sis tsis zoo li lwm yam ntawm sab cev nqaij daim tawv.

Qhov zoo tshaj plaws yog thaum kev ua ib khub pib nrog kev sib hlub. Txawm nyias muaj nyias kab lig kev cai, nkawd txoj kev sib hlub loj hlob zoo li ib zaj dab neeg. Muaj nruab qaim hli thiab paj, tsab ntawv sib hlub, zaj nkauj sib hlub, paj huam, kev tuav tes, thiab lwm yam qhia tias tus tub hluas thiab tus ntxhais hluas sib hlub. Rau ob tug khub no zoo li lub ntiaj teb ploj mus, thiab nkawd muaj kev xyiv fab.

Thiab yog nej xav tias ib tug tub hluas thiab ntxhais hluas kev sib hlub heev yog qhov zoo tshaj plaws uas yuav muaj hauv yus lub neej, ces nej tseem tsis tau ua neej nyob ntev txaus kom pom kev mob siab thiab kev nyab xeeb ntawm ib khub niam txiv laus uas sib hlub. Tej khub niam txiv yeej raug kev sim siab los ntawm kev ntxias, kev tsis to taub, teeb meem ntawm nyiaj txiag, teeb meem hauv tsev neeg, thiab kev mob, tiam sis lawv txoj kev sib hlub loj tuaj. Kev sib hlub uas nyiaj tau ntev los yog ib qho uas cov uas nyuam qhuav sib yuav tsis paub nws zoo npaum li cas.

Kev sib hlub tiag tiag qhia tias yuav tsum tos mus txog thaum sib yuav kom ua tej yam uas siv lub hwj chim dawb ceev uas tsim taus neeg. Kev sib hlub txhais hais tias yus tsis ua tej yam kom tswj tsis tau yus tej kev xav ntawm sab cev nqaij daim tawv. Txoj kev hlub dawb paug tsuas los rau yus tom qab tau cog lus hais tias yuav muab siab npuab rau yus tus khub tas mus li, tau ua kab tshoob ke kos raws li tseem fwv txoj kev cai, thiab qhov zoo tshaj plaws yog raug muab khi ua ke hauv lub tuam tsev, ces Vajtswv thiaj tso cai rau yus siv tau lub hwj chim tsim tub tsim ki. Nej tsuas muaj cai siv lub hwj chim no nrog tus uas yog nej tus khub tas mus ib txhis li xwb.

Thaum yus tsim nyog ua, kev siv lub hwj chim no muab tej yam zoo kawg ntawm lo lus hlub uas los ntawm sab cev nqaij daim tawv, tej kev xav ntawm lub siab, thiab sab ntsuj plig koom ua ke. Tsis muaj ib yam dab tsi hauv lub neej uas zoo li no. Thaum yus ua raws li yus tej kev khi lus, ces yuav muaj lub hwj chim no tas mus ib txhis, vim yuav tsa tej yuam sij ntawm lub pov thawj hwj dawb huv nyob rau hauv, kom nej yuav tau txais sam xeeb thiab yeeb koob (saib Q&K 124:34), uas lub yeeb koob yog qhov muaj txhij txhua thiab ib txoj kev muaj tub ki ntxiv mus ib txhiab thiab ib txhis (saib Q&K 132:19).

Tiam sis kev sib hlub li no yeej tsis tiav lawm; yog qhov chiv keeb xwb. Kev hlub loj tuaj thaum muaj me nyuam, uas los ntawm lub hwj chim uas Vajtswv muab rau ib khub niam txiv uas tau sib yuav. Kev xeeb me nyuam pib thaum ib tug txiv thiab tus poj niam uas sib yuav pw koom ua ke. Pib muaj ib lub cev me me raws li ib txoj kev zoo kawg nkaus. Tus me nyuam yug los, muaj yam ntxwv zoo li nws txiv thiab nws niam hauv lub ntiaj teb. Nyob hauv nws lub cev nqaij daim tawv muaj ib tug ntsuj plig uas txawj hnov thiab xav tej yam ntawm sab ntsuj plig. Nyob hauv tus me nyuam lub cev nqaij daim tawv nws muaj hwj chim uas tseem tsis tau loj hlob kom muaj tub muaj ki raws li nws tus yam ntxwv.

Tus ntsuj plig thiab lub cev thiaj yog neeg (saib Q&K 88:15), thiab muaj kev cai ntawm sab ntsuj plig thiab sab nqaij daim tawv uas yuav tsum ua yog peb xav zoo siab. Muaj tej kev cai nyob mus ib txhis, tsis hais tej kev cai hais txog lub hwj chim tsim taus neeg, uas tau tshaj tawm nyob saum ntuj ceeb tsheej ua ntej lub ntuj no tsim teb raug uas hloov tsis tau, uas yog tag nrho tej koob hmoov lub hauv paus (saib Q&K 130:20). Tej no yog tej kev cai ntawm sab ntsuj plig uas qhia hais tias tib neeg yuav tsum coj ncaj ncees li cas (saib Yauxej Xamiv Kev Txhais Lus, Loos 7:14–15 [nyob hauv phau Npaiv Npaum ntaub ntawv rau tom qab]; 2 Nifais 2:5; Q&K 29:34; 134:6). Muaj tej kev khi lus uas muab peb khi ua ke thiab pov hwm peb thiab muaj kev cog lus tias peb yuav txais koob hmoov mus ib txhis.

Amas ntuas nws tus tub Sinploos hais tias, “Ceev faj tias koj yuav tswj tag nrho koj tej kev ntswv siab, xwv kom koj yuav muaj txoj kev hlub puv npo” (Amas 38:12). Kev tswj yog kev coj thiab kev tuav rawv. Peb yuav tsum tswj peb tej kev ntshaw. Thaum peb ua raws li kev cai, lub hwj chim tsim taus neeg yuav foom koob hmoov thiab ua kom dawb huv (saib Teachings of Presidents of the Church: Joseph F. Smith [1998], 158).

Yeej muaj kev ntxias. Vim tus yeeb ncuab tsim tsis taus neeg, nws khib tag nrho cov uas muaj lub hwj chim zoo kawg ntawd. Nws thiab cov uas nrog nws mus raug ntiab tawm thiab lawv tsis muaj cai txais ib lub cev nqaij daim tawv. “Nws nrhiav ua kom neeg sawv daws txhua leej txhua tus ua neeg nyuaj siab zoo ib yam li nws tus kheej” (2 Nifais 2:27). Yog nws ua tau, nws yuav ntxias kom lub txiaj ntsim no raug txo, raug lwj, thiab raug piam sij, yog tib lub txiaj ntsim uas yuav pab peb muaj tub muaj ki mus ib txhis yog peb tsim nyog (saib Q&K 132:28–31).

Yog peb siv lub hwj chim no ua phem los yog coj lwm tus ua txhaum, peb yuav raug txim uas nyuaj rau peb ris thiab raug txim hnyav (saib Q&K 19:15) tshaj txhua yam kev ntshaw ntawm sab cev nqaij daim tawv.

Amas qhia nws tus tub Khauli-atoos tias, “Koj tsis paub los, kuv tus me tub es, tias tej yam no yog ib txoj kev qias nyob ntawm tus Tswv lub qhov muag; muaj tseeb tiag, yog txoj kev qias uas phem tshaj txhua yam kev txhaum tsuas yog tshuav txoj kev tua tej neeg tsis muaj txim kom ntshav nrog los sis tsis kam lees tus Vaj Ntsuj Plig Dawb Huv xwb no los?” (Amas 39:5). Peb dim tsis tau tej xwm txheej thaum peb ua txhaum.

Tib lub sij hawm uas Vajtswv tso cai pom zoo rau tib neeg siv lub hwj chim tsim taus neeg yog thaum muaj ib tus txiv neej thiab ib tug poj niam uas tau sib yuav raws li kev cai. Yog tsis zoo li no ces lawv txhaum Vajtswv tej lus txib. Tsis txhob ua raws li tus yeeb ncuab tej kev ntxias, vim yuav tsum them nqi rau txhua qhov kev txhaum mus txog “thaum uas [nej] them nqi tas” (Mathais 5:26).

Tsis muaj ib qho chaw twg uas yus nrhiav tau Vajtswv txoj kev ua siab zoo thiab kev hlub tshua ntau npaum thaum yus hloov siab lees txim.

Peb lub cev nqaij daim tawv, thaum twg raug mob, txawj kho lawv tus kheej, es tej lub sij hawm ib tug kws kho mob pab. Tej lub sij hawm, yog tias raug mob heev, yuav muaj caws pliav kom nco txog thaum twg peb raug mob.

Hais txog peb sab ntsuj plig, nov tsis zoo ib yam. Peb tej ntsuj plig raug mob thaum peb ua yuam kev thiab ua txhaum. Tiam sis tsis zoo li peb sab cev nqaij daim tawv, thaum peb hloov siab lees txim, tsis muaj caws pliav vim muaj Yexus Khetos txoj Kev Theej Txhoj. Nws cog lus tias tus uas hloov siab lees txim ntawm nws tej kev txhaum, twb tau zam txim rau tus ntawd, thiab tus Tswv tsis nco qab tej ntawd lawm ntxiv (saib Q&K 58:42).

Thaum peb hais txog kev sib yuav thiab tsev neeg, ua rau peb xav hais tias, “Cov uas tsis zoo li no nev?” Ib txhia muaj teeb meem thiab yug tsis tau me nyuam. Muaj ib txhia uas lawv txoj kev sib yuav raug rhuav vim tus khub tau deev luag poj luag txiv. Lwm tus tsis tau yuav poj niam yuav txiv thiab nyob lawv ib leeg.

Tam sim no kuv qhia li no xwb: Vajtswv yog peb Leej Txiv! Ib leej txiv hauv lub ntiaj teb uas hlub thiab muaj siab zoo npaum li cas los ntshe peb Leej Txiv thiab peb tus Vajtswv ua rau peb cov neeg ntiaj teb tsis to taub Nws hlub peb tshaj qhov ntawd. Nws tej kev txiav txim yeej ncaj; Nws txoj kev hlub tshua yeej nyob mus ib txhis; Nws lub hwj chim muab nqi zog rau peb los tsis muaj dab tsi hauv lub ntiaj teb uas piv tau. “Yog hais tias, qhov uas peb cia siab rau Yexus Khetos, tsuas pab tau peb thaum peb tseem ua neej nyob no xwb, ces peb kuj yog cov uas txom nyem dua tej neeg uas nyob hauv ntiaj teb no huv tib si” (1 Kauleethaus 15:19).

Tam sim no kuv hwm Vajtswv hais lo lus lub tuam tsev. Kuv xav txog ib chav ua kev cai sib khi thiab muaj ib khub niam txiv hluas txhos caug ntawm ib lub thaj. Txoj kab ke dawb ceev hauv lub tuam tsev no tsis yog kev sib yuav xwb, vim hais tias kev sib yuav zoo li no yog ib qho uas tus Ntsuj Plig Dawb Huv ntawm Kev Cog Lus yuav pom zoo, thiab cov vaj lug kub qhia tias peb yuav txais tau tej kev tswj, tej nceeg vaj, tej nceeg tub vaj ntxwv, thiab tej hwj chim, tej kev kav (saib Q&K 132:19). Kuv paub txog txoj kev xyiv fab uas tos txais cov uas txais lub txiaj ntsim zoo kawg no thiab siv yam li tsim nyog.

Muam Donna Smith Packer thiab kuv twb sib yuav ze li 70 xyoo lawm. Hais txog kuv tus poj niam, tus uas yog kuv cov me nyuam niam, kuv tsis pom qab hais. Qhov uas kuv xav hauv kuv lub siab thiab kuv txoj kev ris nws txiaj yeej muaj hwj chim heev kuv thiaj li tsis paub hais. Tus nqi zog loj tshaj plaws uas wb tau txais hauv lub neej no, thiab lub neej tom ntej, yog wb cov me nyuam thiab wb cov xeeb leej xeeb ntxwv. Thaum lub caij kawg ntawm wb lub neej ua ke hauv lub ntiaj teb no, kuv zoo siab rau txhua lub sij hawm uas nws nyob ntawm kuv ib sab thiab rau tus Tswv txoj kev cog lus tias yuav tsis muaj qhov kawg.

Kuv ua tim khawv tias Yexus yog tus Khetos thiab yog Vajtswv Leej Tub. Nws sawv ua tus thawj coj rau Nws lub Koom Txoos no. Dhau los ntawm Nws txoj Kev Theej Txhoj thiab lub hwj chim ntawm lub pov thawj hwj, tej tsev neeg uas pib hauv lub neej no yuav nyob ua ke mus ib txhis li. Txoj Kev Theej Txhoj, uas pab tau peb txhua tus, yeej tsis ua rau peb muaj caws pliav. Qhov no txhais hais tias txawm peb tau ua dab tsi los yog peb tau mus qhov twg los yog muaj xwm txheej dab tsi los, yog peb hloov siab lees txim tiag tiag, Nws cog lus tias Nws yuav theej peb lub txhoj. Thiab thaum Nws theej peb lub txhoj, tsis muaj teeb meem ntxiv. Peb feem coob nyuaj siab txhawj xeeb vim peb xav txog peb txoj kev muaj txim, es peb tsis paub ua li cas kom dim tau. Nej dim tau thaum nej lees yuav Yexus Khetos txoj Kev Theej Txhoj, thiab txhua yam uas ua rau nej lub siab ntais rhe yuav hloov los ua tej yam uas zoo nkauj thiab muaj kev hlub uas nyob mus ib txhis.

Kuv zoo siab ua Vajtswv tsaug rau cov koob hmoov los ntawm tus Tswv Yexus Khetos, rau lub hwj chim tsim taus neeg, rau lub hwj chim txhiv dim, rau txoj Kev Theej Txhoj—txoj Kev Theej Txhoj uas ntxuav tau txhua qhov tsis huv txawm nyuaj npaum li cas los yog ntev li cas los yog tau ua ntau zaus npaum li cas los. Txoj Kev Theej Txhoj yuav tso nej dim kom nej muaj peev xwm mus tom ntej, yam li dawb huv thiab tsim nyog, kom taug txoj kev uas nej tau xaiv hauv nej lub neej no.

Kuv ua tim khawv hais tias Vajtswv muaj txoj sia nyob, Yexus yog tus Khetos, thiab txoj Kev Theej Txhoj tsis yog ib qho uas Nws ua rau lub Koom Txoos tag nrho. Nws ua txoj Kev Theej Txhoj rau txhua leej txhua tus, thiab yog muaj ib yam dab tsi uas ua rau nej nyuaj siab—tej lub sij hawm yog ib qho uas twb ua tau ntev lawm nej thiaj tsis tshua nco qab txog—cia li siv txoj Kev Theej Txhoj. Nws txoj Kev Theej Txhoj yuav ntxuav nej kom huv, thiab nej, ib yam li Nws, yuav tsis nco txog nej tej kev txhaum ntxiv. Los ntawm Yexus Khetos lub npe, amees.