Plwacn in Engan

Yac pucs somlah ah, tukun Mweun Ahkluo luhn Facluh, nga tuh wi college ke nga ohsun nuh sel Donna Smith. Ke pacl se ingacn nga tuh riti lah ip yohk srihpac luo nuh ke sie pahyuck na wowo pa sie cookie ac sie kiss. Nga tuh nuhnkuh lah ohiyac na wo se pa ingacn.

Nga tuh wi lutlut ke lututwacng ah, ac na fohlohk nuh Brigham City in orekma ke garage luhn pahpah tuhmuhk ah ke infulwen lwen se. Class ke lututwacng sahflah lal Donna ah pa home eceonomy(orekma in lohm) uh. Nga tui ke sisken kuhlahs rum lal ah met liki nga som. Sruhngucl sac oasr winto kuhlahs ohkohk, tuh nga fin tu fototo nuh ke kuhlahs ah, el kuh in liye nguhnihk lihkac. El tuh mahsrihk tifoklac ke sie cookie ac sie kiss. Ma nuh kwewa tohkoh sahflah. Kuht tuh pahyuckyak lun Tempuhl Salt Lake, ac muhtwacwacack fuhfahsryucsr wolacna sac ke moul lasr uh.

Ke yac ekahsr somlah me nga kwacna luti sie ip yohk srihpac: ma sahflah ke orekma nuh kwewa ke Alu uh pa in liye lah mukul se ac muhtwacn se yurin tuhlihk nahtuhlos elos engan in lohm ah ac elos siliyuck ke pacl inge uh ac nwe tok ma pahtpaht.

Ke muhtwacwacackiyac:

“Mwet God uh Elos som in orwaclah mwet ke luhmahlos sifacna, ke luhmahn Mwet God in oraclah, mukul ac muhtwacn in oracloslac.

“Ac Mwet God Elos fahk lah Elos ac ahkinsewowoyaclos. Ac Mwet God Elos fahk lah Elos ac oruh in puhkantwen tuhlihk nahtuhlos, ac tuh fihlin tuhlihk nahtuhlos fah apuhnlah facluh ac eis acn uh” (liye Abraham 4:27–28).

Ac ohinge muhtwacwacack fahsriyacn moul luhn mwet uh fin facluh inge ke Adam el wi muhtwacn kiyacl ac el oswe wen ac acn nahtuhlos, ac elos muhtwacwacack in puhkantweni tuhlihk nahtuhlos apuhnlah facluh.

“Ac ...wen ac acn nahtuhl Adam muhtwacwacack fahsrwelihk nuh in u luo ac luo ke fin can, ... ac elos oacyacpac oswe wen ac acn uh” (liye Moses 5:2–3).

Masap in ahkpuhsye tuhlihk apuhnlah facluh tiacna itucklac. Ma inge yohk srihpac nuh ke plwacn in molwelah ac pa muhtwacwacyacn engan luhn mwet uh. Ke orekmakihnyacn suwohs ke kuh se inge, kuht kuh in fototoyang nuh sin Pahpah tuhmasr Inkuhsrao ac puhlakihn fohnlah ke engan uh, finne oacna atacn god. Kuh se in oswe tuhlihk tiacna ip ma kwacna sikyak ke plwacn in engan; ac pa ki se nuh ke mwe engan.

Kena se in tuhkweni yurin mwet ac oan ma pahtpaht ac arulacna fokoko. Engan lasr ke moul suhkawihl, ma pwacr ac molwelah lasr uh wiwina ohiyac ma kuht mukwikwi ke kena fokoko, sikyak pacl nuh kwewa inge uh. Ke kuh in oswe tuhlihk kapkapwack nuh ke ohiyacn mukul fuhsr kuh muhtwacn fuhsr, mwe puhla la sifacna uh sikyak, ke ohiyacn ma kwacna sikyak uh, siena liki kuhtwena mwe puhla luhn mahno sahyac.

Finsrak uh, tuhkweni yurin mwet se uh muhtwacwacack ke atacn luhngse. Finne facsin uh siena, luhngse inge kapkapwack ke puhlan luhngse kwewa ke enganwack ac rahrahlac, ac kuhtuh pacl uh sruhngwacyuck. Oasr kahlwem luhn mahlwem ac ros, lwacta in luhngse, on in luhngse, poety, sruokyacn paho uh, ac kuhtuh sin mwe ahkkahlwemye sahyac ke luhngse inmahsrlon mukul fuhsr se ac muhtwacn fuhsr se. Elos muhlkuhnlah ma sikyak raunweloslac, ac elos puhlakihn mwe engan.

Ac kowos fin nuhnkuh muh fohnlah luhn engan ke atacn luhngse fuhsr pa ma nuh kwewa ma tuhkuh ke kuh in oswe tuhlihk, na kowos soenna moul in liye oaru ac ahkkweye ma tuhkuh sin pahyuck ke luhngse pacl loes. Siyacnyacn pahyuckyak srihkeyuck ke mwe sruhf, mwe fohs, elyah ke mani, elyah ke sucu, mas, ac ke ma inge luhngse ahkfokokoyeyuck. Luhngse kapkapwack oasr engan kac ma tiac kuh in nuhnkweyuck sin siyacnyacn sasuc uh.

Luhngse pwacye enenuh mwet in sano nwe ke tukun pahyuck uh ke akacsruhi luhn atacn luhngse ma fuhlwelah kuh sacohk in oswe tuhlihk. Kalmeyac pa in tiac wi ohiyac ma luhngse luhn mahno ac fah kuhtanglah nuhnak uh. Luhngse nwacsnwacs kalmeyac pa tukun sie fahkwack suwohs ke luhlahlfongi nuh sin mwet se na, sie ahkfuhlwact fahsriyuck suwohs ke masap an, ac wo emet tukun akwuck ke siliyuck lun tempuhl, na kuh se in oswe tuhlihk uh fihliyucklac ye muhtuhn God mwet in kuh in ahkkahlwemye fohnlah luhn luhngse uh. Ma inge enenuh in akacsruhi muhkwena yurin mwet se  suc pa mukul tuhmom kuh muhtwacn kiyom nwe tok ma pahtpaht uh.

Fin weacng nuh kac ke ohiyacn nwacsnwacs, fahsriyuck inge oracni ma wolacna emet ke ma luhn mahno, nuhnak, ac mwe puhla luhn nguhn ma ke kahsluhngse.Ip se ingacn ke moul wacngihn ma oacna nuh kac, wacngihn ma oacna sie, ke nohfohnna mwe puhlakihn luhn mwet uh. Ac fah, ke olweacng uh orweyucklac ac karihngihnyuck, fahsr nwe tok ma pahtpaht, ke srihpen ke ma inge ki luhn pristut muhtahl akmuhsraiyuck, tuh kuht in kuh in eis ahkfuhlwact ac wolacna (liye D&C 124:34), tuh wolacna inge ac fah fohnlah ac kalweniyacn fahko nwe tok ma pahtpaht (liye D&C 132:19).

Tuhsruhk atacn luhngse muhkwena suhfal; ac pa muhtwacwacackiyac uh. Luhngse uh kapkapwack ke tuhkuh luhn tuhlihk uh, suc orweyucklac ke unohn in moul luhlahlfongiyuck nuh sin siyacnyacn suc pahyuckyak. Muhtwacwacackiyacn tuhlihk uh in mahno ahkfahsryeyuck inmahsrlon pahyuck uh sin mukul se muhtwacn se. Mahno na srihsrihk se muhtwacwacack oreklac oacna ke pactuhn wolacna ac yohk srihpac. Oswelah sie tuhlihk ke usrnguck luhn isuslac, orweyucklac ke luhmahn pahpah ninac kiyacl facluh. Ke mahno suhkawihl se oasr nguhna se suc kuh in puhla ac nuhnkuh ke luhn nguhn. Ma soenna kapwack ke mahno suhkawihl luhn tuhlihk se pa kuh se in oswe tuhlihk nahtuhl ke luhmahl sifacna.

“Nguhn ac mahno pa nguhnan mwet se (liyeD&C 88:15), ac oasr masap ke nguhn ac mahno in ahkos kuht fin ac engan. Oasr masap ma pahtpaht, wi masap nuh ke kuh se inge in sang moul, ma tiac kuh in itucklac, ma akiyuck inkuhsrao met liki oreklac luhn facluh inge, ma mwe insewowo kwewa ahkfahsryeyucklac kac (liye D&C 130:20). Ma inge masap ke ma luhn nguhn ma oakiyac ohiyac se nuh sin mwet uh (liye Joseph Smith Translation, Romans 7:14–15;2  Nephi 2:5;D&C 29:34;134:6). Oasr wuhlweacng ma kapri, sili, ac loango ac usot olwelah ke mwe insewowo ma pahtpaht.

Alma el kalyei wen nahtuhl Shiblon, “Liyacacng tuh kom in kutongyac nohfohn kena lom, tuh kom in kuh in sesseslah ke luhngse” (Alma 38:12(). Ma kutongyac orekmakihnyuck in kol, kahsruh, ac na kutongyac. Kena lasr pa in karihngihnyuck. Ke orekmakihnyuck suwohs ke masap an, kuh se in oswe tuhlihk fah ahkinsewowoye ac ahkmuhtahlye (liye Teachings of Presidents of the Church: Joseph F. Smith [1998], 158).

Oasr mwe sruhf pacl nuh kwewa. Ke srihpen mwet lokoalok se el tiac kuh in oswe moul, el lwemta sin elos kwewa suc oasr kuh wolacna se ingacn la. El ac elos suc fahsr tohkohl lihsyucklac ac elos fuhlweack kuh se in eis mahno suhkawihl. “El suk tuh mwet nuhkwewa in kuh in suhpwacr oacna el sifacna” (2 Nephi 2:27). El ac fah srihfe, el fin ac kuh, in ahkmuhnahsye, in ahkkolukye, ac, fin ac kuh, in kuhnaoslah mwe sang se inge ma kuht kuh, kuht fin nwacsnwacs, in oasr tuhlihk nwe tok ma pahtpaht nahtuhsr (liye D&C 132:28–31).

Kuht fin ahkkolukye unohn in moul lasr kuh kohllac mwet sahyac elos in oruh ma koluk, ac fah oasr mwacta arulacna upac in utuck (D&C 19:15) yohk liki na engan luhn mahno uh.

Alma el fahk nuh sin wen nahtuhl Corianton, “Yac kom tiac etuh, wen nuhtihk, lah ma inge ma sruhngwacyuck ye muhtuhn Leum; ahok, sruhngwacyuck emet liki ma koluk nuhkwewa sahyacn ahksohrohrye srah luhn mwet wo kuh in lahfwekihn Nguhn Muhtahl?” (Alma 39:5). Kuht tiac kuh inn kahingkihn mwacta ke kuht tahfonglac uh.

Ahkkahlwemye ma pwacye, lwelah muhkwena luhn kuh se in oswe tuhlihk sikyak sin mukul tuhma muhtwacn kiyac suc pahyuckyak suwohs ke masap an. Kuhtwena ma sahyacn ma inge lain masap luhn God. Nikmet puhtatlac nuh ke mwe sruhf koluklacna luhn mwet lokoalok sac, tuh kais sie ma koluk uh enenuh in moliyuck “nwe ke na kom akfalyela ma nukewa pakpuki kom in moli uh” (Mattu 5:26).

Wacngihn ma ma kuhlwacng ac pahkomuhta luhn God ahkkahlwemyeyuck yohk liki na ke auliyak.

Mahnosr, ke pacl ahkkolukyeyuck, kuh in sifacna ahkwoyelah, kuhtuh pacl uh ke kahsruh luhn mwet ono ah. Fin ma koluk kac uh ma luhlahp, tuh, inkaiyacn pacl uh oasr kihnet ma ac ahkacsmakihnye kuht ke ma koluk sacn.

Ke nguhnasr ac siena. Nguhnasr ahkmuhnahsyeyuck ke kuht tahfonglac kuh orek ma koluk. Tuh siena liki mahno suhkawihl lasr uh, ke ohiyacn auliyak uh ahksahfyelah, wacngihn kihnet luhlah ke srihpen Iwaclah luhn Jisus Kraist. Olwelah sac pa mwet se suc auliyak ke ma koluk lal nuhnak muhnahsyeyuck nuh se, ac Leum El fahk muh El tiacna sifil esam (liye D&C 58:42).

Ke kuht sramsram ke pahyuck uh ac moul luhn sucu uh, kwacna tuhkuh nuh in nuhnak uh, “Meac ke ma suc tiacna wi uh?” Kuhtuh mwet uh isuslac ke srihkasrakuh ac tiac kuh in oswe tuhlihk. Kuhtuh sin mwet wo uh kuhnanuclac pahyuck lalos uh ke srihpen kosro luhn mukul tuhma kuh muhtwacn kiyac. Kuhtuh sin mwet sahyac uh tiacna pahyuckyak ac moulkihn moul lolacp nwacsnwacs.

Nwe ohinge, nga usot mwe kahsruh inge: God El Pahpah tuhmasr! Luhngse ac kuhlwacng nuh kwewa ma ahkkahlwemyeyuck ke srihkasrak se ke pahpah wo emet uh ahkyohkyeyuck in El suc pa Pahpah tuhmasr ac God lasr yohk liki mwet suhkawihl uh uh kuh in kahlwem kac. Nuhnuhnkuh Lal uh suwohs; wacngihn sahflahiyacn pahkomuhta Lal; kuh Lal in ahkwoye yohk liki kuhtwena ma luhn facluh sahyac. “Finsrak lasr in Christ fin ma na nu ke moul se inge mukena, na fal mwet uh in pakomutasr yohk liki mwet nukewa” (Sie1 Corinth 15:19).

Ke ohiyacn muhtahl ingena nga orekmakihn kahs tempuhl. Nga liye in nuhnak luhk uh infuckihl in siliyuck ac sie mwe loang ke sie siyacnyacn fuhsr sikuck muhtuhnte we. Akwuck ke tempuhl muhtahl se inge ma yohk liki na sie pahyuck, tuh macruht se inge kuh in siliyuck sin Nguhn Muhtahl luhn Olwelah, ac ma suhmuhslah uh fahkwack muh kuht ac fah eis tron, tohkohsrahi, mura, kuh, facl uh (liye D&C 132:19). Nga liye engan ma tuh oasr kaclos suc eis mwe sang wolacna inge ac orekmakihn ke nwacsnwacs.

Tahmtahel Donna Smith Packer ac nga tuh oasr tu siskacn sie sin sie ke pahyuck apkuhran in sun yac 70. Nuh sin muhtwacn kiyuck, ninac kiyacn tuhlihk nahtuhsr, nga tiac kuh in ahkkahlwemye mwe puhla luhk uh ke kahs. Puhla sac arulacna loal ac tarilacna uh arulacna fokoko tuh nga tu na tiac kuh in ahkkahlwemye. Opi yohk srihpac emet ma kuht eis ke moul inge uh, ac moul tohkoh, pa tuhlihk nahtuhsr ac nuhtin nahtuhlos. Nuh ke fahsr in sahflahiyacn lwen lasr tuhkweni fin facluh, nga tarilacna ke kais se puhlan pacl yohrohl siskuck ac ke olwelah se Leum El acse muh ac wacngihn sahflah kac.

Nga usot mwe lohoh luhk lah Jisus El pa Kraist. Wen nuhtin God moul. El tu ke sifen. Alu seinge. Ke Iwaclah Lal ac ke kuh luhn pristut, sucu uh ma sramtweack fin facluh kuh in tuhkweni mwe tok ma pahtpaht. I waclah se, suc kuh in molikuhtlac kais sie, tiacl lwewlah in oasr kihnet. Kalmac pa tiac elyah lah mac kuht oruh kuh acn oyac kuht oasr kac kuh fuhkah sikyak luhn ma uh, oacna in ke, puhlah koluk, tiac etuh suwohs fuhkah in tuhlweyucklac. Kom taltalahke lwelah Iwaclah luhn Jisus Kraist, ac kwewana ma upac kuh in eklac nuhke ma wolacna ac luhngse ac ma pahtpaht.

Nga sruikihn ke mwe insewowo luhn Leum Jisus Kraist,ke kuh luhn orek fahko, ke kuh luhn ahkwoyelah, ke Iwaclah-Iwaclah se suc kuh in ahknwacsnwacsyelah kwewa tuhn kuh kalar tiac elyah lah fuhkah upaciyac kuh lusac kuh pacl ekahsr kalweniyuck.Iwaclah kuh in eiskomyang in sukohsohk in fahsr na met, nwacsnwacs ac suwohs, in ukwe inkacnek ma kom enenuh in sulaclah nuhke moul.

Nga fahkwack mwe lohuh lah Luem God el mour; lah Jisus pa Kraist, lah Iwaclah el tiacna ipyohk se uh ma nuhke kwewana Alu. Iwaclah el sifacna, ac fin oasr kuhtwena ma ahkfohsyskom kuhtuhpacl ke pacl somlah ma upac kom in esam kac sang Iwaclah in orekma kac. Ac fahahknwacsnwacsyelah, ac kom, oacyacpac El, fah tiac esam ma koluk lom. Ke inen Jisis Kraist, amen